Lúka̱s 13
13
Ma̱ja̱ñúú xa̱bo̱ tsí na̱nguá ithanga̱a a̱kui̱ín ná inuu Ana̱ꞌlóꞌ
1Nákhí máꞌ mbiꞌi rí ñúꞌún, niguáꞌnú mbá tikhuun xa̱bo̱ nitháán Jesús rí neꞌne Piláto̱, tsí ñajuun xa̱bo̱ ñajun. Nitháa̱n rí ni̱gu̱díi̱n mbá tikhuun xa̱bo̱ numbaa Galiléa̱ jamí nigánda̱wo̱o̱ꞌ iꞌdiúún tsúꞌkhue̱n ga̱jma̱á iꞌdiúún xu̱kú tsí nu̱xna̱xíi̱n ná inuu Ana̱ꞌlóꞌ. 2Xómáꞌ Jesús niꞌthúu̱n: «Á numuu rí xkuaꞌnii nigíꞌníí xa̱bo̱ numbaa Galiléa̱, na̱ju̱ma̱ꞌlaꞌ rí i̱tha̱án máꞌ xa̱bo̱ tsí nune̱ aꞌkhán ñajúu̱n ikhii̱n xó rí i̱ꞌwíin xa̱bo̱ xuajñúu̱ rá dxe̱ꞌ. 3Ikhúúnꞌ na̱tha̱nꞌlaꞌ rí na̱nguá. Xúꞌkhue̱n máꞌ mangáanꞌlaꞌ, ma̱ja̱ñálaꞌ mbá xúgiáanꞌlaꞌ xí tsíthanga̱a a̱kia̱nꞌlaꞌ ná inuu Ana̱ꞌlóꞌ. 4O na̱ju̱ma̱ꞌlaꞌ rí xa̱bo̱ tsí mbá gu̱wa̱ꞌ-nítsu i̱tsu̱un (18), tsí nijáñúú ído̱ nixpátráma guꞌwá tsída̱ꞌ tsu̱du̱ún ná Siloé, i̱wa̱á gíꞌmii̱ aꞌkhán ikhii̱n xó rí i̱ꞌwíin xa̱bo̱ tsí júwa̱ꞌ ná Jerusalén dxe̱ꞌ. 5Na̱nguá. I̱ndo̱ó máꞌ numuu rí ikhúúnꞌ na̱tha̱nꞌlaꞌ: xí tsíthanga̱a a̱kia̱nꞌlaꞌ ná inuu Ana̱ꞌlóꞌ, ma̱ja̱ñálaꞌ mbá xúgiáanꞌ mangáanꞌlaꞌ».
Ajngáa xkri̱da ga̱jma̱á numuu ixe̱ ígo̱ rí tsíjma̱a̱ xndúu
6A̱ꞌkhue̱n Jesús neꞌne ajngáa xkri̱da ríge̱ꞌ: «Mbáa xa̱bo̱ gíꞌdoo mbá ixe̱ ígo̱ ná mbaa rí gíꞌdoo̱ ajmu̱u̱ xndú úba̱. Ído̱ ni̱ke̱e̱ gáꞌyoo̱ xí ríga̱ xndúu ne̱ mi̱khui̱i̱, ndiꞌyoo̱ rí nda̱a̱ ne̱. 7A̱ꞌkhue̱n niꞌthúu̱n xa̱bo̱ tsí na̱ña̱wu̱u̱n ajmu̱u̱ xndú úba̱: “Atiaxe̱ ma̱tha̱ya̱á, riatsú tsigu iꞌkha gáyo̱o̱ xí ríga̱ xndúu ixe̱ ríge̱ꞌ me̱ꞌkholo̱ꞌ, jamí na̱nguá i̱xkamaalo̱ꞌ ne̱. Ikhaa jngó athadi̱í ne̱. Náá lá numuu wéje̱ ne̱ xí i̱ndo̱ó máꞌ najmuu ne̱ xúgi̱í ju̱ba̱ꞌ rá”. 8Xómáꞌ xa̱bo̱ tsí na̱ña̱wu̱u̱n mbaa niriꞌñuu̱: “Táta̱, atatsíñáá ne̱ i̱mbo̱ó tsigu ríge̱ꞌ. Ma̱ne̱-xawaalo̱ꞌ ju̱ba̱ꞌ ná nakhúu ne̱ jamí ma̱ra̱khuáalo̱ꞌ ne̱ yuska. 9Á gáꞌne xí maxná xndúu ne̱. Xí na̱nguá rá, a̱ꞌkhue̱n rí ma̱tha̱di̱í ne̱”».
Jesús naꞌne-thanuu mbáa a̱ꞌgo̱ awúun mbiꞌi rí nduꞌyáa xa̱ꞌlóꞌ
10Mbá mbiꞌi rí nduꞌyáa xa̱ꞌlóꞌ gída̱ꞌ Jesús naꞌsngáá ná guꞌwá rí na̱gi̱mbíin xa̱bo̱ judío̱. 11Ikhín gída̱ꞌ mbáa nána̱ tsí timbá gu̱wa̱ꞌ-nítsu i̱tsu̱ (18) tsigu eꞌne rí najáñuu. Mbáa gíñá ꞌguéen naꞌne rí nde̱tse̱ tsu̱du̱u̱ jamí nitháan tsíyoo gáwi̱jii̱ jmbu. 12Ído̱ rí Jesús ndiꞌyoo nána̱ tsúꞌkhue̱n, a̱ꞌkhue̱n nindxaꞌwóo̱ jamí niꞌthúu̱n: «Nána̱, na̱gu̱ma-jríña̱áꞌ inuu nandiaaꞌ».
13A̱ꞌkhue̱n Jesús nixkajma ga̱jma̱á nájma̱ ñawúun ná tsu̱du̱u̱ nána̱ tsúꞌkhue̱n. Núkho̱ ni̱wi̱jii̱ jmbu, jamí nigíꞌdu̱u̱n neꞌne-mba̱a̱ Ana̱ꞌlóꞌ. 14Xómáꞌ xa̱bo̱ tsí jayá idxu̱u̱ ná guꞌwá rí na̱gi̱mbíin xa̱bo̱ judío̱, nijiꞌnáa̱, numuu rí Jesús neꞌne-thanuu nána̱ tsúꞌkhue̱n awúun mbiꞌi rí nduꞌyáa xa̱ꞌlóꞌ. A̱ꞌkhue̱n niꞌthúu̱n xa̱bo̱ tsí gachúún ikhín: «Ríga̱ majun mbiꞌi rí ma̱goo mu̱ñajunlóꞌ. Ikhaa jngó, a̱guwalaꞌ awúun mbiꞌi rúꞌkhue̱n ma̱gu̱ma-thanalaꞌ, jamí ma̱xáguwalaꞌ awúun mbiꞌi rí nduꞌyáa xa̱ꞌlóꞌ».
15Xómáꞌ Táta̱ niriꞌñuu̱: «¡Phú a̱jma̱ inalaꞌ! Á ra̱ꞌkhá asndo tsáa tsí ikháanꞌlaꞌ narakhúu xidi̱i o xtángidiuu, jamí na̱ka̱ jayáa̱ ma̱ga̱a̱n iya awúun mbiꞌi rí nduꞌyáa xa̱ꞌlóꞌ dxe̱ꞌ. 16Xómáꞌ nána̱ tsíge̱ꞌ, tsí jayá iꞌdiuu Abraám, xtoꞌwóo neꞌne Satanás ga̱jma̱á nandii asndo nákhí timbá gu̱wa̱ꞌ-nítsu i̱tsu̱ (18) tsigu. Á ra̱jáꞌyoo mi̱ꞌkhuíi̱ ikhaa̱ awúun mbiꞌi rí nduꞌyáa xa̱ꞌlóꞌ rá dxe̱ꞌ».
17Ído̱ niꞌthán Jesús ríge̱ꞌ, ni̱ti̱ñu̱úꞌ mbá xúgíin xa̱bo̱ sia̱nꞌ gajmíi̱. Xómáꞌ xa̱bo̱ tsí mbaꞌiin, mbá xúgíi̱n phú gagi a̱kuíi̱n neꞌne ga̱jma̱á numuu rí phú wáá rí naꞌne Jesús.
Ajngáa xkri̱da ga̱jma̱á numuu tsígoo ya̱ꞌwo̱ rí mbiꞌyuu mostása̱
(Mt 13.31-32; Mc 4.30-32)
18A̱ꞌkhue̱n niꞌthán Jesús: «Dí ñajuun ma̱goo ma̱jmaa kajngó mi̱ꞌthán xáne Ana̱ꞌlóꞌ naꞌthán-ñájúún xa̱bo̱ róꞌ. Dí ñajuun ma̱goo ma̱ne̱ xkri̱doo ne̱ róꞌ. 19Xómá tsígoo ya̱ꞌwo̱ rí mbiꞌyuu mostása̱ jaꞌnii ne̱, rí naꞌdu mbáa xa̱bo̱ ná mbayuu. Ikhaa rúꞌkhue̱n nagaja̱a̱ asndo naꞌni̱i xómá mbá ixe̱ mba̱a̱, jamí nune̱ xáñúú ño̱ꞌo̱n ná ñawúun ne̱».
Ajngáa xkri̱da ga̱jma̱á numuu ñu̱u̱ miga̱ꞌ
(Mt 13.33)
20Niꞌthán Jesús ajngáa ríge̱ꞌ mangaa: «Dí ñajuun ma̱goo ma̱jmuꞌ kajngó ma̱tha̱n xáne Ana̱ꞌlóꞌ naꞌthán-ñájúún xa̱bo̱ róꞌ. 21Xómá mbá lájwíin ñu̱u̱ miga̱ꞌ jaꞌnii ne̱, rí nigánda̱wo̱o̱ꞌ mbáa a̱ꞌgo̱ ná awúun atsú awan mba̱ꞌwo̱ ña̱wi̱in ixí iña, a̱ꞌkhue̱n ni̱gi̱xe̱ ne̱ mbá xúgíí».
Xkrugua rí na̱nguá ma̱jña̱ꞌ
(Mt 7.13-14,21-23)
22Awúun máꞌ rí na̱ka̱ Jesús ná Jerusalén, naꞌsngúu̱n xa̱bo̱ ná triga̱ xuajen rí mba̱ꞌwo̱ jamí xuajen rí laka ná na̱ka̱-ranújngoo̱. 23Mbáa xa̱bo̱ niraxu̱u̱ Jesús:
―Táta̱, á na̱nguá mbaꞌiin xa̱bo̱ tsí ma̱jáwíin rá dxe̱ꞌ.
Xómáꞌ Jesús niꞌthúún xa̱bo̱: 24«Gu̱xna̱-míjnálaꞌ tsiakhe̱ rí ma̱ta̱ꞌa̱ꞌlaꞌ ná naꞌthán-ñájun Ana̱ꞌlóꞌ ga̱jma̱á majñu̱u̱ xkrugua rí na̱nguá ma̱jña̱ꞌ. Numuu rí maphú mbaꞌiin xa̱bo̱ ma̱gúún gátu̱ꞌu̱ún jamí ma̱xáxóo gátu̱ꞌúu̱n. 25Ído̱ rí ni̱tu̱xu̱u̱ꞌ máꞌ xa̱bo̱ tsí guꞌwóo gárugua̱a la xkrugua, a̱ꞌkhue̱n rí ikháanꞌlaꞌ tsáanꞌ ninguanálaꞌ rixa̱á mu̱gíꞌdi̱ín mu̱tha̱n-ráꞌalaꞌ: “Táta̱, atarmáꞌtháá ma̱ta̱ꞌa̱ꞌxo̱ꞌ”. Xómáꞌ ikhaa̱ mariꞌñalaꞌ: “Tsíyo̱o̱ náá xa̱bo̱ ñajwanlaꞌ”. 26Xómáꞌ ikháanꞌlaꞌ mu̱gíꞌdi̱ín mu̱tha̱nlaꞌ: “Ikháanꞌxo̱ꞌ nipeꞌtso jamí niwanxo̱ꞌ ga̱jma̱á nindxa̱a̱ꞌ, jamí nirasngáá ná xuáá ná awúun xuajñaxo̱ꞌ”. 27Xómáꞌ ikhaa̱ mariꞌñalaꞌ: “Ni̱tha̱nꞌlaꞌ máꞌ rí tsíyo̱o̱ náá xa̱bo̱ ñajwanlaꞌ. ¡Awaxo̱nlaꞌ janíí ná inuꞌ, mbá xúgiáanꞌ ikháanꞌlaꞌ tsáanꞌ nu̱ne̱laꞌ rí xkawe̱ꞌ!”
28»Ikhín mu̱mbi̱ya̱ꞌlaꞌ jamí mu̱pho-ꞌduun iñalaꞌ, ído̱ gúya̱álaꞌ rí Abraám, ga̱jma̱á Isaák, ga̱jma̱á Jakób, jamí mbá xúgíin tsí ni̱rawíjnga̱a ajngóo Ana̱ꞌlóꞌ, júwe̱e̱ꞌ ná majñu̱ú xa̱bo̱ tsí naꞌthán-ñájúún Ana̱ꞌlóꞌ. Xómáꞌ ikháanꞌlaꞌ ma̱nguanálaꞌ rixa̱á. 29Numuu rí ma̱guwá xa̱bo̱ ná giaxu̱u̱ naꞌwáán jamí ná giaxu̱u̱ jawáá, ná giaxu̱u̱ na̱ꞌkha̱ a̱kha̱ꞌ jamí ná giaxu̱u̱ na̱tra̱ꞌmúu a̱kha̱ꞌ, ma̱trigii̱n mu̱piꞌtsii̱ ná majñu̱ú xa̱bo̱ tsí naꞌthán-ñájúún Ana̱ꞌlóꞌ. 30I̱ndo̱ó máꞌ numuu rí júwa̱ꞌ mbá tikhuun xa̱bo̱ tsí na̱nguá gíꞌdoo numúú xúge̱ꞌ, ikhiin tsúꞌkhue̱n phú ma̱gi̱ꞌdoo numúú nda̱wa̱á. Jamí júwa̱ꞌ mbá tikhuun xa̱bo̱ tsí phú gíꞌdoo numúú xúge̱ꞌ, ikhiin tsúꞌkhue̱n náxági̱ꞌdoo numúú nda̱wa̱á».
Jesús na̱mbi̱ya̱ꞌ ga̱jma̱á numuu xuajen Jerusalén
(Mt 23.37-39)
31Awúun máꞌ rúꞌkhue̱n niguáꞌnú mbá tikhuun xa̱bo̱ fariséo̱, jamí nitháa̱n Jesús:
―A̱ga̱jnáaꞌ ge̱jyoꞌ, jamí ayu i̱mba̱ janíí, numuu rí Eróde̱s nandoo gáxíña̱áꞌ.
32Xómáꞌ ikhaa̱ niriꞌñúu̱:
―Aꞌgua gútha̱ánlaꞌ e̱ge̱ ejmba̱a̱ tsúꞌkhue̱n ajngáa ríge̱ꞌ: “Atiaxe̱ ma̱tha̱ya̱á, xúge̱ꞌ jamí gátsíí na̱xkawíinlo̱ꞌ gíñá ꞌguéen ná xuñúú xa̱bo̱, xúꞌkhue̱n máꞌ na̱ne̱ thanúú xa̱bo̱, jamí ído̱ gárámuu atsú mbiꞌi ma̱mbóꞌlo̱ꞌ”. 33I̱ndo̱ó máꞌ numuu rí ndaꞌyóo rí xúge̱ꞌ, gátsíí jamí nawi̱ín mba̱ya̱ xóó ikhoꞌ. Numuu rí i̱ndo̱ó máꞌ ná Jerusalén jaꞌyoo ma̱ja̱ñúu mbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ.
34A̱ꞌkhue̱n niꞌthée̱n: «¡Phú mingínáaꞌ ikháanꞌlaꞌ xa̱bo̱ xuajen Jerusalén, tsáanꞌ nu̱radíinlaꞌ tsí nu̱rawíjnga̱a ajngóo Ana̱ꞌlóꞌ, jamí nu̱xnu̱úlaꞌ ga̱jma̱á itsí xa̱bo̱ tsí naxuꞌmii Ana̱ꞌlóꞌ rí ma̱guwá juñu̱ú ajngóo̱ ná inalaꞌ! Phú mbaꞌa nothon ne̱ne̱ rí ma̱ꞌgí-ꞌndáanꞌlaꞌ xómá eꞌne mbáxte̱ tsí naꞌgí-ꞌndu̱un i̱ji̱in ná agoo xpípíi, xómáꞌ ikháanꞌlaꞌ ra̱khálaꞌ. 35Ikhaa jngó, gu̱dxawíínlaꞌ, Ana̱ꞌlóꞌ maniña-ti̱go̱o̱ xuajñalaꞌ, jamí na̱tha̱nꞌ-jmbalaꞌ rí náxúyo̱ꞌlaꞌ asndo gága̱nú mbiꞌi rí mu̱tha̱nlaꞌ: “¡A̱gu̱ma-tsakun-rámaa tsí na̱ꞌkha̱ ga̱jma̱á numuu Táta̱!”».
ទើបបានជ្រើសរើសហើយ៖
Lúka̱s 13: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
Lúka̱s 13
13
Ma̱ja̱ñúú xa̱bo̱ tsí na̱nguá ithanga̱a a̱kui̱ín ná inuu Ana̱ꞌlóꞌ
1Nákhí máꞌ mbiꞌi rí ñúꞌún, niguáꞌnú mbá tikhuun xa̱bo̱ nitháán Jesús rí neꞌne Piláto̱, tsí ñajuun xa̱bo̱ ñajun. Nitháa̱n rí ni̱gu̱díi̱n mbá tikhuun xa̱bo̱ numbaa Galiléa̱ jamí nigánda̱wo̱o̱ꞌ iꞌdiúún tsúꞌkhue̱n ga̱jma̱á iꞌdiúún xu̱kú tsí nu̱xna̱xíi̱n ná inuu Ana̱ꞌlóꞌ. 2Xómáꞌ Jesús niꞌthúu̱n: «Á numuu rí xkuaꞌnii nigíꞌníí xa̱bo̱ numbaa Galiléa̱, na̱ju̱ma̱ꞌlaꞌ rí i̱tha̱án máꞌ xa̱bo̱ tsí nune̱ aꞌkhán ñajúu̱n ikhii̱n xó rí i̱ꞌwíin xa̱bo̱ xuajñúu̱ rá dxe̱ꞌ. 3Ikhúúnꞌ na̱tha̱nꞌlaꞌ rí na̱nguá. Xúꞌkhue̱n máꞌ mangáanꞌlaꞌ, ma̱ja̱ñálaꞌ mbá xúgiáanꞌlaꞌ xí tsíthanga̱a a̱kia̱nꞌlaꞌ ná inuu Ana̱ꞌlóꞌ. 4O na̱ju̱ma̱ꞌlaꞌ rí xa̱bo̱ tsí mbá gu̱wa̱ꞌ-nítsu i̱tsu̱un (18), tsí nijáñúú ído̱ nixpátráma guꞌwá tsída̱ꞌ tsu̱du̱ún ná Siloé, i̱wa̱á gíꞌmii̱ aꞌkhán ikhii̱n xó rí i̱ꞌwíin xa̱bo̱ tsí júwa̱ꞌ ná Jerusalén dxe̱ꞌ. 5Na̱nguá. I̱ndo̱ó máꞌ numuu rí ikhúúnꞌ na̱tha̱nꞌlaꞌ: xí tsíthanga̱a a̱kia̱nꞌlaꞌ ná inuu Ana̱ꞌlóꞌ, ma̱ja̱ñálaꞌ mbá xúgiáanꞌ mangáanꞌlaꞌ».
Ajngáa xkri̱da ga̱jma̱á numuu ixe̱ ígo̱ rí tsíjma̱a̱ xndúu
6A̱ꞌkhue̱n Jesús neꞌne ajngáa xkri̱da ríge̱ꞌ: «Mbáa xa̱bo̱ gíꞌdoo mbá ixe̱ ígo̱ ná mbaa rí gíꞌdoo̱ ajmu̱u̱ xndú úba̱. Ído̱ ni̱ke̱e̱ gáꞌyoo̱ xí ríga̱ xndúu ne̱ mi̱khui̱i̱, ndiꞌyoo̱ rí nda̱a̱ ne̱. 7A̱ꞌkhue̱n niꞌthúu̱n xa̱bo̱ tsí na̱ña̱wu̱u̱n ajmu̱u̱ xndú úba̱: “Atiaxe̱ ma̱tha̱ya̱á, riatsú tsigu iꞌkha gáyo̱o̱ xí ríga̱ xndúu ixe̱ ríge̱ꞌ me̱ꞌkholo̱ꞌ, jamí na̱nguá i̱xkamaalo̱ꞌ ne̱. Ikhaa jngó athadi̱í ne̱. Náá lá numuu wéje̱ ne̱ xí i̱ndo̱ó máꞌ najmuu ne̱ xúgi̱í ju̱ba̱ꞌ rá”. 8Xómáꞌ xa̱bo̱ tsí na̱ña̱wu̱u̱n mbaa niriꞌñuu̱: “Táta̱, atatsíñáá ne̱ i̱mbo̱ó tsigu ríge̱ꞌ. Ma̱ne̱-xawaalo̱ꞌ ju̱ba̱ꞌ ná nakhúu ne̱ jamí ma̱ra̱khuáalo̱ꞌ ne̱ yuska. 9Á gáꞌne xí maxná xndúu ne̱. Xí na̱nguá rá, a̱ꞌkhue̱n rí ma̱tha̱di̱í ne̱”».
Jesús naꞌne-thanuu mbáa a̱ꞌgo̱ awúun mbiꞌi rí nduꞌyáa xa̱ꞌlóꞌ
10Mbá mbiꞌi rí nduꞌyáa xa̱ꞌlóꞌ gída̱ꞌ Jesús naꞌsngáá ná guꞌwá rí na̱gi̱mbíin xa̱bo̱ judío̱. 11Ikhín gída̱ꞌ mbáa nána̱ tsí timbá gu̱wa̱ꞌ-nítsu i̱tsu̱ (18) tsigu eꞌne rí najáñuu. Mbáa gíñá ꞌguéen naꞌne rí nde̱tse̱ tsu̱du̱u̱ jamí nitháan tsíyoo gáwi̱jii̱ jmbu. 12Ído̱ rí Jesús ndiꞌyoo nána̱ tsúꞌkhue̱n, a̱ꞌkhue̱n nindxaꞌwóo̱ jamí niꞌthúu̱n: «Nána̱, na̱gu̱ma-jríña̱áꞌ inuu nandiaaꞌ».
13A̱ꞌkhue̱n Jesús nixkajma ga̱jma̱á nájma̱ ñawúun ná tsu̱du̱u̱ nána̱ tsúꞌkhue̱n. Núkho̱ ni̱wi̱jii̱ jmbu, jamí nigíꞌdu̱u̱n neꞌne-mba̱a̱ Ana̱ꞌlóꞌ. 14Xómáꞌ xa̱bo̱ tsí jayá idxu̱u̱ ná guꞌwá rí na̱gi̱mbíin xa̱bo̱ judío̱, nijiꞌnáa̱, numuu rí Jesús neꞌne-thanuu nána̱ tsúꞌkhue̱n awúun mbiꞌi rí nduꞌyáa xa̱ꞌlóꞌ. A̱ꞌkhue̱n niꞌthúu̱n xa̱bo̱ tsí gachúún ikhín: «Ríga̱ majun mbiꞌi rí ma̱goo mu̱ñajunlóꞌ. Ikhaa jngó, a̱guwalaꞌ awúun mbiꞌi rúꞌkhue̱n ma̱gu̱ma-thanalaꞌ, jamí ma̱xáguwalaꞌ awúun mbiꞌi rí nduꞌyáa xa̱ꞌlóꞌ».
15Xómáꞌ Táta̱ niriꞌñuu̱: «¡Phú a̱jma̱ inalaꞌ! Á ra̱ꞌkhá asndo tsáa tsí ikháanꞌlaꞌ narakhúu xidi̱i o xtángidiuu, jamí na̱ka̱ jayáa̱ ma̱ga̱a̱n iya awúun mbiꞌi rí nduꞌyáa xa̱ꞌlóꞌ dxe̱ꞌ. 16Xómáꞌ nána̱ tsíge̱ꞌ, tsí jayá iꞌdiuu Abraám, xtoꞌwóo neꞌne Satanás ga̱jma̱á nandii asndo nákhí timbá gu̱wa̱ꞌ-nítsu i̱tsu̱ (18) tsigu. Á ra̱jáꞌyoo mi̱ꞌkhuíi̱ ikhaa̱ awúun mbiꞌi rí nduꞌyáa xa̱ꞌlóꞌ rá dxe̱ꞌ».
17Ído̱ niꞌthán Jesús ríge̱ꞌ, ni̱ti̱ñu̱úꞌ mbá xúgíin xa̱bo̱ sia̱nꞌ gajmíi̱. Xómáꞌ xa̱bo̱ tsí mbaꞌiin, mbá xúgíi̱n phú gagi a̱kuíi̱n neꞌne ga̱jma̱á numuu rí phú wáá rí naꞌne Jesús.
Ajngáa xkri̱da ga̱jma̱á numuu tsígoo ya̱ꞌwo̱ rí mbiꞌyuu mostása̱
(Mt 13.31-32; Mc 4.30-32)
18A̱ꞌkhue̱n niꞌthán Jesús: «Dí ñajuun ma̱goo ma̱jmaa kajngó mi̱ꞌthán xáne Ana̱ꞌlóꞌ naꞌthán-ñájúún xa̱bo̱ róꞌ. Dí ñajuun ma̱goo ma̱ne̱ xkri̱doo ne̱ róꞌ. 19Xómá tsígoo ya̱ꞌwo̱ rí mbiꞌyuu mostása̱ jaꞌnii ne̱, rí naꞌdu mbáa xa̱bo̱ ná mbayuu. Ikhaa rúꞌkhue̱n nagaja̱a̱ asndo naꞌni̱i xómá mbá ixe̱ mba̱a̱, jamí nune̱ xáñúú ño̱ꞌo̱n ná ñawúun ne̱».
Ajngáa xkri̱da ga̱jma̱á numuu ñu̱u̱ miga̱ꞌ
(Mt 13.33)
20Niꞌthán Jesús ajngáa ríge̱ꞌ mangaa: «Dí ñajuun ma̱goo ma̱jmuꞌ kajngó ma̱tha̱n xáne Ana̱ꞌlóꞌ naꞌthán-ñájúún xa̱bo̱ róꞌ. 21Xómá mbá lájwíin ñu̱u̱ miga̱ꞌ jaꞌnii ne̱, rí nigánda̱wo̱o̱ꞌ mbáa a̱ꞌgo̱ ná awúun atsú awan mba̱ꞌwo̱ ña̱wi̱in ixí iña, a̱ꞌkhue̱n ni̱gi̱xe̱ ne̱ mbá xúgíí».
Xkrugua rí na̱nguá ma̱jña̱ꞌ
(Mt 7.13-14,21-23)
22Awúun máꞌ rí na̱ka̱ Jesús ná Jerusalén, naꞌsngúu̱n xa̱bo̱ ná triga̱ xuajen rí mba̱ꞌwo̱ jamí xuajen rí laka ná na̱ka̱-ranújngoo̱. 23Mbáa xa̱bo̱ niraxu̱u̱ Jesús:
―Táta̱, á na̱nguá mbaꞌiin xa̱bo̱ tsí ma̱jáwíin rá dxe̱ꞌ.
Xómáꞌ Jesús niꞌthúún xa̱bo̱: 24«Gu̱xna̱-míjnálaꞌ tsiakhe̱ rí ma̱ta̱ꞌa̱ꞌlaꞌ ná naꞌthán-ñájun Ana̱ꞌlóꞌ ga̱jma̱á majñu̱u̱ xkrugua rí na̱nguá ma̱jña̱ꞌ. Numuu rí maphú mbaꞌiin xa̱bo̱ ma̱gúún gátu̱ꞌu̱ún jamí ma̱xáxóo gátu̱ꞌúu̱n. 25Ído̱ rí ni̱tu̱xu̱u̱ꞌ máꞌ xa̱bo̱ tsí guꞌwóo gárugua̱a la xkrugua, a̱ꞌkhue̱n rí ikháanꞌlaꞌ tsáanꞌ ninguanálaꞌ rixa̱á mu̱gíꞌdi̱ín mu̱tha̱n-ráꞌalaꞌ: “Táta̱, atarmáꞌtháá ma̱ta̱ꞌa̱ꞌxo̱ꞌ”. Xómáꞌ ikhaa̱ mariꞌñalaꞌ: “Tsíyo̱o̱ náá xa̱bo̱ ñajwanlaꞌ”. 26Xómáꞌ ikháanꞌlaꞌ mu̱gíꞌdi̱ín mu̱tha̱nlaꞌ: “Ikháanꞌxo̱ꞌ nipeꞌtso jamí niwanxo̱ꞌ ga̱jma̱á nindxa̱a̱ꞌ, jamí nirasngáá ná xuáá ná awúun xuajñaxo̱ꞌ”. 27Xómáꞌ ikhaa̱ mariꞌñalaꞌ: “Ni̱tha̱nꞌlaꞌ máꞌ rí tsíyo̱o̱ náá xa̱bo̱ ñajwanlaꞌ. ¡Awaxo̱nlaꞌ janíí ná inuꞌ, mbá xúgiáanꞌ ikháanꞌlaꞌ tsáanꞌ nu̱ne̱laꞌ rí xkawe̱ꞌ!”
28»Ikhín mu̱mbi̱ya̱ꞌlaꞌ jamí mu̱pho-ꞌduun iñalaꞌ, ído̱ gúya̱álaꞌ rí Abraám, ga̱jma̱á Isaák, ga̱jma̱á Jakób, jamí mbá xúgíin tsí ni̱rawíjnga̱a ajngóo Ana̱ꞌlóꞌ, júwe̱e̱ꞌ ná majñu̱ú xa̱bo̱ tsí naꞌthán-ñájúún Ana̱ꞌlóꞌ. Xómáꞌ ikháanꞌlaꞌ ma̱nguanálaꞌ rixa̱á. 29Numuu rí ma̱guwá xa̱bo̱ ná giaxu̱u̱ naꞌwáán jamí ná giaxu̱u̱ jawáá, ná giaxu̱u̱ na̱ꞌkha̱ a̱kha̱ꞌ jamí ná giaxu̱u̱ na̱tra̱ꞌmúu a̱kha̱ꞌ, ma̱trigii̱n mu̱piꞌtsii̱ ná majñu̱ú xa̱bo̱ tsí naꞌthán-ñájúún Ana̱ꞌlóꞌ. 30I̱ndo̱ó máꞌ numuu rí júwa̱ꞌ mbá tikhuun xa̱bo̱ tsí na̱nguá gíꞌdoo numúú xúge̱ꞌ, ikhiin tsúꞌkhue̱n phú ma̱gi̱ꞌdoo numúú nda̱wa̱á. Jamí júwa̱ꞌ mbá tikhuun xa̱bo̱ tsí phú gíꞌdoo numúú xúge̱ꞌ, ikhiin tsúꞌkhue̱n náxági̱ꞌdoo numúú nda̱wa̱á».
Jesús na̱mbi̱ya̱ꞌ ga̱jma̱á numuu xuajen Jerusalén
(Mt 23.37-39)
31Awúun máꞌ rúꞌkhue̱n niguáꞌnú mbá tikhuun xa̱bo̱ fariséo̱, jamí nitháa̱n Jesús:
―A̱ga̱jnáaꞌ ge̱jyoꞌ, jamí ayu i̱mba̱ janíí, numuu rí Eróde̱s nandoo gáxíña̱áꞌ.
32Xómáꞌ ikhaa̱ niriꞌñúu̱:
―Aꞌgua gútha̱ánlaꞌ e̱ge̱ ejmba̱a̱ tsúꞌkhue̱n ajngáa ríge̱ꞌ: “Atiaxe̱ ma̱tha̱ya̱á, xúge̱ꞌ jamí gátsíí na̱xkawíinlo̱ꞌ gíñá ꞌguéen ná xuñúú xa̱bo̱, xúꞌkhue̱n máꞌ na̱ne̱ thanúú xa̱bo̱, jamí ído̱ gárámuu atsú mbiꞌi ma̱mbóꞌlo̱ꞌ”. 33I̱ndo̱ó máꞌ numuu rí ndaꞌyóo rí xúge̱ꞌ, gátsíí jamí nawi̱ín mba̱ya̱ xóó ikhoꞌ. Numuu rí i̱ndo̱ó máꞌ ná Jerusalén jaꞌyoo ma̱ja̱ñúu mbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ.
34A̱ꞌkhue̱n niꞌthée̱n: «¡Phú mingínáaꞌ ikháanꞌlaꞌ xa̱bo̱ xuajen Jerusalén, tsáanꞌ nu̱radíinlaꞌ tsí nu̱rawíjnga̱a ajngóo Ana̱ꞌlóꞌ, jamí nu̱xnu̱úlaꞌ ga̱jma̱á itsí xa̱bo̱ tsí naxuꞌmii Ana̱ꞌlóꞌ rí ma̱guwá juñu̱ú ajngóo̱ ná inalaꞌ! Phú mbaꞌa nothon ne̱ne̱ rí ma̱ꞌgí-ꞌndáanꞌlaꞌ xómá eꞌne mbáxte̱ tsí naꞌgí-ꞌndu̱un i̱ji̱in ná agoo xpípíi, xómáꞌ ikháanꞌlaꞌ ra̱khálaꞌ. 35Ikhaa jngó, gu̱dxawíínlaꞌ, Ana̱ꞌlóꞌ maniña-ti̱go̱o̱ xuajñalaꞌ, jamí na̱tha̱nꞌ-jmbalaꞌ rí náxúyo̱ꞌlaꞌ asndo gága̱nú mbiꞌi rí mu̱tha̱nlaꞌ: “¡A̱gu̱ma-tsakun-rámaa tsí na̱ꞌkha̱ ga̱jma̱á numuu Táta̱!”».
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.