Mata 6
6
Lecekzetene ŋ hejəye metetekw ege
1Yesu a zlepetene, a ŋgaya: «Hune sla aka, mada hune kala taŋtaŋ ca, hune ɗaw ŋ law, ndar hejəye əy sarzahune səkwaw. Cemey, mada hune la ana ebe ŋghe ca, hune kenelem laŋtar mavəday anta ara Cehw ŋkune ma mgba ata uzlaf askwaw. 2Mada hune kevelene səkan ŋ ɗala metetekw ca, hune ɗaw ŋ law, ndar hejəye əy gərehune, ana hejəye ma a ganana gbak gbak ege, əy kalaw, ŋ ujek ma ata rak Gazlavay mala Yahudu ege leŋ ata taf ege səkwaw. Əy law, ana ebe ŋghe ca, əy ɗaw ca, hejəye əy həmanzata. Njenjəwen, sa kazlapahune, a tata ca, əy kélem laŋtar tata aza kəɗaŋ tew. 3Cemey, hwa ca, mada hwa kevelene səkan ŋ ɗala a ra zam ŋkwa ca, ra gula ŋkwa a ɗaw ŋ san səkwaw. 4Ana ebe ŋghe, la taŋtaŋ ŋkwa kaw ɗala a ɗaw ŋ san səkwaw, aya, Cehw ma kegəre səkan maa hwa kalaw, kaw ɗala a kasan səkwaw wese ca, a naŋtarahwaw mavəday anta.»
Lasasərak ata larak Gazlavay
5Yesu a zlepetene zeney, a ŋgaya: «Mada hune karak Gazlavay ca, hune ɗaw ŋ law, ana hejəye ma a ganana gbak gbak ege səkwaw. Əy kaɗawza ŋ rak Gazlavay medeŋedeŋ a ujek ma ata rak Gazlavay leŋ ata lajav taf ege, ndar hejəye vəram əy gəreta. Njenjəwen, sa kazlapahune, a tata ca, əy kélem laŋtar tata aza kəɗaŋ tew. 6Cemey, hwa ca, mada hwa kaɗaw ŋ rak Gazlavay ca, dam ŋ ujek, mpak ma ujek ŋkwa aka, rak Cehw ma a təwse, ata la maa kaw hejəye əy kasan səkwaw, aya, Cehw ma kegəre səkan maa hwa kalaw, kaw ɗala a kasan səkwaw, a naŋtarahwaw mavəday anta.»
7«Mada hune karak Gazlavay ca, hune ɗaw ŋ nja ka ŋ zenza zlap ŋ gas vəram ata səkan ma teŋguleŋ ana hejəye ma kasan Gazlavay səkwaw ege, əy kalaw, səkwaw. Əy deŋza ŋ ha tata ca, Gazlavay a nalamza ma tata mavəday əy kazlap dakala. 8Hune ɗaw ŋ law, ana tata səkwaw, mavəday, səkan maa hune kaɗaw ŋ rak ca, Cehw ŋkune, a kasan tew. 9Ŋghe, mada hune kaɗaw ŋ rak Gazlavay ca, hune zlap ana ebe ŋghe:
Vana ŋcene ma mgba ata uzlaf,
a ɗaw ca, kaw vayay masan ca, hwa Gazlavay ma keweɗ.
10A ɗaw ca, lazam Bay ŋkwa mandaha,
laɗaw ŋkwa mala ata hayak ete ŋghe ana ma mgba ata uzlaf yam.
11Veleney səkan ta zam tete ana maa nene kaɗaw a tambaca.
12Pelzeney gay ŋcene ege aka,
ana maa nene kepelzetene gay mala hejəye ma leney gay ege aka yam.
13Hwa ɗaw ŋ pelzeney aka ŋ nah ŋ laslan ege səkwaw,
cemey, rehzeney aza asa ra Malula.
[Mavəday, lazam Bay, ɓarɓar leŋ ɓardakw ŋ hwa teŋguleŋ ŋkwa, kaw vepey a vepey. Aməyna!]»
14«Cemey, mada hune képelzetene gay mala hejəye ma lahune gay ege aka ca, wese ca, Cehw ŋkune ma mgba ata uzlaf a napalzahune gay ŋkune ege aka yam. 15Mada hune képelzetene gay mala hejəye vedəye ege aka askwaw ca, wese ca, Cehw ŋkune kaw a kanapalzahune gay ŋkune ege aka askwaw yam.»
16«Mada vah maa hune kala sumay ca, hune ɗaw ŋ jejekw ana hejəye ma a ganana gbak gbak ege askwaw. Cemey, a tata ca, əy bawza nje tata ege aza ŋ ghwelzetene ŋ hejəye ca, əy kala sumay. Njenjəwen, sa kazlapahune, ata ca, əy kélem laŋtar tata aza kəɗaŋ tew. 17Cemey, hwa ca, mada hwa kala sumay ca, ban nje ŋkwa aza, tukwaɗ mel aza ata ha ŋkwa, 18ndar hejəye əy ɗaw ŋ san ca, hune kala sumay səkwaw. Cemey, səy Cehw ma kegəre səkan maa hwa kalaw, kaw ɗala a kasan səkwaw, a naŋtarahwaw mavəday anta.»
Laŋcaɗ ma mgba ata uzlaf
19Yesu a zlepetene zeney, a ŋgaya: «Hune ɗaw ŋ nja aka ŋ bec səkan aka ata hayak ete ŋghe ata la maa tepe ege ey gez əy kazamata aza leŋ ata la maa ŋhel ege, əy kagbav ujek ŋ ŋhelata aza səkwaw. 20Cemey, hune bec səkan aka mgba ata uzlaf, ata la maa tepe ege ey gez, əy kanala kula ŋ zamata aza səkwaw, leŋ ata maa ŋhel ege, əy kanala kula ŋ gbav ujek ŋ ŋhelata aza səkwaw. 21Mavəday, ata la maa səkan ma asa ra ŋkwa mbəy a təwse ca, unaf ŋkwa mbəy a təwse yam.»
Leweɗ ey kuzle
22Yesu a zlepetene, a zeney, a ŋgaya: «Nje ŋkwa ca, a keweɗza kusam ŋkwa ana patarla. Mada nje ŋkwa a kegəre la kadak kadak ca, kusam ŋkwa tewtew a keweɗ. 23Cemey, mada nje ŋkwa a kegəre la kadak kadak səkwaw ca, kusam ŋkwa tewtew mbəy ŋ kuzle yam. Ana ebe ŋghe, mada leweɗ ma ŋ hwa mbəy ana kuzle ca, wese ca, kuzle anta a la ɓekɓek.»
Lasəbar Gazlavay ey səlay
24Yesu a zlepetene, a zeney, a ŋgaya: «Ɗala teŋguleŋ kula ŋ letene zlan aza ŋ təwjek ege gbak ca, askwaw, mavəday a nazlap ma dadawar ata wende, a naɗaw wende yam. Askwaw ca, a newenzene ha aka ŋ ma teŋguleŋ, a kenececefza wende səkwaw. Hune kula ŋ səbar Gazlavay leŋ səlay, gbak tata ŋ la anta səkwaw.»
Gazlavay ca, ara mbe ma kaval səkan ege tewtew
25Yesu a zlepetene, a zeney, a ŋgaya: «Mavəday anta, sa kazlapahune, hune ɗaw ŋ ŋga ŋkwaɓ ata lanja ŋkune ege səkwaw, ata səkan ta zam səkwaw, akwaw ca, ata səkan ma ata sa səkwaw leŋ ata rəgwac ma ata ca ata kusam səkwaw. Ayaw, səkan ta zam ca, pa ma day aha lanja ŋkune ege vaw? A zeney, rəgwac ca, pa ma day aha kusam ŋkune vaw? 26Hune sarzata vəgem ege may, əy kazləka səkan askwaw, əy kepet səkan askwaw, əy keɓec səkan aka ŋ tərgwa tata askwaw. Cemey, Cehw ŋkune ma mgba ata uzlaf a kezemetene səkan! Hune ca, hune pa ma day aha vəgem ege səkwaw vaw! 27Ɗala ŋ taba ŋkune ma kula aza ŋ ŋcakwza vah anta a tama ŋ laŋga ŋkwaɓ anta, kaw a wan teŋguleŋ ca, vayay?»
28«Ayaw, hune ŋga ŋkwaɓ ata rəgwac ca, ŋ vay? Hune sarzata fafan ege ma kala ata damaw may, kaw əy kala zlan askwaw, kaw əy kaja rəgwac, askwaw. 29Cemey, sa kazlapahune, kaw Suleymanu a laŋcaɗ anta tewtew ca, kaw kélem rəgwac ma tuwah ana fafan teŋguleŋ ŋ taba fafan anta ege ca, askwaw. 30Gazlavay a law, ndar ŋkusaf a fafan a tambaca, aya, a mpat anta ca, əy nahza aza ŋ kwahwaw. Mada ana ebe ŋghe ca, Gazlavay a kanacahune rəgwac ŋ hune hejəye maa lalam ŋkune parham ŋghe ege, day aha ŋkusaf anta, səkwaw vaw? 31Hune ɗaw ŋ ŋga ŋkwaɓ, huney: “Nene nazam vemey?” “Nene nasa vemey?” Askwaw ca, “Nene naca ata kusam vemey?” səkwaw. 32Hejəye ma kasan Gazlavay ege səkwaw ca, əy kampam səkan ŋghe anta ege tewtew, ata pes ata pes. Cemey, Cehw ŋkune ma mgba ata uzlaf ca, a kasanaw, səkan ŋghe anta ege tewtew ca, hune kaɗawata. 33Hune mpam mampar anta ca, Lazam bay mala Gazlavay leŋ hune la səkan ana maa a kaɗaw, a dəwze anta ca, a navalahune səkan vedəye tewtew zeney. 34Ana ebe ŋghe, hune ɗaw ŋ ŋga ŋkwaɓ ata vah ma a mpat a tama səkwaw, mavəday vah ma a mpat anta ca, ara mbe ma kanaŋga ŋkwaɓ ata ha anta. Vah kaw vekey ca, gef anta ga ŋ mbe.»
ទើបបានជ្រើសរើសហើយ៖
Mata 6: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
