Zlan mala malaɓ ege 13
13
Əy laɓzata ata Barnabas ey Sawl
1Ŋ lajav hejəye ma lamza ma mala Yesu aza ege ma ŋ Antakəya ca, uzəye ma zlap ma mala Gazlavay ege leŋ masasərak ege aka: Ara ata Barnabas, Səymeyawn maa əy kayaɓa Meɗekwɗekw, Lusəyus ɗala ma ŋ Səyrene, Manahen maa əy gal ŋ la anta a bay Həyrudus maa əy kayaɓa Antəypas, leŋ Sawl. 2A pes wende aka əy karak Bay Madakal, əy kala sumay, a təwse, Zəwet ma keweɗ a zlepetene, a ŋgaya: «Hune cekey ata Barnabas ey Sawl aka parpar ŋ la zlan maa sa yata ŋ law.» 3Aya, a dəwze maa əy kala sumay aza, əy kárak Gazlavay aza ca, əy ca ra tata ata ata Barnabas ey Sawl wese, əy geɓzata aka, əy manah ma.
Ata Barnabas ey Sawl əy ŋ Kəypərus
4Aya maa Zəwet ma keweɗ a laɓzata ata Barnabas ey Sawl wese ca, əy nda ŋ uzam Selewkəya, əy dam ŋ kwambawal, əy zlaŋ hayak ma ŋ taba ŋtele, əy hwas ŋ Kəypərus. 5Maa əy hwas ŋ uzam Salaməys ca, əy ghwal zlap mala Gazlavay ŋ ujek ma ata rak Gazlavay mala Yahudu ege. Yuhana Markus mbəy ara tata ŋ cekzetene.
6Əy zlaŋ hayak Kəypərus wese tewtew, ha hwas ŋ Pafaws. Əy ndewzene ŋ ɗala Yahudu wende aka a təwse, zlam anta Bar Yesu. Heje anta ca, a kala zaɓəla ege. Káca ha anta aza ŋ mba ma zlap ma mala Gazlavay. 7Bar Yesu anta, ara madarlaŋw mala Sergəyus Pawl, ɗala mambal hayak, ɗala ma ŋkwaɓ ŋ ha. Mambal hayak anta a yata ata Barnabas ey Sawl a wata anta, mavəday a kaɗaw ŋ zləme zlap mala Gazlavay. 8Cemey, Eləymas ana zlap ca, ɗala mala zaɓəla wese ca, a kaɗaw ma mala ata Barnabas ey Sawl səkwaw. A təwse ca, a mpam taf ŋ tak mambal hayak aka ŋ lamza zlap mala Gazlavay, səkwaw. 9A təwse ca, Sawl, maa əy kayaɓa Pawl, ɗala ma ghef a Zəwet ma keweɗ, a sarza mala zaɓəla wese mgbezlzle, 10a zlepene, a ŋgaya: «Hwa ɗala mala metəwle! Hwa ɗala ma kabaɗzata hejəye tewtew! Hwa mba Malula! Hwa kaɗaw səkan ma taŋtaŋ səkwaw. Zlan maa Bay Madakal a kala ca, a heɗe a heɗe, cemey, ŋkwa ca, hwa kagayza ka a zlan ma kadak səkwaw. Ca, hwa negeɓza ŋ la səkan mada ebe ŋghe aka ca, vepey? 11Na ŋgha ca, zləme ka, Bay Madakal a nagayzahwaw aza, hwa nulaf ŋkwa, hwa kenegəre pes kwagwa askwaw!» A təwse a təwse, la a jaɓ, kuzle gbek ata nje Eləymas. A təwse ca, a baw ata la anta, ata la anta, a mpam ɗala ŋ njewew. 12Maa mambal hayak a gəre səkan ma laha wese ca, kálamza zlap mala Gazlavay aza, lasasərak mala Bay Madakal anta kéŋgene ŋkwaɓ aza mambaza.
Ata Pawl ey Barnabas, əy ŋ uzam Antakəya, ma ŋ hayak Pəysəydəya
13Ata Pawl ey hejəye maa əy ndaha tewtew ege, əy dam ŋ kwambawal ŋ Pafaws, əy nda kəɗe uzam Perge ma ŋ hayak Pamfəyləya. Aya, Yuhana Markus a yakzata aka, a zen anta ŋ Urusaləyma. 14A dəwze anta ca, ata Pawl ey Barnabas, əy gwarzam aka ŋ Perge wese, əy nda kəɗa ŋ uzam Antakəya ma ŋ hayak Pəysəydəya. A pes ma ata zazak mala Yahudu ege, əy dam a ujek ma ata rak Gazlavay mala Yahudu ege, əy nja ka ŋma. 15A dəwze maa əy kéjəŋge ma maŋkanaŋkan ma ŋ ɗerewel mala Musa leŋ mala uzəye ma zlap ma mala Gazlavay aza ege ca, madakal dakal mala ujek ma ata rak Gazlavay mala Yahudu ege, əy veletene zlap ŋ ata Pawl ey Barnabas wese, əy ŋgaya: «Zlana ege, mada zlap ma ata veletene ɓarɓar ŋ hejəye aka ca, hune kula aza ŋ zlap.»
16Aya, Pawl a gwarzam, a kafza ra anta, a zlap, a ŋgaya: «Hune hejəye Əysərayəyla ege leŋ hune ma karak Gazlavay ege, hune tehzekey zlam! 17Gazlavay mala hejəye ŋtakwaw Əysərayəyla ege, kámay jeje ŋtakwaw ege aza. Kágalzata aza maa əy ŋ hayak Məysəra. A dəwze anta, kádamata aza ŋ hayak Məysəra wese, a ɓarɓar anta ma dakal. 18A la anta va raŋfaɗ ege, a kahəbarata aka ata ata darzlam. 19Késlerata ŋseŋ hejəye aza ŋsəleɗ ŋ hayak Kanana, kéveletene hayak tata aza ŋ hejəye ŋtakwaw ege, ndar a la anta ŋ hayak tata. 20Səkan malaha ŋghe anta ege tewtew ca, əy kála va temere ŋfaɗ a rajaɓan ata darzlam wese.»
«A dəwze anta ca, Gazlavay, a veletene hejəye ma ja guma ege ata ha tata, ha hwas ata vah maa Samuyəyla, mba ma zlap ma mala Gazlavay, a ndaha. 21A dəwze anta, əy ɗawza Gazlavay ŋ veletene bay maa a kananja aka ata ha tata ŋ zam bay. A təwse ca, a veletene Sawl, mba Kəys, ma ndaha aka ta ata ŋseŋ Benyaməyn, a zam bay ata tata va raŋfaɗ. 22A dəwze maa a cakw Sawl aza ŋ bay ca, a cetene Dawuda ŋ uley anta. Gazlavay, a zlap ata Dawuda anta, a ŋgaya: “Sa kéndew aza ata ɗala maa sa kaɗawaw, ara Dawuda mba Yesa. A nala zlan tewtew ana maa sa kaɗawaw.” 23Gazlavay kéveletene Yesu, ɗala ma ata ŋseŋ Dawuda aza ŋ rehzata hejəye Əysərayəyla ege ana maa a zlap. 24Cemey, maa kándaha kwagwa səkwaw ca, Yuhana kéghwelzetene aza ŋ hejəye Əysərayəyla ege tewtew, a ŋgaya: “Hune bawza lanja ŋkune ege aza, hune lem laban aza a yam baptəysma!” 25Aya, maa Yuhana slaɓ ŋ tuwaɗza zlan anta ca, a zlap, a ŋgaya: “Hune deŋza ca, sa ca, sa vayay? Sa ca, sa ɗala maa hune kahəbar wese səkwaw. Cemey, ɗala a kanadaha a dəwze naka aka, kaw ŋ pal serek ŋte anta ca, sa kula səkwaw”.»
26Aya, Pawl a zlepetene zeney, a ŋgaya: «Zlana ege, hune hejəye ma ata ŋseŋ Əybərahəyma leŋ hune hejəye vedəye ma kahəmanza Gazlavay ege, Gazlavay a laɓaza ma ma ata rehzaheje ŋghe ca, ŋ kwakaw tewtew ŋtakwaw. 27Ca, hejəye ma ŋ Urusaləyma ege leŋ bay tata ege ca, əy kasan Yesu səkwaw. Əy kézləme zlap mala uzəye ma zlap ma mala Gazlavay ege maa əy kejəŋgeta ata pes ata pes, a pes ma ata zazak Yahudu ege səkwaw. Cemey, əy ghemew, əy law, ana maa uzəye mazlap ma mala Gazlavay ege, əy zlap. 28Kaw əy kéndew ma a heɗe ma ata ja aza ca, askwaw, cemey, əy zlepene Pəylatu ŋ ja aza. 29A dəwze maa əy lata səkan ege aza tewtew a heɗe ana maa kéŋtereye ŋ ɗerewel mala Gazlavay ca, əy tadakwaza ata mpe gafaŋgal, əy mpasaw, ŋ jeɓ. 30Cemey, Gazlavay kágwarzamaza aza ata lamac. 31A təwse ca, kéghwelzetene kusam anta ŋ wan ege vəram, ŋ hejəye maa əy ndaha aka tewtew ege ŋ Galəyləy, ha hwas ŋ Urusaləyma. Na ŋgha ca, əy kála tata ŋ hejəye ma kaghwal ma ata Yesu ege a tama hejəye. 32Nene yam, nene ghwalzahune Ma Mewe ma Taŋtaŋ ana zlap ca, ma maa Gazlavay a zlepetene ŋ jeje ŋtakwaw ege, a neletene wese. 33Na ŋgha ca, Gazlavay kálaheje səkan anta aza ŋ heje, heje uzəye anta ege, ta ŋ la gwarzamha Yesu aza ata lamac. Ana maa kéŋtereye ŋ ɗerewel Jabura, fasluwal gbak maa, a ŋgaya:
“Hwa ca, hwa Mba naka,
a tambaca, sa kámbawahwaw aza”.
34Gazlavay kágwarzamaza aza ata lamac, ndar a ɗaw ŋ rəɗa səkwaw. Kázlap njenjəwen, a ŋgaya:
“Sa navalahune bəzla naka ma keweɗ ege njenjəwen, ana maa sa zlepene ŋ Dawuda.”
35A zeney, kéŋtereye ata la wende zeney, a ŋgaya:
“Hwa kenegeɓza ɗala ma keweɗ aka ŋ rəɗa ca, askwaw.”
36Dawuda kélene zlan ŋ Gazlavay a heɗe heɗe ana maa a kaɗawaw. A dəwze anta ca, kámac anta, əy kámpas aza ŋ jeɓ a həzlar jeje anta ege, kárəɗa anta. 37Cemey, heje maa Gazlavay a gwarzamaza aza ata lamac wese ca, kárəɗa askwaw. 38Zlana ege, hune san aka, laghwal zlap ata lapal gay ca, a ndaha aka ta ara Yesu. Cemey, ma maŋkanaŋkan mala Musa ca, kula ŋ palzahune gay ŋkune ege aza səkwaw. 39Kaw vayay ma lamza Yesu aza ca, gay anta ege tewtew, əy képeleye aza. 40Ana ebe ŋghe, hune sla ka kadak kadak, ndar ma maa uzəye ma zlap ma mala Gazlavay ege əy zlap wese a ɗaw ŋ ndewzahune səkwaw:
41“Hune hejəye ma kaŋta ha ŋkune ege aza ana masan səkan ege ŋgha,
hune ŋga ŋkwaɓ, hune fətek ŋkune!
Sa nala zlan ma dakal ata vah ŋkune ŋghe,
Zlan ma dakal maa kaw ɗala a ghwalzahune ca,
hune kanalamza askwaw.”»
42Maa ata Pawl ey Barnabas wese, əy damha aza ŋ ujek ma ata rak Gazlavay Yahudu ege ca, hejəye əy zlepetene əy mezenha a pes ma ata zazak ma kandaha ŋ zlap ata ma ŋgha anta zeney. 43A dəwze maa hejəye əy kéweɗ tata ca, Yahudu ege vəram ey hejəye maa ata Yahudu ege səkwaw, ma səbar kwakwas mala Yahudu ege, əy səbarata ata Pawl ey Barnabas. Ŋ labara tata maa əy kalaw ca, Malaɓ ege wese əy kezlepetene, əy keveletene ɓarɓar ŋ nja ka ŋ zəhay mala Gazlavay kaw vepey.
Ata Sawl ey Barnabas əy baw kəɗa aha hejəye maa tata Yahudu ege səkwaw
44Maa pes ma ata zazak wende wese a hwasha aza ca, radakal hejəye ma ŋ uzam anta ege tewtew əy ɓecha ŋ zləme zlap mala Bay Madakal. 45Aya maa Yahudu ege əy gəre hejəye ma ɓecha ege vəram wese ca, əy la sərah ata Pawl, əy raɓa, əy kaɗaw ma anta səkwaw. 46Aya, ata Pawl ey Barnabas wese, əy zlepetene kaw a lalak askwaw, əy ŋgaya: «Nene mar ŋ ghwal zlap mala Gazlavay ara hune ca, a heɗe a heɗe, cemey, hune kálamza zlap anta səkwaw. Ca, hune kéghem ha ŋkune ege aza, hune káhwas ŋ lem lanja ma kaŋtakw səkwaw səkwaw. Mavəday anta, nene yakzahune aka, nene nda ŋcene kəɗe ara hejəye maa tata Yahudu ege səkwaw. 47Cemey, Bay Madakal a zlepeney, a ŋgaya:
“Sa kácahwaw aza ŋ leweɗ hejəye vedəye,
ndar hwa detene leweɗ ŋ manhayak tewtew.”»
48Maa hejəye vedəye əy zləme zlap ŋgha anta ca, əy sasam, əy həmanza Bay Madakal ata zlap anta. Aya, hejəye maa Gazlavay a mayata aza ege ŋ lem lanja ma kaŋtakw səkwaw ara mbe ca, əy lamza ma mala Yesu.
49Zlap mala Bay Madakal a ŋtez ŋ hayak anta tewtew. 50Cemey, Yahudu ege əy ŋcakwzata weləye maŋcaɗaŋcaɗ ma kahəmanza Gazlavay ege leŋ madakal dakal ma a tama hejəye ma ŋ uzam anta ege, ŋ letene dadawar ŋ ata Pawl ey Barnabas. Əy gamata aza ŋ uzam anta. 51Ata Pawl ey Barnabas wese, əy ŋtewetene berdeberde ma ata ŋgas tata ege aka, əy nda tata ŋ Əykawnəya. 52Hejəye ma lamza ma mala Yesu aza ege ma ŋ Antakəya ege cemey, əy ghef a sasam leŋ a Zəwet ma keweɗ.
ទើបបានជ្រើសរើសហើយ៖
Zlan mala malaɓ ege 13: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
