Luka 13
13
Zlap ata labaw lanja
1Ata vah wese, hejəye vedəye ma a təwse ege, əy zlepene ŋ Yesu, əy ŋgaya: «Bay Pəylatu kájata hejəye Galəyləy ege aza ata vah maa əy kala kwakwas, maa əy kefetene səkan ŋ Gazlavay. A kəvaɗ mbambaz tata a mbambaz səkan maa əy fatata ege.» 2Yesu a zenetene, a ŋgaya: «Hune deŋza a ha ŋkune ca, əy jata hejəye Galəyləy anta ege aza ana ebe ŋghe ca, mavəday əy kála gay pa ma day aha hejəye Galəyləy ege vedəye ma tewtew ege vaw? 3Sa kazlapahune, kaw askwaw. Cemey, mada hune kábawza lanja ŋkune aza askwaw ca, hune namac tewtew ŋkune ana tata yam. 4Akwaw ca, hune deŋza ata hejəye ma wam aha jamahkaɗ maa ujek malamalam ma jem ma ŋ Səylawam a ghwaramha ata tata wese ca, əy pa ma la gay aha hejəye vedəye ma tewtew ege ma a Urusaləyma vaw? 5Sa kazlapahune, kaw askwaw. Cemey, mada hune kábawza lanja ŋkune aza askwaw ca, hune namac tewtew ŋkune ana tata yam.»
Laslaŋgal ma ata səke ma kambaw səkwaw
6Yesu a zlepetene a laslaŋgal ma zeney, a ŋgaya: «Heje wende aka, mpe səke kádavha ŋ la mpe mavaw anta. A pes wende, a nda ŋ mbalha mba anta ca, kélem a heɗe askwaw. 7Aya, a zlepene a ɗala ma həbar la anta, a ŋgaya: “Ŋghe! Sarza. Va mahkaɗ sa kandaha ŋ mpam mba səke ŋghe, kaw sa kélem askwaw. Razlza! A kemper la ka bəse.” 8Cemey, a zenene, a ŋgaya: “Təwjek naka, yakza ka a vawaca zeney, sa nara la aka a səka dərezl, sa netemzene ŋvarzla. 9Ketegəre a makuɗa ca, a nambawaha ka vaw, mada kámbawaha askwaw zeney ca, hwa razlza.”»
Yesu a rehza wala ma kadawar a pes ma ata zazak
10A pes ma ata zazak wende, Yesu a kasasərakzata hejəye a ujek ma ata rak Gazlavay mala Yahudu ege. 11Wala wende a təwse aka, zəwet malula kámbalza va wam aha jamahkaɗ. Zəwet anta kéhweremene kusam aza, mbəy kula ŋ gar gbar səkwaw. 12Maa Yesu a gəre wala wese ca, a yaɓa, a zlepene, a ŋgaya: «Wala, hwa kéreh ŋkwa ŋ dawar lahwaram ŋkwa.»
13Ca a ca ra ata wala wese, a təwse a təwse, wala wese gbar a gar kadak kadak, a həmanza Gazlavay. 14Cemey, madakal ujek ma ata rak Gazlavay kághwaɗ anta ata Yesu, mavəday maa a rehza ɗala a pes ma ata zazak. Aya, a zlepetene ŋ hejəye, a ŋgaya: «Wan ŋkwah aka ŋ la zlan. Mada hune kaɗaw ŋ reh ŋ dawar ŋkune ege ca, hune ndaha ata vah ŋghe anta ege. Cemey, hune ɗaw ŋ ndaha a pes ma ata zazak səkwaw!»
15Bay Madakal Yesu a zenene, a ŋgaya: «Hune hejəye ma a ganana gbak gbak ŋghe ege, kaw vayay ŋ taba ŋkune a kapal zla anta, askwaw ca, berjeŋ anta ata lazam səkan anta a pes ma ata zazak ŋ jeɓza ŋ sene yam askwaw vaw? 16Wala ŋseŋ dəmas Əybərahəyma ŋghe, mbəy asa ra Sayɗanu, va wam aha jamahkaɗ. Wala ŋghe anta ca, sa pal aza a pes ma ata zazak səkwaw ca, mavəday vemey?» 17A təwse maa a zenetene zlap ana ebe ŋghe ca, hawa kájata hejəye ma kaɗa gham a mbe ege wese aza tewtew. Cemey, hejəye ma a təwse ege tewtew ca, əy kasasam ata səkan ege ma taŋtaŋ ege tewtew maa Yesu a kalata.
Laslaŋgal ma ata mba venjeh
18Aya, Yesu a zlepetene ŋ hejəye zeney, a ŋgaya: «Lazam bay mala Gazlavay ca, a nja ana vemey? Sa kula ŋ slaŋgal aza a vemey? 19Lazam bay mala Gazlavay ca, a nja ana mba venjeh maa ɗala a ŋtaw, a zlak ka ŋ la anta. A təwse, a davha, a gal, a la ŋ mpe ma dakal. Aya, vəgem ege əy ndaha, əy ba ujek tata ege ka ata zləram anta ege.»
Laslaŋgal ma ata əys
20Yesu a zlepetene zeney, a ŋgaya: «Sa kula ŋ slaŋgal Lazam bay mala Gazlavay ata hejəye ca, a vemey? 21A nja ana əys maa wala a ŋta cekuɗe ende ŋghe, a kəvaɗ a ŋfa dakala ma ata da peŋ ŋ hafza tewtew.»
Ladam ŋ Lazam bay mala Gazlavay
22Yesu a nda kəɗa ŋ Urusaləyma. A nda ta ŋ uzam ege leŋ ta ŋ kəva ege, a kasasərakzata hejəye. 23A təwse ca, heje wende a ɗawza Yesu, a ŋgaya: «Bay Madakal, Gazlavay a nerehaha ŋ gay ca, hejəye cekuɗe ende ŋghe vaw?» Aya, a zenetene zlap ŋ hejəye ma a təwse ege tewtew a ŋgaya: 24«Hune tal ŋ dam ta ma ujek ma lez ŋ Lazam bay mala Gazlavay. Njenjəwen sa kazlapahune, hejəye vəram əy nampam taf ŋ dam ŋma, cemey, əy kanala kula ŋ dam səkwaw.»
25«Ayaw, a pes maa heje ujek kágwarzamha aza, kámpak ma ujek anta aza ca, hune ca, hune mba ka a bəza. A təwse, hune naɗaf ma a ma ujek, hune nezlepene, huney: “Bay Madakal, zlerzeney ma ujek!” A nezenahune, a ŋgaya: “Sa kasanahune səkwaw, hune nda aka a katay?” 26Cemey, hune nezenene, huney: “Heje kázam səkan ŋ la anta leŋ heje kása səkan ŋ la anta. Hwa késesərekzeney zlap Gazlavay ata taf ege ma ŋ uzam ŋcene.” 27A nezenahune, a ŋgaya: “Sa kasanahune səkwaw, hune nda aka a katay? Hune kese ŋkune gədak a sa, hune hejəye tewtew ma kala dadawar ege!” 28Cemey, a təwse ca, hune negəreta ata Əybərahəyma, Əysəyaku leŋ Yakubu zlaɓa uzəye ma zlap ma mala Gazlavay ege tewtew ŋ Lazam bay mala Gazlavay. Hune nahan, hune naɓam zləɗeŋ ŋkune ege, mavəday hune ca, hune kéneheye aza a bəza! 29A təwse ca, hejəye əy nandaha aka ta ŋ kəva ege vedəye vedəye ma a manhayak. Aya, əy nanja ŋ Lazam bay mala Gazlavay ŋ ja gwaygwaya. 30Cemey, hejəye ma a tama ma na ŋgha ege, əy nezen tata a dəwze. Hejəye ma a dəwze ma na ŋgha ege, əy nanda tata a tama!»
Yesu mbəy ata taf ma ata nda ŋ Urusaləyma
31Aya, a vah wese ca, Farəysa ege vedəye, əy ndaha ara Yesu, əy zlepene, əy ŋgaya: «Kese ete, nda ŋkwa ata la matakan, mavəday bay Həyrudus a kampamahwaw ŋ jahwaw aza!» 32A zenetene, a ŋgaya: «Hune nda ŋ zlepene ŋ mbəyga#13.32 Mbəyga: Yesu a yaɓa bay Həyrudus a «mbəyga» ca, mavəday ŋ ledeŋ ŋkwaɓ a Yahudu ege ca, mbəyga ca, ara səkan damaw ma werwer dəydey, cemey hejəye əy kalalak a mbe səkwaw mavəday mbəy pəzekw ende. anta ca: “Ŋghe! Sa kagam zəwet malula ege, sa kerehzata hejəye ma kadawar ege a tambaca, a mpat, aya, ata wan mamahkaɗ anta ca, sa namaɗza zlan naka.” 33Ana zlap ca, səy sa səbar taf naka a tambaca, a mpat leŋ a vagumtaɗ. Mavəday mba ma zlap ma mala Gazlavay ca, a kamac ŋ hayak matakan səkwaw, səy a Urusaləyma.»
34A dəwze anta ca, Yesu a ŋgaya: «Hune hejəye ma a Urusaləyma#13.34 Hune hejəye ma a Urusaləyma ege: A zlap ŋghe ege ca, Yesu káhwas ŋ uzam Urusaləyma kwagwa səkwaw, cemey, a zlap ana maa mbəy mbermber a tata. ege! Hune hejəye ma a Urusaləyma ege! Hune kájata uzəye ma zlap ma mala Gazlavay ege aza, hune káŋgwafata uzəye ma zlap ma mala Gazlavay ege a ŋkəɗaŋ. Sa kámpam ŋ ɓecahune a tama naka a gas vəram, ana man gamtak ma keɓecata uzəye anta ege asa papa anta. Cemey, hune káɗaw səkwaw. 35Ayaw, hune zləme ka, Gazlavay a nadaɗ ra anta aza ata ha ŋkune, ujek kwakwas ŋkune a nabaw anta a ŋkef. Cemey, sa kazlapahune, hune kenezen ŋ gərekey zeney askwaw, səy ata vah maa hune kanazlap: “Bəzla Gazlavay manja ata ɗala ma kandaha a zlam Bay Madakal!”»
ទើបបានជ្រើសរើសហើយ៖
Luka 13: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
