Luka 5
5
Yesu a yahata madarlaŋw anta ma mpar ege
1A pes wende aka, Yesu kédeŋeye a ma ŋtele Genesaret. Hejəye əy kéɓecha vəram ara mbe, əy kaŋgwaŋgwat kusam ŋ zləme zlap mala Gazlavay. 2Aya, a gəre kwambawal ege gbak a ma ŋtele wese. Hejəye ma mbal ŋkəlef ege, əy tadakwha aka ŋ kwambawal ege wese, əy kayaɓ taba tata ege. 3Cemey, kwambawal wende ca, ara mala Səymawn. A tev ŋma, aya a zlepene ŋ Səymawn anta ŋ zenza kwambawal anta wese kəɗa a mazlam yam cekuɗe. A təwse ca, a nja ka ŋ kwambawal anta, a kasasərakzata hejəye vəram.
4A dəwze maa káŋtakwza aza ŋ ghwal zlap mala Gazlavay ca, a zlepene ŋ Səymawn, a ŋgaya: «Zenza kwambawal kəɗe ata la yam ma pəɗem. Hune cata taba ŋkune ege ŋ yam ŋ mbalaha ŋkəlef.» 5A təwse ca, Səymawn a zenene, a ŋgaya: «Bay ŋcene, nene kála zlan zaɗaw zaɗaw, kaw nene kélemha səkan askwaw. Cemey, mavəday maa hwa zlepekey ŋghe ca, sa nacata taba anta ege ŋ yam anta.»
6Aya, əy cata taba tata ege wese ŋ yam, kəɗe ca, dəmbaɗ əy zlaɗaha ŋkəlef dakala mambaza. Taba tata ege wese əy kamar ŋ slah tata mavəday ŋkəlef anta dəydey mambaza. 7A təwse ca, əy vetata hejəye tata ege ma ŋ kwambawal wende wese, ŋ ndaha ŋ cekzetene. Aya, hejəye wese ege əy ndaha, əy ghefzata kwambawal ege wese gbak tata a ŋkəlef dəydey mambaza, ha kwambawal anta ege əy kadam tata uza asa yam. 8Aya, maa Səymawn Pəyer a gəre səkan ma laha ana ebe ŋghe wese ca, a gəleɓ a tama Yesu, a zlepene, a ŋgaya: «Kes ŋkwa a həzlar sa, Bay Madakal, mavəday sa ca, sa ɗala ma kala gay!» 9Ata Səymawn anta ey hejəye anta ege wese ca, əy kálalak tata, mavəday ŋkəlef maa əy mbalaha dakala wese. 10Ata Yakuba ey Yuhana, uzəye Zebede ege maa əy kala zlan tewtew ata Səymawn wese, əy kálalak tata yam. Aya, Yesu a zlepene ŋ Səymawn, a ŋgaya: «Hwa lalak səkwaw, mar aka na ŋgha ca, hwa neɓecata hejəye ŋ səberekey.» 11A təwse ca, zen əy zenata kwambawal tata ege wese aza a mazlam yam, yak əy yakzata səkan tata ege ka tewtew, aya, tel əy səbar Yesu.
Yesu a rehza ɗala maa fagwalakw a heɗe aza
12A pes wende aka, Yesu mbəy a uzam wende. Ɗala maa fagwalakw kégeyzene kusam aza tewtew, a ndaha a təwse. Heje anta a gəre Yesu ca, kuraɓ a ndav a tama anta, mananakw dac ata hayak. A təwse ca, a rakaw, a ŋgaya: «Bay Madakal, mada hwa kaɗaw ca, hwa kula ŋ rehzekey aza ŋ fagwalakw naka ŋgha, ŋ benekey aza!» 13A təwse ca, Yesu a kafza ra anta, a ca a heɗe, a zlepene, a ŋgaya: «Sa kaɗawaw, saɗ ŋkwa ŋ fagwalakw ŋkwa, baw ŋkwa ŋ ɗala mabanaban!» A təwse a təwse, fagwalakw ma ata heje wese, saɗ a saɗ anta. 14Aya, Yesu a ŋgazaw, a zlepene, a ŋgaya: «Hwa ɗaw ŋ ghwalza səkan maa sa lahwaw ŋgha anta ŋ kaw vayay səkwaw. Cemey, nda ghwalza ha ŋkwa a tama mala kwakwas. A dəwze anta ca, hwa valza səkan ma ata la kwakwas ana ma maŋkanaŋkan mala Musa, ndar hejəye əy san ca, fagwalakw ŋkwa kásaɗ anta.» 15A təwse ca, hejəye əy kavas ŋ ya zlam Yesu a tama a tama ata səkan maa a kalata ege. Aya, hejəye vəram əy ndaha ara mbe ŋ zləme zlap anta leŋ ŋ lem lereh ŋ dawar tata ege. 16Cemey, a mbe anta tewtew ca, Yesu káyakzata aka, kánda anta teŋguleŋ anta ata la maa hejəye əy a təwse askwaw, a karak Gazlavay.
Yesu a rehza ɗala ma halɓaya aza
17A pes wende aka, Yesu a kasasərakzata hejəye. Farəysa ege ey maghwal ma maŋkanaŋkan ege əy kénjeye a həzlar. Əy ndaha aka ta ŋ uzam ege vedəye vedəye ma ŋ hayak Galəyləy, ŋ Yahudəya leŋ ma ŋ Urusaləyma. Cemey, ɓarɓar mala Gazlavay Madakal mbəy a mbe ŋ rehzata hejəye ma kadawar ege aza. 18Aya, hejəye vedəye aka, əy ndaha, əy tewaha ɗala ma halɓaya ata lambaŋ anta. Əy mpam taf ŋ damza ŋ ujek maa Yesu mbəy ŋma, ŋ wanza aka a tama anta. 19A təwse ca, əy kélem taf ŋ hwas ara Yesu askwaw, mavəday hejəye dəydey. Aya, əy tev zlaɓa heje ma halɓaya wese mgba ata ha ujek, əy gbav uley, amba əy lem taf, əy tadakwza ata lambaŋ anta ŋ taba hejəye a tama Yesu. 20Aya, maa Yesu a gəre lalam tata ca, a zlepene ŋ heje ma halɓaya wese, a ŋgaya: «Ŋgama naka, gay ŋkwa ege əy képeleye aza.»
21A təwse ca, Maghwal ma maŋkanaŋkan ege ey Farəysa ege, maa əy zləme ma ŋghe ege ca, əy ulakza, əy zlap, əy ŋgaya: «Heje ma ca ha anta aza ana Gazlavay ŋgha ca, ara heje vayay? Ɗala ma kula ŋ pal gay mala hejəye ca, vayay? Səy Gazlavay teŋguleŋ anta ma kula!» 22Cemey, Yesu a kasan ledeŋ ŋkwaɓ tata ege, aya, a ɗawzata, a ŋgaya: «Hune deŋ ŋkwaɓ ana ebe ŋghe ca, ŋ vay? 23Sa kula ŋ zlap aza: “Gay ŋkwa ege əy képeleye aza”, akwaw ca: “Gwarzam, nda”. Ŋ taba zlap ŋghe ege ca, ma ma kenelekey aza ndeɓndeɓ ŋ zlap ca, vekey? 24Cemey, sa kaɗaw ca, hune san ka, sa, sa Mba Ɗala, sa mbəy a ɓardakw ma ata pal gay hejəye ma ŋ manhayak ege.» A təwse ca, a zlepene ŋ heje ma halɓaya wese, a ŋgaya: «Sa ma kazlapahwaw, gwarzam, ŋta lambaŋ ŋkwa, nda a wata!»
25A təwse a təwse, heje wese perce a gwarzam ata nje hejəye tewtew. Aya, kpaŋ a ŋta lambaŋ anta maa əy tewaza a heɗe wese, tel a nda anta a wata, a kahəmanza Gazlavay ara. 26Hejəye wese ege tewtew əy kedeŋ ŋkwaɓ dakala mambaza, əy həmanza Gazlavay. A təwse ca, ŋgəzleŋ kájata aza dakala, əy zlap, əy ŋgaya: «Nja ŋtakwaw, kaw heje kegəre ŋseŋ səkan maa heje gəre a tambaca ŋgha, askwaw.»
Yesu a yaɓa Lewəy ŋ səbaraw
27A dəwze maa Yesu a la zaɓəla ŋgha aza ca, a damha aza a bəza, kəɗe a sar la ca, a gəre ɗala ma cak budaw wende aka, zlam anta Lewəy, kénjeye ŋ ujek ma ata cak budaw. Aya, a zlepene, a ŋgaya: «Səberekey.» 28A təwse ca, Lewəy wese perce, a gwarzam, yak a yakzata səkan ege aka tewtew, a səbaraw.
29A dəwze anta ca, Lewəy wese, a jene gwaygwaya ma dakal a səkan ta zam dakala a wata anta. Hejəye macak budaw ege vedəye vəram leŋ hejəye vedəye yam əy zam uda anta tata tewtew tata ŋ la anta. 30Kəɗe ca, Farəysa ege ey maghwal ma maŋkanaŋkan ege ca, əy kaŋgwaŋgwar, əy zlepetene ŋ madarlaŋw Yesu ege, əy ŋgaya: «Hune zam uda leŋ hune sa səkan ŋ la anta ata hejəye macak budaw ege leŋ hejəye mala gay ege ca, ŋ vay?» 31A təwse ca, Yesu a zenzetene, a ŋgaya: «Hejəye ma werwer ege ca, ma tata a ɗala ma val menjevek ma ata reh hejəye ca, askwaw. Cemey, ma kaɗaw ma anta ca, hejəye ma kadawar ege. 32Hejəye ma əy kedeŋza ŋ ha tata ege, tata ca, hejəye ma taŋtaŋ ege a tama Gazlavay ca, Gazlavay kéleɓekey ŋ yahata askwaw. Cemey, a leɓekey ca, ŋ yahata hejəye ma kala gay ege, ndar əy ja mbahw, əy bawza lanja tata ege aza.»
Laɗaw ata sumay
33Farəysa ege wese, əy zlepene ŋ Yesu, əy ŋgaya: «Madarlaŋw Yuhana ege, ata vah vedəye ca, əy kala sumay, əy karak Gazlavay. A zeney, madarlaŋw ŋcene ege ca, əy kalaw, andəwse yam. Ca, a madarlaŋw ŋkwa ege ca, əy kazam səkan, əy kasa səkan war ca, ŋ vay?» 34Aya, Yesu a zenetene a laslaŋgal ma, a ŋgaya: «Ata vah gwaygwaya ma ata ca dəma ca, hune kula ŋ letene kulakw ŋ hejəye mayaya ege ŋ la sumay, mada mawal dəma anta mbəy ara tata kwagwa vaw? 35Cemey, vah maa əy keneŋtetene mawal dəma aza ca, a nandaha. Aya, ata vah anta ca, əy nala sumay.»
Laslaŋgal ma ata səkan mavava ey səkan mewe
36Yesu, a zlepetene a laslaŋgal ma ŋgha, a ŋgaya: «Ɗala kula ŋ slah rəgwac mewe aza ŋ tay rəgwac mavava a mbe səkwaw! Mada a la ende ŋghe ca, rəgwac mewe a nagay anta, maslaga rəgwac mewe anta əy kanajav a rəgwac mavava səkwaw. 37A zeney, ɗala kula ŋ ɗeɗe mavaw ma tak ŋ na ŋ gajak#5.37 Gajak bukəla: Ara kanyakanyaawu a ma pəysar. bukəla ege mavava səkwaw. Mada a la ende ŋghe ca, mavaw ma tak ŋ na wese, a naɓərahwata gajak bukəla mavava ege wese aza. A təwse ca, mavaw anta a nazaha aza ata hayak, aya, gajak bukəla ege wese yam əy nagay tata. 38Cemey, əy ɗeɗe mavaw ma kamar ŋ na ca, ŋ gajak bukəla mewe ege. 39Kaw vayay maa kásaza mavaw manana aza ca, a kaɗaw mavaw ma kamar ŋ na zeney səkwaw, mavəday, əy kazlap, əy ŋgaya: “Mavaw manana ca, pa ma ndəram aha ma tak ŋ na!”»
ទើបបានជ្រើសរើសហើយ៖
Luka 5: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
