Zlan mala malaɓ ege 25
25
Pawl mbəy a tama Festus, mambal hayak
1A dəwze wan mahkaɗ maa Festus a hwasha ŋ hayak wese ca, a gwarzam ŋ Kaysarəya, a nda ŋ Urusaləyma. 2A təwse ca, madakal dakal mala kwakwas ege ey madakal dakal ma a tama mala Yahudu ege, əy ndaha, əy ŋkəɗaw Pawl ara Festus, əy jene mbahw, 3mada kálamza aza ca, madaza Pawl ŋ Urusaləyma. Əy ɗawza ana ebe ŋghe ca, mavəday əy kájav ma tata aza, ŋ ja Pawl aza ata taf. 4Cemey, Festus a zenetene, a ŋgaya: «Pawl ca, mbəy ŋ daŋgay ŋ Kaysarəya, sa yam, sa nezen naka kəcaŋ a təwse. 5Madakal dakal ma ŋ taba ŋkune ege, əy mesəberekey ara ŋ Kaysarəya anta. Mada heje anta kálaha gay aka ca, əy maŋkəɗawaw a təwse.»
6Festus a nja ara tata ŋ Urusaləyma ca, wan jamahkaɗ, askwaw ca, wan wam, a dəwze anta a zen anta ŋ Kaysarəya. A mpat anta, a nja ata laja guma, a pal taf ŋ daza Pawl. 7Aya, maa Pawl a hwasha ca, Yahudu ma ndaha aka ta ŋ Urusaləyma ege, əy dərezlew, əy zlene metəwle a laŋkəɗawaw ma dadawar ege vəram, cemey, əy kula ŋ ghwalza ma anta ege, a heɗe a heɗe səkwaw. 8A təwse ca, Pawl a ghwal ma ata ha anta, a zlap, a ŋgaya: «Sa kála gay, kaw ata ma maŋkanaŋkan mala Yahudu ege askwaw, kaw ata ujek kwakwas, kaw ata bay mala hayak Rawma, askwaw.»
9Aya, Festus a ɗaw ŋ sasamzata Yahudu ege, a ɗawza Pawl, a zlepene a ŋgaya: «Hwa lamza aza ŋ nda ŋ Urusaləyma ndar əy jahwaw guma ata laŋkəɗaw ŋghe anta ege a tama naka vaw?» 10Cemey, Pawl a zenene, a ŋgaya: «Na ŋgha ca, sa kégereye ata laja guma mala bay madakal mala hayak Rawma, hune jekey guma naka anta ete ŋghe. Sa kéletene dadawar ŋ Yahudu ege askwaw, hwa a ha ŋkwa, hwa kasan kadak kadak. 11Mada ara ghem naka, sa kála gay ma tete ma ata jekey aza ca, sa kalamza aza, əy mejekey anta. Cemey, mada ma ma njenjəwen ŋ laŋkəɗaw tata ŋghe anta ege askwaw ca, ɗala ma kula ŋ velzekey aza asa ra tata ca, askwaw. Ana ebe ŋghe, sa kaɗaw taf hwa jeɓza guma naka anta a tama bay madakal mala hayak Rawma.» 12Aya, a dəwze maa ata Festus əy zenza ma anta a hejəye anta ege ca, a zlepene ŋ Pawl wese, a ŋgaya: «Hwa káɗaw taf ŋ nda ara bay madakal mala hayak Rawma, hwa nanda a tama anta anta.»
Pawl mbəy a tama bay Agarəypa ey Bernəyke
13Aya, wan cekuɗe a dəwze anta ca, ata bay Agarəypa ey zlaŋgan haldəma, Bernəyke, əy ndaha ŋ Kaysarəya ŋ zlepzene ŋ Festus. 14Əy kánja a təwse wan vəram. Aya, Festus a ghwelzene ma ma ata Pawl ŋ bay wese, a ŋgaya: «Feləykus káyakza heje wende aka ŋ daŋgay ete ŋghe. 15Maa sa nda ŋ Urusaləyma ca, madakal dakal mala kwakwas ege ey madakal dakal ma a tama Yahudu ege əy ŋkəɗaw ara sa, əy ɗewzekey ŋ ghemew, ŋ ja aza. 16Cemey, sa zenzetene sa ya, ma maŋkanaŋkan mala Rawma ege a kapal taf ŋ ghem ɗala ŋ ja aza ca, səy əy majav aza a hejəye ma ŋkəɗaw anta ege, ndar a zenza zlap ata ma maa əy ŋkəɗaw anta ege. 17A təwse ca, nene ndaha tewtew a tata ete ŋghe, sa yam kaw sa kánja ka səpek askwaw. Aya, a mapat anta sa nja ata laja guma, sa pal taf ŋ daza heje anta. 18Hejəye ma ŋkəɗaw ege wese əy ndaha, sa cakza ca, əy nazlap ma ma dadawar ege a heɗe, kəɗe ca, kaw askwaw. 19Səy əy ja səbakw ca, ata kwakwas tata gagaha leŋ ata heje maa əy kayaɓa Yesu. Heje anta ca, kámac anta, cemey, Pawl a zlepetene a ŋgaya: “Mbəy a nje”. 20Kaw sa kasan ŋ zla ŋseŋ ma ma da ebe ŋghe səkwaw, aya, sa ɗawza Pawl anta, sa ya: “Hwa lamza aza ŋ nda ŋ Urusaləyma ndar əy jahwaw guma ata laŋkəɗaw ŋghe anta ege vaw?” 21Cemey, Pawl a zlepekey ŋ jeɓza guma anta a tama bay madakal hayak Rawma. Ana ebe ŋghe, amba sa zlepetene əy mahəbar ka ŋ daŋgay kwagwa ha hwas ata pes maa sa kanalaɓza a tama Bay Rawma.» 22Aya, Agarəypa a zlepene ŋ Festus a ŋgaya: «Sa yam, sa ɗaw ŋ zləme ma heje anta.» A təwse ca, Festus a zenene a ŋgaya: «Hwa nezləme a mapat.»
23Aya, a mapat anta, ata Agarəypa ey Bernəyke əy ndaha ma bay bay, əy dam ŋ ujek laja guma zlaɓa ma pa ŋ madakal dakal mala sawje ege leŋ madakal dakal ma ŋ uzam Kaysarəya ege. A dəwze anta ca, Festus a zlap ŋ daza Pawl, aya, əy daza. 24A təwse ca, Festus a zlap, a ŋgaya: «Bay Agarəypa leŋ hune hejəye ma tewtew ete ŋghe ege, heje maa hune kegəre ŋghe ca, ara heje maa Yahudu ege tewtew əy ɓecaha ara sa ŋ ŋkəɗawaw, ŋ Urusaləyma leŋ ete ŋghe zeney. Əy ja ula tewtew tata əy ŋgaya: “Heje anta ca, ara ɗala ma ata yakza aka a nje səkwaw.” 25A naka ca, sa kéndew ata gay anta ma tete ma ata ja aza ca, askwaw. Karba mbe a ha anta yam, káɗaw taf ŋ nda ara bay madakal mala hayak Rawma ŋ jene guma anta, cemey, sa kálamza aza ŋ leɓzene. 26Cemey, sa kasan ma maa sa keneŋterene ŋ bay madakal ata guma ŋghe anta səkwaw. Mavəday anta, sa kádaza aza a tama ŋkune, day ca, a tama ŋkwa bay Agarəypa. A dəwze maa hwa kénjenza ma anta aza ca, sa nelem ma ma ata ŋterew. 27Cemey, ŋ ledeŋ ŋkwaɓ naka ca, ŋ laɓza ɗala maa mbəy ŋ daŋgay ata laja guma, mada sa kághwalza ma maa əy ŋkəɗawaw, a heɗe a heɗe askwaw ca, kadak səkwaw.»
ទើបបានជ្រើសរើសហើយ៖
Zlan mala malaɓ ege 25: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
