Ŋgengéná 14
14
Póoro na Baranabása vá ámó na oŋgórá rá Ikoniyúmu
1Na Ikoniyúmu, Póoro na Baranabása vá ma iŋgááná naáté yá yanje yá mbásóóríyé yá va Yúdene. Vá katé oja maró má Irɔŋgɔ kó ncumbí wa vato, va Yúdene itɔɔ va hayídene vá ma búndé vatɔ́wɔ. 2Kó va Yúdene avámó ává vá ta ma atɔ́wɔ vá ma nehíyé va hayídene índí vá tímbe vambé vá mbuŋgáná na vatɔ́wɔ. 3Kó Póoro na Baranabása vá ma ríi téé na Ikoniyúmu. Vá ma ré járáana ka tíné, vá tímbe ipitína Okí, kó Okí a katé wó hwá ŋguru éjé anáá vá eŋgá mesimbá na mamba má okémbyé, naná kówo a katé tíhíye anáá maró má ntá ámá Póoro na Baranabása vá katé ojana vato má katé rií vatɔ́ɔ́tɔ́. 4Ncumbí wa vato ává na oŋgórá a ma saá, vámó vá rií na nimé ra va Yúdene, avámó vá ríi na nimé ra enásá. 5Va hayídene, va Yúdene na jwé ráwó vá ma sombá anáá vá tuúriyámó Póoro na Baranabása, kaá vá wó oná na atááné. 6Kó vato ává váváné amáva vá ma jembé até éyé é katé váheéhenda, kó vá ma bwɔ́nɔ́ wenda pere éjé na eŋgórá ra Rikawoníyá, eŋgórá mwané kéejé: Rísitere, Derebéya na éjé na kɔɔ́kɔ́ŋgɔ́. 7Ɔkɔ́ hónó vá ma késyé woja Usi wa cómó.
Póoro na Baranabása vá ámó na oŋgórá rá Rísitere
8Na Rísitere, moto omo a katé rií ɔ́wɔ́, a ma byánávéná isúsuúru kó a ma ríi a arɔ́wɔ́ ka ndenda. 9Isi émó, a katé vátɔ́rɔ́ Póoro a járáana, Póoro a ma me néénéméná kó a ma ená anáá moto mwané a katé timbe ŋgɔ́tééná anáá índi a ondówa. 10Kó a ma járá naá mií na máná anáá: «Hatééná eténé pip na eŋgoró rɔɔ!» Moto a ma hurúwé okésyé ondenda. 11Ará ncumbí wa vato a ma ená wandá ówó Póoro a ma eŋgá, kó vá ma késyé orume na enjárá éjé na edɔŋgɔ yá Rikawoníyá anáá: «Va sambé vá má búndáná vato kó vá má sísaná na visó.» 12Vá katé béráana Baranabása anáá: «Sambé ójó Sése,» Póoro anáá: «Eremése.» Esené Póoro kójo a katé járáana enjárá. 13Acekiye mómí wa Sése a katé timbe yanje yá sambé mwané na yiŋgááná yá oŋgórá, kó a ma uré na vinémé vyá ndɔne húwé húwé na vá paráwa, otérémena na ohótó rá yanje yá sambé omójo orɔŋgɔ na ncumbí wa vato, vá ma diŋgé anáá vá eréena enásá mómí. 14Ará Baranabása na Póoro vá ma ová ndɔ́ŋɔ́ mwané, vá ma saróná cunú ráwó wenda kwakwa na raaté wa ncumbí wa vato vá rúme anáá: 15«Aá va mbérá váámé, na wusó wá até kówo no eŋgámó náná? Visó hónó to ámó vato sɛ́ɛm ámó vinó! To no urénámó na Usi wa cómó ukú ójó anáá no mice motéé umúmu esene éyé mó ta ámó na mpi, vedá índi no mbúndyé aŋgísó na Irɔŋgɔ ójó a hwenámó esene éyé, ómwané kójó a ma héndá máná, cí, máŋá na motéé mwimé úmú ɔ́wɔ́. 16Na póná, a ma micé mayɔŋɔ mimé má byɔ́ɔnɔ pé ráwó. 17Wó je ríi anáá Irɔŋgɔ a ma wó tíhíyé andiŋgé ráa esene éyé a ma nó tóméná towórá na mebuwe na usi wa itíndíkáná. A nó hwámó manyá a wunde onwíyé etémá ra vinó na visaŋgena.» 18Itɔɔ ámó enásá e katé járá náná, ncumbí wa vato omójo háŋé háŋé bɛ́ŋ anáá a wó hwá mómí kó vá ma wó suryé maté notó.
19Va Yúdene vámó vá ma endá urána na Antiyóso ójó na pisidíyá kó na Ikoniyúmu kó vá ma eŋgá anáá ncumbí wa vato a eŋga até éyé vá né járámó nawó. Vá ma twáná Póoro atááne anáá vá me oná kó vá ma me turé o me uryé na oŋgórá ondo me umbe vá mbúŋgana anáá a ogwé. 20Ará vihoóhóná ví ma váwónjééna na kɔ́ŋgɔ́ raá, Póoro a ma hatééná wiŋgáana naáté yá oŋgórá. Míveri máa, kó a ma endá na Derebéya nawó na Baranabása.
Póoro na Baranabása vá wúndámó na Antiyóso ójó na Siríyá
21Ará Póoro na Baranabása vá ma maná woja Usi wa cómó na oŋgóra rá Derebéyáyá, ombunu rá vato ó ma búndé vihoóhóná kó vá ma wundé otómbéna na Rísitere, na Ikoniyúmu kó na Antiyóso ójó na Pisidíyá. 22Va katé kírítiye etémá ra vihoóhóná vá wúnde o wó sítiye anáá vá rií kírítítí na ŋgɔ́tééná kó vá katé járá nawó anáá: «To geremenámó otimbe ombunu rá vitɔɔ ukú ójó anáá to iŋgáana na Edɔŋgɔ yá Irɔŋgɔ.» 23Póoro na Baranabása vá ma ré tɔ́wɔ́ vagónó na mowóŋjá mwá vatɔ́wɔ mwimé. Vá katé vasoóriye na wusó wáwó hɔrɔ́ vá eŋgá iki rá manyá. Kaá ará vá mánámó vá katé tíhíye Okí ójó vá ma atɔ́wɔ́ vato mwané.
24Kó Póoro na Baranabása vá ma caká edɔŋgɔ yá Pisidíyá ondo húmé na Pampiríyá, 25woja maró má Irɔŋgɔ na oŋgórá rá Peregéyá kó na nimé éjé ɔ́wɔ́ vá ma endá na oŋgórá rá Ataríya. 26Ohúmé ówó na Ataríyá, va má wɔ́rɔ́ sitíme owunde na Antiyóso ójó na Siríyá, na oŋgórá mwané kówo vá ma wó erééná na ntá ra Irɔŋgɔ na wusó wá manɔnɔwɔ ámá vá ré mana weŋgá. 27Ará vá ma endá jine, kó vá ma wónjééná Iwónjá rá vatɔ́wɔ o wó ojána mamba mimé ámá Irɔŋgɔ a ma eŋgá nawó. Caké caké ámó a ma bunéná va hayídene ohótó ra ŋgɔ́tééná. 28Kó vá má túmbyé itíndíkáná na vihoóhóná.
ទើបបានជ្រើសរើសហើយ៖
Ŋgengéná 14: tii
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, CABTAL
