Lúka̱s 3
3
Nagíꞌdu̱u̱n Juáán naꞌthán-ráꞌa
(Mt 3.1-12; Mc 1.1-8; Jn 1.19-28)
1Ni̱ga̱nú máꞌ gu̱wa̱ꞌ-nítsu (15) tsigu rí Tibério̱ Sésa̱r ñajuun thúngaa ná Róma̱. Xómáꞌ Pónsio̱ Piláto̱ ñajuun xa̱bo̱ ñajun ná numbaa Judéa̱, xómáꞌ Eróde̱s ñajuun xa̱bo̱ ñajun ná numbaa Galiléa̱, xómáꞌ dxíyo̱o̱ Eróde̱s tsí mbiꞌyuu Felípe̱ ñajuun xa̱bo̱ ñajun ná numbaa Ituréa̱ ga̱jma̱á Trakoníte̱, jamí Lisánia̱s ñajuun xa̱bo̱ ñajun ná numbaa Abilínia̱. 2Xómáꞌ Anáás ga̱jma̱á Kaifás ñajúu̱n tsí juya̱ idxu̱ún dxakuun. Nákhí mbiꞌi rúꞌkhue̱n xtáa Juáán, a̱dée Sakaría̱s, ná mbaa niníí, jamí ikhín ni̱grui̱guíi̱ ajngáa rawuun Ana̱ꞌlóꞌ. 3A̱ꞌkhue̱n rí ni̱ka̱ Juáán mbá xúgíí rawuun matha mba̱a̱ rí mbiꞌyuu Jordán. Ni̱ka̱-raꞌthán-rúꞌwúu̱n xa̱bo̱ rí ma̱thanga̱a a̱kuíi̱n ná inuu Ana̱ꞌlóꞌ, jamí rí ga̱jngúu̱n ná awúun iya kajngó marngudi̱i la Ana̱ꞌlóꞌ aꞌkhúu̱n. 4Ni̱ꞌkha̱-raríga̱ xómá ka̱ma naꞌthán ná i̱yu̱u̱ꞌ Isaía̱s, tsí ni̱gu̱wíjnga̱a ajngóo Ana̱ꞌlóꞌ wajyúú:
«Phú gakhe̱ naꞌthán mbáa xa̱bo̱ ná mbaa niníí: “Gu̱ne̱-májánlaꞌ jamba̱a̱ ná ma̱ꞌkha̱ Táta̱.
Gu̱ríya̱ꞌlaꞌ mbá ikha jmbu ma̱ꞌgee̱.
5A̱gu̱ma-mbáni̱i mbá xúgíí bóo,
ga̱ngudi-ri̱ga̱a mbá xúgíí júba̱ ga̱jma̱á xndúu.
A̱gu̱ma-jmbu̱u jamba̱a̱ rí mixngaa,
jamí a̱gu̱ma-mbáni̱i jamba̱a̱ rí xndíji inuu.
6A̱ꞌkhue̱n rí mbá xúgíin xa̱bo̱ numbaa mbuyáa̱ rí
ma̱gu̱ma-jáwíi̱n gáꞌne Ana̱ꞌlóꞌ”».#3.4-6 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 40.3-5.
7A̱ꞌkhue̱n rí phú mbaꞌiin xa̱bo̱ niguwá rí mi̱xúꞌdu-maꞌíin ná awúun iya gáꞌne Juáán, xómáꞌ ikhaa̱ niꞌthúu̱n:
―¡Ikháanꞌlaꞌ xómá a̱bo̱ꞌ jaꞌñáaꞌlaꞌ! Tsáa niꞌthánlaꞌ rí ma̱jríñáaꞌlaꞌ inuu jamínu̱ꞌ rí ma̱ꞌkha̱ gáꞌne Ana̱ꞌlóꞌ róꞌ. 8Gu̱ne̱laꞌ rí máján xómá eꞌne ixe̱ rí máján xndúu, kajngó ma̱kujma rí nithanga̱a máꞌ a̱kia̱nꞌlaꞌ ná inuu Ana̱ꞌlóꞌ. Jamí mu̱xúndxa̱ꞌwa̱-mijnálaꞌ ná awúun a̱kia̱nꞌlaꞌ: “Ikháánꞌlóꞌ mu̱xúdrígúlóꞌ jamínu̱ꞌ gáꞌne Ana̱ꞌlóꞌ, numuu rí i̱ji̱in Abraám ñajwanlóꞌ”. Numuu rí ikhúúnꞌ i̱tha̱nꞌlaꞌ rí Ana̱ꞌlóꞌ ma̱goo ma̱ꞌne rí asndo itsí ríge̱ꞌ ma̱ꞌni̱i i̱ji̱in Abraám. 9Jamí ka̱ma máꞌ na̱ma̱ñuu ácha̱ ná ajmu̱u̱ ixe̱. Ikhaa jngó, mu̱thon-wíí asndo ajmu̱u̱ mbá xúgíí ixe̱ rí na̱nguá máján xndúu, jamí ma̱ti ne̱ mi̱kha ná awúun agu.
10A̱ꞌkhue̱n watraxi̱í Juáán nene̱ xa̱bo̱:
―Dí jaꞌyoo mu̱ne̱xo̱ꞌ xúꞌkhue̱n rá.
11Xómáꞌ Juáán niriꞌñúu̱:
―Tsí gíꞌdoo a̱jma̱ kutíin, gaxnúu̱ ne̱ mbá tsí nda̱a̱ kutíin. Tsí gíꞌdoo rí naꞌkho̱, gaxpíꞌtháa̱ ne̱ mi̱khui̱i̱ ga̱jmáa̱ xa̱bo̱ tsí nda̱a̱ rí me̱kho̱.
12Niguwá xa̱bo̱ tsí nu̱ru̱ma mbúkho̱o̱ guꞌwá-ñajun mangiin, kajngó mi̱xúꞌdu-maꞌíi̱n ná awúun iya. A̱ꞌkhue̱n ni̱ra̱xíi̱ Juáán:
―Táta̱ naꞌsngáá, dí jaꞌyoo mu̱ne̱ ikháanꞌxo̱ꞌ rá.
13Xómáꞌ Juáán niriꞌñúú xa̱bo̱ tsúꞌkhue̱n:
―Náxánújngu-rámuu rí nu̱ru̱malaꞌ rá. Rí gu̱ru̱malaꞌ i̱ndo̱ó máꞌ rí jaꞌyoo.
14Xúꞌkhue̱n máꞌ mbá tikhuun xa̱bo̱ tsí ku̱ra̱tuun ajwa̱nꞌ, ni̱ra̱xíi̱ Juáán mangii̱n:
―Ikháanꞌxo̱ꞌ rá, dí jaꞌyoo mu̱ne̱xo̱ꞌ rá.
Xómáꞌ Juáán niriꞌñúu̱:
―Mu̱xúrígú-jaꞌyíílaꞌ mbúkha̱a̱ asndo nimbáa xa̱bo̱ ga̱jma̱á tsiakhe̱, ni máꞌ mu̱xúrígu-waꞌalaꞌ aꞌkhúun xa̱bo̱. Jamí mu̱xúne̱-xkunjdulaꞌ ga̱jma̱á numuu rí nu̱da̱a̱ꞌlaꞌ.
15Mbá xúgíin xa̱bo̱ guáꞌthíi̱n mbuyáa̱ dí gáríga̱. Nu̱ra̱xe̱-mijnée̱ ná awúun a̱kuíi̱n á gáꞌne xí Juáán ñajuun Krísto̱, tsí maxúngua̱a̱ꞌ Ana̱ꞌlóꞌ. 16A̱ꞌkhue̱n rí Juáán niꞌthúún mbá xúgíin xa̱bo̱ tsúꞌkhue̱n: «Gakon máꞌ rí ikhúúnꞌ na̱xu̱ꞌdú-maꞌáanꞌlaꞌ ná awúun iya. I̱ndo̱ó máꞌ numuu rí ná tsu̱du̱ꞌ na̱ꞌkha̱ mbáa tsí i̱wa̱á mba̱a̱ ski̱yu̱u̱ꞌ xó rí ikhúúnꞌ, jamí ikhúúnꞌ ni ra̱jáꞌyoꞌ rí ma̱ra̱khúu chádoo̱. Xómáꞌ ikhaa̱ ma̱ꞌnii̱ rí mu̱dríguíilaꞌ Xu̱u̱ꞌ Ana̱ꞌlóꞌ jamí mu̱drígúlaꞌ agu. 17Ikhaa̱ jayée̱ máꞌ xu̱wa̱á rí manditíi̱ tsíga ma̱ꞌga náskoo. Xómáꞌ itsúu rí jaꞌwu ma̱gu̱xii̱ ne̱ ná awúun xtagaꞌwuu̱, xómáꞌ náska magruíye̱e̱ꞌ ne̱ mi̱kha ná awúun agu rí ni miꞌtsú ma̱xáwíyuu».
18Ga̱jma̱á ajngáa rí xkuaꞌnii jamí ga̱jma̱á phú mbaꞌa i̱ꞌwá ajngáa, Juáán naꞌthán-múꞌúu̱n xa̱bo̱ ga̱jma̱á numuu ajngáa máján. 19Xúꞌkhue̱n máꞌ mangaa, niríyúu̱ xa̱bo̱ ñajun Eróde̱s ga̱jma̱á numuu rí gíꞌdaa̱ Erodía̱s asndo xómá a̱ꞌguii̱. A̱ꞌgo̱ tsúꞌkhue̱n ñajuun a̱ꞌgui̱i Felípe̱, dxíyo̱o̱ máꞌ Eróde̱s. Juáán niríyúu Eróde̱s mangaa ga̱jma̱á numuu i̱ꞌwá rí ra̱máján i̱ꞌkha̱-raꞌnii̱. 20A̱ꞌkhue̱n rí Eróde̱s xóó niꞌnii̱ i̱mba̱ rí ra̱máján: nirugua-raꞌaa̱ Juáán ná géjwa̱nꞌ.
Juáán naxúꞌdu-maꞌáan Jesús ná awúun iya
(Mt 3.13-17; Mc 1.9-11)
21Mbá mbiꞌi rí Juáán naxúꞌdu-maꞌíin xa̱bo̱ ná awúun iya, nixúꞌdu-maꞌáa̱n Jesús mangaa ná awúun iya. Jamí awúun máꞌ rí Jesús naꞌthán-jáñuu Ana̱ꞌlóꞌ, a̱ꞌkhue̱n ni̱ma̱ꞌthoo mikhu, 22jamí nikujma ni̱ga̱taa asndo ná mikhuíí Xu̱u̱ꞌ Ana̱ꞌlóꞌ ná wíji̱i̱, xómá na̱ga̱taa rigu. A̱ꞌkhue̱n niwán-ti̱ya̱ꞌ mbá a̱ꞌwá ná mikhuíí rí naꞌthán: «Ikháánꞌ ñajwaanꞌ A̱ꞌdéꞌ. Phú nandoꞌ ja̱ya̱a̱ꞌ jamí phú nadxu a̱kui̱nꞌ ithane̱».
Xa̱bo̱ tsí ñajúún xi̱ꞌñú-egoo Jesús
(Mt 1.1-17)
23Ído̱ rí Jesús nigíꞌdu̱u̱n niꞌnii̱ ñajuu̱n, gíꞌdoo̱ máꞌ xí mbá skíñú gu̱wa̱ꞌ wáa tsiguu̱.
Nuthan xa̱bo̱ rí Jesús ñajuun a̱dée José.
Xómáꞌ José ninindxu̱u̱ a̱dée Elí,
24xómáꞌ Elí ninindxu̱u̱ a̱dée Matát,
xómáꞌ Matát ninindxu̱u̱ a̱dée Lebí,
xómáꞌ Lebí ninindxu̱u̱ a̱dée Melkí,
xómáꞌ Melkí ninindxu̱u̱ a̱dée Jána̱,
xómáꞌ Jána̱ ninindxu̱u̱ a̱dée José.
25Xómáꞌ José ninindxu̱u̱ a̱dée Matatía̱s,
xómáꞌ Matatía̱s ninindxu̱u̱ a̱dée Amós,
xómáꞌ Amós ninindxu̱u̱ a̱dée Naúm,
xómáꞌ Naúm ninindxu̱u̱ a̱dée Ésli̱,
xómáꞌ Ésli̱ ninindxu̱u̱ a̱dée Nagái̱.
26Xómáꞌ Nagái̱ ninindxu̱u̱ a̱dée Ma̱át,
xómáꞌ Ma̱át ninindxu̱u̱ a̱dée Matatía̱s,
xómáꞌ Matatía̱s ninindxu̱u̱ a̱dée Seméi̱,
xómáꞌ Seméi̱ ninindxu̱u̱ a̱dée José,
xómáꞌ José ninindxu̱u̱ a̱dée Judá.
27Xómáꞌ Judá ninindxu̱u̱ a̱dée Joanán,
xómáꞌ Joanán ninindxu̱u̱ a̱dée Résa̱,
xómáꞌ Résa̱ ninindxu̱u̱ a̱dée Sorobabél,
xómáꞌ Sorobabél ninindxu̱u̱ a̱dée Salatiél,
xómáꞌ Salatiél ninindxu̱u̱ a̱dée Néri̱.
28Xómáꞌ Néri̱ ninindxu̱u̱ a̱dée Melkí,
xómáꞌ Melkí ninindxu̱u̱ a̱dée Ádi̱,
xómáꞌ Ádi̱ ninindxu̱u̱ a̱dée Kosám,
xómáꞌ Kosám ninindxu̱u̱ a̱dée Elmodám,
xómáꞌ Elmodám ninindxu̱u̱ a̱dée Ér.
29Xómáꞌ Ér ninindxu̱u̱ a̱dée Josué,
xómáꞌ Josué ninindxu̱u̱ a̱dée Eliesér,
xómáꞌ Eliesér ninindxu̱u̱ a̱dée Jorím,
xómáꞌ Jorím ninindxu̱u̱ a̱dée Matát.
30Xómáꞌ Matát ninindxu̱u̱ a̱dée Lebí,#3.30 Ríga̱ mbá tikhu i̱yi̱i̱ꞌ rí waꞌthán-ri̱ya̱aꞌ rí ka̱ma mbiꞌyuu Lebí ná kíxnuu 29.
xómáꞌ Lebí ninindxu̱u̱ a̱dée Simeón,
xómáꞌ Simeón ninindxu̱u̱ a̱dée Judá,
xómáꞌ Judá ninindxu̱u̱ a̱dée José,
xómáꞌ José ninindxu̱u̱ a̱dée Jonán,
xómáꞌ Jonán ninindxu̱u̱ a̱dée Eliakím.
31Xómáꞌ Eliakím ninindxu̱u̱ a̱dée Meléa̱,
xómáꞌ Meléa̱ ninindxu̱u̱ a̱dée Mainán,
xómáꞌ Mainán ninindxu̱u̱ a̱dée Matáta̱,
xómáꞌ Matáta̱ ninindxu̱u̱ a̱dée Natán.
32Xómáꞌ Natán ninindxu̱u̱ a̱dée Dabíd,#3.32 Ríga̱ mbá tikhu i̱yi̱i̱ꞌ rí waꞌthán-ri̱ya̱aꞌ rí ka̱ma mbiꞌyuu Dabíd ná kíxnuu 31.
xómáꞌ Dabíd ninindxu̱u̱ a̱dée Isaí,
xómáꞌ Isaí ninindxu̱u̱ a̱dée Obéd,
xómáꞌ Obéd ninindxu̱u̱ a̱dée Bóós,
xómáꞌ Bóós ninindxu̱u̱ a̱dée Salmón,
xómáꞌ Salmón ninindxu̱u̱ a̱dée Naasón.
33Xómáꞌ Naasón ninindxu̱u̱ a̱dée Aminadáb,
xómáꞌ Aminadáb ninindxu̱u̱ a̱dée Arám,#3.33 Ríga̱ mbá tikhu i̱yi̱i̱ꞌ griégo̱ rí wayuu ná mixtiꞌkhu mbiꞌñúú xa̱bo̱ ná kíxnuu ríge̱ꞌ.
xómáꞌ Arám ninindxu̱u̱ a̱dée Esróm,
xómáꞌ Esróm ninindxu̱u̱ a̱dée Fáre̱s,
xómáꞌ Fáre̱s ninindxu̱u̱ a̱dée Judá.
34Xómáꞌ Judá ninindxu̱u̱ a̱dée Jakób,
xómáꞌ Jakób ninindxu̱u̱ a̱dée Isaák,
xómáꞌ Isaák ninindxu̱u̱ a̱dée Abraám,
xómáꞌ Abraám ninindxu̱u̱ a̱dée Taré,
xómáꞌ Taré ninindxu̱u̱ a̱dée Nakór.
35Xómáꞌ Nakór ninindxu̱u̱ a̱dée Serúg,
xómáꞌ Serúg ninindxu̱u̱ a̱dée Rágau̱,
xómáꞌ Rágau̱ ninindxu̱u̱ a̱dée Péle̱g,
xómáꞌ Péle̱g ninindxu̱u̱ a̱dée Ebér,
xómáꞌ Ebér ninindxu̱u̱ a̱dée Sála.
36Xómáꞌ Sála ninindxu̱u̱ a̱dée Kainán,
xómáꞌ Kainán ninindxu̱u̱ a̱dée Arfaksád,
xómáꞌ Arfaksád ninindxu̱u̱ a̱dée Sém,
xómáꞌ Sém ninindxu̱u̱ a̱dée Noé,
xómáꞌ Noé ninindxu̱u̱ a̱dée Lamék.
37Xómáꞌ Lamék ninindxu̱u̱ a̱dée Matusalén,
xómáꞌ Matusalén ninindxu̱u̱ a̱dée Enók,
xómáꞌ Enók ninindxu̱u̱ a̱dée Jaréd,
xómáꞌ Jaréd ninindxu̱u̱ a̱dée Maalaleél,
xómáꞌ Maalaleél ninindxu̱u̱ a̱dée Kainán.
38Xómáꞌ Kainán ninindxu̱u̱ a̱dée Enós,
xómáꞌ Enós ninindxu̱u̱ a̱dée Sét,
xómáꞌ Sét ninindxu̱u̱ a̱dée Adán,
xómáꞌ Adán ninindxu̱u̱ a̱dée Ana̱ꞌlóꞌ.
ទើបបានជ្រើសរើសហើយ៖
Lúka̱s 3: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
