Luka 20
20
Ma velene ɓardakw ŋ Yesu ca, vayay?
1A pes wende aka, Yesu a kasasəsarakzata hejəye ŋ ujek kwakwas, a keghwelzetene Ma Mewe ma Taŋtaŋ. Madakal dakal mala kwakwas ege ey maghwal ma maŋkanaŋkan ege zlaɓa hejəye madakal dakal ege ma a tama hejəye əy ndaha, 2əy ɗawza, əy ŋgaya: «Ma zlapahwaw ŋ lata səkan ŋghe anta ege ca, vayay? Ma valahwaw taf ŋ lata ca, vayay?» 3A təwse ca, a zenetene, a ŋgaya: «Sa yam, sa naɗawzahune ma teŋguleŋ, hune zenekey zlap. 4Ma laɓaza Yuhana maban hejəye a yam baptəysma ca, ara vayay? Ara Gazlavay ma laɓaza vaw, hejəye ma laɓaza vaw?»
5Aya, əy zen zlap ŋ taba tata, əy ŋgaya: «Mada heje zenzene: “Ara Gazlavay ma laɓaza,” a nazlapaheje: “Ca, hune lemzene ma Yuhana anta səkwaw ca, ŋ vay?” 6Cemey, mada heje zenzene: “Ara hejəye ma laɓaza,” hejəye tewtew əy nakwapaheje a ŋkəɗaŋ, əy najaheje aza, mavəday əy kálamza Yuhana aza ca, ara mba ma zlap ma mala Gazlavay.» 7Aya, əy zenene, əy ŋgaya: «Nene kasan ɗala ma laɓaza Yuhana mala baptəysma anta səkwaw.» 8A təwse ca, Yesu a zlepetene, a ŋgaya: «Sa yam, sa kanaghwalzahune ɗala ma velekey taf ŋ la səkan ŋghe anta ege askwaw.»
Laslaŋgal ma ata hejəye dadawar ma kaɗas ege
9A dəwze anta ca, Yesu a zlepetene ŋ hejəye a laslaŋgal ma, a ŋgaya: «Heje wende aka, la anta aka, káŋgaɓ mpe mavaw aka ŋma. A valza la anta ka asa ra hejəye ŋ ɗasaw, tel a nda anta ŋ ŋcəwerha, a nja a təwse walaŋ dakala. 10Maa vah ma ata mbal mba mpe mavaw ege wese kála anta ca, a laɓza mala zlan anta wende ara maɗas ege wese ŋ lemene mba mpe magəva anta. Cemey, gazl əy gazl ka, əy gamaw, kaw əy kévelene səkan ara askwaw. 11Aya, heje la wese a laɓza mala zlan anta wende zeney, gazl gazl əy gazl ka war, əy raɓa, əy gamaw, kaw əy kévelene səkan ara askwaw. 12Aya, a laɓaza mala zlan anta wende mamahkaɗ anta zeney, mbe yam, ha əy cene mbəlah ka ata kusam, amba əy nahaza a bəza.»
13«A təwse ca, heje la mpe mavaw wese, a zlap, a ŋgaya: “Sa nalaɓa na ŋgha ca, vaŋgay? Sa nalaɓza mba naka maa sa kaɗaw mambaza, mbe ca, əy netehzene zlam.” Aya, a dəwze anta ca, a laɓza mba anta wese. 14Cemey, maa maɗas ege əy gəre mba anta wese, a kandaha ca, əy zlap ŋ taba tata, əy ŋgaya: “Heje ŋghe ca, ara mazam ujek, ŋ jakwaw aza, ndar la a njaheje ka ŋ heje.” 15Aya, maa mba wese a hwasha aza ca, əy njew aza kəɗa ŋ bəza la mpe mavaw wese, əy jaza.»
Cemey, Yesu a ɗawzata hejəye ma a təwse ege, a ŋgaya: «Na ŋgha ca, heje la anta a neletene ŋ maɗas ege wese vemey? 16Ayaw, sa kazlapahune, heje la anta a nandaha, a najata aza, a navalza la mpe mavaw anta wese aka asa ra hejəye matakan ege.» Maa hejəye əy zləme zlap Yesu wese ca, əy ŋgaya: «Kaw a ɗaw ŋ laha ana ebe ŋghe səkwaw!» 17Cemey, a sarzata kadak kadak, a zlepetene, a ŋgaya: «Mada hune kaɗaw a laha ana ebe ŋghe səkwaw ca, ma Gazlavay meŋtereŋter ŋ ɗerewel anta, a ŋgaya:
“Ŋkəɗaŋ maa malam ujek ege
əy nahza aza ata zlaŋgal wese ca,
kábaw anta ŋ ŋkəɗaŋ ma pa ma tuwah aha vedəye,”
ma ŋgha anta ca, a ɗaw ŋ zlap ca, vaŋgay? 18Kaw vayay ma ndav ata ŋkəɗaŋ ŋgha anta ca, a nebərezene kusam anta aza. Mada ŋkəɗaŋ anta a nah ata ɗala ca, a nemeskweɗ ka.» 19Ayaw, maghwal ma maŋkanaŋkan ege ey madakal dakal mala kwakwas ege wese, əy kasan Yesu a zlap a laslaŋgal ma ŋghe anta ca, ata tata. Əy ɗaw ŋ mbal a təwse a təwse, cemey, əy kálalak tata ata hejəye.
Lacak budaw ŋ bay Rawma
20Aya, maghwal ma maŋkanaŋkan ege ey madakal dakal mala kwakwas ege, əy mar ŋ həbar Yesu ŋ zlap anta ege. Əy laɓzata hejəye ara mbe ŋ həbar zlap ege ma ŋ pakam anta. Hejəye anta ege əy ca ha tata ege ka ana tata hejəye ma taŋtaŋ ege. Əy ndaha ara Yesu a werwer tata ŋ zləme ma maa a kanagayaha ege ŋ zlap anta ege, ndar əy lem taf ŋ valza ŋ mambal hayak ma mbəy zlaɓa ɓarɓar ata hejəye. 21Əy ɗawza, əy ŋgaya: «Madakal, nene kasan ca, ma maa hwa kazlapata ey maa hwa kaghwalzata ŋghe ege tewtew ca, əy a heɗe a heɗe. Hwa kasarzata hejəye tewtew tata, tata ma teŋguleŋ a tama ŋkwa. A zeney, hwa kasasərakzata hejəye ŋ nja ana maa Gazlavay a kaɗaw njenjəwen. 22Ana ebe ŋghe, zlepeney, ma maŋkanaŋkan ŋcene ca, a kapal taf ŋ cekene budaw ŋ bay hayak Rawma vaw, askwaw vaw?»
23Cemey, Yesu kásan werwer tata aza, aya, a zlepetene, a ŋgaya: 24«Hune ghwelzekey səlay anta teŋguleŋ may! Tama ma a heɗe ŋghe ca, a vayay? Zlam ma kéŋtereye a heɗe ŋghe ca, a vecey?» A təwse, əy zenene, əy ŋgaya: «Mala bay Rawma.» 25Aya, Yesu a zenetene, a ŋgaya: «Mada ana ebe ŋghe ca, səkan mala bay Rawma, hune velene ŋ bay Rawma, səkan mala Gazlavay, hune velene ŋ Gazlavay.» 26A təwse ca, kaw əy kélem ma ma ata mbalaw, ŋ zlap anta ege wese tewtew askwaw. Cemey, maa Yesu a zenetene ana ebe ŋghe wese ca, əy kédeŋ ŋkwaɓ dakala ata ma anta, aya, əy nja ka tete.
Laɗaw ata lagwarzamha hejəye ata lamac
27Aya, hejəye vedəye ŋ taba Sadukəy ege, əy ndaha mbermber ara Yesu. Ara hejəye ma kedeŋza ca, hejəye mamacamac ege ca, əy kanagwarzamha aza ata lamac tata askwaw. Əy ɗawza, əy ŋgaya: 28«Madakal, Musa kéŋterene ka a ma maŋkanaŋkan, zlezle a ŋgaya: “Mada ɗala maa zlaŋgan káca wala aza aka, mada zlaŋgan anta kámac anta, kaw əy kámbawha uzəye a wala anta askwaw ca, səy zlaŋgan wese maŋta wala mce wese, ndar əy mbewene uzəye ŋ zlaŋgan ma mac anta wese.” 29Ayaw, hejəye vedəye aka, əy ata zlaŋgan tata, tata ŋsəleɗ. Zlaŋgan tata ma dakal káca wala, kámac anta, kaw əy kámbawha uzəye a wala anta askwaw. 30Zlaŋgan magbak anta a ŋta wala mce wese, a caw, mac a mac anta, kaw əy kámbawha uzəye askwaw yam. 31A dəwze anta, zlaŋgan tata mamahkaɗ tata, a ŋta wala wese zeney, mac a mac anta, kaw əy kámbawha askwaw war. Ana ebe ŋghe, tata ŋsəleɗ tata, əy káca wala wese aza, əy kámac tata ŋsəleɗ tata, kaw əy kámbawha uzəye a mbe askwaw. 32A dəwze tata ca, wala wese mac a mac anta yam. 33Cemey, ana ebe ŋghe ca, a pes maa hejəye əy kanagwarzamha aza ata lamac ca, wala ŋgha anta a nala ŋ wala eze a vecey? Mavəday, tata ŋsəleɗ tata tewtew əy káŋta aza ŋ wala.»
34Yesu a zenetene, a ŋgaya: «A manhayak ŋgha ca, mawal ege əy kaŋta weləye, weləye əy kaŋta mawal ege. 35Cemey, a dəwze lamac ca, mawal ege ey weləye maa Gazlavay a sarzata tata tete ŋ gwarzamha aza ata lamac leŋ ŋ lem lanja ma kaŋtakw səkwaw ca, mawal a kanaŋta wala askwaw, weləye əy kanaŋta mawal askwaw. 36A təwse ca, əy kanamac zeney askwaw, əy nanja ana malaɓ mala Gazlavay ege. Əy kála tata ŋ uzəye Gazlavay ege, mavəday əy kágwarzamha aza ata lamac tata.»
37«Cemey, Musa kázlap zlezle njenjəwen, hejəye mamacamac ege əy nagwarzamha aza ata lamac tata. Maa Musa a kaslap labara mala kwahwaw ma kaŋkəɗaw ŋ daba jəkeɗ ca, a yaɓa Gazlavay Madakal a “Gazlavay mala Əybərahəyma, Gazlavay mala Əysəyaku leŋ Gazlavay mala Yakubu.”» 38A zeney, Yesu a ŋgaya: «Ara Gazlavay ca, hejəye mamacamac ege ey hejəye ma a nje ege ca, tata tewtew tata ca, əy a nje, mavəday, Gazlavay ca, ara Gazlavay mala hejəye mamacamac ege səkwaw, cemey, ara Gazlavay mala hejəye ma a nje ege.» 39A təwse ca, maghwal ma maŋkanaŋkan ege vedəye əy zlepene ŋ Yesu, əy ŋgaya: «Madakal, hwa zlapaha a heɗe a heɗe.» 40Aya, hejəye əy kalalak tata ŋ ɗawza ata ma vedəye zeney.
Almasəyhu ara Madakal Dawuda ca, vaŋgay?
41A təwse ca, Yesu a ɗawzata hejəye, a ŋgaya: «Hejəye əy nasan ŋ zlap Almasəyhu, ɗala maa Gazlavay a laɓaza ŋ rehzata hejəye ca, ara mba dəmas Dawuda ca, vaŋgay? 42Cemey, Dawuda a ha anta a zlap ŋ ɗerewel Jabura, a ŋgaya:
“Gazlavay Madakal a zlepene ŋ Bay Madakal naka, a ŋgaya:
Ndaha, nja ka ata ra zam naka, ndar mama zam bay ata hejəye,
43ha hwas ata pes maa sa macata hejəye ma kaɗaw ŋ gərehwaw ata nje səkwaw ege aza, asa ŋgas ŋkwa.”
44Cemey, mada Dawuda a yaɓa Almasəyhu a “Bay Madakal” ca, Almasəyhu anta a nasan ŋ la ŋ mba dəmas Dawuda zeney ca, vaŋgay?»
Yesu a ŋgazata madarlaŋw anta ege ŋ sla ka ata maghwal ma maŋkanaŋkan ege
45Aya, maa hejəye tewtew əy ketehzene zlam ŋ Yesu ca, a zlepetene ŋ madarlaŋw anta ege, a ŋgaya: 46«Hune sla ka ata maghwal ma maŋkanaŋkan ege, ma kaɗaw ŋ tawar a rəgwac ma cap ata kusam ege. Əy ɗaw hejəye əy zlepzetene a lawan ha ata lanja ma ŋ hubakw. Ŋ ujek ma ata rak Gazlavay ca, əy may lanja ma taŋtaŋ ege a tama. A pes ma ata zam uda gwaygwaya ca, əy may lanja ma mpar a tama. 47A zeney, əy kepəresletene səkan mala weləye mce ege aza tewtew, cemey, mada əy karak Gazlavay ca, əy nja səpek ata larak anta ndar hejəye əy zlap ca, tata hejəye ma taŋtaŋ ege. Mavəday anta, Gazlavay, a nesetene gef pa ma day aha hejəye vedəye.»
ទើបបានជ្រើសរើសហើយ៖
Luka 20: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
