Ŋgengéná 3
3
Pyéere na Yohánese vá odónámó isúsuúru
1Isí emó, Pyéere na Yohánese vá ma ríi na onaá ówó na yanje yá Irɔŋgɔ na wusó wa mbásóóríyé ra maworo mátátó má enéŋgá. 2Na ohótó rá iruŋge rá yanje yá Irɔŋgɔ ójó vá ma ré béráana anáá Usi wa ohótó, moto omo a ma ré rií ɔ́wɔ́ ójó a ma byánávéná isúsuúru. Isí yimé va ma ré me byá o me mice na ohótó omójo ukú ójó anáá a ɔŋgɔɔnɔ vato ává vá ma ré iŋgáanana na yanje yá Irɔŋgɔ mwení. 3Ará a ma éna Pyéere nawó na Yohánese vá ríi anáá vá iŋgáana na yanje yá Irɔŋgɔ kó ma wó súsé mwení. 4Pyéere na Yohánese vá bárá aŋgísó o me núné kó Pyéere a ma eŋgá naá anáá: «O só néménámó.» 5Kó moto a ma wó baráyáná aŋgísó esene éyé a ma ré piti anáá vá me hwámó wandá. 6Kó Pyéere a ma járá naá anáá: «Tɔɔ mwení tɔɔ góoro ta timbé, vedá até éyé timbámó, ŋgo wo hwámó. Na ebérááná yá Yésusu Kirítu ójó na Nasaráte, hatééná o denda!» 7Kó a ma me wɔ́rɔ́ na ombɔɔ́ rá ombaábáné o me aka anáá a hateena. Kó isimí hónó, eŋgoró ráa na kárárá ráa mó má váwóndéténá. 8Moto nakó a etá eténé kó a ma késyé ondenda. A ma iŋgááná na yanje yá Irɔŋgɔ orɔŋgɔ na Pyéere na Yohánese a ndenda a jerume hɔrɔ́ a gúmíye Irɔŋgɔ. 9Vato bimé vá ma me ená a ndenda a gúmíye Irɔŋgɔ. 10Ará vato vá ma me renjá kó vá ma jembé anáá: Ómwané kójo a katé rií indidií na Usí wa ohótó a ɔŋgɔɔnɔ mwéni, bimé vá ma ré keékembye, munú o wó dáŋgá na até éyé é ma tómbávéna na wusó wa moto omójo.
Pyéere a ma járá na vato naáté yá yanje yá Irɔŋgɔ
11Moto omójo a ma híráná orátéena Pyéere nawó na Yohánese ka ne wó urúkye. Vato bimé vá ma ré keékembye kó vá ma mbaŋgéyáná ondo wó etíye na mwaná wa ohótó ójó vá béráanámó anáá ohótó rá Sárómono. 12Ará Pyéere a ma ená naná, a ma járá na ncumbí wa vato omójo anáá: «Aá vato ává na Ísayéere, na wusó wá até kówo no kémbyámó até éyé é ré tómbávena? Na wusó wá até kówo no só neménámó mámó wéŋga anáá wó ámó na ŋguru ra visó ítɔɔ na wusó wá usi wa esɔ́tɔ́ yá visó kówo to mó éŋga anáá moto ojó a ndenda? 13Irɔŋgɔ wa Abaraháma, wa Isáka na Yákɔwɔ, Irɔŋgɔ wa va kókó va visó a ma erééná eŋga manɔnɔwɔ waá ójó Yésusu niimí. Yésusu mwané ójó vinó no ma kává, vinó owunde o me váráŋga na aŋgísó rá Piráta, hɔ́rɔ́ Piráta mwané a ma ríi a etá kpá kpá anáá a me mice. 14No ma váráŋgá ojo mwáŋ mwáŋ a wunde orií ndíŋgirííŋ, kó no ma súsé anáá vá míce yoná vato. 15Ŋgómbá ra esɔ́tɔ́ éjé no ma eŋgá anáá vá oná, Irɔŋgɔ a má me honóná na raaté wa vigwé kó to ámó va wúsinete. 16Na wusó wá ŋgɔ́tééná na ebérááná yá Yésusu kówo moto ójó no néménámó ojó, no wunde o me ijíme hónó a ámó eténé, kó ŋgɔ́tééná éjé to timbámó na Yésusu kéje é mó ondóna moto ojó na wusó wá vinó. 17Wó je rií anáá va mbísó, njembámó wusi na wusi anáá vinó na jwé rá vinó no má eŋgá náná esene éyé no ta káté jembe vatɔ́ɔ́tɔ́. 18Irɔŋgɔ ómwané a ma ríi a mána woja na uŋgúté rá vahúmíye maró váa bimé anáá Etómá yáa é mó enámó etɔɔ mbunu, kó a má eŋgá hónó náná. 19Céndyáno sɔ́ vambé vá púrú vá vinó, no wundena Irɔŋgɔ na eŋgoró ukú ójó anáá nyéŋgé rá vinó í híndyévena. 20Kaá ɔ́wɔ́ Okí a né no hwámó mutíndíkána mwá ihwéri owunde o nó tóména Yésusu, Etómá yáa éyé a ma késyé wijata na wusó wá vinó. 21Na itíndíkáná ijí a geremenamó omana ríi na máná ondo húmé na metúú ámá wandá wimé wó mó wúndámó otékávéna ámó Irɔŋgɔ a ma ojá kɔ́ɔ́m na uŋgúté rá va mwáŋ mwáŋ vá vahúmíye maró váa. 22Mósese a ma késyé woja anáá: Okí Irɔŋgɔ wa vinó ámó nó tóménámó ahúmíye maaro waá sɛ́ɛm ámó noó, ámó ríi ámó moto ójó naáté yá noyomo na vinó kó no mo yánámó weŋgá até yimé ámó to no jánámó. 23Kó moto oŋgime ójó a ta né ová ahúmíye maró wa Irɔŋgɔ mwané, vá mó me baketámó na raaté wa noyómó ná Irɔŋgɔ, o me oná. 24Kó vahúmíye maró va Irɔŋgɔ bimé okésyé owo na Samwéere ondo humé hwɔs na ava vá ma me byɔɔnɔ́, vá ma ojá até éyé é tómbávenámó eyé na itíndíkáná ráwó. 25Vinó káva no ámó vaná vá vahúmíye maró, kó iretye éyé Irɔŋgɔ a ma tánéná va kókó vá vinó é ámó na wusó wá vinó, esene éyé a ma járá na Abaraháma anáá: Ŋgo mó utanámó ncárana na ebonda yɔɔ́ ɔ́wɔ́ hónó kówo toyómó timé ótó na cí tó mó tímbámó ncárana. 26Wó ámó na wusó wa vinó kówo Irɔŋgɔ a ma késyé otómá eŋga manɔnɔwɔ waá anáá a enda nó utána nosanjá ombótá ójó anáá ámó moto a mice vibé vyáa vyá ŋgeŋgéná.»
ទើបបានជ្រើសរើសហើយ៖
Ŋgengéná 3: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
