Luka 2
2
Lambaw Yesu
1Ata vah maa əy mbawaza Yuhana aza ca, bay Agustus mala hayak Rawma, kágwarzamha ma ma ata ŋter zlam hejəye ma ŋ hayak anta ege tewtew. 2Ara leŋter zlam ma mpar ŋ hayak Rawma. Leŋter zlam anta ca, a laha ata vah maa Kəyrəynəyus, ara bay mala hayak Səyrəya. 3Hejəye tewtew əy kánda ŋ ŋterha zlam kaw vayay ŋ uzam maa cen a mbawha ŋma. 4Aya, Yusufu a gwarzam ŋ uzam Nasaratu ŋ hayak Galəyləy, a nda ŋ uzam Baytəylama ŋ hayak Yahudəya, ata la maa Dawuda a mbawha, mavəday Yusufu ca, ara ŋseŋ Dawuda. 5Maa a nda a təwse ca, a nda zlaɓa səbe anta Marəyama ŋ ŋterha zlam tata ege. Marəyama anta ca, mbəy a dəmas.
6Aya, maa əy ŋ Baytəylama ca, pes Marəyama ma ata mbaw hwas. 7A mbawha Gwenje anta. A dap ka a rəgwac, a wanza ka ata lazam səkan ma ŋ bezle ege, mavəday əy kélem la a ujek ma ata wan mbəlakw ege askwaw.
Malaɓ mala Gazlavay a ndaha ara uzəye njəwen ege
8Ŋ hayak anta a təwse ca, uzəye njəwen ege aka, əy kénjeye ata damaw ŋ həbar ŋtəməye tata ege a zaɗaw. 9Aya, kəɗe ca, əy gəre malaɓ mala Gazlavay kédeŋeye a həzlar tata. Ɓardakw mala Bay Madakal a weɗ la ata tata. A təwse ca, lalak əy lalak tata dakala mambaza. 10Cemey, malaɓ wese a zlepetene, a ŋgaya: «Hune lalak səkwaw, mavəday sa ndaha ca, sa dahune labara ma taŋtaŋ ma kanasasamzata hejəye tewtew dakala. 11A zaɗaw ŋgha, ɗala ma kenerehzata hejəye, kámbawaha aza ŋ uzam maa bay Dawuda a mbawha zlezle a təwse. Ara Almasəyhu, Bay Madakal. 12Ŋghe səkan ma kanaghwalzahune ŋ san mba anta. Hune nendewzene a mba kédepeye a rəgwac, kéweneye ata lazam səkan ma kadamha ŋ bezle ege.»
13A təwse a təwse, malaɓ mala Gazlavay ma mgba ata uzlaf ege vedəye vəram əy ndaha, əy təwlek malaɓ mala Gazlavay wese. Əy kahəmanza Gazlavay, əy ŋgaya:
14«A ɗaw ca, hejəye mahəmanza Gazlavay ma mgba ata uzlaf,
a zeney, a ɗaw ca, zəhay anta mandaha ata hayak ata hejəye maa a kaɗawata ege!»
Uzəye njəwen ege əy nda ŋ Baytəylama
15A təwse ca, malaɓ mala Gazlavay ege wese, əy yakzata aka, əy zen tata mgba ata uzlaf. Aya, uzəye njəwen ege əy zlap ŋ taba tata, əy ŋgaya: «Kazakwaw hwas ŋ Baytəylama ŋ saraza səkan ma laha maa Gazlavay, Bay Madakal a ghwalzaheje wese.» 16Əy nda kəcaŋ a təwse. Əy ndewzetene ŋ ata Marəyama ey Yusufu leŋ mba kéweneye ata lazam səkan ma ŋ bezle ege. 17Aya, maa əy gəre mba anta ca, əy kaslap ma maa malaɓ mala Gazlavay a zlepetene ata mba wese. 18Hejəye tewtew ma zləme ma mala uzəye njəwen ege maa əy slap wese ca, əy kedeŋ ŋkwaɓ ata ma anta, kaw əy kasan səkan maa əy kanala səkwaw. 19Cemey, a Marəyama ca, kámbal ma anta ka a unaf anta, a kedeŋza kaw vepey. 20Aya, uzəye njəwen ege wese, əy zen tata ara ŋtəməye tata ege, əy kahəmanza Gazlavay ara ata səkan ege maa əy zləmeta ey maa əy gəreta, mavəday səkan anta ege tewtew ca, əy laha ana maa malaɓ mala Gazlavay a zlepetene wese.
Əy cene zlam ŋ Yesu
21Aya, wan majamahkaɗ anta, a dəwze maa mba a mbawha aza ca, ara pes ma ata zlene mandulay aza, a pes wese, əy cene zlam anta Yesu ana maa malaɓ mala Gazlavay a ghwelzene a Marəyama mar a nala a dəmas wese.
22A dəwze anta ca, vah maa ata Yusufu ey Marəyama ma ata la kwakwas ma ata ban ha tata ege aza a tama Gazlavay ana maa ma maŋkanaŋkan mala Musa a kaɗaw a hwasha. A təwse ca, əy jeɓza mba tata ŋ ujek kwakwas ŋ Urusaləyma ŋ ghwelzene ŋ Bay Madakal. 23Cemey, kéŋtereye ŋ ma maŋkanaŋkan mala Bay Madakal, a ŋgaya: «Gwenje mba mawal mala kaw vayay ca, mala Bay Madakal.» 24Ca, əy ndaha, əy lene kwakwas zeney yam, a magudaguda gbak, askwaw ca, məyɗanak gbak, ana ma maŋkanaŋkan mala Bay Madakal a zlap.
Səymeyawn a həmanza Bay Gazlavay mavəday Yesu
25Aya, heje wende ŋ Urusaləyma aka, zlam anta Səymeyawn. Heje anta a kala səkan a heɗe a heɗe a tama Gazlavay, a kasəbar taf Gazlavay a unaf anta teŋguleŋ. A kahəbar ɗala ma kanandaha ŋ rehzata hejəye Əysərayəyla ege. Zəwet ma keweɗ mbəy a heɗe. 26Zəwet ma keweɗ anta kéghwelzene aza, a ŋgaya, a kanamac askwaw, səy mbəy ma gəre Almasəyhu, ɗala maa Bay Madakal a laɓaza ŋ rehzata hejəye aza, a nje anta. 27A dəwze anta, Zəwet wese a jeɓza Səymeyawn a ujek kwakwas, lec maa ata Yusufu ey Marəyama əy daza Yesu a ujek wese ndar əy lene kwakwas ana maa ma maŋkanaŋkan a zlap. 28Aya, Səymeyawn a gəre mba wese, a ŋta asa ra anta, a lene wasay ŋ Gazlavay, a ŋgaya:
29«Bay Madakal, hwa kála səkan maa hwa zlap wese aza na ŋgha kəɗaŋ.
Hwa kula ŋ yakza mala zlan ŋkwa ka mamac a zəhay.
30Mavəday a nje naka, sa kégəre lereh ŋkwa aza,
31lereh maa hwa slaza ka a tama hejəye ŋkwa ege tewtew.
32Ara leweɗ ma kanaghwalza ha ŋkwa ŋ hejəye ma ŋ manhayak ege tewtew
leŋ a neveletene ɓardakw ŋ hejəye Əysərayəyla ŋkwa ege.»
33Ata cen Yesu ey maman, əy kédeŋ ŋkwaɓ dakala ata ma maa Səymeyawn a zlap ata mba anta. 34Aya, Səymeyawn wese, a bəzletene. A dəwze anta ca, a zlepene ŋ Marəyama, man Yesu wese, a ŋgaya: «Gazlavay a may mba ŋgha ca, ndar hejəye Əysərayəyla ege vəram əy ndav ŋ gay, aya, hejəye vedəye yam, əy nereh tata mavəday anta. Mbe ca, ara ɗala ma keneghwelzetene ŋ hejəye ca, ara Gazlavay ma kaɗaw ŋ rehzata aza ŋ gay tata ege, cemey, əy kanaɗaw ma anta səkwaw. 35Cemey, a naghwalaza ledeŋ ŋkwaɓ hejəye vəram maɓahaɓah ŋ unaf tata ege a bəza. Hwa maman anta yam, lambal ma anta a nazlahwaw a unaf ŋkwa ana ŋgezle masalam.»
Ana a lene wasay ŋ Gazlavay
36Mba ma zlap ma mala Gazlavay wende aka, ara wala, zlam anta Ana. Mbe ca, ara həla Fanuwel, ŋseŋ Aser. Mbəy msəra dəydey. Cemey, maa mbəy dalay ca, káŋta mawal, əy kánja a mbe va ŋsəleɗ. 37Aya, maa mawal anta a mecene aza ca, kénjeye, kaw káŋta mawal wende askwaw. Va anta kála anta rajamahkaɗ aha ŋfaɗ. Mbəy ata pes ata pes a ujek kwakwas, a kelene zlan ŋ Gazlavay pes ey zaɗaw kaw vepey, a kala sumay, a karak Gazlavay. 38A ndaha lec maa Səymeyawn káŋtakwza zlap anta aza, a lene wasay ŋ Gazlavay. A dəwze anta, a zlepetene ma mba anta ŋ hejəye tewtew ma kahəbar lereh maa Gazlavay a nerehzata hejəye aza ŋ Urusaləyma. 39A dəwze maa ata Yusufu ey Marəyama əy kálaza kwakwas aza ana ma maŋkanaŋkan ma mala Bay Madakal a kaɗaw ca, tel əy zen tata zlaɓa mba tata ŋ uzam tata Nasaratu ŋ hayak Galəyləy.
40Mba a kagal, a kelem ɓarɓar, mbəy a kəleŋ dakala. Bəzla Gazlavay mbəy a heɗe.
Yesu mbəy ŋ ujek kwakwas, va anta wam aha gbak
41Ata va kaw vekey ca, ata Yusufu, cen Yesu ey maman Marəyama, əy kanda ŋ ja gwaygwaya Paska ŋ Urusaləyma. 42Maa va Yesu a la anta wam aha gbak ca, əy nda tewtew ana ma a mpat a mpat a təwse ŋ ja gwaygwaya anta. 43Maa gwaygwaya tuwaɗ ca, ata Marəyama ey Yusufu əy zenha aza a wata. Cemey, a mba tata Yesu ca, mbəy mgba ka ŋ Urusaləyma a təwse. Ata cen ey maman əy kasan səkwaw. 44Əy cakza ca, Yesu mbəy ara hejəye maa əy nda tewtew ege. Əy la wan pal ata taf, amba əy mpam ŋ taba van tata ege ey ŋgama tata ege. 45Cemey, əy kéndewzene askwaw. Aya, əy zenha ŋ mpamaw, ŋ Urusaləyma zeney. 46Ata wan mamahkaɗ anta ca, əy ndewzene a mba wese ŋ ujek kwakwas. Kénjeye ŋ taba maghwal ma maŋkanaŋkan ege, a ketehzetene zlam leŋ a keletene laɗaw ege. 47Hejəye ma ketehzene zlam ege tewtew, ŋkwaɓ kéŋgetene aza ata laɗaw anta ege ey lezen zlap anta ege a kəleŋ maa a kezenzetene. 48Aya, maa ata cen ey maman, əy ndewzene aza ca, əy kághar tata dakala a heɗe, aya maman a zlepene, a ŋgaya: «Mba naka, hwa leney ana ebe ŋghe ca, mavəday vemey? Hwa kasan vaw! Nene gbak ŋcene a cehw, nene káŋga ŋkwaɓ aza dakala mambaza ata lampamahwaw.» 49A təwse ca, a zenetene, a ŋgaya: «Hune mpemekey ca, ŋ vay? Hune kasan ca, kulakw, sa nanja ka a ujek Vana səkwaw vaw?» 50Cemey, ma anta a ɗaw ŋ zlap vaŋgay ca, əy kasan səkwaw.
51Aya, ata Yesu zen əy zen tata tewtew ŋ uzam Nasaratu. A təwse ca, a wenzetene ha ka. Cemey, a maman ca, kaw a keheseŋza səkan ma laha ŋghe anta ege tewtew səkwaw, əy ŋ unaf anta. 52Yesu a kagal zlaɓa kəleŋ anta, mbəy tuwah a tama Gazlavay leŋ a tama hejəye.
ទើបបានជ្រើសរើសហើយ៖
Luka 2: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
