Yuhana 3
3
Ata Yesu ey Nəykawdemus
1Cemey, heje wende ŋ taba Farəysa ege aka, zlam anta Nəykawdemus, ara ɗala ma teŋguleŋ ŋ taba madakal dakal ma a tama Yahudu ege. 2A zaɗaw, wende aka, a ndaha a ndewzene ŋ Yesu, a zlepene, a ŋgaya: «Masasərak, nene kasan ca, hwa ɗala maa Gazlavay a laɓaza ŋ sesərekzeney, mavəday kaw ɗala ma kula ŋ la zaɓəla ege ana maa hwa kalata ŋghe ege ca, askwaw, səy Gazlavay mbəy a heje anta.» 3A təwse ca, Yesu a zenene a ŋgaya: «Sa kazlapahwaw njenjəwen, mada ɗala kámbawaha magbak, askwaw ca, heje anta mbəy kula ŋ gəre Lazam bay mala Gazlavay səkwaw.» 4Nəykawdemus a ɗawza, a ŋgaya: «Mada ɗala mbəy msəra tew ca, kula ŋ zen ŋ mbawaha magbak zeney, vaw? Mbəy kula ŋ zen a dəmas maman ndar a mbawha zeney vaw?» 5Yesu a zenene, a ŋgaya: «Njenjəwen, sa kazlapahwaw, mada ɗala kámbawaha a yam leŋ a Zəwet askwaw ca, heje anta kula ŋ dam ŋ Lazam bay mala Gazlavay, səkwaw. 6Ɗala ma mbawaha ta ŋ ata mawal ey wala ca, ara heje dakənak. Cemey, ɗala ma mbawaha a Zəwet ca, ara zəwet. 7Hwa ɗaw ŋ ŋga ŋkwaɓ ata maa sa zlapahwaw, sa ya: “Səy hune mbawaha aza magbak wese səkwaw, ana zlap ca, lambawha ma mgba ata uzlaf.” 8Tatəɗam a kaja kəɗa ata la maa a kaɗawaw, hwa kezləme lababar anta. Cemey, hwa kasan ata la maa a ndaha səkwaw, hwa kasan ata la maa a ndaha səkwaw. Kaw vayay ma mbawaha a Zəwet ca, a nja ana mbe.» 9Nəykawdemus a ɗawza Yesu zeney, a ŋgaya: «Səkan anta a nala ca, vaŋgay?» 10Aya, Yesu a zenene, a ŋgaya: «Hwa masasərak ma dakal maa əy kasanaw, ŋ hayak Əysərayəyla, hwa kasan səkan anta səkwaw ca, vaŋgay? 11Sa kazlapahwaw njenjəwen. Ŋcene ca, nene zlap ata səkan maa nene kasanaw. Nene ghwal ma ca, ata səkan maa nene gəreta a nje ŋcene ege, a mbe anta tewtew ca, hune kaɗaw ŋ lamza ma ŋcene səkwaw. 12Mada sa zlapahune ata səkan ege ma ŋ manhayak ŋghe, hune kalamza ma naka səkwaw. Cemey, mada sa zlapahune ata səkan ege ma mgba ata uzlaf ca, hune nasan ŋ lamza, vaŋgay? 13Kaw ɗala teŋguleŋ ŋ manhayak ŋghe, kétev mgba ata uzlaf ca, askwaw, səy heje ma tadakwaha ka mgba ata uzlaf, ara Mba Ɗala. 14Ana maa Musa a kəlaw zezekw ɓarzlam ma vəre ata mpe, a kafza ata darzlam zlezle, səy əy makəlaw Mba Ɗala aza ata mpe, əy makafza aza ana mbe yam, 15ndar, kaw vayay ma lamza aza ca, a lem lanja ma katuwaɗ səkwaw kaw vepey. 16Ayaw, Gazlavay káɗaw manhayak aza mambaza, mavəday anta, kávalza Mba anta ma teŋguleŋ aza, ndar kaw vayay ma lamza aza ca, a fətek anta səkwaw, cemey, a lem lanja ma katuwaɗ səkwaw kaw vepey. 17Cemey, Gazlavay kálaɓaza Mba anta ŋ manhayak ndar a ghem manhayak ca, askwaw, karba ca, ndar manhayak a lem lereh a mbe. 18Ɗala ma lamza ma anta aza ca, guma a kanaja a heɗe askwaw. Cemey, a ɗala ma lamza ma anta səkwaw ca, kéghemeye aza tew, mavəday kálamza Mba Gazlavay ma teŋguleŋ, askwaw. 19Ŋghe, laja guma anta ca, a nja ana ebe ŋghe: Gazlavay a laɓaza leweɗ anta ŋ manhayak, cemey, hejəye ma a manhayak ege, əy ɗaw kuzle day aha leweɗ, mavəday əy kala səkan ma kadak səkwaw ege. 20Kaw vayay, ma kala səkan ma kadak səkwaw ca, a kaɗaw leweɗ səkwaw, a kananda ŋ leweɗ, askwaw, mavəday a kalalak ata səkan anta ma kadak səkwaw ege wese, əy naghwalha aza. 21Cemey, ɗala ma kala səkan ma njenjəwen ca, a nanda ata la ma keweɗ, ndar hejəye əy gəreta zlan anta maa a kalata ege kadak kadak, ana maa Gazlavay a kaɗawaw.»
Ata Yesu ey Yuhana
22A dəwze anta ca, Yesu a nda ŋ hayak Yahudəya, ey madarlaŋw anta ege. Əy nja a təwse, walaŋ cekuɗe, aya, Yesu a kabanata hejəye a yam baptəysma. 23Yuhana yam, a kabanata hejəye a yam baptəysma ŋ Aynun, la anta mbermber a uzam Saləym, ata la maa yam dakala a təwse aka. Hejəye əy kandaha ara mbe, ŋ kaban a yam baptəysma. 24Cemey, ata vah wese ca, əy kánahza Yuhana ŋ daŋgay kwagwa, səkwaw.
25Aya, madarlaŋw mala Yuhana ege vedəye, əy ja səbakw a ɗala Yahudu wende aka, ata ma maŋkanaŋkan mala Musa maa a kazlap ata laban gay. 26A təwse ca, əy nda ara Yuhana, əy zlepene, əy ŋgaya: «Masasərak ŋcene, hwa kesenzene ata heje maa hune gbak aha bəza Urdun, maa hwa ghwal ma a heɗe wese, səkwaw vaw? Mbe yam, a banata hejəye a yam baptəysma. Hejəye tewtew əy kanda ara mbe.» 27Yuhana a zenetene, a ŋgaya: «Kaw vayay ma kula ŋ lem ɓardakw aza ca, askwaw, cemey, səy Gazlavay ma velene. 28Hune a ha ŋkune ege, hune kaghwal ma ata sa, maa sa ya: “Sa ca, sa Almasəyhu, səkwaw. Cemey, sa ɗala maa Gazlavay a leɓekey a tama a tama, ŋ lemzene taf aka.” 29Mawal dəma ca, wala ca, mala anta. Cemey, ŋgama mawal dəma ca, kénjeye a həzlar, a keteh zlam a heɗe, a kasasam dakala ata zlap mawal dəma anta. Sasam naka a nja ana mbe, sa ghef a sasam. 30Səy madakal anta magal, mala naka magac.»
Ɗala ma ndaha aka mgba ata uzlaf
31«Ɗala ma ndaha aka mgba ata uzlaf ca, mbəy pa ma day, aha kaw vemey tewtew. Ɗala ma ndaha ŋ manhayak yam, ara ɗala mala manhayak, a zlap ca, ata səkan ege ma ŋ manhayak. Cemey, ɗala ma ndaha aka mgba ata uzlaf ca, [mbəy pa ma day, aha kaw vemey tewtew.] 32Ana ebe ŋghe, a kaghwalza zlap ata səkan maa a gəre ey maa a zləme, cemey, kaw ɗala ma kalamza laghwal zlap anta, askwaw. 33Kaw vayay, ma lamza laghwal zlap anta aza ca, a kaghwalza ca, Gazlavay a zlap ma ma njenjəwen. 34Ɗala maa Gazlavay a laɓaza ca, a zlap ca, ma mala Gazlavay, mavəday Gazlavay a kevelene Zəwet anta dakala mambaza. 35Cen, a kaɗaw Mba anta, kévelene səkan ege aka tewtew asa ra anta. 36Kaw vayay ma lamza Mba aza ca, a nelem lanja ma katuwaɗ səkwaw kaw vepey. Kaw vayay ma lamza Mba anta səkwaw ca, a kenelem lanja ma katuwaɗ, səkwaw, askwaw. Cemey, laghwaɗ Gazlavay mbəy a heɗe kaw vepey.»
ទើបបានជ្រើសរើសហើយ៖
Yuhana 3: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
