Márko̱s 15
15
Na̱ka̱ jiꞌyáa Jesús ná inuu Piláto̱
(Mt 27.1-2,11-14; Lc 23.1-5; Jn 18.28-38)
1A̱ꞌkhue̱n rí phú miꞌcha̱ niguáꞌdáá awan dxakuun tsí gíꞌdoo numúú gajmíí xa̱bo̱ buanuu, gajmíí xa̱bo̱ tsí nusngáá xtángoo jamí mbá xúgíin xa̱bo̱ buanuu ede̱. A̱ꞌkhue̱n ni̱ru̱ꞌwáa̱ Jesús, jamí nigóo̱ juya̱a̱ ná inuu Piláto̱. 2Piláto̱ niraxu̱u̱ Jesús:
―Á ikháánꞌ ñajwaanꞌ Thúngaa drígu̱ún xa̱bo̱ judío̱ dxe̱ꞌ.
Jamí Jesús niriꞌña:
―Jmína̱á máꞌ ikháánꞌ irathán.
3A̱ꞌkhue̱n dxakuun tsí gíꞌdoo numúú nuni̱i̱ mbaꞌa aꞌkhúun Jesús. 4A̱ꞌkhue̱n Piláto̱ niraxu̱u̱ mbu̱júu Jesús: «Á nda̱a̱ nitháan rí ma̱triꞌña rá. Athayáá rí mbaꞌa rí nuthee̱n rí nuni̱i̱ aꞌkháanꞌ». 5Xómáꞌ Jesús ni máꞌ xúꞌkhue̱n táriꞌñee̱ nimbá, ikhaa jngó Piláto̱ phú nimakuu.
Nambánuu rí ma̱ja̱ñúu Jesús
(Mt 27.15-31; Lc 23.13-25; Jn 18.38—19.16)
6Mbámbá rí nagájnuu ndxa̱a̱ Páskua̱, Piláto̱ naꞌne-jríya̱a̱ꞌ mbáa xa̱bo̱ tsí kra̱ꞌaa géjwa̱nꞌ, asndo tsáa máꞌ tsí gúnda̱ꞌa̱ xa̱bo̱ xuajen rí ma̱jríya̱a̱ꞌ. 7Nákhí mbiꞌi rúꞌkhue̱n kra̱ꞌaa géjwa̱nꞌ mbáa xa̱bo̱ tsí mbiꞌyuu Barabás. Kra̱ꞌaa̱ gajmíi̱ a̱nguii̱n numuu rí nixkaxi̱i̱ xkujndu ná xuajen jamí nixíya̱a̱ mbáa xa̱bo̱. 8A̱ꞌkhue̱n ni̱xu̱ꞌma-mijná xa̱bo̱ tsí mbaꞌiin ná inuu Piláto̱, jamí ni̱gíꞌdíi̱n ni̱nda̱ꞌáa̱ rí ma̱ꞌnii̱ rí naꞌne jayuu̱ máꞌ.
9A̱ꞌkhue̱n rí Piláto̱ niriꞌña: «Á nandalaꞌ rí ma̱ni̱ꞌñúu Thúngaa drígu̱ún xa̱bo̱ judío̱ dxe̱ꞌ». 10Numuu rí ndiꞌyoo̱ máꞌ rí dxakuun tsí gíꞌdoo numúú, ni̱xna̱xíi̱ Jesús ná inuu̱ ga̱jma̱á numuu rí naxígúu̱nꞌ juyáa̱. 11Xómáꞌ dxakuun tsí gíꞌdoo numúú ni̱sngrúꞌúu̱n xa̱bo̱ tsí mbaꞌiin rí mu̱ndxa̱ꞌwa̱, kajngó Piláto̱ maniñuu Barabás. 12A̱ꞌkhue̱n Piláto̱ niꞌthúún mbu̱júꞌ xa̱bo̱:
―Náá rí iyalaꞌ rí ma̱ne̱ ga̱jma̱á nindxu̱u̱ tsí nu̱tha̱ánlaꞌ Thúngaa drígu̱ún xa̱bo̱ judío̱ rá.
13Jamí ikhii̱n ni̱ndxa̱ꞌwe̱e̱ gakhe̱ mbu̱júꞌ:
―¡Athadujmaa̱ ná ixe̱ krúsi̱!
14A̱ꞌkhue̱n Piláto̱ niꞌthúu̱n:
―Náá rí ra̱máján niꞌnii̱ kajngó róꞌ.
Xómáꞌ ikhii̱n i̱wa̱á máꞌ gakhe̱ ni̱ndxa̱ꞌwe̱e̱:
―¡Athadujmaa̱ ná ixe̱ krúsi̱!
15Xómáꞌ Piláto̱ nandoo̱ rí ma̱nguanú-mújúu̱n ná inúú xa̱bo̱ xuajen, ikhaa jngó nixná-ñájwii̱n rí ma̱ga̱jnáa Barabás ná géjwa̱nꞌ. Jamí nixná-ñájwii̱n rí mi̱xpáthiin Jesús ga̱jma̱á ñuu xtá rí tráma ajwa̱nꞌ inuu, nda̱wa̱á a̱ꞌkhue̱n nixnáxi̱i̱ rí mi̱ꞌdujmaa ná ixe̱ krúsi̱.
16A̱ꞌkhue̱n rí xa̱bo̱ tsí ku̱ra̱tuun ajwa̱nꞌ nigóo̱ juya̱a̱ Jesús ná rixo̱o̱ guꞌwá mba̱a̱ drígo̱o̱ Piláto̱. Rixo̱o̱ guꞌwá mba̱a̱ mbiꞌyuu pretório̱, jamí ikhín niwi̱in mbá xúgíin xa̱bo̱ tsí ku̱ra̱tuun ajwa̱nꞌ. 17A̱ꞌkhue̱n ni̱tsuaꞌaa̱n mbá xtíin rí maña̱ꞌ skuni, xúꞌkhue̱n máꞌ nene̱-gámíi̱ tsuwan jamí ni̱ríguii̱ ne̱ ná idxu̱u̱ Jesús. 18A̱ꞌkhue̱n nu̱ra̱xii̱ mbaꞌa nothon, jamí nutháa̱n: «¡Álá Thúngaa drígu̱ún xa̱bo̱ judío̱!». 19Xúꞌkhue̱n máꞌ nuxnáa̱ idxu̱u̱ ga̱jma̱á mbá e̱ꞌe̱n, nu̱ndu̱tájmaa̱, jamí nu̱tsi̱jmaa̱ nu̱sma̱ti̱gúu̱n inuu asndo xó rí nune̱-mba̱a̱. 20Ído̱ wámbúu̱n nene̱-mati̱i̱ꞌ, a̱ꞌkhue̱n ni̱ríyaa̱ꞌ xtíin rí maña̱ꞌ skuni rí júwuu̱n, jamí ni̱tsuaꞌaa̱n xtíñuu̱. A̱ꞌkhue̱n nigóo̱ juya̱a̱ rí mudujmaa̱ ná ixe̱ krúsi̱.
Waꞌdujmaa Jesús ná inuu ixe̱ krúsi̱
(Mt 27.32-44; Lc 23.26-43; Jn 19.17-27)
21A̱ꞌkhue̱n nene̱-ski̱yíi̱ mbáa xa̱bo̱ tsí na̱ka̱-ranújngoo ikhín, tsí inu na̱ꞌkha̱a ni̱ka̱ xanáá, ma̱ꞌga jayóo ixe̱ krúsi̱i Jesús. Xa̱bo̱ tsúꞌkhue̱n mbiꞌyuu Simón, tsí na̱ꞌkha̱ ná xuajen Siréne̱. Ikhaa̱ ñajuu̱n anu̱u̱ Alejándro̱ ga̱jma̱á Rúfo̱. 22A̱ꞌkhue̱n nigóo̱ juya̱a̱ Jesús ná mbaa rí mbiꞌyuu Gólgo̱ta̱, rí nandoo gáꞌthán: «Itso̱ Idxu̱u̱ Xa̱bo̱». 23Ikhín nixnáa̱ ma̱ga̱a̱n iya ni̱ga̱yu̱u̱ꞌ drígo̱o̱ úba̱ rí ni̱ga̱nda̱wo̱o̱ꞌ ga̱jma̱á wájya rí mbiꞌyuu míra̱. Xómáꞌ ikhaa̱ ra̱khóo̱ gágáa̱n ne̱.
24Ído̱ wámbúu̱n nidujmaa̱ ná ixe̱ krúsi̱, a̱ꞌkhue̱n nitsíi̱n kajngó mu̱xpi̱ꞌtha̱-mijnée̱ xtíñuu Jesús, jamí mbuyáa̱ náá rí gáyá mbámbáa. 25Naꞌne mbá mijnagu̱wa̱ꞌ i̱ka̱ ajwa̱nꞌ rí miꞌcha̱ ído̱ nidujmaa̱ Jesús ná ixe̱ krúsi̱. 26Jamí ná idxu̱u̱ ixe̱ krúsi̱i Jesús, ka̱ma naꞌthán náá aꞌkhán gíꞌmaa̱: «TSÍGE̱Ꞌ ÑAJUUN THÚNGAA DRÍGU̱ÚN XA̱BO̱ JUDÍO̱». 27Xúꞌkhue̱n máꞌ nidujmii̱ ná ixe̱ krúsi̱ a̱jmi̱i ku̱ꞌwá ga̱jma̱á nindxu̱u̱ Jesús. Mbáa ni̱we̱je̱ krúsi̱i ná níjñú mújúu̱n jamí i̱mba̱a̱ꞌ ná níjñú xti̱yu̱u̱ꞌ. 28Xkuaꞌnii nimbánuu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Niñíi̱ asndo xómá na̱gu̱mii xa̱bo̱ tsí ra̱májíin».#15.28 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 53.12. Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ kíxnuu 28.
29Jamí xa̱bo̱ tsí nanújngúún ikhín nuthan-xkawíi̱ꞌ, nu̱rmajngaa̱ idxúu̱n rí nune̱-mati̱i̱ꞌ jamí nutháa̱n xáꞌnii: «Ikháánꞌ tsáánꞌ natarngudi̱i guꞌwá dxákuiin Ana̱ꞌlóꞌ, jamí awúun rí atsú mbiꞌi natakúxi̱i ne̱, 30athane̱-jríya̱ꞌ-mina̱ꞌ máꞌ ikháánꞌ, jamí a̱dxuta̱aꞌ ná ixe̱ krúsi̱».
31Xúꞌkhue̱n máꞌ ene̱ mangiin dxakuun tsí gíꞌdoo numúú gajmíí xa̱bo̱ tsí nusngáá xtángoo, nune̱-mati̱i̱ꞌ Jesús jamí nuthan-mijnée̱ xáꞌnii: «Neꞌne-jáwíi̱n i̱ꞌwíin xa̱bo̱, i̱ndo̱ó máꞌ numuu rí ikhaa̱ tsíꞌngo̱o̱ gáꞌne-jríya̱ꞌ-mine̱e̱ꞌ. 32A̱ga̱taa̱ xúge̱ꞌ ná ixe̱ krúsi̱ Krísto̱ rá, tsí ñajuun Thúngaa drígu̱ún xa̱bo̱ Israél, kajngó mbu̱ꞌyáálóꞌ jamí ma̱nimba̱ꞌlóꞌ juꞌyáa̱». Mangiin máꞌ xa̱bo̱ tsí waꞌdujmii ga̱jma̱á nindxu̱u̱, nuthan-xkawíi̱ꞌ.
Nijáñuu Jesús
(Mt 27.45-56; Lc 23.44-49; Jn 19.28-30)
33Ído̱ neꞌne wakha̱ꞌ niníí asndo atsú i̱ka̱ ajwa̱nꞌ rí wakhíí, a̱ꞌkhue̱n neꞌne jína inuu mbá xúgíí numbaa. 34Jamí ído̱ neꞌne atsú i̱ka̱ ajwa̱nꞌ rí wakhíí, a̱ꞌkhue̱n maphú gakhe̱ nindxaꞌwá Jesús. Xáꞌnii niꞌthée̱n: «Eloí, Eloí. Láma̱ sabaktáni̱». (Rí nandoo gáꞌthán: «Táa Mikhuíí, Táa Mikhuíí, náá numuu kajngó nitatsíñúꞌ róꞌ».)
35Mbá tikhuun xa̱bo̱ tsí wájun ikhín ni̱dxawíín rí niꞌthán Jesús, jamí nithee̱n: «Gu̱dxawíínlaꞌ, Elía̱s nandxaꞌwóo̱ ma̱ꞌkha̱». 36A̱ꞌkhue̱n mbáa xa̱bo̱ ni̱ka̱-ragáyuu gárma̱jan mbá xtíin me̱do̱ ga̱jma̱á iyoo úba̱ rí miga̱ꞌ, niruꞌwájmee̱ ne̱ ná inuu mbá e̱ꞌe̱n, nixuꞌmee̱ ne̱ ná rawuun Jesús kajngó ma̱ga̱a̱n ne̱. Jamí niꞌthée̱n: «Gu̱ni̱ꞌñáa̱laꞌ, mu̱waꞌthi̱ínlóꞌ mbu̱ꞌyáá xí ma̱ꞌkha̱ Elía̱s gáríguíi̱».
37Xómáꞌ Jesús maphú gakhe̱ nindxaꞌwée̱, jamí nijáñuu̱. 38A̱ꞌkhue̱n nithongaa ti̱kua̱pha̱a̱ xtíin rí kra̱jngaa ná awúun guꞌwá dxákuun. Nithongaa ne̱ ri̱jma̱á jamí asndo mbayíí. 39Jamí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ wéje̱ ná inuu brákaa Jesús, ndiꞌyoo̱ xáne nijáñuu̱ ído̱ wámbo̱o̱ nindxaꞌwée̱,#15.39 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ído̱ wámbo̱o̱ nindxaꞌwée̱». a̱ꞌkhue̱n niꞌthée̱n: «Maphú gakon rí A̱dée Ana̱ꞌlóꞌ ñajuun xa̱bo̱ tsíge̱ꞌ».
40Mangaa máꞌ mbá tikhuun go̱ꞌo̱ wájun tsíngua̱ꞌ nu̱ya̱xe̱. Mbáa tsí wéje̱ ñajuun María̱ tsí na̱ꞌkha̱ ná Magdála̱, xúꞌkhue̱n máꞌ wéje̱ María̱ tsí ñajuun nánée Santiágo̱#15.40 Ná i̱yi̱i̱ꞌ griégo̱ rí wayuu naꞌthán «Jakóbo̱», rí nithán «Santiágo̱» ná ajngáa xtílo̱o̱. tsí lájwíin ga̱jma̱á José, jamí wéje̱ máꞌ Salomé mangaa. 41Ikhiin go̱ꞌo̱ tsíge̱ꞌ niguwá ga̱jma̱á nindxu̱u̱ Jesús jamí nene̱-mba̱ꞌwi̱i̱ nákhí nixtáa̱ ná Galiléa̱. Jamí ikhín máꞌ wájun mangiin mbaꞌiin i̱ꞌwíin go̱ꞌo̱ tsí niguwá ga̱jma̱á nindxu̱u̱ Jesús ná Jerusalén.
Waꞌdi̱i Jesús
(Mt 27.57-61; Lc 23.50-56; Jn 19.38-42)
42Mbiꞌi biérne̱s ñajuun mbiꞌi rúꞌkhue̱n, mbiꞌi rí nune̱-mbánu-mijná xa̱bo̱ judío̱ rí mbuya̱a xu̱únꞌ, jamí inu máꞌ ma̱gi̱ꞌdu̱u̱n mbiꞌi rí nduyaa̱ xúu̱nꞌ. Ikhaa jngó ído̱ na̱ka̱-raꞌne wakhíí máꞌ, 43a̱ꞌkhue̱n táta̱ José tsí na̱ꞌkha̱ ná Arimatéa̱ támíñuu̱ ni̱ꞌkhe̱e̱ ná inuu Piláto̱ jamí ni̱nda̱ꞌe̱e̱ xuyuu Jesús kajngó ma̱ꞌdii̱ ne̱. Táta̱ José ñajuun mbáa xa̱bo̱ tsí gíꞌdoo numuu tsí jimaa tsu̱du̱ún xa̱bo̱ buanuu ede̱, jamí mangaa̱ máꞌ gíꞌthu̱u̱n rí ma̱ga̱nú mbiꞌi rí Ana̱ꞌlóꞌ maꞌthán-ñájúún xa̱bo̱. 44Xómáꞌ Piláto̱ nimakuu ído̱ nidxawuun rí nijáñuu máꞌ Jesús. Ikhaa jngó nindxaꞌwóo̱ xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, jamí niraxu̱u̱ xí gakon rí nijáñuu̱ máꞌ. 45Ído̱ wámbo̱o̱ niꞌthán xa̱bo̱ tsí naꞌthán-ñájúún tsí ku̱ra̱tuun ajwa̱nꞌ rí gakon nijáñuu̱ máꞌ, a̱ꞌkhue̱n nixná ajngóo Piláto̱ rí José ma̱goo ma̱ꞌga jayóo xuyuu Jesús. 46A̱ꞌkhue̱n José nirígúu xuyuu Jesús jamí nimbróꞌoo̱ ne̱ ga̱jma̱á mbá xtíin wapa rí niꞌtsi̱i̱. A̱ꞌkhue̱n ni̱ka̱ jayóo̱ ne̱ ná iñá-wajen rí waꞌndi-raꞌáá ná pátsí, xúꞌkhue̱n máꞌ nirmajngue̱e̱ꞌ mbá itsí kajngó maruguaa̱ rawuun iñá-wajen. 47Jamí María̱ tsí na̱ꞌkha̱ ná Magdála̱ ga̱jma̱á María̱ nánée José ndiyáa̱ náá waꞌdi̱i Jesús.
ទើបបានជ្រើសរើសហើយ៖
Márko̱s 15: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
Márko̱s 15
15
Na̱ka̱ jiꞌyáa Jesús ná inuu Piláto̱
(Mt 27.1-2,11-14; Lc 23.1-5; Jn 18.28-38)
1A̱ꞌkhue̱n rí phú miꞌcha̱ niguáꞌdáá awan dxakuun tsí gíꞌdoo numúú gajmíí xa̱bo̱ buanuu, gajmíí xa̱bo̱ tsí nusngáá xtángoo jamí mbá xúgíin xa̱bo̱ buanuu ede̱. A̱ꞌkhue̱n ni̱ru̱ꞌwáa̱ Jesús, jamí nigóo̱ juya̱a̱ ná inuu Piláto̱. 2Piláto̱ niraxu̱u̱ Jesús:
―Á ikháánꞌ ñajwaanꞌ Thúngaa drígu̱ún xa̱bo̱ judío̱ dxe̱ꞌ.
Jamí Jesús niriꞌña:
―Jmína̱á máꞌ ikháánꞌ irathán.
3A̱ꞌkhue̱n dxakuun tsí gíꞌdoo numúú nuni̱i̱ mbaꞌa aꞌkhúun Jesús. 4A̱ꞌkhue̱n Piláto̱ niraxu̱u̱ mbu̱júu Jesús: «Á nda̱a̱ nitháan rí ma̱triꞌña rá. Athayáá rí mbaꞌa rí nuthee̱n rí nuni̱i̱ aꞌkháanꞌ». 5Xómáꞌ Jesús ni máꞌ xúꞌkhue̱n táriꞌñee̱ nimbá, ikhaa jngó Piláto̱ phú nimakuu.
Nambánuu rí ma̱ja̱ñúu Jesús
(Mt 27.15-31; Lc 23.13-25; Jn 18.38—19.16)
6Mbámbá rí nagájnuu ndxa̱a̱ Páskua̱, Piláto̱ naꞌne-jríya̱a̱ꞌ mbáa xa̱bo̱ tsí kra̱ꞌaa géjwa̱nꞌ, asndo tsáa máꞌ tsí gúnda̱ꞌa̱ xa̱bo̱ xuajen rí ma̱jríya̱a̱ꞌ. 7Nákhí mbiꞌi rúꞌkhue̱n kra̱ꞌaa géjwa̱nꞌ mbáa xa̱bo̱ tsí mbiꞌyuu Barabás. Kra̱ꞌaa̱ gajmíi̱ a̱nguii̱n numuu rí nixkaxi̱i̱ xkujndu ná xuajen jamí nixíya̱a̱ mbáa xa̱bo̱. 8A̱ꞌkhue̱n ni̱xu̱ꞌma-mijná xa̱bo̱ tsí mbaꞌiin ná inuu Piláto̱, jamí ni̱gíꞌdíi̱n ni̱nda̱ꞌáa̱ rí ma̱ꞌnii̱ rí naꞌne jayuu̱ máꞌ.
9A̱ꞌkhue̱n rí Piláto̱ niriꞌña: «Á nandalaꞌ rí ma̱ni̱ꞌñúu Thúngaa drígu̱ún xa̱bo̱ judío̱ dxe̱ꞌ». 10Numuu rí ndiꞌyoo̱ máꞌ rí dxakuun tsí gíꞌdoo numúú, ni̱xna̱xíi̱ Jesús ná inuu̱ ga̱jma̱á numuu rí naxígúu̱nꞌ juyáa̱. 11Xómáꞌ dxakuun tsí gíꞌdoo numúú ni̱sngrúꞌúu̱n xa̱bo̱ tsí mbaꞌiin rí mu̱ndxa̱ꞌwa̱, kajngó Piláto̱ maniñuu Barabás. 12A̱ꞌkhue̱n Piláto̱ niꞌthúún mbu̱júꞌ xa̱bo̱:
―Náá rí iyalaꞌ rí ma̱ne̱ ga̱jma̱á nindxu̱u̱ tsí nu̱tha̱ánlaꞌ Thúngaa drígu̱ún xa̱bo̱ judío̱ rá.
13Jamí ikhii̱n ni̱ndxa̱ꞌwe̱e̱ gakhe̱ mbu̱júꞌ:
―¡Athadujmaa̱ ná ixe̱ krúsi̱!
14A̱ꞌkhue̱n Piláto̱ niꞌthúu̱n:
―Náá rí ra̱máján niꞌnii̱ kajngó róꞌ.
Xómáꞌ ikhii̱n i̱wa̱á máꞌ gakhe̱ ni̱ndxa̱ꞌwe̱e̱:
―¡Athadujmaa̱ ná ixe̱ krúsi̱!
15Xómáꞌ Piláto̱ nandoo̱ rí ma̱nguanú-mújúu̱n ná inúú xa̱bo̱ xuajen, ikhaa jngó nixná-ñájwii̱n rí ma̱ga̱jnáa Barabás ná géjwa̱nꞌ. Jamí nixná-ñájwii̱n rí mi̱xpáthiin Jesús ga̱jma̱á ñuu xtá rí tráma ajwa̱nꞌ inuu, nda̱wa̱á a̱ꞌkhue̱n nixnáxi̱i̱ rí mi̱ꞌdujmaa ná ixe̱ krúsi̱.
16A̱ꞌkhue̱n rí xa̱bo̱ tsí ku̱ra̱tuun ajwa̱nꞌ nigóo̱ juya̱a̱ Jesús ná rixo̱o̱ guꞌwá mba̱a̱ drígo̱o̱ Piláto̱. Rixo̱o̱ guꞌwá mba̱a̱ mbiꞌyuu pretório̱, jamí ikhín niwi̱in mbá xúgíin xa̱bo̱ tsí ku̱ra̱tuun ajwa̱nꞌ. 17A̱ꞌkhue̱n ni̱tsuaꞌaa̱n mbá xtíin rí maña̱ꞌ skuni, xúꞌkhue̱n máꞌ nene̱-gámíi̱ tsuwan jamí ni̱ríguii̱ ne̱ ná idxu̱u̱ Jesús. 18A̱ꞌkhue̱n nu̱ra̱xii̱ mbaꞌa nothon, jamí nutháa̱n: «¡Álá Thúngaa drígu̱ún xa̱bo̱ judío̱!». 19Xúꞌkhue̱n máꞌ nuxnáa̱ idxu̱u̱ ga̱jma̱á mbá e̱ꞌe̱n, nu̱ndu̱tájmaa̱, jamí nu̱tsi̱jmaa̱ nu̱sma̱ti̱gúu̱n inuu asndo xó rí nune̱-mba̱a̱. 20Ído̱ wámbúu̱n nene̱-mati̱i̱ꞌ, a̱ꞌkhue̱n ni̱ríyaa̱ꞌ xtíin rí maña̱ꞌ skuni rí júwuu̱n, jamí ni̱tsuaꞌaa̱n xtíñuu̱. A̱ꞌkhue̱n nigóo̱ juya̱a̱ rí mudujmaa̱ ná ixe̱ krúsi̱.
Waꞌdujmaa Jesús ná inuu ixe̱ krúsi̱
(Mt 27.32-44; Lc 23.26-43; Jn 19.17-27)
21A̱ꞌkhue̱n nene̱-ski̱yíi̱ mbáa xa̱bo̱ tsí na̱ka̱-ranújngoo ikhín, tsí inu na̱ꞌkha̱a ni̱ka̱ xanáá, ma̱ꞌga jayóo ixe̱ krúsi̱i Jesús. Xa̱bo̱ tsúꞌkhue̱n mbiꞌyuu Simón, tsí na̱ꞌkha̱ ná xuajen Siréne̱. Ikhaa̱ ñajuu̱n anu̱u̱ Alejándro̱ ga̱jma̱á Rúfo̱. 22A̱ꞌkhue̱n nigóo̱ juya̱a̱ Jesús ná mbaa rí mbiꞌyuu Gólgo̱ta̱, rí nandoo gáꞌthán: «Itso̱ Idxu̱u̱ Xa̱bo̱». 23Ikhín nixnáa̱ ma̱ga̱a̱n iya ni̱ga̱yu̱u̱ꞌ drígo̱o̱ úba̱ rí ni̱ga̱nda̱wo̱o̱ꞌ ga̱jma̱á wájya rí mbiꞌyuu míra̱. Xómáꞌ ikhaa̱ ra̱khóo̱ gágáa̱n ne̱.
24Ído̱ wámbúu̱n nidujmaa̱ ná ixe̱ krúsi̱, a̱ꞌkhue̱n nitsíi̱n kajngó mu̱xpi̱ꞌtha̱-mijnée̱ xtíñuu Jesús, jamí mbuyáa̱ náá rí gáyá mbámbáa. 25Naꞌne mbá mijnagu̱wa̱ꞌ i̱ka̱ ajwa̱nꞌ rí miꞌcha̱ ído̱ nidujmaa̱ Jesús ná ixe̱ krúsi̱. 26Jamí ná idxu̱u̱ ixe̱ krúsi̱i Jesús, ka̱ma naꞌthán náá aꞌkhán gíꞌmaa̱: «TSÍGE̱Ꞌ ÑAJUUN THÚNGAA DRÍGU̱ÚN XA̱BO̱ JUDÍO̱». 27Xúꞌkhue̱n máꞌ nidujmii̱ ná ixe̱ krúsi̱ a̱jmi̱i ku̱ꞌwá ga̱jma̱á nindxu̱u̱ Jesús. Mbáa ni̱we̱je̱ krúsi̱i ná níjñú mújúu̱n jamí i̱mba̱a̱ꞌ ná níjñú xti̱yu̱u̱ꞌ. 28Xkuaꞌnii nimbánuu rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Niñíi̱ asndo xómá na̱gu̱mii xa̱bo̱ tsí ra̱májíin».#15.28 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 53.12. Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ kíxnuu 28.
29Jamí xa̱bo̱ tsí nanújngúún ikhín nuthan-xkawíi̱ꞌ, nu̱rmajngaa̱ idxúu̱n rí nune̱-mati̱i̱ꞌ jamí nutháa̱n xáꞌnii: «Ikháánꞌ tsáánꞌ natarngudi̱i guꞌwá dxákuiin Ana̱ꞌlóꞌ, jamí awúun rí atsú mbiꞌi natakúxi̱i ne̱, 30athane̱-jríya̱ꞌ-mina̱ꞌ máꞌ ikháánꞌ, jamí a̱dxuta̱aꞌ ná ixe̱ krúsi̱».
31Xúꞌkhue̱n máꞌ ene̱ mangiin dxakuun tsí gíꞌdoo numúú gajmíí xa̱bo̱ tsí nusngáá xtángoo, nune̱-mati̱i̱ꞌ Jesús jamí nuthan-mijnée̱ xáꞌnii: «Neꞌne-jáwíi̱n i̱ꞌwíin xa̱bo̱, i̱ndo̱ó máꞌ numuu rí ikhaa̱ tsíꞌngo̱o̱ gáꞌne-jríya̱ꞌ-mine̱e̱ꞌ. 32A̱ga̱taa̱ xúge̱ꞌ ná ixe̱ krúsi̱ Krísto̱ rá, tsí ñajuun Thúngaa drígu̱ún xa̱bo̱ Israél, kajngó mbu̱ꞌyáálóꞌ jamí ma̱nimba̱ꞌlóꞌ juꞌyáa̱». Mangiin máꞌ xa̱bo̱ tsí waꞌdujmii ga̱jma̱á nindxu̱u̱, nuthan-xkawíi̱ꞌ.
Nijáñuu Jesús
(Mt 27.45-56; Lc 23.44-49; Jn 19.28-30)
33Ído̱ neꞌne wakha̱ꞌ niníí asndo atsú i̱ka̱ ajwa̱nꞌ rí wakhíí, a̱ꞌkhue̱n neꞌne jína inuu mbá xúgíí numbaa. 34Jamí ído̱ neꞌne atsú i̱ka̱ ajwa̱nꞌ rí wakhíí, a̱ꞌkhue̱n maphú gakhe̱ nindxaꞌwá Jesús. Xáꞌnii niꞌthée̱n: «Eloí, Eloí. Láma̱ sabaktáni̱». (Rí nandoo gáꞌthán: «Táa Mikhuíí, Táa Mikhuíí, náá numuu kajngó nitatsíñúꞌ róꞌ».)
35Mbá tikhuun xa̱bo̱ tsí wájun ikhín ni̱dxawíín rí niꞌthán Jesús, jamí nithee̱n: «Gu̱dxawíínlaꞌ, Elía̱s nandxaꞌwóo̱ ma̱ꞌkha̱». 36A̱ꞌkhue̱n mbáa xa̱bo̱ ni̱ka̱-ragáyuu gárma̱jan mbá xtíin me̱do̱ ga̱jma̱á iyoo úba̱ rí miga̱ꞌ, niruꞌwájmee̱ ne̱ ná inuu mbá e̱ꞌe̱n, nixuꞌmee̱ ne̱ ná rawuun Jesús kajngó ma̱ga̱a̱n ne̱. Jamí niꞌthée̱n: «Gu̱ni̱ꞌñáa̱laꞌ, mu̱waꞌthi̱ínlóꞌ mbu̱ꞌyáá xí ma̱ꞌkha̱ Elía̱s gáríguíi̱».
37Xómáꞌ Jesús maphú gakhe̱ nindxaꞌwée̱, jamí nijáñuu̱. 38A̱ꞌkhue̱n nithongaa ti̱kua̱pha̱a̱ xtíin rí kra̱jngaa ná awúun guꞌwá dxákuun. Nithongaa ne̱ ri̱jma̱á jamí asndo mbayíí. 39Jamí xa̱bo̱ tsí naꞌthán-ñájúún tsí ku̱ra̱tuun ajwa̱nꞌ wéje̱ ná inuu brákaa Jesús, ndiꞌyoo̱ xáne nijáñuu̱ ído̱ wámbo̱o̱ nindxaꞌwée̱,#15.39 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «ído̱ wámbo̱o̱ nindxaꞌwée̱». a̱ꞌkhue̱n niꞌthée̱n: «Maphú gakon rí A̱dée Ana̱ꞌlóꞌ ñajuun xa̱bo̱ tsíge̱ꞌ».
40Mangaa máꞌ mbá tikhuun go̱ꞌo̱ wájun tsíngua̱ꞌ nu̱ya̱xe̱. Mbáa tsí wéje̱ ñajuun María̱ tsí na̱ꞌkha̱ ná Magdála̱, xúꞌkhue̱n máꞌ wéje̱ María̱ tsí ñajuun nánée Santiágo̱#15.40 Ná i̱yi̱i̱ꞌ griégo̱ rí wayuu naꞌthán «Jakóbo̱», rí nithán «Santiágo̱» ná ajngáa xtílo̱o̱. tsí lájwíin ga̱jma̱á José, jamí wéje̱ máꞌ Salomé mangaa. 41Ikhiin go̱ꞌo̱ tsíge̱ꞌ niguwá ga̱jma̱á nindxu̱u̱ Jesús jamí nene̱-mba̱ꞌwi̱i̱ nákhí nixtáa̱ ná Galiléa̱. Jamí ikhín máꞌ wájun mangiin mbaꞌiin i̱ꞌwíin go̱ꞌo̱ tsí niguwá ga̱jma̱á nindxu̱u̱ Jesús ná Jerusalén.
Waꞌdi̱i Jesús
(Mt 27.57-61; Lc 23.50-56; Jn 19.38-42)
42Mbiꞌi biérne̱s ñajuun mbiꞌi rúꞌkhue̱n, mbiꞌi rí nune̱-mbánu-mijná xa̱bo̱ judío̱ rí mbuya̱a xu̱únꞌ, jamí inu máꞌ ma̱gi̱ꞌdu̱u̱n mbiꞌi rí nduyaa̱ xúu̱nꞌ. Ikhaa jngó ído̱ na̱ka̱-raꞌne wakhíí máꞌ, 43a̱ꞌkhue̱n táta̱ José tsí na̱ꞌkha̱ ná Arimatéa̱ támíñuu̱ ni̱ꞌkhe̱e̱ ná inuu Piláto̱ jamí ni̱nda̱ꞌe̱e̱ xuyuu Jesús kajngó ma̱ꞌdii̱ ne̱. Táta̱ José ñajuun mbáa xa̱bo̱ tsí gíꞌdoo numuu tsí jimaa tsu̱du̱ún xa̱bo̱ buanuu ede̱, jamí mangaa̱ máꞌ gíꞌthu̱u̱n rí ma̱ga̱nú mbiꞌi rí Ana̱ꞌlóꞌ maꞌthán-ñájúún xa̱bo̱. 44Xómáꞌ Piláto̱ nimakuu ído̱ nidxawuun rí nijáñuu máꞌ Jesús. Ikhaa jngó nindxaꞌwóo̱ xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, jamí niraxu̱u̱ xí gakon rí nijáñuu̱ máꞌ. 45Ído̱ wámbo̱o̱ niꞌthán xa̱bo̱ tsí naꞌthán-ñájúún tsí ku̱ra̱tuun ajwa̱nꞌ rí gakon nijáñuu̱ máꞌ, a̱ꞌkhue̱n nixná ajngóo Piláto̱ rí José ma̱goo ma̱ꞌga jayóo xuyuu Jesús. 46A̱ꞌkhue̱n José nirígúu xuyuu Jesús jamí nimbróꞌoo̱ ne̱ ga̱jma̱á mbá xtíin wapa rí niꞌtsi̱i̱. A̱ꞌkhue̱n ni̱ka̱ jayóo̱ ne̱ ná iñá-wajen rí waꞌndi-raꞌáá ná pátsí, xúꞌkhue̱n máꞌ nirmajngue̱e̱ꞌ mbá itsí kajngó maruguaa̱ rawuun iñá-wajen. 47Jamí María̱ tsí na̱ꞌkha̱ ná Magdála̱ ga̱jma̱á María̱ nánée José ndiyáa̱ náá waꞌdi̱i Jesús.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.