Yohánese 3
3
Yésusu na Nikodéme
1Wó je rií anáá na ipɔké rá va pariséne, moto omo a ma ríi wɔ́ɔ́ vá me berana anáá Nikodéme, a rií ogónó na va Yúdene. 2Wutúú womó, a ma endá ená Yésusu aye naá anáá: «Oyéere, to ijímámó anáá Irɔŋgɔ ojo a ma wo tómá anáá o só hwá ehoóhona, esene éyé moto a ta hítí weŋga mesimbá ámá wo eŋgámó, ŋgé Irɔŋgɔ a ta ámó náá.» 3Yésusu a ma me wundíyé anáá: «Na vatɔ́ɔ́tɔ́ Na vatɔ́ɔ́tɔ́, na vatɔ́ɔ́tɔ́ ŋgo wo ojanámó anáá: Ŋgé moto a ríi ka wunde obyánávena, a ta hítí wená Edɔŋgɔ yá Irɔŋgɔ.» 4Nikodéme a ma me súsé anáá: «Twiiŋí kówo moto a hítyámó obyánávena hɔrɔ́ a etá irunú? Ye a hítyámó owunde wiŋgáana na ibúmu na netí owunde obyánávena?» 5Yésusu a ma me wundíyé anáá: «Na vatɔ́ɔ́tɔ́ Na vatɔ́ɔ́tɔ́, na vatɔ́ɔ́tɔ́ ŋgo wo ojanámó anáá, moto a ta hítí wiŋgáana na Edɔŋgɔ yá Irɔŋgɔ ŋgé a ríi ka byánávena na mateyá kó hée na Ireréŋgi yá Irɔŋgɔ. 6Owo wó byánávenámó na mewú wó ámó mewú, owo honó wó byánávenámó na mwáŋ mwáŋ wa ireréŋgi wó ámó ireréŋgi. 7Mámó ka kémbyé ámó ŋgo mó járá nɔɔ anáá no geremenámó owunde obyánávena. 8Puŋgi e pepámó ará e diŋgámó kó wovámó uduŋgú, wó je rií anáá o ta ijímé ará yo urámó ítɔɔ ará yo endámó, naná kówo moto ójó byánérí na ireréŋgi yá Irɔŋgɔ a ámó.» 9Nikodéme a ma járá naá anáá: «Twiiŋí kówo wandá mwané wó hítyámó weŋgavena?» 10Yésusu a ma me wundíyé anáá: «Mámó ójó o ámó oyéere na Ísayéere o ta ijímé motéé mwané? 11Na vatɔ́ɔ́tɔ́, Na vatɔ́ɔ́tɔ́, na vatɔ́ɔ́tɔ́ Na vatɔ́ɔ́tɔ́, na vatɔ́ɔ́tɔ́ ŋgo wo ojanámó anáá, to járámó wandá ówó to ijímámó kó to tisíyámó wandá ówó to ma ená, kó vinó no ta atɔ́wɔ́ metiseenye má visó. 12Ŋgé no a ríi ka atɔ́wɔ ará ŋgo nó ojánámó motée mwá cí, twiiŋí kówo no né atɔ́wɔmó ará ŋgo né nó ojánámó motée úmú na máná? 13Moto a ta ma naáta na máná, bɛ́ŋ Mwaná moto ójó a ma sísé ondo uré ówó na máná. 14Kó ámó Mósese a ma néétyé nɔɔ́ ra itwíŋí na ekwété yá edɔŋgɔ, wó géremenámó honó anáá Mwaná moto a rií néétyérí, 15ukú ójó anáá ojo a timbámó ipití naá a timbe esɔ́tɔ́ éyé kɔ́rɔ́tɔ́tɔ́. 16Esené Irɔŋgɔ a ma caká odiŋge cí rá ndono, kó a ma erééná nukí náa ná Mwaná ukú ójó anáá moto aá moto ójó a me atɔ́wɔmó a rií ka gwé, vedá a timbe esɔ́tɔ́ éyé kɔ́rɔ́tɔ́tɔ́. 17Irɔŋgɔ a ta ma tómá Mwaná waá na cí ra ndono anáá a jósyé cí ra ndono, a ma me tómá ukú ójo anáá a sótyé cí ra ndono. 18Ojo a me atɔ́wɔ́mó vá ta me jósyé, kó ojo a ta me atɔ́wɔ́ vá omana o me jósyé esene éyé a ta ma atɔ́wɔ nukí na Mwaná ná Irɔŋgɔ. 19Aaná kówo jósi a ámó: Ineŋgí é ma uré na cí ra ndono, kó vato vámwané vá ma diŋgé mbínó otómbá ineŋgí esene éyé ŋgeŋgéná ráwó í ámó mbé. 20Kaá ojo a eŋgámó wobé a benámó ineŋgí kó a ta uré ará ineŋgí esene éyé a tínámó anáá vá jémbe ŋgeŋgéná ráa. 21Wó je rií anáá ojo a eŋgámó até éyé é ámó vatɔ́ɔ́tɔ́ a urámó na ineŋgí índi vá ená anáá manɔnɔwɔ máa esene éyé má endámó uré na Irɔŋgɔ.»
Yésusu nawó na Yohánese
22Na nimé raá, Yésusu a ma endá na vihoóhóná vyáa na edɔŋgɔ yá Yúdeyá, otúmbyé metúú ɔ́wɔ́ a dwe vato. 23Yohánese honó a katé dwe vato na osombo ójó berebe na edɔŋgɔ éyé anáá Sarími esene éyé matéyá má katé romba ɔ́wɔ́. Osombo mwané vá béráanámó anáá Énɔŋ kó vato vá katé urána vá dúuwana. 24Na itíndíkáná mwané, vá ma ríi vá árɔ́wɔ́ ka nɔ Yohánese na mboo. 25Kó vihoóhóná vimó vyá Yohánese ví ma késyé mpetɔ́ na mwaná wa va Yúdene na até éyé é néménámó osowa ówó iwééwérí, 26kó vá ma endá etíye Yohánese váye naá anáá: «Oyéere, moto ójó a katé rií nɔɔ mbóró ra osombo rá Yurudéne, ójó o má tíséényé na wusó wáá, tetee ojó a dwámó kó vato bímé vá endánámó na ómwané!» 27Yohánese a wó wundíyé anáá: Moto a ta hítí otimbe wandá ŋgé Irɔŋgɔ a ríi ka me hwá. 28Vinó maté no ámó vatiseenye vamé ará ŋgo má járá anáá: Ta ámó ojo Irɔŋgɔ a ma tómá, ndo ámó ojo vá ma tómá anáá ŋgo me héndéna pé. 29Okótó ojó a baánámó a ámó na wusó wá enémé, wó je rií anáá mbérá wa moto ójó a káte baána a ámó ɔ́wɔ́ a vátɔ́rɔ́, kó a takámó mbunu ará a ovámó mií ra mbérá waá ójó a káte baána omójo. Wandá mwané kówo ndo ámó na vitaka kó vitaka mwané ví ámó táásé. 30Wó géremenámó anáá ómwané ójó Yésusu a góná, índi noó círána.
Ojo a endámó uré na máná
31«Ojo a endámó uré na máná a tómbámó wandá wimé, ojo a endámó uré na cí a ámó na wusó wá cí kó a ma járá mamba má cí. Ojo a endámó uré na máná a tómbámó wandá wímé, 32kó a tiseenyámó wandá ówó a ma ená owunde wová, kó moto a ta atɔ́wɔ́ enjárá raá. 33Ojo a atɔ́wɔmó enjárá raá a atɔ́wɔmó hónó anáá Irɔŋgɔ a ojámó vatɔ́ɔ́tɔ́, 34esene éyé ojo Irɔŋgɔ a ma tómá a ojámó vipéŋgé vyá Irɔŋgɔ, kó Irɔŋgɔ a me hwámó Mwáŋ mwáŋ wa Ireréŋgi ka na ombárá. 35Isyé Mwáná a diŋgámó Mwaná kó a ma me wundíyé wandá wímé na embɔɔ́. 36Ojo a atɔ́wɔmó Mwaná Irɔŋgɔ a timbámó esɔ́tɔ́ éyé kɔ́rɔ́tɔ́tɔ́, ojo a ta atɔ́wɔ́ Mwáná Irɔŋgɔ a ta né timbe esɔ́tɔ́ éyé kɔ́rɔ́tɔ́tɔ́ kó mbésé ra Irɔŋgɔ e né riíríyámó naá.»
ទើបបានជ្រើសរើសហើយ៖
Yohánese 3: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
