Yuhana Ladam
Ladam
Yuhana a ŋteraza Ma Mewe ma Taŋtaŋ anta ca, ŋ lajav hejəye ma lamza ma mala Yesu ege aza, ma ŋ Səyrəya, askwaw ca, ma ŋ Asəya ma pəzekw ma əy kayaɓa, Turkəya na ŋgha. Yuhana ŋteraza ŋ ghwelzetene ŋ hejəye ca, Yesu ca, ara Almasəyhu, Mba Gazlavay. Ana ebe ŋghe, mada əy kálamza aza ca, əy nelem lanja a zlam anta 20.31. Ma Mewe ma Taŋtaŋ maa a ŋteraza ŋgha anta ca, mbəy parpar a vedəye. Yuhana ca, ara madarlaŋw ma Yesu a kaɗaw mambaza 21.20-24. Kégəreta səkan ege maa Yesu a lata ege ata nje anta. Səkan ege vedəye maa a ŋterata ege ca, kaw ɗala a kendewzetene ŋ ɗerewel mala Mata, ŋ ɗerewel mala Markus leŋ ŋ ɗerewel mala Luka, askwaw. Yuhana a ŋterata səkan ma la ege mar aka ata mala Yuhana ma ban hejəye a yam baptəysma ha hwas ata vah maa əy ndar Yesu aza ata mpe gafaŋgal ŋ ɓardakw anta. Yuhana kághwalza Yesu ca, ara zlap mala Gazlavay ma kanja kaw vepey, ara heje dakənak, mbəy a zleykusam, kánja ŋ taba ŋtakwaw 1.14. Yesu kázlap ŋ gas vəram ŋ Ma Mewe ma Taŋtaŋ ŋgha, a ŋgaya: «Sa ca», sa səkan ta zam ma kaval lanja 6.35, sa ca, sa mba njəwen ma taŋtaŋ 10.14, sa ca, sa taf, sa njenjəwen leŋ sa lanja 14.6, sa ndaw mpe ma taŋtaŋ 15.1. A kaghwalza njenjəwen ca, ara Gazlavay, mavəday zlam Bay Madakal ca, ara: «Sa ca, ara sa» Ladamha aza 3.14. Kəva mampar 1.12 a kazlap ata zaɓəla ege parpar parpar ma kaghwalza Yesu ca, ara Mereh heje, ara Mba Gazlavay. Hejəye vedəye əy kálamza ma anta aza, əy kála tata ŋ madarlaŋw anta ege. Hejəye vedəye yam, ha tata ege ɓarɓar, əy kálamza, askwaw. Ata leŋter 13-17, heje nejəŋgekwaw ma ata lajav mala ata Yesu ey madarlaŋw ege ŋ zaɗaw, maa sawje a ndaha ŋ mbalaw. Yesu kézlepetene ma ege vəram, ndar əy sla ka, kéveletene ɓarɓar aza mar a namac. Leŋter mamaɗ ege 18.21 əy kaghwalzaheje maa əy mbal Yesu leŋ maa əy jene guma ma ata jaza ŋ mce ata mpe gafaŋgal, a zeney, maa a gwarzamha aza ata lamac leŋ maa madarlaŋw anta ege əy gəre mbəy a nje.
Lasəbar zlap ege
Lamar zlap 1.1-16
Yesu maban hejəye a yam baptəysma ey madarlaŋw mala Yesu ege mampar ege 1.19-51
Zaɓəla ege mala Yesu ey laghwal zlap anta ege 2-12
Zlap mala Yesu ege ma maɗ ŋ madarlaŋw anta ege 13-17
Lambal Yesu ey gef anta ege leŋ lamac anta 18-19
Lagwarzamha Yesu aza ata lamac leŋ maa a ghweletene kusam ŋ madarlaŋw anta ege 20
Yesu a ghwalha kusam ŋ Galəyləy zeney 21.1-25.
ទើបបានជ្រើសរើសហើយ៖
Yuhana Ladam: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL