Yuhana 5
5
Yesu a rehza ɗala ma halɓaya aza
1A dəwze anta ca, Yahudu ege əy kaja gwaygwaya wende aka, aya, Yesu a nda kəɗa mgba ŋ Urusaləyma. 2Ŋ Urusaləyma anta ca, təker wende mbermber a ma ujek ŋtəməye aka. Əy yaɓa təker anta a ma Əybəranəyŋkaw ege ca, «Baytəyjata», galaɓ ege jaɓan a meɗeɗe aka. 3Asa galaɓ anta ege ca, hejəye ma kadawar ege vəram, əy kéweneye, a səka. Hejəye ulaf ege, gwesleleŋ ege, ey hejəye ma halɓaya ege. [Əy kahəbar yam ŋ həɓal, 4mavəday, ata vah wende ca, malaɓ Bay Madakal a katadakwha ŋ təker anta, a kahəɓalza yam. Aya, ɗala ma kadawar, ma tadakw anta mpar ŋ yam, a dəwze maa káhəɓal anta tew ca, a reh anta ŋ dawar anta, kaw ara ŋseŋ dawar vekey.] 5Heje wende a təwse aka, a kadawar va ramahkaɗ aha jamahkaɗ. 6Maa Yesu a gəre kéweneye ca, a zləme heje anta kánja va vəram ŋ dawar anta, anta, a ɗawza, a ŋgaya: «Hwa kaɗaw ŋ reh vaw?» 7Heje wese a zenene, a ŋgaya: «Bay Madakal, ɗala ma ata nehzekey ŋ təker tete maa yam a kahəɓal, askwaw. Mar sa nasla ka ŋ nda ŋma ca, ɗala wende kánah anta mpar aha sa.» 8Yesu a zlepene, a ŋgaya: «Gwarzam, ŋta lawan ŋkwa, nda!» 9A təwse a təwse, heje wese a reh anta ŋ dawar anta, a ŋta lawan anta, a kanda.
Cemey, pes anta ca, ara pes ma ata zazak mala Yahudu ege. 10Aya, madakal dakal Yahudu ege, əy zlepene ŋ heje ma reh anta wese, əy ŋgaya: «A tambaca ca, ara pes ma ata zazak Yahudu ege, ma maŋkanaŋkan a kapalzahwaw taf ŋ tew lawan ŋkwa, səkwaw.» 11Cemey, a zenetene, a ŋgaya: «Heje ma rehzekey aza, a zlepekey, a ŋgaya: “Ŋta lawan ŋkwa, nda.”» 12Aya, əy ɗawza, əy ŋgaya: «Heje ma zlapahwaw, a ŋgaya: “Ŋta lawan ŋkwa, nda,” anta ca, ara vayay?» 13Cemey, heje ma reh anta wese a kasan heje ma rehza anta səkwaw, mavəday Yesu kéfətek anta ŋ taba hejəye.
14A dəwze anta ca, Yesu a ndewzene ŋ ujek kwakwas, a zlepene, a ŋgaya: «Ŋghe, na ŋgha ca, hwa reh. Hwa ɗaw ŋ la gay zeney səkwaw, ndar səkan ma day aha ebe ŋghe a ɗaw ŋ ndewzahwaw zeney səkwaw!» 15Heje anta a nda, a zlepetene ŋ madakal dakal Yahudu ege, a ŋgaya: «Ara Yesu ma rehzekey.» 16A təwse ca, madakal dakal Yahudu anta ege, əy mar ŋ mpam ŋgwesem asa Yesu, mavəday maa a rehza heje anta a pes ma ata zazak mala Yahudu ege. 17Cemey, Yesu a zenetene, a ŋgaya: «Vana ca, a kala zlan ha na ŋgha, sa yam, sa kala zlan.»
18Mavəday zlap ŋgha wese ca, madakal dakal Yahudu ege, əy vas ŋ mpam taf ma ata ja Yesu aza. Mavəday Yesu ca, a teh zlam səkwaw ca, ata ma maŋkanaŋkan mala pes ma ata zazak gagaha səkwaw, cemey, day zeney ca, a yaɓa Gazlavay ca, Cen. Ana ebe ŋghe ca, a kaslaŋgalza ha anta a Gazlavay.
Ɓarɓar Mba Gazlavay
19Yesu a zlepetene zeney, a ŋgaya: «Njenjəwen, sa kazlapahune, Mba Ɗala, kula ŋ la səkan aza a ha anta ca, askwaw, cemey, səy maa a kegəre, Cen a kalaw. Mavəday səkan maa Cen a kala ca, Mba a law, ana mbe yam. 20Cemey, Cen a kaɗaw Mba anta, a keghwelzene səkan maa a kala ege tewtew. A neghwelzene zlan ma pa ma day aha ebe ŋghe ege zeney, hune naŋga ŋkwaɓ mavəday anta. 21Ana maa Vana a kagwarzamata hejəye aza ata lamac, a keveletene lanja, ana mbe yam, Mbaw, a nevelene lanja ŋ ɗala maa a kaɗaw ŋ velene yam. 22Vana ca, a keghem ɗala, askwaw, cemey, kévelene ɓarɓar ma ata ghem hejəye aka ŋ Mbaw, 23ndar hejəye tewtew, əy həmanza Mbaw, ana maa əy kahəmanza Cen ma laɓaza. Ɗala ma káhəmanza Mbaw, askwaw ca, káhəmanza Cen ma laɓaza, askwaw yam.»
24«Njenjəwen, sa kazlapahune, kaw vayay ma zləme zlap naka, ma lamza ɗala ma leɓekey aza ca, a nelem lanja ma katuwaɗ səkwaw kaw vepey. Guma a kanambalaw, askwaw. Cemey, kázlaŋ anta ata lamac, a nda ata lanja. 25Njenjəwen, sa kazlapahune, vah maa hejəye mamacamac ege əy nezləme ula Mba Gazlavay, a kandaha, kánda aza tew, hejəye ma zləme ege tewtew əy nelem lanja. 26Mavəday lanja ca, mbəy ara Vana, lanja ara Mba aka yam. Ara Cen ma velene lanja anta. 27Kévelene ɓardakw ŋ Mbaw, ŋ ghemata hejəye, mavəday ara Mba Ɗala. 28Hune ɗaw ŋ ŋga ŋkwaɓ ata səkan ŋgha anta ege tewtew, səkwaw, vah a kandaha, maa hejəye ma ŋ jeɓ ege tewtew, əy nezləme ula anta. A təwse ca, əy nagwarzamha aza ŋ jeɓ tata ege. 29Aya hejəye ma la taŋtaŋ ege, əy nagwarzamha aza ata lamac, əy nelem lanja, cemey hejəye ma la dadawar ege ca, əy nagwarzamha aza, ŋ lem ghem.»
Hejəye ma ghwal zlap ata Yesu ege
30Yesu a zlap, a ŋgaya: «Sa ca, sa kula ŋ la səkan aza a ha naka ca, askwaw. Sa ghemata hejəye ca, ana maa sa zləmeza. Sa ghemata hejəye ca, a heɗe a heɗe, mavəday sa kampam ŋ la səkan ana maa sa kaɗawaw ca, askwaw, cemey, sa law, ca, ana maa heje ma leɓekey a kaɗawaw. 31Mada sa ghwal zlap ata ha naka ca, laghwal zlap anta a kanala a heɗe a heɗe, askwaw. 32Cemey, ara ɗala matakan ma kanaghwal zlap, ata sa. Sa kasan ca, laghwal zlap anta ca, ara ma njenjəwen. 33Hune kálaɓzata malaɓ ege ara Yuhana, cemey, kághwal zlap a heɗe a heɗe. 34Sa káɗaw ɗala a ghwal ma ata sa ca, askwaw, cemey, sa zlap ana ebe ŋghe ca, ndar hune lem lereh. 35Yuhana ca, kánja ana patarla ma kébeseye, a keweɗ la, hune kálamza leweɗ anta a sasam ata vah anta cekuɗe. 36Cemey, a naka ca, laghwal zlap naka day aha mala Yuhana. Zlan maa sa kalata ege ca, ara zlan ege maa Vana a velekey ŋ lata. Zlan ege maa sa kalata anta ca, əy kaghwalza zlap ata sa ca, ara Vana ma leɓekey. 37Vana ma leɓekey a ha anta kághwal zlap ata sa. Cemey, hune kéteh zlam ata zlap anta, askwaw, hune kégəre, askwaw. 38Aya hune kámbal zlap anta aka, askwaw, mavəday hune kálamza ɗala maa a laɓaza, askwaw. 39Hune kejəŋge leŋter ege, mavəday hune deŋza ca, hune nelem lanja ma katuwaɗ səkwaw ŋma. Ayaw, Leŋter anta ege ca, əy kaghwal zlap ata sa. 40Cemey, hune kaɗaw ŋ ndaha, ŋ lem lanja ma katuwaɗ kaw vepey anta ara sa, səkwaw.»
41«Ɓardakw naka ca, a ndaha aka, ara hejəye, səkwaw. 42Cemey, sa kasanahune, laɗaw Gazlavay ŋ hune, askwaw. 43Sa ndaha ca, a zlam Vana ma leɓekey, hune kaɗaw ŋ lemzekey, səkwaw, cemey, mada ɗala wende, a ndaha a zlam anta ca, hune nalamza. 44Hune ɗaw ca, hune həman kusam ŋ taba ŋkune ege, hune kampam ɓardakw ma ndaha aka ara Gazlavay ma teŋguleŋ anta, askwaw, ca, hune nasan ŋ lemzekey ca, vaŋgay? 45Hune ɗaw ŋ deŋza ca, ara sa ma kanaŋkəɗawahune a tama Vana, səkwaw, cemey, ara Musa maa hune káca ŋkwaɓ ŋkune ka tewtew a heɗe wese, mbəy ma kanaŋkəɗawahune. 46Cemey, mada hune kálamza ma mala Musa aza njenjəwen ca, hune nelemzekey yam, mavəday Musa kázlap ata sa ŋ leŋter anta. 47Mada hune kálamza zlap maa Musa a ŋter ata sa, askwaw ca, hune nasan ŋ lamza ma naka ca, vaŋgay?»
ទើបបានជ្រើសរើសហើយ៖
Yuhana 5: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
