Ŋgengéná 15
15
Iwónjá rá vatɔ́wɔ íjí na Antiyóso í sámó na maró wa bwenjí
1Vato vámó vá má enda uré na Yúdeyá anáá vá enda na Antiyóso, kó vá katé eréena vatɔ́wɔ vambé vá ndébɔ́ vá yáá: «No ta ámó oríi sótyérí ŋgé no a ríi ka ríi anjánjé ámó mbéndɔ́ rá Mósese e járámó.» 2Póoro na Baranabása vá ta ma ríi míi emweesii nawó na uku ra enjárá mwané kó vá ma timbé ekáné mpetɔ́, kaá vá ma wɔ́rɔ́ combena anáá Póoro na Baranabása na vato avámó vá ne endámó na Yerúsareme anáá vá enda onona enjárá mwané orɔŋgɔ na enásá na vagónó. 3Iwónjá rá vatɔ́wɔ í ma wo hwá yáka na wuso wa oŋgendɔ ráwó mwané. Vá ma cáká na Penisíyá, na Samaríyá vá té ojá ámó va hayídene vá ma céndyé watɔ́wɔ Irɔŋgɔ, kó vatɔ́wɔ vá ma ríi na vitaka ará va ma ová cómó mwané. 4Iwónjá rá vatɔ́wɔ na enásá orɔŋgɔ na vagónó vá ma wó aká ará vá ma húmé na Yerúsareme kó vá ma wó ojáná até yimé éyé Irɔŋgɔ a ma eŋga nawó.
Vá héndámó enjárá na Yerúsareme
5Kó vá Pariséne vámó ává vá búndé vatɔ́wɔ vá katé járá anáá: «Vá géremenámó wanja va hayídene vá wúnde o wó tévére anáá vá béerye mbéndɔ́ ra Mósese.» 6Enásá na vagónó vá ma váwónjééná anáá vá onowona enjárá mwané. 7Amó vá katé ríi ríi na mpétɔ́, kó Pyéere a ma wɔ́rɔ́ enjárá ayáá: Va mbísó, no jembámó anáá Irɔŋgɔ a ma ŋgijétá na raáte wa vinó wó etá kɔ́ɔ́m ukú ójó anáá ŋgo ojana va hayídene Usi wa cómó índi vá ová, vá atɔ́wɔ. 8Irɔŋgɔ ójó a jembámó étéma ra vato a ma tisííyé na wusó wáwó ará a ma wó hwá Mwáŋ mwáŋ wa Ireréŋgi ámó a ma só hwá visó hónó. 9A ta ma vaá céndi na vámwané na visó kó a ma wó sová etémá esene éyé vá ma atɔ́wɔ́. 10Tetee ojó sɔ́, na wusó wá até kówo no diŋgámó anáá no neétye Irɔŋgɔ mbésé? No diŋgámó anáá no tweéna vihoóhóná ebyá éyé vá kókó vá visó itɔɔ visó maté to ta ma hítí obyá na wusó wá até? 11To atɔ́wɔmó anáá Okí Yésusu a só sótyámó na ntá raá sɛ́ɛm ámó vá mwané hónó.
12Kó iwónjá rá vato íjí í ma ríi ɔ́wɔ́ í ma obá ihóhó, káá vá ma vátɔ́rɔ́ Póoro na Baranabása vá wó ojána mesimbá mimé na mamba má okémbyé ámá Irɔŋgɔ a ma eŋgá nawó na va hayídene. 13Ará vá ma maná ojárá, Yáka a ma wɔ́rɔ́ enjárá ayáá: «Va mbísó, mbátɔ́rɔ́mánó. 14Símono a ré wunde o só ojáná ámó Irɔŋgɔ na makésyé, a ma wɔ́rɔ́ itíndíkáná anáá a ijata noyɔŋɔ náa na raaté wá va hayídene. 15Kó wandá mwané wó géremenámó na até éyé vahúmíye maró vá Irɔŋgɔ vá ma járá esene éyé wó ámó tiré tíré anáá:
16Na nimé raá ŋgo mó wúndámó ohaá erárá yá Dáviti éyé é ma báábáŋgá.
Ŋgo mó wúndámó oneétye até éyé é ma cáná na yanje mwané kó é mó wúndámó eténé.
17Ɔ́wɔ́ kówo vato avámó vá né sɔsɔmó Okí,
na mayɔŋɔ mimé ámá má byámó ebérááná yámé.
Náná kówo Okí a ma járá,
kó a eŋgámó até éyé a ma járá ka ebyé.»
18A ma eŋgá anáá vá jémbe mbuŋgáná ráa kɔ́ɔ́m.
19Kó Yáka a ma járá sɔ́ anáá: «Na mbuŋgáná rame, to ta geréméná weréene va hayídene ává vá atɔ́wɔ́mó Irɔŋgɔ vindíndiŋ. 20Vedá ŋgáno to no wó tírana anáá vá vásaára manyɔ́tɔ́ má vihekere yá ovásoóriye, vá vásaára ibamba, vá rií ka nyá nama éjé vá mó otá itoki miné ka júré. 21Esené okésyé ówó na mutíndíkáná mwá póná, vato vá ojámó mbéndɔ́ ra Mósese na eŋgórá iŋgimé, ámó vá bánámó mbéndɔ́ mwané na byanje vyá mbásóóríyé isí yimé yá ihuwe.»
Enásá na vagónó vá tóménámó va hayídene kárate
22Kó enásá na vagónó orɔŋgɔ na Iwónjá rá vatɔ́wɔ vá ma wɔ́rɔ́ cómbéná anáá vá ijámó vato ává vá né endámó tíráana Póoro na Baranabása na Antiyóso, kaá vá ma ijátá Yúde ójó vá katé béráana anáá Barásábasa na Sírasa, vato amáva vá katé timbe mpí mbunu na raaté wa vatɔ́wɔ. 23Kárate ójó vá ma wó hwá, vá ma tiré ɔ́wɔ́ anáá: «Visó ává enásá na vagónó orɔŋgɔ na vatɔ́wɔ, to vétíyámó va mbísó ává vá hayídene na Antiyóso ójó na Siríyá kó na edɔŋgɔ yá Círicíyá. 24To má ová anáá vato vámó ává na visó vá má uré ondo nó búndyé munú owunde o nó vaá mesisi na vipéŋgé vyáwó, jembáno anáá até visó káva to má wó tómá. 25Wandá mwané kówo visó bimé to má wɔ́rɔ́ cómbéná anáá to ije vato ává vá né endámó tíráana va mbérá vá visó ává Baranabása na Póoro ɔ́kɔ́ na vinó. 26Vato amáva vá má nééná esɔ́tɔ́ yáwó na wusó wá ebéráá yá Okí wa visó ójó Yésusu Kirítu. 27To nó tóménámó sɔ́ Yúde na Sírasa anáá vá wundé okumutye até éyé to má nó tiréná. 28Esené Mwáŋ mwáŋ wa Ireréŋgi na visó maté to má sombá anáá to ta né nó tweéna ebyá índyé, bɛ́ŋ mamba ámá má cákámó orií na mpí amá, má ámó anáá: 29Vinó ka nyá jambó iji vá neénámó vihekere, vinó ka nyá miné na nama íjí vá otámó itoki, kó ovásaára ibamba. Ŋgé no a vásáárá mamba amáma, no né eŋgámó wusí. To nó vétíyámó naáté yá wonavéne!»
30Kó Póoro, Baranabása, Yúde na Sírasa vá ma saá na Iwóŋjá rá vatɔ́wɔ wenda na Antiyóso kaá o wónjéena vatɔ́wɔ o wó cékiye kárate. 31Vá ma ráŋá kárate kó moto uŋgimé a ma rií táásé na visaŋgena esene éyé a katé wó hwá wonotó. 32Yúde na Sírasa ámó vá ma ríi vahúmíye maró vá Irɔŋgɔ, vá ma járááná téé na vatɔ́wɔ anáá vá wó hwá wonotó vá wúnde orerye ŋgɔ́tééná rawó. 33Vá ma ríi ɔ́kɔ́ mwaná wa itíndíkáná na Antiyóso kó vatɔ́wɔ vá ma wo micé anáá vá endá hɔrɔ́ vá wó táména usi wa oŋgendɔ ará vá wundámó na vato ává vá ma wó tómá. 34Kó Sírasa a ma sómbá anáá a cánámó ɔ́wɔ́. 35Póoro na Baranabása vá mwané vá ma dyeené na Antiyóso orɔŋgɔ na ombunu rá vásɔ́ɔ́, va yeére vato vá wúnde woja Usi wa cómó wa maró má Okí.
Póoro na Baranabása vá sámó
36Na nimé ra itíndíkáná imó, Póoro a ma eŋgá na Baranabása anáá: «Ŋgá to enda to té heremana vatɔ́wɔ ává na eŋgórá iŋgimé éjé to má ójá maró má Okí ɔ́wɔ́, índi to ená ombárá ójó vá etá.» 37Baranabása a ma diŋge anáá vá enda na Yohánese ójó ebérááná anáá Márákoso, 38kó Póoro a ta ma díŋge wandá mwané esene éyé Márákoso mwané a ma wó kútyé na Pampiríyá kó a ma ríi a etá ka ne wó aká na manɔnɔwɔ máwó. 39Kó vá ma timbé ekáné cáŋgó éjé e ma eŋgá anáá vá sá. Baranabása a ma wɔ́rɔ́ Márákoso kó vá ma wɔ́rɔ́ sitíme wenda na ihómá ná Sípere. 40Póoro ómwané a ma vábáyétá na Sírasa kó vá ma endá hɔ́rɔ́ vatɔ́wɔ vá omána wó eréena na ntá ra Okí. 41Kó Póoro a ma endá na vidɔŋgɔ vyá Siríyá na Ciricíyá a té rerye Mowónjá mwá vatɔ́wɔ nótó.
ទើបបានជ្រើសរើសហើយ៖
Ŋgengéná 15: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
