Lúka̱s 4
4
Gixa̱a̱ ndiyoo gáꞌne-rájáa Jesús
(Mt 4.1-11; Mc 1.12-13)
1Ído̱ ni̱ꞌkha̱a Jesús rí ni̱ke̱e̱ ná matha Jordán, mbá xa̱bi̱i̱ nithán-ñájwíi̱n eꞌne Xu̱u̱ꞌ Ana̱ꞌlóꞌ. A̱ꞌkhue̱n neꞌne Xu̱u̱ꞌ Ana̱ꞌlóꞌ rí ma̱ꞌgee̱ ná mbaa niníí. 2Ikhín nixtáa̱ a̱jma̱ skíñú (40) mbiꞌi, jamí neꞌne gixa̱a̱ rí ma̱ꞌne-rájáa̱ ma̱ꞌnii̱ aꞌkhán. Mbá xúgíí mbiꞌi rúꞌkhue̱n na̱nguá niꞌkhui̱i̱ mbá jayu guma. Ído̱ nirámuu mbiꞌi rúꞌkhue̱n, a̱ꞌkhue̱n ni̱xki̱dxu̱u̱ mi̱ndaꞌkho. 3A̱ꞌkhue̱n gixa̱a̱ niꞌthúun Jesús:
―Xí gakon rí A̱dée Ana̱ꞌlóꞌ ñajwaanꞌ, aratháán itsí ríge̱ꞌ ma̱ꞌni̱i guma me̱ꞌtso.
4A̱ꞌkhue̱n Jesús niꞌthúu̱n gixa̱a̱:
―Ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: “Ra̱ꞌkhá máꞌ i̱ndo̱ó guma jayá mbiꞌyuu xa̱bo̱, rí mbá xúgíí máꞌ ajngáa rawuun Ana̱ꞌlóꞌ mangaa”.#4.4 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «rí mbá xúgíí máꞌ ajngáa rawuun Ana̱ꞌlóꞌ mangaa». Mbá xúgíí ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 8.3.
5A̱ꞌkhue̱n rí gixa̱a̱ ni̱ka̱ jayáa Jesús ná inuu mbá júba̱ tsída̱ꞌ, jamí nisngájmuu̱ mbégo jayu mbá xúgíí xuajen mba̱ꞌwo̱ ríga̱ ná tsu̱du̱u̱ ju̱ba̱ꞌ, ná naꞌthán-ñájun mbáa thúngaa. 6A̱ꞌkhue̱n gixa̱a̱ niꞌthúun Jesús:
―Ma̱xna̱a̱ꞌ ma̱ra̱tha̱n-ñájwíín mbá xúgíí xuajen mba̱ꞌwo̱ rúꞌkhue̱n, jamí mbá xúgíí rí mitsaan ríga̱ ná awúun ne̱. Numuu rí ikhúúnꞌ nijanúꞌ mbá xúgíí numbaa rúꞌkhue̱n, jamí ma̱goo ma̱xnu̱u̱ ne̱ asndo tsáa máꞌ tsí naꞌne a̱kui̱nꞌ ikhúúnꞌ. 7Ikhaa jngó, xí natasmáti̱ga̱a̱ꞌ ná inuꞌ rí ma̱tha̱ne̱-mbu̱únꞌ, mbá xúgíí rúꞌkhue̱n ma̱ꞌne dríga̱a̱ꞌ.
8A̱ꞌkhue̱n Jesús niriꞌñuu gixa̱a̱:
―Araxo̱n janíí, Satanás,#4.8 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Araxo̱n janíí, Satanás». numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: “Athane̱-mba̱a̱ i̱ndo̱ó máꞌ Tátiáaꞌ Mikhuíí, jamí athane̱-mba̱ꞌwi̱i̱ i̱ndo̱ó máꞌ ikhaa̱”.#4.8 Ajngáa ríge̱ꞌ na̱ꞌkha̱ ná I̱yi̱i̱ꞌ ná naꞌthán-makoo xtángoo 6.13.
9A̱ꞌkhue̱n rí gixa̱a̱ ni̱ka̱ jayáa Jesús ná i̱tha̱án tsída̱ꞌ tsu̱du̱u̱ guꞌwá dxákuun ná xuajen Jerusalén, jamí niꞌthúu̱n:
―Xí gakon rí A̱dée Ana̱ꞌlóꞌ ñajwaanꞌ, atambatígú-mina̱ꞌ mbayíí. 10Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
“Ana̱ꞌlóꞌ maxúngui̱inꞌ ánje̱l drígo̱o̱ kajngó mu̱ña̱wa̱a̱nꞌ.
11Jamí ikhii̱n mu̱xu̱xíi̱nꞌ ga̱jma̱á ñawúu̱n,
kajngó ma̱xáta̱xi̱ꞌná gáꞌne asndo nimbá itsí”.#4.10-11 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 91.11-12.
12A̱ꞌkhue̱n Jesús niriꞌñuu gixa̱a̱:
―Ka̱ma naꞌthán ná i̱yi̱i̱ꞌ ajngóo Ana̱ꞌlóꞌ mangaa: «Ma̱xátha̱ne̱-rájáa Tátiáaꞌ Mikhuíí rí ma̱ꞌne rí naꞌne a̱kia̱anꞌ ikháánꞌ».#4.12 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 6.16.
13Ído̱ ndiꞌyoo gixa̱a̱ rí nánguá i̱mba̱ xó ma̱goo ma̱ꞌne-rájáa̱ Jesús, a̱ꞌkhue̱n ni̱kaa̱ asndo i̱mba̱ miꞌtsú.
Jesús nagíꞌdu̱u̱n ñajuun ná numbaa Galiléa̱
(Mt 4.12-17; Mc 1.14-15)
14A̱ꞌkhue̱n nithanga̱a Jesús ni̱ka̱a ná numbaa Galiléa̱ ga̱jma̱á ski̱yu̱u̱ꞌ Xu̱u̱ꞌ Ana̱ꞌlóꞌ, jamí mbá xúgíí xuajen rí triga̱ ná numbaa rúꞌkhue̱n ni̱dróꞌoo ajngáa ga̱jma̱á numuu̱. 15Jesús naꞌsngáá ná awúun mbámbá guꞌwá ná na̱gi̱mbíin xa̱bo̱ judío̱, jamí mbá xúgíin xa̱bo̱ nuthan rí máján ga̱jma̱á numuu̱.
Jesús naꞌsngáá ná Nasarét
(Mt 13.53-58; Mc 6.1-6)
16A̱ꞌkhue̱n ni̱ꞌkha̱a Jesús ná Nasarét, xuajñuu̱ ná nigaja̱a̱. Ído̱ ni̱ga̱nú mbiꞌi rí nduya̱a xu̱únꞌ xa̱bo̱ judío̱, ni̱ke̱e̱ ná guꞌwá rí na̱gi̱mbíi̱n, xómá rí naꞌne jayuu̱. A̱ꞌkhue̱n ni̱tu̱xu̱u̱ꞌ ma̱gu̱xnuu̱ ajngáa rawuun Ana̱ꞌlóꞌ. 17Jamí nijanáa̱ ma̱gu̱xnuu̱ i̱yi̱i̱ꞌ rí niꞌtháán Isaía̱s, tsí ni̱gu̱wíjnga̱a ajngóo Ana̱ꞌlóꞌ wajyúú. Ído̱ nirmáꞌthoo̱ ne̱, nixkamaa̱ ná ka̱ma naꞌthán xáꞌnii:
18«Xu̱u̱ꞌ Táta̱ xtáa ga̱jma̱á nindxu̱ꞌ,
numuu rí ikhaa̱ niraꞌwúu̱n rí ma̱thu̱ún ajngáa máján xa̱bo̱ tsí ngíníi.
Nixúngúu̱nꞌ rí ma̱ne̱-maꞌdíin xa̱bo̱ tsí natájwíin a̱kui̱ín,#4.18 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «rí ma̱ne̱-maꞌdíin xa̱bo̱ tsí natájwíin a̱kui̱ín».
rí ma̱tha̱n-rúꞌúúnlo̱ꞌ xa̱bo̱ tsí traꞌi̱in géjwa̱nꞌ rí ma̱jáwíi̱n,
jamí ma̱xna̱lo̱ꞌ idúún xa̱bo̱ tsí tsífrigu̱únꞌ.
Mangaa máꞌ rí ma̱ne̱-jáwíin tsí na̱gu̱ma-ngíníi ene̱ xa̱bo̱,
19jamí ma̱tha̱n-ráꞌalo̱ꞌ rí ni̱ga̱nú máꞌ mbiꞌi rí Táta̱ ma̱ꞌne-jáwíin xa̱bo̱».#4.18-19 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 61.1-2.
20Ído̱ wámbo̱o̱ Jesús ni̱gu̱xnuu, nimbúxii̱ i̱yi̱i̱ꞌ, jamí nixnáxii̱ ne̱ xa̱bo̱ tsí nambáyú-jmuu, a̱ꞌkhue̱n ni̱gi̱ꞌii̱. Mbá xúgíin xa̱bo̱ tsí ni̱gi̱mbúun ikhín tsíni̱ñáa̱ ru̱ya̱xíi̱. 21A̱ꞌkhue̱n nigíꞌdu̱u̱n Jesús niꞌthúún xa̱bo̱: «Mbiꞌi máꞌ xúge̱ꞌ nimbánuu ná inalaꞌ rí ka̱ma naꞌthán ná i̱yi̱i̱ꞌ ajngóo Ana̱ꞌlóꞌ ríge̱ꞌ».
22Mbá xúgíin xa̱bo̱ nuthan rí máján ga̱jma̱á numuu̱, jamí maphú namakúu̱n eꞌne ajngáa mitsaan rí naꞌthée̱n. Jamí nu̱ra̱xe̱-mijnée̱: «Á ra̱ꞌkhá a̱dée José ñajuun tsíge̱ꞌ dxe̱ꞌ».
23A̱ꞌkhue̱n Jesús niꞌthúún xa̱bo̱ tsúꞌkhue̱n: «Phú nda̱yo̱o̱ gúkúꞌ máꞌ rí mu̱thu̱nꞌlaꞌ ajngáa ríge̱ꞌ: “Tsáánꞌ nathane̱-thanúú xa̱bo̱, athane̱-thana-mina̱ꞌ máꞌ ikháánꞌ. Numuu ni̱dxawíínxo̱ꞌ rí mbaꞌa guéño rí máján nithane̱ ná Kapernaúm#4.23 Ríga̱ mbá tikhu i̱yi̱i̱ꞌ griégo̱ rí naꞌthán «Kafarnaúm». ñúꞌún. Athane̱ rúꞌkhue̱n ná xuajñalóꞌ ge̱jyoꞌ mangaa rá”».
24Jamí niꞌthúu̱n xóó: «Na̱tha̱nꞌ-jmbalaꞌ rí asndo nimbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ, tsígu̱ma-makuíi̱ ná xuajñuu̱. 25Jamí na̱tha̱nꞌlaꞌ rí gakon, phú mbaꞌiin go̱ꞌóxuáꞌa nijúwa̱ꞌ ná Israél nákhí nixtáa Elía̱s, nákhí táxnúu ruꞌwa mbá atsú tsigu i̱tikhu, jamí phú gakhe̱ niríga̱ ewi ná inuu mbá xúgíí numbaa. 26I̱ndo̱ó máꞌ numuu rí táwaxúngua̱a̱ꞌ Elía̱s rí mambáyúu asndo nimbáa a̱ꞌgóxuáꞌa tsúꞌkhue̱n, rí waxúngua̱a̱ꞌ mambáyúu̱ mbá a̱ꞌgóxuáꞌa tsí ra̱ꞌkháa xa̱bo̱ judío̱ ñajuun, tsí xtáa ná Sarépta̱ ná mijngi xuajen Sidón. 27Xúꞌkhue̱n máꞌ phú mbaꞌiin xa̱bo̱ tsí naꞌga xuñúú nijúwa̱ꞌ ná Israél nákhí nixtáa Eliséo̱, tsí ni̱gu̱wíjnga̱a ajngóo Ana̱ꞌlóꞌ wajyúú. I̱ndo̱ó máꞌ numuu rí asndo nimbáa xa̱bo̱ tsúꞌkhue̱n tágu̱ma-thanáá neꞌne Eliséo̱, rí neꞌne-thanuu̱ Naamán tsí ra̱ꞌkháa xa̱bo̱ judío̱ ñajuun, mbáa xa̱bo̱ tsí na̱ꞌkha̱ ná numbaa Síria̱».
28Ído̱ ni̱dxawíín ríge̱ꞌ mbá xúgíin xa̱bo̱ tsí gachúún ná guꞌwá rí na̱gi̱mbíin xa̱bo̱ judío̱, maphú nijiꞌníi̱. 29A̱ꞌkhue̱n ni̱tu̱xu̱ún xa̱bo̱, ni̱rtuwii̱n Jesús jamí ni̱xkriya̱a̱ꞌ ná awúun xuajen. Nigóo̱ juya̱a̱ asndo ná inuu júba̱ ná kra̱ꞌmá xuajñúu̱, kajngó mu̱mbatíguíi̱ ná pátsí. 30Xómáꞌ Jesús ninújngoo ná majñúu̱, niwatuu̱n jambo̱o̱ ni̱ke̱e̱.
Jesús naxkriya̱a̱ꞌ mbáa gíñá ꞌguéen ná xuyuu mbáa xa̱bo̱
(Mc 1.21-28)
31A̱ꞌkhue̱n ni̱gataa Jesús ni̱ka̱ ná Kapernaúm, mbá xuajen rí ꞌgí ná numbaa Galiléa̱. Ikhín naꞌsngáa̱ mbámbá mbiꞌi rí nduya̱a xu̱únꞌ xa̱bo̱ judío̱. 32Maphú namakúún xa̱bo̱ eꞌne rí naꞌsngáa̱, numuu rí naꞌthée̱n asndo xómá mbáa xa̱bo̱ tsí naꞌthán-ñájun.
33Ná awúun guꞌwá rí na̱gi̱mbíin xa̱bo̱ judío̱, ikhín gída̱ꞌ mbáa xa̱bo̱ tsí waꞌyáa neꞌne mbá gíñá ꞌguéen. Ikhaa tsúꞌkhue̱n gakhe̱ guéño nindxaꞌwá ná inuu Jesús: 34«Jesús, tsáánꞌ nadxa̱ꞌ ná Nasarét, ¡ayu janíí! Dí iyaaꞌ ga̱jma̱á nindxa̱ꞌxo̱ꞌ róꞌ. Á nadxa̱ꞌ gátha̱ne̱ gámbáanꞌxo̱ꞌ dxe̱ꞌ. Ikhúúnꞌ nda̱yo̱o̱ rí ikháánꞌ ñajwaanꞌ tsí Jaꞌwii nixúngua̱a̱ꞌ Ana̱ꞌlóꞌ».
35A̱ꞌkhue̱n rí Jesús nixná-ñájuun gíñá ꞌguéen jamí niꞌthúu̱n: «¡Wíí gáꞌne rawaanꞌ! ¡A̱ga̱jnáaꞌ ná xuyuu xa̱bo̱ tsúꞌkhue̱n!».
Xómáꞌ gíñá ꞌguéen nikruiga̱a̱ xa̱bo̱ tsúꞌkhue̱n mbayíí ná inúú xa̱bo̱. A̱ꞌkhue̱n nigájnaa̱ ná xuyuu xa̱bo̱, jamí táꞌne-jámbi̱yu̱u̱ꞌ máꞌ.
36Mbá xúgíin xa̱bo̱ maphú namakúu̱n, jamí nuthan-mijnée̱: «Náá máꞌ rí ajngáa ñajuun ríge̱ꞌ rá, rí xa̱bo̱ tsíge̱ꞌ naꞌthán-ñájúún gíñá ꞌguéen, nitiamakuíi̱ ene̱, jamí asndo nagáñúú iꞌnii̱».
37Jamí mbá xúgíí xuajen rí triga̱ ná numbaa rúꞌkhue̱n ni̱dróꞌoo ajngáa ga̱jma̱á numuu Jesús.
Jesús naꞌne-thanuu dxa̱gui̱i Simón Pédro̱
(Mt 8.14-15; Mc 1.29-31)
38Ído̱ nigájna̱a Jesús ná guꞌwá rí na̱gi̱mbíin xa̱bo̱ judío̱, a̱ꞌkhue̱n ni̱ke̱e̱ ná guꞌwóo Simón. Xómáꞌ dxa̱gui̱i Simón najáñuu̱, maphú gakhe̱ mikaa̱, jamí nithán-jáñíi̱ Jesús rí ma̱ꞌne thanuu̱. 39A̱ꞌkhue̱n nixuꞌma-mina̱ꞌ Jesús ná jabóo nána̱ tsí najáñuu, jamí nixná-ñájuu̱n nandii rí ma̱ga̱jnáa ná xuyuu̱. Núkho̱ ni̱gata̱a rí mikaa nána̱ tsúꞌkhue̱n, a̱ꞌkhue̱n rí mbá nacha̱ máꞌ ni̱tu̱xii̱ neꞌne-mújúu̱n rí mu̱phi̱i̱.
Jesús naꞌne-thanúú mbaꞌiin xa̱bo̱
(Mt 8.16-17; Mc 1.32-34)
40Ído̱ rí na̱tra̱ꞌmúu a̱kha̱ꞌ, mbá xúgíin xa̱bo̱ tsí guáꞌdiin a̱ngui̱ín tsí najáñúú ga̱jma̱á mbá xúgíí inii nandii, niguwá judii̱n ná inuu Jesús. Xómáꞌ ikhaa̱ nixkrámaa̱ mbámbáa xa̱bo̱ tsúꞌkhue̱n, jamí núkho̱ niꞌni̱i a̱kui̱ín niꞌnii̱. 41Xúꞌkhue̱n máꞌ mangaa, mbaꞌiin xa̱bo̱ nagájna̱á gíñá ꞌguéen ná xuñúú. Ído̱ nagájnáa̱, xáꞌnii i̱ndxa̱ꞌwe̱e̱ inuu Jesús: «Ikháánꞌ ñajwaanꞌ A̱dée Ana̱ꞌlóꞌ». Xómáꞌ Jesús naxná-ñájúu̱n gíñá ꞌguéen rí ma̱ga̱jnáa̱ ná xuñúú xa̱bo̱, jamí tániñúu̱ muthan, numuu nduyáá rí ikhaa̱ ñajuu̱n Krísto̱.
Jesús naꞌthán-ráꞌa ná numbaa Galiléa̱
(Mc 1.35-39)
42Ído̱ ni̱mbiꞌi, a̱ꞌkhue̱n niríya̱ꞌ-mina̱ꞌ Jesús ná rawuun xuajen, ná ndawi̱in xa̱bo̱. Xómáꞌ xa̱bo̱ ningrigu̱únꞌ ndiꞌyáa̱ asndo náá ni̱xkamaa̱, a̱ꞌkhue̱n nini̱i̱ rí ma̱wajún-ꞌthíi̱n kajngó ma̱xáꞌgee̱ i̱mba̱ janíí. 43Xómáꞌ ikhaa̱ niꞌthúu̱n: «Maphú ndaꞌyóo rí ma̱ꞌgá gátha̱n-ráꞌalo̱ꞌ ná i̱ꞌwá xuajen mangaa, ajngáa máján rí naꞌthán rí Ana̱ꞌlóꞌ maꞌthán-ñájúún xa̱bo̱. Ikhaa numuu rúꞌkhue̱n waxúngu̱únꞌlo̱ꞌ ná numbaa ríge̱ꞌ».
44Xkuaꞌnii na̱ka̱-raꞌthán-raꞌa Jesús ná awúun mbámbá guꞌwá rí na̱gi̱mbíin xa̱bo̱ judío̱, rí triga̱ ná numbaa Galiléa̱.#4.44 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «numbaa Judéa̱».
ទើបបានជ្រើសរើសហើយ៖
Lúka̱s 4: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
