Yuhana 13
13
Yesu a benetene ŋgas mala madarlaŋw anta ege
1Mar gwaygwaya Paska a naja ca, Yesu a kasan ca, vah anta kándaha aza, vah ma ata geɓza manhayak aka ŋ nda ara Cen. Yesu ca, a kaɗawata hejəye anta ege ma ŋ manhayak, a kaɗawata hwas ata laŋtakw. 2Maa ata Yesu ey madarlaŋw anta ege, əy kazam uda mala mackwahw ca, enjekeɗe, malula kévelene ledeŋ ŋkwaɓ aza ŋ Yahuda Əyskarəyawt, mba Səymawn, ŋ səkam Yesu aza. 3Yesu a kasanaw, Cen kévelene səkan ege aka tewtew asa ra anta, a ndaha aka ara Gazlavay, a nezen anta ara Gazlavay. 4Yesu a gwarzam ata lazam uda wese, a cakw garawal anta aka, a jaw maslaga ŋ bəra. 5A dəwze anta, a ɗa yam ŋ tekeɗ, a mar ŋ benetene ŋgas mala madarlaŋw anta ege, aya, a tukwaɗata aza a maslaga maa a jaw ka ŋ bəra anta wese.
6Ana ebe ŋghe, a hwas ara Səymawn Pəyer. A təwse ca, Səymawn Pəyer anta a zlepene a ŋgaya: «Bay Madakal, hwa ca, hwa benekey ŋgas aza vaw?» 7Yesu a zenene a ŋgaya: «Səkan maa sa kala ca, hwa kula ŋ san na ŋgha kwagwa səkwaw. Cemey, a tama cekuɗe ca, hwa nasanaw.» 8A təwse ca, Pəyer a zlap, a ŋgaya: «Hwa, ŋ benekey ŋgas ŋ sa, kaw a kanala, askwaw!» Yesu a zenene, a ŋgaya: «Mada sa kábanahwaw ŋgas, askwaw ca, kaw səkan ma kanajavamaw a hwa, askwaw.» 9Səymawn Pəyer a zlepene, a ŋgaya: «Bay Madakal, mada ana ebe ŋghe ca, hwa benekey ŋgas ege gagaha səkwaw, cemey, benekey aza zlaɓa ra ege ey ha» 10Yesu a zlepene, a ŋgaya: «Mada ɗala kában aza ca, a kaɗaw ban zeney səkwaw, mavəday dama ata kusam anta, askwaw. Ŋkune ca, hune ghwezlekghwezlek, cemey, hune tewtew ŋkune səkwaw.» 11Yesu a kasan ɗala ma kanasəkamaw, mavəday anta, a ŋgaya: «Hune tewtew ŋkune, hune ghwezlekghwezlek, askwaw.»
12A dəwze maa kébenetene ŋgas aza kəɗaŋ ca, Yesu a ca garawal anta, a nja ata la ma ata zam uda zeney, aya, a zlepetene, a ŋgaya: «Hune kasan səkan maa sa lahune ŋghe vaw? 13Hune keyekey a “Masasərak” ey “Bay Madakal”, njəwen, hune zlap a heɗe a heɗe, mavəday sa nja ana maa hune zlap anta. 14Na ŋgha, sa Bay Madakal, Masasərak, sa kábanahune ŋgas ege aza, səy hune ban ŋgas ŋkune ege ŋ taba ŋkune yam. 15Zlan maa sa law, ŋgha ca, ara laslaŋgal ma, ndar hune yam, hune law, ana maa sa lahune ŋghe. 16Njenjəwen, sa kazlapahune, mala zlan pa ma day aha təwjek anta ca, askwaw, mba malaɓ pa ma day aha ɗala ma laɓza ca, askwaw. 17Mavəday hune kásanza, mada hune kala ana ebe ŋghe ca, hune nelem sasam. 18Sa zlap ana ebe ŋghe ca, ata hune tewtew səkwaw, sa kasanata hejəye maa sa mayata ege. Cemey, səy mala anta ana maa ma meŋtereŋter a zlap, a ŋgaya: “Ɗala maa nene kazam səkan ŋ la anta, kábaw anta a maɗa gham a sa.” 19Sa zlapahune ma anta aza na ŋgha, mar səkan anta a nalaha, ndar mada káhwasha aza ca, hune lamza, sa ca, “ara Sa”. 20Njenjəwen, sa kazlapahune, kaw vayay ma lamza ɗala maa sa laɓza ca, a lam ca, sa. Kaw vayay ma lemzekey aza yam ca, a lam ca, ɗala ma leɓekey.»
Yahuda a səkam Yesu aza
21A dəwze maa Yesu a zlap aza ana ebe ŋghe ca, a ŋga ŋkwaɓ mambaza, aya, a zlap ata nje kaw vayay, a ŋgaya: «Sa kazlapahune njenjəwen, ɗala teŋguleŋ ŋ taba ŋkune a nesəkemekey aza.» 22A təwse ca, Madarlaŋw anta ege, əy sar la a nje a nje, əy kasan ɗala maa a kazlap a heɗe səkwaw. 23Madarlaŋw wende maa Yesu a kaɗawaw, kénjeye a həzlar Yesu. 24Səymawn Pəyer a gədehza madarlaŋw wese, a ŋgaya: «Ɗawza, a zlap ca, ata vayay?» 25Aya, madarlaŋw wese a ŋteŋ ha kəɗa ara Yesu, a zlepene, a ŋgaya: «Bay Madakal, ara ca vayay?» 26Yesu a zenene, a ŋgaya: «Sa nemec peŋ, sa nacughwaɓaw, sa nevelene ŋ ɗala. Ɗala maa sa kenevelene ca, ara mbe.» Aya, Yesu a ŋta peŋ maa a cughwaɓ wese, a velene ŋ Yahuda Əyskarəyawt, mba Səymawn. 27A təwse ca, maa kévelene peŋ aza ca, Sayɗanu a dam a unaf Yahuda. Aya, Yesu a zlepene, a ŋgaya: «Səkan maa hwa kaɗaw ŋ la ca, laza kəcaŋ.» 28Kaw ɗala teŋguleŋ ŋ taba ma a təwse ege, ma sanza, Yesu zlap ana ebe ŋghe ca, mavəday vemey ca, askwaw. 29Yahuda ca, ara mbe ma kambal bakatar səlay aka, mavəday anta, vedəye, əy deŋza ca, Yesu a zlepene ŋ nda ŋ səkamha səkan ma ata ja gwaygwaya, askwaw ca, ŋ veletene səkan ŋ metetekw ege. 30Maa Yahuda a lamza peŋ aza ara Yesu ca, a təwse a təwse, a damha aza a bəza. Zaɗaw kála anta tew.
Ma maŋkanaŋkan mewe
31Maa Yahuda a damha aza a bəza ca, Yesu a zlap, a ŋgaya: «Na ŋgha ca, Mba Ɗala kélem ɓardakw anta aza, ɓardakw mala Gazlavay yam a ghwalha ta ŋ mbe. 32[Mada Gazlavay a ghwalha ɓardakw anta ta ŋ mbe ca,] Gazlavay a naghwalaza ɓardakw anta na ŋgha, a ha anta. 33Uzəye naka ege, sa nanja ara hune walaŋ cekuɗe ende ŋghe, hune nempemekey. Cemey sa kazlapahune ana maa sa zlepetene ŋ madakal dakal mala Yahudu ege: “Ata la maa sa kanda ca, hune kula ŋ nda a təwse, səkwaw.” 34Sa kavalahune ma maŋkanaŋkan mewe: Hune ɗaw kusam ŋ taba ŋkune. Ana maa sa kaɗawahune, hune ɗaw kusam ŋ taba ŋkune yam. 35Ana ebe ŋghe, hejəye tewtew, əy nasanaw, hune ca, hune madarlaŋw naka ege, mavəday laɗaw kusam ma ŋ taba ŋkune.»
Ata Pəyer ey Yesu
36Səymawn Pəyer a zlepene, ŋ Yesu ŋgaya: «Bay Madakal, hwa nanda a vay?» Yesu a zenene, a ŋgaya: «Ata la maa sa kananda ca, hwa kula ŋ səberekey na na ŋgha səkwaw, cemey, a tama ca, hwa nesəberekey.» 37Pəyer a zlepene, a ŋgaya: «Bay Madakal, sa kula ŋ səbarahwaw na na ŋgha səkwaw ata vemey? Sa kásla aza ŋ valza ha naka mavəday hwa.» 38Aya, Yesu a zenene, a ŋgaya: «Hwa navalza ha ŋkwa aza mavəday sa vaw? Sa kazlapahwaw, njenjəwen, mar gamzakw a naja ula ca, hwa ca, hwa nazlap gas mahkaɗ, hwa kesenekey səkwaw.»
ទើបបានជ្រើសរើសហើយ៖
Yuhana 13: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
