Zlan mala malaɓ ege 15
15
Səbakw ŋ Antakəya ata lazla mandulay
1Hejəye vedəye əy ndaha aka ŋ hayak Yahudəya, əy nda ŋ uzam Antakəya, əy sesərekzetene zlap ŋ zlaŋgan tata ege, əy ŋgaya: «Mada hune kálamza ŋ zla mandulay ŋkune aza ana ma maŋkanaŋkan mala Musa a zlap askwaw ca, hune kanala kula ŋ reh səkwaw.» 2A təwse ca, ata Pawl ey Barnabas əy kálamza ma tata anta səkwaw, əy ja səbakw dakala mambaza a tata ata ma anta. Aya, Pawl, Barnabas leŋ hejəye vedəye ma ŋ Antakəya ege, əy zen zlap ŋ taba tata, əy jav ma tata aka ŋ nda ŋ Urusaləyma ara malaɓ ege ey madakal dakal ma a tama ege, ŋ zlap ata ma anta a tata.
3Aya, lajav hejəye ma lamza ma mala Gazlavay aza ege ma ŋ Antakəya a veletene səkan ege ŋ cekzetene ata taf Urusaləyma. Əy nda ta ŋ Fəynəykəya ey Samarəya, əy kaghwalza ma ara ata hejəye vedəye maa tata Yahudu ege səkwaw, əy ja mbahw aza a tama Bay Madakal. A təwse ca, labara anta kásasamzata zlaŋgan tata ege aza tewtew dakala. 4Maa əy gwarha ŋ Urusaləyma wese ca, lajav hejəye ma lamza ma mala Gazlavay aza ege leŋ malaɓ ege ey madakal dakal ma a tama ege, əy lamzata. Aya, ata Pawl ey Barnabas, əy ŋgeɗetene səkan ege tewtew maa Gazlavay a lata a tata.
Lajav ma dakal ŋ Urusaləyma
5Cemey, Farəysa ege vedəye ma ŋ taba hejəye ma lamza ma mala Gazlavay aza ege, əy gwarzam, əy zlap, əy ŋgaya: «Səy, hejəye ma tata Yahudu ege səkwaw, əy mazla mandulay tata ege aza, heje zlepetene, əy malamza ma maŋkanaŋkan mala Musa aza.» 6Malaɓ ege ey madakal dakal ma a tama ege əy jav ŋ sarza ma anta.
7Aya, maa əy kaja səbakw dakala ata ma anta wese ca, Pəyer a gwarzam a zlepetene, a ŋgaya: «Zlana ege, hune kasanaw, Gazlavay kémeyekey aza ŋ taba ŋkune a nuna anta ŋ ghwelzetene Ma Mewe ma Taŋtaŋ ŋ hejəye vedəye, ndar əy zləme, əy lamza zlap anta. 8Gazlavay ca, a kasan səkan ma ŋ unaf hejəye tewtew. Kéveletene Zəwet ma keweɗ ŋ hejəye maa tata Yahudu ege səkwaw, ana maa a valaheje yam. Ana ebe ŋghe, a kaghwalza ca, kálamzata aza yam. 9Gazlavay ca, kaw káca leɓez aka ŋ taba ŋtakwaw a tata ca, askwaw. Kébenetene unaf tata ege aza mavəday maa əy lamza ma anta aza. 10Ca, na ŋgha ca, hune ɗaw ŋ slanza Gazlavay ca, ŋ vay? Səkan ma ndeɓndeɓ maa kaw vana ŋtakwaw ege, kaw heje, heje kula ŋ tew səkwaw ca, hune tewetene ata hejəye ma lamza ma mala Gazlavay aza ege ca, ŋ vay? 11Heje kasanaw, Gazlavay a rehzaheje ca, ta ŋ taŋtaŋ mala Bay Madakal Yesu, ana maa a rehzata hejəye vedəye yam.»
12Aya, hejəye ma ɓecha a təwse ege tewtew, əy nja aka tete, əy keteh zlam ata ata Barnabas ey Pawl maa əy keghwelzetene səkan ma kaŋga ŋkwaɓ ege leŋ zaɓəla ege tewtew maa Gazlavay a veletene ɓarɓar ŋ law, ŋ taba hejəye maa tata Yahudu ege səkwaw wese.
13Maa əy maɗza zlap tata aza ca, Yakuba a gwarzam, a zlap, a ŋgaya: «Zlana ege, hune tehzekey zlam! 14Səymawn kághwalzaheje maa mar aka ata lamar, Gazlavay a ha anta kámay hejəye ŋ taba hejəye ma tata Yahudu ege səkwaw ŋ la ŋ hejəye anta ege. 15Zlap anta ege əy nja ana zlap mala uzəye ma zlap ma mala Gazlavay ege, ma kéŋtereye ŋ ɗerewel anta, a ŋgaya:
16“Bay Madakal a zlap, a ŋgaya:
A dəwze ca, sa nezenha
ŋ lam ujek Dawuda ma ghwaram anta wese aka,
sa nagarza ka ata la anta.
17Aya, hejəye vedəye memenemen ege tewtew əy nampam Bay Madakal,
njenjəwen, zlaɓa hejəye vedəye tewtew ma kaya zlam naka ege.
Bay Madakal a ŋgaya, a nalata zlan anta ege ana ebe ŋghe,
18zlan anta ege ma késeneye aza zlezle.”»
19Yakuba a zlap zeney, a ŋgaya: «Sa kazlapahune, heje ɗaw ŋ letene ma ŋ hejəye ma tata Yahudu ege səkwaw ma bawza lanja tata ege aza kəɗa ara Gazlavay səkwaw. 20Cemey, zukwan ca, heje ŋteretene ɗerewel, əy ɗaw ŋ zam zley kule səkwaw, əy ɗaw ŋ ŋta kusam a bəza səkwaw ey laca weləye ma ata taf anta səkwaw, səkwaw, əy ɗaw ŋ zam zley səkan ma ɓərataɓərat səkwaw, əy ɗaw ŋ zam mbambaz səkwaw. 21Mavəday, zlezle ca, əy kaghwalza ma ata ma maŋkanaŋkan mala Musa ŋ uzam ege tewtew, a zeney, əy kejəŋge laŋkan ma anta ŋ ujek ma ata rak Gazlavay kaw vepey a pes ma ata zazak.»
Əy ŋteretene ɗerewel ŋ hejəye ma tata Yahudu ege səkwaw
22Aya, malaɓ ege əy madakal dakal ma a tama ege, zlaɓa hejəye ma ata lajav hejəye ma lamza Gazlavay aza ege tewtew, əy may hejəye vedəye ŋ taba tata ŋ laɓzata ŋ Antakəya zlaɓa ata Pawl ey Barnabas. A təwse ca, əy may Yahuda, maa əy kayaɓa Barsabas, ey Səylas. Tata gbak tata, hejəye ma lamza ma mala Gazlavay aza ege əy kewenzetene ha aka. 23Əy laɓzata a ɗerewel asa ra, kéŋtereye ende ŋghe:
«Nene malaɓ ege leŋ madakal dakal ma a tama ege, zlanahw ŋkune ege, nene kezlepzetene ŋ hejəye ma tata Yahudu səkwaw ege ma lamza ma mala Yesu aza ege, ma ŋ Antakəya, ŋ Səyrəya leŋ ŋ Səyləykəya.
24Nene kézləme, hejəye vedəye ŋ taba ŋcene, əy kánda ŋ ŋgaɗahune ŋkwaɓ, əy kálalakzahune a zlap tata ege. Cemey, nene ca, nene kálaɓzata askwaw. 25Mavəday anta, nene kájav ma ŋcene ka ma teŋguleŋ ŋ may hejəye ŋ laɓzata ara hune. Hejəye anta ege, əy nanda tewtew əy ata Barnabas leŋ Pawl, maa nene kaɗawata kadak kadak. 26Ata Pawl ey Barnabas anta ca, ara hejəye ma valza ha tata ege aza ŋ la zlan Bay Madakal ŋtakwaw Yesu Almasəyhu. 27Mavəday anta, nene laɓzahune ata Yahuda ey Səylas ŋ ghwalzahune ma anta ma teŋguleŋ ana maa nene ŋter ŋ ɗerewel ŋghe. 28Zəwet ma keweɗ leŋ nene, nene káŋkan ma aza, ŋ cahune səkan wende a heɗe zeney ca, askwaw. Cemey, maŋkanaŋkan ege maa nene kalaɓzahune ca, əy cakwa: 29Hune ɗaw ŋ zam zley kule səkwaw, hune ɗaw ŋ zam mbambaz səkwaw, hune ɗaw ŋ zam zley səkan maa əy kézlene ula askwaw səkwaw, hune ɗaw ŋta kusam a bəza səkwaw. Mada hune katakata kusam ŋkune ege aka ŋ lata səkan ŋghe anta ege ca, wese ca, hune la səkan ma taŋtaŋ. Hune nja kadak.»
30Aya, əy geɓzata hejəye maa əy mayata ŋ laɓzata wese ege aka, əy nda tata ŋ Antakəya. Maa əy hwas a təwse ca, əy javata hejəye ma lamza ma mala Gazlavay aza ege, əy veletene ɗerewel wese. 31A təwse, əy jəŋge ɗerewel anta, əy sasam dakala, mavəday ɗerewel anta keveletene ɓarɓar. 32Ata Yahuda ey Səylas ca, tata uzəye ma zlap ma ege. Əy zlepetene ma ege dakala ŋ zlaŋgan tata ege, əy veletene ɓarɓar ŋ nja kadak kadak ŋ lalam. 33Ata Yahuda ey Səylas əy nja a təwse, walaŋ cekuɗe. A dəwze anta, əy ɗaw ŋ zenha aza ara hejəye ma laɓzata ege wese. Aya, hejəye ma lamza ma mala Yesu aza ma a təwse ege, əy zlepetene əy ŋgaya: «Hune nda a zəhay.» 34[Cemey, Səylas ca, kánja ka a təwse.] 35Ata Pawl ey Barnabas əy kánja dakala ŋ Antakəya. Tata leŋ hejəye vedəye vəram, əy kasasərakzata hejəye, əy keghwelzetene ma mala Bay Madakal.
Ata Pawl ey Barnabas əy ɓez kusam
36Ata wan ege cekuɗe a dəwze anta ca, Pawl a zlepene ŋ Barnabas, a ŋgaya: «Maza ŋ zen ŋ sarata zlana ŋtakwaw ege ma ŋ uzam ege tewtew maa mama ghwelzetene zlap mala Bay Madakal wese, ŋ sarza lanja tata ege, əy nja ca, vaŋgay.» 37Barnabas ca, a ɗaw ŋ ŋta Yuhana maa əy kayaɓa Markus ara, a həzlar tata. 38Cemey, Pawl kálamza askwaw, mavəday Yuhana anta kégeɓzata aka ŋ hayak Pamfəyləya, kégeɓza zlan aka. 39A təwse ca, əy ja səbakw dakala, əy ɓez kusam aza, kaw vayay a ŋtaɓa taf anta. Barnabas a ŋta Markus, əy dam ŋ kwambawal ma dakal, əy nda tata ŋ Kəypərus. 40Pawl yam, a ŋta Səylas. Zlaŋgan tata ege əy palzata aka ŋ taŋtaŋ Bay Madakal, tel əy nda tata. 41Pawl a nda ŋ hayak Səyrəya ey Səyləykəya, a keveletene ɓarɓar ara ŋ lajav hejəye ma lamza ma mala Yesu aza ege.
ទើបបានជ្រើសរើសហើយ៖
Zlan mala malaɓ ege 15: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
