Rúkasa 19
19
Oráŋá rá Sakéyá
1Na weŋga ówó anáá Yésusu a iŋgáana na Yeríko, a cakámó oŋgórá 2Moto omo a ma rií awɔ ebérááná anáá Sakéyá a ma rií njwé ra vato ává vá wɔ́rɔ́nɔmó tása kó a katé timbe akúmé. 3A katé sɔsɔ anáá a ená áné kójo a ámó Yésusu kó a ta ma hítí esene éyé anáá vato vá ma rɔmbá ómwané a rií igɔrɔwɔ. 4A ma jowá na otéta wenda onaáta na máná ra werété índi a ená Yésusu ará a né tómbámó. 5Ará Yésusu a ma húmé na pandó mwané, a terémenamó oneétye aŋgísó na máná a me enámó aye naá anáá «Sakéyá sisé kwakwa ŋgeremenamó wiŋgáana na yanje yɔɔ́ wusí owó.» 6Kó sakée ama sise kwa kwa waka Yésusu na vitaka 7Vato bime ava vá ma ena ate eye e ma tombévénává ma kesyé oŋgugure vá ye anáá: «Moto ójó a ma enda iŋgaana na yanje yá yeŋga mabé.» 8Kó Sakéyá a kerenámó Okí ayaá: «Okí, mbaŋgámó weréena va wora raáté wa ekúmé ramé, kó wó a ríi anáá ŋgo ma wɔ́rɔ́ moto mwení mbunu, ŋgo me wundiyámó eŋgendɔ ene.» 9Kó Yésusu a ma járá naá anáá: «Wusí owó esɔ́tɔ́ éyé kɔ́rɔ́tɔ́tɔ́ é mó iŋgáana na yanje eyé, esene éyé ómwané honó a ámó mwaná Abaraháma. 10Na vatɔ́ɔ́tɔ́ Mwaná moto a ma uré anáá a sɔsɔ a wunde osótyé ava vá ma ríi dáŋgérí.»
Nkaná ra vikpama vyá góoro
11Amó vato vá katé me vátɔ́rɔ́, kó Yésusu a ma endá na wusó na enjárá okésyé o wó kwéna nkaná esene éyé vá ma ríi vá etá berebe na Yerúsareme kó vato vá katé buŋgana anáá edɔŋgɔ éyé na máná é váŋgamó osise na itíndíkáná mwané. 12Nkaná éjé Yésusu a katé wó kwéna kéejé: «Moto omo a ma ríi na noyómó ná vato vá jiní, a ma endá na edɔŋgɔ emó urehí anáá vá me neétye ahumu, kaá na nimé raá índi a enda etá. 13A rɔ́wɔ́ ka enda, a ma bérááná veŋga manɔnɔwɔ váa vábɔ́t o wó téŋgíye vipkama vyá góoro íví ví díyámó kó a ma járá nawó anáá: Ŋgáno mékíte ondo húmé ará ŋgo né endamó etá. 14Kó amó vato ává na edɔŋgɔ yáa vá katé me bena, vá ma tómá vato na nimé ráa índi vá endá járá anáá: “To ta diŋgé anáá moto omójo a rií ahumu rá visó.” 15Ítɔɔ náná vá ma me nuumíyé ahumu kó a ma endá wunde. A ma bérááná sɔ́ veŋga mɔnɔnɔwɔ váá ává a ma wó wundíyé mwení índi a jembe até éyé vá ma timbé na máná. 16Wa makésyé a ma uré a yé anáá: “Oyéere, ekpama yá góoro éyé o ma pwá é má byáná vipkama víndyé vyábɔ́t.” 17Ahumu a ye náa anáá: Naná wó ámó wusi! Usi wa yeŋga mɔnɔnɔwɔ, amó o má ríi ndíŋgirííŋ na mwaná wa wandá, ŋgo wo tírímiyamó njwé ra eŋgórá yabɔ́t. 18Ojo tii a ma uré aye naá anáá: “Oyéere, ekpama yá góoro éyé o ma pwá é má byáná vipkama víndyé vítáánó.” 19Ahumu a ma járá naá anáá: “Mamó ŋgo wo tírímiyamó njwé ra eŋgórá etaáno.” 20Yeŋga mɔnɔnɔwɔ índyé é ma endá uré, kó é ma járá anáá: “Oyéere, epkama yɔɔ́ yá góoro éyé o ma pwá kéeyé. Ŋgo ma vétééná na kɔ́ŋgɔ́ híté híté na cunú, 21esene ŋgo má ré wo tíné amó o ámó moto ójó a ta byará, o wɔ́rɔ́mó até éyé é ta ámó yɔɔ́, kó o buwamó até éyé o ta ma néma.” 22Ahumu a ma járá na á anáá: “Ombé wa eŋga mɔnɔnɔwɔ! Ŋgo wo jwósyámó na vipéŋgé vyɔɔ́ maté. O má ré jembe anáá ndo ámó moto ójó a ta byará, anáá ŋgɔ́rɔ́mó até éyé é ta ámó yamé, kó mbuwamó até éyé ta ma néma. 23Na wusó wá até kówo o ta endá ovétéena mwení ramé na báŋa ukú ójó anáá ará ŋgo né wundamó índi ŋgɔ́rɔ́ na ebyáná?” 24Kó ahumu a ma járá na vato ává vá ma ríi ɔ́wɔ́ anáá: “Bɔɔ́no ekpama yá góoro éyé a timbamó índi no eréena ojo a timbamó vipkama vyábɔ́t.” 25Vato vamó vá ma járá naá anáá: “Oyéere a etá timbe vikpama vyábɔ́t.” 26Ahumu a ma járá nawó anáá: Vá mó eréenamó ojo a timbamó, kaá ojo ka timbe, vá mó bɔ́ɔmó ítɔɔ vaná vá motéé úmú a timbamó. 27Na até éyé é néménamó vambeembéná vamé, ává vá ta ma díŋge anáá ndií ahumu ráwó, úráno nawó ará índi no wó sómbá vitoki na wusó wamé.»
Yésusu a endámó na Yerúsareme
28Ará Yésusu a ma máná o járá náná a ma endá na wusó na ogendɔ onaá na Yerúsareme. 29Ará vá ma ríi vá etá berebe na Yerúsareme na kɔ́ŋgɔ́ ra vidɔŋgɔ íví anáá Betepagéya na Betaníya pere ra yene yá marété ámá vá béráanamó anáá orívya, a ma tomá vihoóhóná vyáa vívé 30a ye nawó anáá: Ndáno na edɔŋgɔ éyé é ámo na wusó wá vinó. Ará no húmámó ɔ́wɔ́, no né etiyámó kána ra mwaná wa ikemerí woteeri ójó moto a me eŋga arɔ́ɔ́ ka naata ɔ́wɔ́ hurunano na ure naá ará 31ŋgé moto a ne súsé anáá: «Na wuso wate kówo no hurunámó mwaná wa ikemerí omójo? Vinó o me wundiye anáá Okí a káte me vaŋga.»
32Vihoóhóná íví vívé imívi ví ma endá wetíye wandá wimé amó Yésusu a ma járá nawó. 33Ará vá katé hurune ikemerí imíji, vato ává vá katé timbe nama mwané vá ma wó súsé anáá: Na wusó wá até kówo no hurunámó ikemerí imíji? 34Kó vá ma wundyé anáá: «Okí a káte me vaŋga.» 35Vá ma turé ikemerí berebe na Yésusu, ota cunú na máná ráa, oneétye Yésusu na máná. 36Yésusu a ndenda na máná ra mwaná wa ikemerí omójo, vámwané vá séta cunú na wusó wáa. 37Yésusu a ma húmé na pé éjé e wɔsɔmó ondo uré ówó na oŋgené rá marété má mbiti, kó ncámbá wa vihoóhóná a katé taka naá kó va ma kesyé ovaána esawo, vá gúmíye Irɔŋgɔ na wusó wá esimbá ájá vá ma ená. 38Kó vá katé járá anáá: Ŋga Irɔŋgɔ a utana ahumu ájá yó urámó nosanjá na niyó ná Okí, dɔ́ŋgɔrɔ́ɔ́ŋ a rií na máná kó niimí na Irɔŋgɔ ójó hébébé na máná.
39Va Pariséne ává vá ma ríi na raaté wa idíŋge rá vato mwané vá ma eŋgá na Yésusu anáá: «Oyéere, tombyé vihoóhóná vyɔɔ́!» 40Yésusu a ma wó wundíyé anáá: «Ŋgé vá bweená iŋgúté, atááné kája á né vaánamó esawo.»
Yésusu a vaŋgámó na wusó wá Yerúsareme
41Ará Yésusu a ma rií a etá berebe na Yerúsareme, a ma ená oŋgórá. Kó a ma túsúwé na mbií na wusó wá oŋgórá mwané. 42A katé járá anáá: 43«Itíndíkáná mwané yó urámó na wusó wɔɔ́ íjí vambeembéná vɔɔ́ va né háámó víkáné vyá mpimi ukú ójó anáá vá nɔ́ vitá nɔɔ, va né wo endétyamó pere iŋgímé. 44Vá né goramó na mamó na vato ává vá sɔ́tɔ́mó na mamó, vá ta né mice ítɔɔ itááné na máná ra itááné, esene éyé anáá o ta ma jémbe itíndíkáná íjí Irɔŋgɔ a ma uré anáá a wo eŋga wusi.»
Yésusu a gunámó va sera ava yanje yá Irɔŋgɔ
45Yésusu iŋgaanámó na yanje yá mbásóóriye kó egunámó va sérá 46Ayé nawo anáá: «Naáte yá aŋgóŋgí ájá mwáŋ mwáŋ, Irɔŋgɔ a ma járá anáá: Vá mó béráanámó yanje yámé anaá yanje yá mbásóóríyé na wusó wá mayɔŋɔ mimé. Kó vinó no búndyámó yó etá asɔɔ́ rá vaŋgúŋgúbí!» 47Mesi mimé Yésusu a katé yéere vato na yanje yá Irɔŋgɔ. Vagónó vá vacekiye mómí na njembe rá mbéndɔ́ na vagónó vá vato ává na edɔŋgɔ vá katé sɔsɔ anáá va me oná. 48Kó va ta jembe anáá vá pityámó weŋga esene éyé edɔŋgɔ yime e kate me vátɔrɔ na akéré.
ទើបបានជ្រើសរើសហើយ៖
Rúkasa 19: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
