Márákoso 11
11
Yésusu a iŋgáanámó na Yerúsareme
(Mat 21:1-11; Rúk 19:28-40; Yoh 12:12-16)
1Ará vá ma rii vá etá berebe na Yerúsareme na kɔ́ŋgɔ́ ra edɔŋgɔ éyé anáá Betepagéya na yene rá maráte a ma vá béráanámó anáá orívyá, Yésusu a ma tómá vihoóhóná vyáa vívé 2aye nawó anáá: «Ndáno na edɔŋgɔ éyé no enámó na wusó wá vinó eméye. Na yiŋgáánéná, no né etíyámó kána ra mwaná wa ikemerí emo wótéwóté ójó moto a arɔ́wɔ́ ka naáta, o me hurúnámáno no uré naá. 3Ŋgé moto a nó súsé anáá até kéye no eŋgámó naná, vinó ojárá naá anáá Okí kójó a vaŋgámó kó a né me wundyámó ará kwakwa.» 4Vihoóhóná ví ma endá wetíye kána ra mwaná wa ikemerí emo wótéwóté na naŋgáté na kɔ́ŋgɔ́ ra ohótó rá yanje emó na onjɔ́ŋɔ́ kó vá ma hurúné. 5Vato vámó ává vá ma ríi ɔ́wɔ́ vá ma wó súsé anáá: «Até eye no eŋgámó eméye? Na wusó wá até kówo no hurunámó nama eméje?» 6Vihoóhóná ví ma wó wundiyé ámó Yésusu a ma wó tévéré kó vá ma wó micé vá endá. 7Vihoóhóná imíví ví ma endá ma húména Yésusu na mwaná wa ikemerí, vá ma me táryááná cunú ráwó kó Yésusu a ma nuumáná na máná raá. 8Ombunu rá vato ó ma taá cunú ráwó na onjɔ́ŋɔ́, ávámó vá tá twané tá marété ótó vá ma ré swa na kondo. 9Vato ává vá katé rií na wusó na ava vá ma katé té byɔɔnɔ Yésusu vá ma ré rume anaá: «Niimi na Irɔŋgɔ! Ŋgá Irɔŋgɔ a utana ŋgáŋgó na ojo a urámó na ebérááná yá Okí! 10Ŋgá Irɔŋgɔ a utana ŋgáŋgó na tamba éjé yo urámó, tamba ra Dáviti kókó wa visó, niimí na pandó íjí na máná oyává!» 11Yésusu a ma endá na Yerúsareme wiŋgáana na yanje yá Iroŋgɔ. Ará a ma maná o té néména wandá wimé, a ma wɔ́rɔ́ vihoóhóná vyáa vyábɔ́t na vívé wenda na Betaníya ámó enéŋgá é ma yó jíne.
Yésusu a semámó tíné ra kána ra mpaŋganá emo
(Mat 21:18-19)
12Má iveri máa, ará vá ma urúkyé na Betaníya, Yésusu a ma ová njeŋge. 13A ma ená tíné ra mpaŋganá urehí e timbe twané. A ma endá ená ŋgé a hítyámó wetíye vaná vá vibomá ɔ́wɔ́. Ará a ma kerá berebe, a ma etíyé bɛ́ŋ twané na twané esene éyé ó ta ma rií táma ra vibomá. 14A ma wɔ́rɔ́ enjárá aye na werété owó anáá: «Moto a ta mó ne sɔ́sɔ́ hée ebomá yɔɔ́!» Vihoóhóná vyáa ví katé me vátɔ́rɔ́.
Yésusu a gúnámó vato vá mékíte na yanje yá Irɔŋgɔ
(Mat 21:10-17; Rúk 19:45-48; Yoh 2:13-16)
15Vá ma endá húmé na Yerúsareme. Yésusu a ma iŋgááná na yanje yá Irɔŋgɔ, kó a ma késyé ogúné vato ává vá ma ré sérá na ava vá katé kuse, a búŋgúnana va dévere vá vacéndíye mwení na vibóŋgó vyá ava vá katé sérá emeŋgá, 16kó a ta ma ré mice anáá moto a ndéŋgére na wandá embɔɔ́ naáté yá yanje yá Iroŋgɔ. 17Kó a ma késyé oyeére vato amáva anaá: «Naáte yá aŋgóŋgí ájá mwáŋ mwáŋ, Irɔŋgɔ a ma járá anáá: Vá mó béráanámó yanje yámé anaá yanje yá mbásóóríyé na wusó wá mayɔŋɔ mimé. Kó vinó no búndyámó yó etá asɔɔ́ rá vaŋgúŋgúbí!» 18Vagónó vá vacekiye mómí na vayéere vá mbéndɔ́ vá ma ová oráŋá maté kó vá ma késyé osɔsɔ anáá vá oná Yésusu. Wó je rií anáá vá katé me tíné esene éyé ehóhona yáa é katé táhá moto uŋgimé na otémá. 19Ará enéŋgá é ma sisé, Yésusu na vihoóhóná vyáa vá ma urúkyé na oŋgórá.
Ŋgɔ́tééna na mbásóóríyé
(Mat 21:20-22)
20Ará vá ma tómbá ibeesí na pé, vá ma ená tíné ra mpaŋganá éjé Yésusu a ma semá yó mána gwé hwɔs na eŋgaŋgá. 21Pyéere a ma buŋgé até éyé é ma tómbá kó a eŋgámó na Yésusu anáá: «Oyéere, néméná werété ówó o má sɛ́ɛmá wó mána okótána.» 22Yésusu a ma wɔ́rɔ́ enjárá aye nawó anáá: «Timbánó ŋgɔ́tééná na Irɔŋgɔ. 23Ŋgo nó ojánámó na vatɔ́ɔ́tɔ́ anáá ŋgé moto a járá na yene ojó anáá yó urúkye hɔ́rɔ́ yó endá obena naáté yá máŋá, a ríi ka timbe mpetɔ́ na otémá ráa, a je atɔ́wɔ́ anáá wandá ówó a mó járá wó eŋgávenámó, Irɔŋgɔ a né eŋgámó wandá mwané. 24Na wusó maté kówo njárámó na vinó anáá: Wimé ówó no né súsámó na mbásóóríyé, átɔ́wɔ́no anáá no mána timbe, kó no né enámó wó eŋgávena. 25Kó ará no ámó viténé na ovásoóriye, ŋgé no timbámó vaná vá enjárá na moto ává vá wo hwámó otémá rá wokáná, o me jwaámáno ukú ójó anáá tyó wa vinó ójó na máná a nó njwé vinó hónó muhusí mwá vinó.» [ 26]
Injwé rá Yésusu yó urámó háá
(Mat 21:23-27; Rúk 20:1-8)
27Yésusu na vihoóhóná vyáa vá ma wundé na Yerúsareme. Na itíndíkáná íjí Yésusu a katé váhóríye naáté yá yanje yá Iroŋgɔ, vagónó vá vacekiye mómí, vayéere vá mbéndɔ́ na vagónó ává na edɔŋgɔ vá ma uré ondo mó etíye. 28Vá ma járá naá anáá: «Na ŋguru ra áné kówo wo eŋgámó mamba ámá wo eŋgámó? Áné kójo a mó wo hwá ŋguru anáá wo eŋga mamba mwané?» 29Yésusu aye nawó anáá: «Ŋgo nó súsámó bɛ́ŋ cúcána imwesií; ŋgundíyámáno ŋgaráná kó mbaŋgámó o nó ojána na ŋguru ra áné kówo ŋgo eŋgámó mamba mwané. 30Áné kójo a ma tómá Yohánese anáá a dwe vato? Ye Irɔŋgɔ kee vato? Ŋgudíyámáno.» 31Vá ma késyé winimana vá wúnde ojáráana vámwané na vámwané anáá: «Ŋge to a wundíyé anáá: Irɔŋgɔ, A né járámó anáá: Na wusó wá até kówo no ta ma me kaŋga? 32Kó hónó ye to hítyámó orékána ojárá anáá: Vato?» Vá katé tiné ncumbí wa vato esene éyé bimé vá Katé buŋgana anáá Yohánese a ma ríi mwané tɔ́ɔ́tɔ́ wa ahúmíye maró wa Irɔŋgɔ. 33Kó vá ma wundíyé Yésusu anáá: «To ta ijímé.» Kó Yésusu a ma járá nawó anáá: «Noó hónó ta nó ojáná na ŋguru ra áné kówo ŋgo eŋgámó mamba mwané.»
ទើបបានជ្រើសរើសហើយ៖
Márákoso 11: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL