Yuhana 11
11
Lamac Lazarus
1Heje wende aka, a kadawar. Ara Lazarus ma ŋ Baytanəya, uzam maa ata Marəyama ey zlaŋgan Marta əy ŋma. 2Marəyama anta ca, ara wala ma temzene mel ma kenjef feŋfeŋ ata ŋgas Bay Madakal, a tukwaɗza a jukwaɗ ha anta wese. Lazarus ma kadawar wese ca, ara zlaŋgan. 3A təwse ca, zlaŋgan heldəməye ma gbak ege wese, əy laɓ ɗala ara Yesu ŋ zlepene ca: «Bay Madakal, ŋgama ŋkwa, a kadawar.» 4Aya, maa Yesu a zləme ma anta ca, a zlap, a ŋgaya: «Dawar Lazarus ŋghe ca, a kanajaw, askwaw. Cemey, a naghwalaza ɓardakw mala Gazlavay, a naghwalaza ɓardakw mala Mba Gazlavay yam.»
5Yesu ca, a kaɗawata ata Marta ey Marəyama leŋ zlaŋgan tata Lazarus. 6Cemey, maa a zləme Lazarus a kadawar ca, kánja ka a təwse wan gbak zeney. 7A dəwze anta, a zlepetene ŋ madarlaŋw anta ege, a ŋgaya: «Kazakwaw ŋ zen ŋtakwaw ŋ hayak Yahudəya.» 8Madarlaŋw anta ege əy zenene, əy ŋgaya: «Masasərak, təlam təlam ŋghe, Yahudu ege, əy kámpam ŋ ŋgwafahwaw a ŋkəɗaŋ, hwa ɗaw ŋ zen a təwse zeney eze vaw?» 9Yesu a zenetene, a ŋgaya: «Pes teŋguleŋ ca, ler wam aha gbak, askwaw vaw? Ayaw, mada ɗala a kanda a pes ca, kaw mejembeɗew a kanajaw, askwaw, mavəday a kegəre leweɗ ma ŋ manhayak ŋgha. 10Cemey, mada ɗala a kanda a zaɗaw ca, mejembeɗew a najaw, mavəday leweɗ ŋ mbe, askwaw.» 11A dəwze maa kézlepetene aza ana ebe ŋghe, a zlepetene zeney, a ŋgaya: «Ŋgama ŋtakwaw Lazarus káwan anta, cemey, sa nanda ŋ fəɗahaza.» 12Madarlaŋw anta ege, əy zenzene, əy ŋgaya: «Bay Madakal, mada a wan ca, a nereh.» 13A təwse ca, Yesu a ɗaw ŋ zlepetene ca, Lazarus kámac anta. Cemey, madarlaŋw anta ege, əy cakza ca, a zlepetene ca, ata wan ma njenjəwen. 14Aya, Yesu a zlepetene a heɗe a heɗe, a ŋgaya: «Lazarus ca, kámac anta. 15Sa kasasam mavəday ŋkune ata maa sa a təwse, askwaw, ndar hune lemzekey. Cemey, kazakwaw ara mbe.» 16A təwse ca, Tawmas, maa əy kayaɓa a Musa, a zlepetene ŋ madarlaŋw ege vedəye, a ŋgaya: «Kazakwaw yam, heje macakwaw tewtew a mbe.»
Yesu ara ɗala ma kagwarzamaza ɗala aza ata lamac
17Maa, Yesu a hwas ŋ uzam Baytanəya ca, əy kámpas Lazarus aza, kála anta wan ŋfaɗ mbəy ŋ jeɓ. 18Uzam Baytanəya ey uzam Urusaləyma ca, əy mbermber, a la anta kəylawmeter mahkaɗ ŋ taba tata. 19Mavəday anta, Yahudu ege vəram, əy kándaha ŋ deɓetene unaf aka ata Marəyama ey Marta, mavəday lamac zlaŋgan tata Lazarus. 20Maa Marta a zləme Yesu a kandaha ca, a hey ŋ ŋgelene ma ata taf, cemey, a Marəyama ca, kénjeye a wata. 21Marta a zlepene ŋ Yesu, a ŋgaya: «Bay Madakal, mada hwa ete ŋghe keɗe ca, zlana a kanamac, askwaw. 22Cemey, na ŋgha zeney, sa kasan ca, Gazlavay a navalahwaw səkan ma hwa ɗawza ara mbe tewtew.» 23A təwse ca, Yesu a zenene, a ŋgaya: «Zlanahw a nagwarzamha aza ata lamac.» 24Marta a zenene ŋ Yesu, a ŋgaya: «Ayaw, sa kasan ca, a nagwarzamha aza ata lamac a pes maa hejəye mamacamac ege, əy kanagwarzamha aza ata lamac, a pes maa manhayak a kanatuwaɗ.» 25Aya, Yesu a zlepene ŋ Marta, a ŋgaya: «Sa ca, sa ɗala ma kagwarzamata hejəye aza ata lamac leŋ sa ɗala ma kaval lanja. Ɗala ma lemzekey aza ca, kaw kámac anta ca, a nagwarzamha aza ata lamac. 26A zeney, kaw vayay mbəy a nje, kélemzekey aza ca, a kanamac, askwaw kaw vepey. Hwa kálamza aza vaw?» 27Marta a zenene, a ŋgaya: «Ayaw, Bay Madakal, sa kálamza aza. Hwa ca, hwa Almasəyhu, Mba Gazlavay, ɗala ma kanandaha ŋ manhayak.»
Yesu a han mavəday Lazarus
28A dəwze zlap ŋghe ege ca, Marta a nda ŋ yaɓa zlaŋgan Marəyama, a sesekwene ma, a ŋgaya: «Masasərak mbəy ete ŋghe, a kayahwaw.» 29A təwse ca, Marəyama a gwarzam kəcaŋ a nda ara Yesu. 30Yesu ca, káhwasaha ŋ uzam kwagwa səkwaw, mbəy ata la maa Marta a ŋgelene ma wese war. 31Yahudu ege, əy a ujek ara Marəyama, əy kedeɓetene unaf. Əy gəre maa Marəyama a gwarzam perce a damha aza a bəza ca, ɓəlah, əy səbaraza ara. Əy cakza ca, a nda ŋ hanha a ma jeɓ.
32Marəyama a hwas ata la maa Yesu mbəy a təwse, aya, maa a gəre ca, a ndav asa ŋgas anta, aya, a zlepene, a ŋgaya: «Bay Madakal, mada keɗe hwa ete ŋghe ca, zlana a kanamac askwaw.» 33Yesu a gəreta, ata Marəyama əy kahan, zlaɓa Yahudu ma səbaraza ara ege wese ca, a təwse, hahar a jaw, unaf a ŋkuraf. 34A ɗawzata, a ŋgaya: «Hune mpas a katay?» Əy zenene, əy ŋgaya: «Bay Madakal, ndaha ŋ sarza may?» 35Aya, Yesu a han. 36Yahudu ege wese, əy ŋgaya: «Hune sarza may, a kaɗaw mambaza.» 37Cemey, hejəye vedəye ŋ taba Yahudu ege, əy ŋgaya: «Mbəy ma zlerzene nje aza ŋ ulaf, ca, mbəy kula ŋ rehza Lazarus aza ata lamac səkwaw vaw?»
Lazarus kágwarzamaza ata lamac
38Aya, hahar a ja Yesu zeney. A təwse ca, a nda a ma jeɓ. Jeɓ anta ca, ara bədam, ma mampakampak a beleler. 39Yesu a zlepetene, a ŋgaya: «Hune tatəŋgwalza beleler ŋghe aza.» Marta zlaŋgan heje ma mac anta wese, a zlepene ŋ Yesu, a ŋgaya: «Bay Madakal, a nenjef, mavəday kálaza wan ŋfaɗ ŋ jeɓ.» 40Cemey, Yesu a zenene, a ŋgaya: «Sa kázlapahwaw, sa ya, mada hwa kálamza ma naka ŋgha aza ca, hwa negəre ɓardakw mala Gazlavay, askwaw vaw?»
41A təwse ca, əy tatəŋgwalza beleler wese aza. Yesu a sar la ata uzlaf, a ŋgaya: «Vana, sa kalahwaw wasay, mavəday hwa ketehzekey zlam. 42Sa kasanaw, hwa ketehzekey zlam kaw vepey. Cemey, sa zlap ana ebe ŋghe ca, mavəday hejəye ma a həzlar sa ŋghe ege, ndar əy lamza njenjəwen, ara hwa ma leɓekey.» 43A dəwze maa a zlap ana ebe ŋghe wese, a ja ula a mazlazlay, a ŋgaya: «Lazarus damha aza!» 44A təwse ca, Lazarus ma mac anta wese, a damha aza, ŋgas ege ey ra ege əy kéjeweye a maslaga, nje anta yam késəreteye a rəgwac. A təwse ca, Yesu a zlepetene, a ŋgaya: «Hune palaw, hune yakza manda.»
Əy la ŋgwaɗŋgwaɗ ata Yesu
45Yahudu ege vəram ŋ taba ma ndaha ara Marəyama ege, ma kégəre səkan maa Yesu a law ca, əy lamza aza. 46Cemey, vedəye ca, əy nda ara Farəysa ege, əy ghwelzetene səkan maa Yesu a law. 47Maa əy zləme ana ebe ŋghe ca, madakal dakal mala kwakwas ege ey Farəysa ege, əy jav a madakal ma ata ja guma ege, əy jav ma tata, əy ŋgaya: «Heje nala na ŋgaha ca, vaŋgay? Heje anta a kala zaɓəla ege vedəye vedəye vəram. 48Mada heje kayakza ka, a kala ana ebe ŋghe ca, hejəye tewtew əy nalamza. A zeney, madakal dakal Rawma ege əy nanah ŋ ma anta, əy napəlah ujek kwakwas ŋtakwaw aza, əy napəlah hayak ŋtakwaw aza.» 49Aya, ɗala teŋguleŋ ŋ taba tata, zlam anta Kayafas, ara madakal mala kwakwas ege ata va wese, a zlepetene, a ŋgaya: «Hune ca, kaw hune kasan səkan, səkwaw. 50Hune kasan səkwaw vaw? Kadak ca, ɗala teŋguleŋ mamac mavəday hejəye tewtew aha maa hejəye tewtew əy kanakuɗap tata, askwaw vaw?» 51Ma maa Kayafas anta a zlap ana ebe ŋghe ca, ara ŋkwaɓ anta ma deŋza səkwaw. Mbe ca, ara madakal mala kwakwas ege ata va wese. A laca, a ghwalza səkan ma kanalaha, Yesu a namac mavəday hejəye Yahudu ege. 52Yesu a namac ca, mavəday hejəye Yahudu ege gagaha səkwaw, cemey, ndar a ɓecata uzəye Gazlavay ma weɗ tata ege tewtew yam.
53Mar aka a pes wese ca, madakal dakal Yahudu ege əy kájav ma tata aza ŋ jaw. 54Mavəday anta, Yesu kaw a katawar ŋ taba Yahudu ege zeney askwaw, a keghweletene kusam zeney askwaw. A nda anta kəɗa ŋ hayak ma mbermber a ma darzlam, ŋ uzam maa əy kayaɓa Efərayəym. A nja a təwse zlaɓa madarlaŋw anta ege.
55Cemey, gwaygwaya Paska mala Yahudu ege slaɓ. Mar gwaygwaya anta a naja ca, hejəye ma ŋ uzam ege vedəye vedəye, əy kanda ŋ Urusaləyma ŋ ban gay tata ege. 56Əy kampam Yesu. Aya, maa əy a ujek kwakwas ca, əy kaɗawzata kusam ŋ taba tata ege, əy ŋgaya: «Hune deŋza ca, vaŋgay? Kaw a kanandaha ŋ gwaygwaya, askwaw vaw?» 57Əy zlap ana ebe ŋghe ca, mavəday madakal dakal mala kwakwas ege ey Farəysa ege əy kézlepetene aza ŋ hejəye, əy ŋgaya: «Mada ɗala a kasan ata la maa Yesu mbəy a təwse ca, maghwalza, ndar əy nda ŋ mbalaza.»
ទើបបានជ្រើសរើសហើយ៖
Yuhana 11: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
