Zlan mala malaɓ ege 4
4
Ata Pəyer ey Yuhana əy a tama laja guma mala Yahudu ege
1Cemey, maa ata Pəyer ey Yuhana əy kezlepetene zlap ŋ hejəye meɓeceɓec ege wese ca, mala kwakwas ege, madakal mahəbar ujek kwakwas ege leŋ hejəye Sadukəy ege, əy ndaha ara tata. 2A təwse ca, əy kághwaɗ tata mambaza ata ata Pəyer ey Yuhana wese, mavəday maa əy kasasərakzata hejəye, əy kezlepetene, əy ŋgaya: Gazlavay kágwarzamaza Yesu aza ata lamac. Mavəday anta, hejəye ma mac tata ege ca, əy nagwarzamha aza ata lamac. 3Aya, əy mbalata ata Pəyer ey Yuhana wese, əy mpakata ka ŋ daŋgay ha a mapat, mavəday mackwahw kála anta tew. 4Cemey, ŋ taba hejəye ma zləme zlap mala malaɓ ege wese ca, hejəye vəram əy kálamza ma mala Yesu aza, əy la tata bəlakw jaɓan ege.
5A mpat anta, madakal dakal Yahudu ege, madakal dakal ma a tama ege leŋ maghwal ma maŋkanaŋkan ege, əy jav ŋ Urusaləyma. 6Ata Anas, madakal mala mala kwakwas ege, Kayafas, Yuhana, Aleksandəyre leŋ hejəye ma a wata madakal mala kwakwas ege wese tewtew, əy ŋ taba hejəye ma jav anta ege wese. 7Aya, əy data ata Pəyer ey Yuhana wese a tama tata, əy ɗawzata, əy ŋgaya: «Hune rehza heje ma halɓaya ŋghe ca, a ɓarɓar vekey? Hune rehza ca, a zlam vecey?» 8A təwse ca, Pəyer, mbəy ghef a Zəwet ma keweɗ, a zlepetene a ŋgaya: «Hune madakal dakal Yahudu ege, hune madakal dakal ma a tama ege, 9əy ŋkəɗewekey a tambaca ata taŋtaŋ maa nene lene ŋ heje ma halɓaya ŋghe. Huney, “Heje anta a san ŋ reh ca, vaŋgay?” 10Kadak! Hune tewtew zlaɓa hejəye Əysərayəyla ege tewtew, hune san ka. Heje ma halɓaya ŋghe anta, a gar a tama ŋkune, mbəy werwer ŋghe ca, mavəday zlam Yesu Almasəyhu, ɗala Nasaratu, maa hune dar aka ata mpe gafaŋgal. Cemey, Gazlavay kágwarzamaza aza ata lamac. 11Mbe ca,
“Ara ŋkəɗaŋ maa hune malam ujek ege, hune nahza aza wese,
ara mbe ma kábaw anta ara ŋkəɗaŋ ma pa ma tuwah.”
12Cemey, heje nelem lereh ca, səy ara Yesu, mavəday, Gazlavay kévelene ɓardakw kaw ŋ ɗala wende ŋ manhayak ŋgha, ŋ rehzaheje aza ca, askwaw.» 13A təwse ca, hejəye ma ata lajav ma dakal ma ata ja guma ege wese, əy káŋga ŋkwaɓ mambaza, mavəday ata Pəyer ey Yuhana anta ca, əy zlap a heɗe a heɗe, kaw a lalak səkwaw. A zeney, əy sarzata ca, əy nja ana hejəye vedəye, kaw əy kéjəŋgeha askwaw. Əy kásanata aza, ara tata hejəye ma tawarha ata Yesu ege. 14Aya, əy gəre heje ma halɓaya wese kégereye a həzlar tata, mbəy werwer. A təwse ca, kaw əy kula ŋ zenetene zlap ŋ ma anta səkwaw. 15A təwse ca, əy zlap ŋ damata ata Pəyer ey Yuhana aza kəɗe a bəza kwagwa, aya, ka əy nja ka ŋ zenza zlap anta ŋ taba tata. 16Aya, əy zlap, əy ŋgaya: «Heje neletene ŋ hejəye ŋghe anta ege ca, vaŋgay? Mavəday hejəye ma ŋ Urusaləyma ege tewtew əy kasan njenjəwen, hejəye ŋghe anta ege ca, əy kála zaɓəla, heje kula ŋ ja səbakw a heɗe səkwaw. 17Cemey, mada ma anta a ɗaw ŋ ŋtez a tama a tama ŋ taba hejəye səkwaw ca, səy heje gulakzata, əy ɗaw ŋ zlepene ŋ kaw vayay a zlam Yesu zeney səkwaw.» 18Aya, əy yahata zeney, əy gulakzata, əy zlepene, əy ŋgaya: «Kaw hune ɗaw ŋ zlepetene leŋ kaw hune ɗaw ŋ sesərekzetene zlam Yesu ŋ hejəye zeney səkwaw!» 19Cemey, ata Pəyer ey Yuhana wese, əy zenetene, əy ŋgaya: «Səkan ma pa ma tuwah a tama Gazlavay ca, nene tehzahune zlam vaw? Nene tehzene zlam ŋ Gazlavay vaw? Hune a ha ŋkune ege, hune zla ma anta. 20A ŋcene ca, nene kula ŋ geɓza zlap aka ŋ zlap ata səkan maa nene gəreta a nje ŋcene ege ey maa nene zləmeta a zlam ŋcene ege səkwaw.» 21Hejəye ma ata lajav ma dakal ma ata ja guma ege wese, əy gulakzata zeney, aya, əy palzata aka, mavəday kaw əy kéndew ma ma tete ma ata veletene ghem askwaw, mavəday hejəye tewtew əy kahəmanza Gazlavay ata səkan ma laha anta. 22Heje ma halɓaya maa əy rehza aza a zaɓəla wese ca, va anta day aha raŋfaɗ.
Hejəye ma lamza ma mala Yesu aza ege, əy karak Gazlavay
23Maa əy palzata ata Pəyer ey Yuhana aka wese ca, əy zen tata ara hejəye tata ege. Aya, əy ŋgeɗetene ma ege tewtew maa madakal dakal mala kwakwas ege ey madakal dakal ma a tama ege əy zlepetene wese. 24Maa hejəye tata ege wese, əy zləme ma anta ege ca, tewtew tata əy rak Gazlavay a unaf teŋguleŋ ata la anta, əy ŋgaya: «Bay Madakal, hwa ma baza la ma mgba ata uzlaf ey la ma ata hayak, ŋtele leŋ səkan ma ŋ tata ege tewtew. 25Hwa ma ca Zəwet ma keweɗ aka ŋ jeje ŋcene Dawuda mala zlan ŋkwa ŋ zlap ana ebe ŋghe:
“Hejəye ma ata hayak ege əy ɓam pakam ca, mavəday vemey?
Əy deŋ ŋkwaɓ ata səkan ege bəse ca, ŋ vay?
26Bay ma a manhayak ege əy kajav ŋ mpam ma,
madakal dakal ma a tama hejəye, əy kajav ma tata aka ŋ ɗa gham,
a Bay Madakal leŋ a Almasəyhu anta.”
27Ayaw, njenjəwen, ata Həyrudus, Pawntəyus Pəylatu, hejəye maa tata Yahudu ege səkwaw leŋ hejəye Əysərayəyla ege tewtew əy kéɓec ŋ uzam ŋgha ata Yesu, mala zlan ŋkwa ma keweɗ maa hwa mayaw. 28Ana ebe ŋghe, əy kála səkan ege tewtew ana maa hwa slata aka zlezle a ɓarɓar ŋkwa ana maa hwa ɗawaw. 29Na ŋgha cemey, Bay Madakal, teh zlam ata gulak maa əy gulekzeney. Veletene ɓarɓar mala zlan ŋkwa ege, ndar əy ghwalza zlap ŋkwa a ɓarɓar kaw a lalak askwaw. 30Cemey, valza ɓarɓar ŋkwa, ndar hejəye əy reh. Zaɓəla ege ey səkan ma kaŋga ŋkwaɓ ege mala ta ŋ zlam Yesu, mala zlan ŋkwa ma keweɗ.»
31A dəwze maa əy kárak Gazlavay aza ca, la maa əy kéɓeceye a təwse wese, a həɓal. Tata tewtew tata əy ghef a Zəwet ma keweɗ, aya, əy ghwalza zlap mala Gazlavay kaw a lalak askwaw.
Hejəye ma lamza ma mala Yesu aza ege, əy jav səkan ma asa ra tata ege aka ŋ la anta
32Hejəye ma lamza ma mala Yesu aza ege tewtew əy kéjeveye ŋ la anta a unaf ma teŋguleŋ, a ledeŋ ma ŋkwaɓ teŋguleŋ. Kaw ɗala teŋguleŋ ŋ taba tata maa a kazlap ene, səkan ŋgha ca, mala naka ca, askwaw. Cemey, əy kájav səkan ma asa ra tata ege aka tewtew ŋ la anta. 33Malaɓ Yesu ege əy kaghwalza njenjəwen, Bay Madakal Yesu ca, kágwarzamha aza ata lamac. Əy ghwalza ma anta ca, a ɓarɓar ma dakal. Gazlavay kéveletene bəzla dakala ŋ tata tewtew tata. 34Kaw ɗala teŋguleŋ ŋ taba tata ma kamay səkan ca, askwaw. Ɗala maa la anta ege aka, askwaw ca, ujek anta ege aka ca, a səkamata aza, a daza səlay anta, 35a veletene ŋ malaɓ Yesu ege wese. A dəwze anta əy ɓezetene səlay anta, kaw vayay a lem tete ana maa a kaɗawaw.
36A təwse ca, heje wende aka, zlam anta Yusufu, ara ɗala Leweŋkaw, a mbawha ŋ Kəypərus. Malaɓ Yesu ege, əy cene zlam anta Barnabas, «ana zlap ca, ɗala ma keveletene ɓarɓar ŋ hejəye.» 37Heje anta ca, la anta aka yam, a səkamza, a daza səlay anta, a veletene ŋ malaɓ Yesu ege wese.
ទើបបានជ្រើសរើសហើយ៖
Zlan mala malaɓ ege 4: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
