Zlan mala malaɓ ege 18
18
Pawl mbəy ŋ uzam Kawrəyntu
1A dəwze anta, Pawl a gwarzam ŋ uzam Atena, a nda ŋ Kawrəyntu. 2A təwse ca, a ndewzene ŋ ɗala Yahudu wende aka, zlam anta Akəylas, a mbawha ŋ hayak Pawŋtus. A ndaha aka təlam ŋ hayak Əytaləya ey wala anta Pəyrəyskəyla, mavəday Kalawdəyus, bay ma dakal hayak kágamata Yahudu ege ma ŋ uzam Rawma aza tewtew. Pawl a nda ara ata Akəylas ey Pəyrəyskəyla anta, 3mavəday zlan tata ca, ma teŋguleŋ. Zlan tata anta ca, ma ata ba guɗakw#18.3 guɗakw anta ege ca, əy lata a bukəla ege, mavəday anta Pawl a nja ara ata, əy la zlan ŋ la anta. 4Ata pes ata pes, a pes ma ata zazak mala Yahudu ege ca, Pawl a kanda a ujek ma ata rak Gazlavay mala Yahudu ege ma a təwse, a keghwelzetene zlap ata Gazlavay ŋ hejəye Yahudu ege leŋ Yunanəyŋkaw ege, ndar əy lamza ma anta.
5Maa ata Səylas ey Təymawte əy ndaha aka ŋ hayak Makedawnəya ca, Pawl a valza ha anta aka ŋ ghwal zlap Gazlavay. A zlepetene ŋ Yahudu ege a ŋgaya: «Yesu ca, ara Almasəyhu.» 6Cemey, Yahudu ege əy kaɗaw ma anta səkwaw, əy raɓa. Aya, Pawl a ŋtewetene berdeberde ma ata rəgwac anta ka, a zlepetene, a ŋgaya: «Mbambaz ŋkune mezen ata ha ŋkune! Ma naka səkwaw, na ŋgha ca, sa nda naka kəɗa ara hejəye ma tata Yahudu ege səkwaw.» 7Aya, a gwarzam anta a təwse, a nda a wata heje wende aka, zlam anta Təytus Yustus, ara ɗala ma kahəmanza Gazlavay. Wata anta mbəy a həzlar ujek ma ata rak Gazlavay mala Yahudu ege. 8A təwse ca, Kəyrəyspus, madakal ujek ma ata rak Gazlavay mala Yahudu ege, a lamza ma mala Bay Madakal zlaɓa hejəye ma a wata anta ege tewtew. Hejəye Kawrəyntu ege vəram, ma ketehzene zlam ŋ Pawl yam, əy lamza zlap Gazlavay, əy lem laban aza a yam baptəysma.
9A zaɗaw wende aka, Bay Madakal a ghwelene ha anta ŋ Pawl, a zlepene, a ŋgaya: «Hwa lalak səkwaw, cemey, hwa ɗaw ŋ nja ka tete səkwaw, zlepetene war, 10mavəday sa ŋ hwa. Kaw ɗala ma kanala aza kula ŋ mbalahwaw, ŋ sahwaw gef ca, askwaw, mavəday hejəye naka ege vəram ŋ uzam ŋgha anta aka.» 11Aya, Pawl a nja ŋ uzam Kawrəyntu va pal a ŋtəra ŋkwah, a kesesərekzetene zlap Gazlavay ŋ hejəye.
Pawl mbəy a tama mambal hayak maa əy kayaɓa Galəyaŋw
12Ata vah maa Galəyaŋw ara mambal hayak Akaya ca, Yahudu ege tewtew əy jav ma tata aka ata Pawl, əy mbalaw, əy jeɓza ata laja guma. 13Aya, əy zlap, əy ŋgaya: «Heje ŋghe, a kaŋcakwzata hejəye ŋ səbar Gazlavay ta ŋ taf matakan parpar a ma maŋkanaŋkan.» 14Kəɗe Pawl a ɗaw ŋ zlap, cemey, Galəyaŋw a zlepetene ŋ Yahudu ege, a ŋgaya: «Hune Yahudu ege, mada heje ŋghe anta kála gay ma dakal aka, askwaw ca, kála səkan ma dadawar ma dakal wende aka ca, sa netehzahune zlam. 15Cemey, hune ja səbakw ca, ata lasasərak kwakwas ege, ata zlam leŋ ata ma maŋkanaŋkan ŋkune ege. Hune a ha ŋkune ege, hune ja guma anta. Sa kalamza ŋ ja guma ata ŋseŋ ma ma da ebe ŋghe ege səkwaw!» 16A təwse ca, a gamata aza ata laja guma. 17Aya, hejəye tewtew, əy mbal Sawstenes, madakal ujek ma ata rak Gazlavay mala Yahudu ege, əy gazl ka a tama hejəye ma ata laja guma ege. Cemey, kaw Galəyaŋw kécecefza ma anta askwaw.
Pawl a zen a uzam Antakəya ŋ hayak Səyrəya
18Pawl a nja walaŋ cekuɗe zeney ŋ Kawrəyntu. A dəwze anta ca, a geɓzata hejəye ma lamza ma mala Yesu aza ege ka, a dam ŋ kwambawal ma dakal əy ata Pəyrəyskəyla ey Akəylas, əy nda ŋ Səyrəya. Mar Pawl a nadam ŋ kwambawal wese ca, káfaɗ ha anta aza ŋ uzam Keŋkereya, mavəday kémeɗene ma anta aza ŋ Gazlavay. 19Aya, əy hwas ŋ uzam Efesus, a təwse ca, Pawl a geɓzata ata Pəyrəyskəyla ey Akəylas aka. Tel a nda a ujek ma ata rak Gazlavay mala Yahudu ege, ŋ zenza zlap a Yahudu ege. 20A təwse ca, əy rakaw, manja ka walaŋ cekuɗe ara tata, cemey, kálamza səkwaw. 21Cemey, maa a kaɗaw ŋ nda anta ca, a zlepetene a ŋgaya: «Mada Gazlavay kálamza aza ca, sa nezenha ara hune.» Aya, a gwarzam a uzam Efesus, a dam ŋ kwambawal ma dakal, a nah ma. 22Aya, maa a hwas ŋ Kaysarəya ca, a tadakwha aza, a tev ŋ Urusaləyma ŋ zlepezetene ŋ hejəye ma ata lajav hejəye ma lamza ma mala Yesu aza ege a təwse. A dəwze anta ca, a tadakwha aza ŋ uzam Antakəya ŋ hayak Səyrəya. 23A dəwze maa a nja walaŋ cekuɗe a təwse ca, a nah ma, a zlaŋ ta ŋ hayak Galatəya ey Fəyrəygəya, a veletene ɓarɓar ŋ hejəye ma lamza ma mala Yesu aza ege tewtew.
Apawlaws a ghwal zlap Gazlavay ŋ Efesus ey ŋ Kawrəyntu
24Yahudu wende aka, zlam anta Apawlaws, a mbawaha a Aleksandərəya, a nda ŋ uzam Efesus. Ara ɗala ma kasan zlap tuwah, a zeney, a kasan ɗerewel ma keweɗ kadak kadak. 25Kásasərak aza taf mala Bay Madakal aza a heɗe a heɗe. Kávalza ha anta aza tewtew, a kaghwalza ma mala Yesu a heɗe a heɗe. Cemey, a sanɓa ca, laban a yam baptəysma mala Yuhana gagaha. 26A mar ŋ ghwal zlap a ujek ma ata rak Gazlavay mala Yahudu ege, kaw a lalak ŋ nje askwaw. Aya, maa ata Pəyrəyskəyla ey Akəylas əy zləme zlap anta wese ca, əy ŋta aza ara tata, əy ghwelzene taf mala Gazlavay a heɗe a heɗe. 27Apawlaws a ɗaw ŋ nda ŋ hayak Akaya. Hejəye ma lamza ma mala Yesu aza ege ma ŋ Efesus, əy velene ɓarɓar ŋ nda leŋ əy ŋteretene ɗerewel ŋ madarlaŋw ma a təwse ege, ndar əy lamza kadak kadak. Maa mbəy hwas a təwse ca, kécekzetene dakala ŋ hejəye ma lamza ma mala Gazlavay aza ege, a zəhay maa Gazlavay a velene. 28A təwse ca, Apawlaws, a zlepetene ŋ Yahudu ege, a ghwelzetene, a ɓarɓar ata nje hejəye tewtew, ledeŋ ŋkwaɓ tata ca, parpar. Aya, a ghwelzetene ta ŋ ɗerewel ma keweɗ, njenjəwen Yesu ca, ara Almasəyhu. A təwse ca, kaw əy kula ŋ jene səbakw səkwaw.
ទើបបានជ្រើសរើសហើយ៖
Zlan mala malaɓ ege 18: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
