Zlan mala malaɓ ege 22
22
1«Vana ege, zlana ege, hune teh zlam ata ma maa sa kanazlapahune na ŋgha, ata ma ma ata ha naka.» 2Aya, maa əy zləme Pawl a kezlepetene a ma Əybəranəyŋkaw ege wese ca, əy vas ŋ nja ka tete. A təwse ca, Pawl a zen ŋ ŋta zlap, a ŋgaya: 3«Sa ca, sa ɗala Yahudu, sa mbawha ŋ Tarsus ma ŋ Səyləykəya. Cemey, sa gal ete ŋghe ŋ Urusaləyma. Gamaləyel ca, ara masasərak naka, mbəy ma ghwelzekey ma maŋkanaŋkan mala jeje ŋtakwaw ege a heɗe a heɗe. Sa kasəbar Gazlavay a ɓarɓar ana maa hune tewtew hune kasəbaraw, a tambaca yam. 4Sa késetene gef ŋ hejəye vedəye ma kasəbar Taf Bay Madakal ege ha hejəye anta ege əy kámac tata. Sa kámbalata mawal ege leŋ weləye, sa kánahzata ŋ daŋgay. 5Madakal mala kwakwas ey lajav mala madakal dakal ege ma a tama hejəye əy kasan ca, zlap naka ŋghe ca, ara metəwle səkwaw. Ara tata ma velekey ɗerewel, ndar sa jeɓzetene ŋ zlana ŋtakwaw ege ma ŋ Damas. Sa kánda a təwse ŋ mbalata hejəye ma lamza ma mala Yesu aza ege ŋ jawata, ŋ data ŋ Urusaləyma ete ŋghe ŋ setene gef.»
6«Maa sa kanda ata taf, sa slaɓ ŋ hwas ŋ Damas, pes slaɓ ŋ la wereywerey ca, a təwse a təwse, leweɗ ma dakal a tadakwha ka mgba ata uzlaf, a weɗ ata sa. 7Aya, sa ndav ata hayak, sa zləme ula a kezlepekey, a ŋgaya: “Sawl, Sawl, hwa sekey gef ca, ŋ vay?” 8Sa ɗawza, sa ya: “Hwa vayay, Bay Madakal?” Aya, ula wese, a zenekey, a ŋgaya: “Sa ca, sa Yesu ɗala Nasaratu, maa hwa kesene gef wese.” 9Hejəye maa nene tewtew ege, əy kégəre leweɗ anta, cemey, əy kézləme ula ɗala ma kezlepekey anta askwaw. 10Sa ɗawza, sa ya: “Ca, sa nala na ŋgha ca, vaŋgay, Bay Madakal?” Bay Madakal, a zlepekey, a ŋgaya: “Gwarzam, nda ŋ Damas, a təwse ca, əy naghwalzahwaw səkan ege tewtew maa hwa kanalata.” 11Leweɗ ma dakal wese, kúlefekey nje aza. A təwse ca, hejəye maa nene tewtew ege wese, əy mbelekey ra, əy njewekey hwas ŋ Damas.»
12«Heje wende a təwse aka, zlam anta Ananəyas, ara ɗala ma kasəbar Gazlavay, a kasəbar ma maŋkanaŋkan ŋtakwaw a heɗe a heɗe. Yahudu ege ma ŋ Damas tewtew, əy kahəmanza. 13A ndaha, a ndewzekey, a deŋ aka ara sa, a zlepekey, a ŋgaya: “Sawl, zlana, nje ŋkwa mazlar anta!” A təwse a təwse ca, nje naka zlar, a zlar anta, aya sa kegəre Ananəyas anta kadak kadak. 14A zlepekey zeney, a ŋgaya: “Gazlavay mala jeje ŋtakwaw ege kámayahwaw aza, ndar hwa san laɗaw anta, hwa gəre Ɗala anta ma teŋguleŋ, ma kala səkan a heɗe a heɗe, hwa zləme zlap ma ŋ pakam anta. 15Hwa nala ŋ maghwal ma anta a tama a hejəye tewtew ŋ ghwelzetene səkan ege tewtew maa hwa gəreta ey maa hwa zləmeta. 16Na ŋgha ca, hwa teh zeney vemey? Gwarzam, lem laban aza a yam baptəysma, ya zlam mala Gazlavay ndar a palzahwaw gay ŋkwa ege aka.”»
Gazlavay a laɓza Pawl ara hejəye ma tata Yahudu ege səkwaw
17«A pes wende aka, maa sa kézenha aza ŋ Urusaləyma, lec maa sa karak Gazlavay a ujek kwakwas ca, səkan wende kéghwelzekey kusam. 18Aya, sa gəre Bay Madakal, a zlepekey, a ŋgaya: “Kese aza ŋ Urusaləyma kəcaŋ, mavəday hejəye anta ege, əy kanalamza laghwal ma ŋkwa ata sa askwaw.” 19Sa zenzene, sa ya: “Bay Madakal, əy kasan njenjəwen ca, sa kánda a ujek ege ma ata rak Gazlavay mala Yahudu ege, sa kámbalata hejəye ma lamza ma ŋkwa aza ege, sa kánahzata ŋ daŋgay ŋ gazlata. 20Maa əy ja Etəyen, ɗala ma ghwal ma ata hwa aza wese ca, sa yam, sa a təwse. Sa kálamza ma tata aza ŋ jaw, sa kéhəberetene rəgwac tata ege aka.” 21Cemey, Bay Madakal a zlepekey, a ŋgaya: “Nda, sa nalaɓzahwaw gədak ara hejəye ma tata Yahudu ege səkwaw.”»
Ata Pawl ey madakal sawje Rawma ege
22Hejəye əy ketehzene zlam ŋ Pawl ha hwas ata lamaɗ ma. Əy mar ŋ ja ula, əy ŋgaya: «Hune jaza, hune ɗaw ŋ yakza ɗala ma da ebe ŋghe aka a nje səkwaw!» 23A təwse ca, əy ja ula a mazlazlay, əy nahzata rəgwac tata ege aza a mgba ata uzlaf, əy kaɗəbas berdeberde. 24Madakal sawje Rawma ege wese, a zlepetene ŋ hejəye anta ege ŋ damza Pawl ŋ galaŋ tata, əy maŋtawaw, ndar a ghwalza, ma maa Yahudu ege əy kaja ula a heɗe wese ca, ara ma vekey. 25Cemey, maa əy kájawza ŋ ŋtawaw ca, a zlepene ŋ madakal sawje ege wende ma a həzlar a təwse, a ŋgaya: «Taf ŋkune ŋ ŋtaw ɗala Rawma ma kéghemeye kwagwa səkwaw ca, aka vaw?» 26Maa madakal sawje ege wese a zləme ma ŋghe ca, tel a nda ara madakal tata, a ɗawza, a ŋgaya: «Hwa ɗaw ŋ la kəɗe ca vemey? Heje anta ca, ara ɗala Rawma!» 27A təwse ca, madakal sawje ege wese, a nda ara Pawl, a ɗawza, a ŋgaya: «Zlepekey, hwa ca, hwa ɗala Rawma njenjəwen vaw?» Pawl a zenene, a ŋgaya: «Ayaw, sa ɗala Rawma.» 28Aya, madakal sawje ege wese, a zlepene, a ŋgaya: «A naka ca, sa káŋtar səlay dakala ŋ la ŋ ɗala Rawma.» Pawl a zlepene, a ŋgaya: «Cemey, sa ca, mbawa naka, sa ɗala Rawma.» 29A təwse ca, sawje ege ma slaza ŋ gazl Pawl wese, əy yakza aka, əy nda tata. Madakal tata wese yam kálalak anta, ata maa a sanza ara ɗala Rawma, a kedeŋ ŋkwaɓ mavəday maa a jaw a sesele wese.
Pawl mbəy a tama lajav ma dakal ma ata ja guma
30A mpat anta ca, madakal sawje ege wese, a ɗaw ŋ san njəwen ca, Yahudu ege əy ŋkəɗaw Pawl anta ca, ata vemey. Aya, a pelene sesele ege aza, a yaha madakal dakal mala kwakwas ege ey lajav ma dakal ma ata ja guma tewtew. A dəwze anta, a daza Pawl, a njaza ka a tama tata ŋ tehzene zlam.
ទើបបានជ្រើសរើសហើយ៖
Zlan mala malaɓ ege 22: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
