Jonás 4
4
Jonás naꞌne xkujndu ná inuu Ana̱ꞌlóꞌ
1Xómáꞌ Jonás maphú táni̱gu̱u̱ꞌ rí na̱nguá wámbi̱in xa̱bo̱, ikhaa jngó phú nijiꞌnáa̱. 2A̱ꞌkhue̱n niꞌthúu̱n Ana̱ꞌlóꞌ Mikhuíí xáꞌnii:
―Táta̱, Anu̱ꞌ Mikhuíí, á ra̱ꞌkhá ikhaa máꞌ rúꞌkhue̱n xtáá na̱tha̱n-mína̱ꞌ nákhí xtáá ná xuajñuꞌ dxe̱ꞌ. Ikhaa jngó mbá nacha̱ máꞌ ne̱ne̱ rí ma̱ga̱yúꞌ inaaꞌ ná Társi̱s. Numuu rí nda̱yo̱o̱ mújúnꞌ máꞌ rí maphú mba̱a̱ a̱kia̱anꞌ jamí májáan a̱kia̱anꞌ, Táta̱. Tsíjiꞌnáá nacha̱ guéño jamí phú nañáwíin a̱kia̱anꞌ ene̱ xa̱bo̱, xúꞌkhue̱n máꞌ nathanga̱a a̱kia̱anꞌ rí ma̱tha̱ne̱ rí nirathán ma̱tha̱ñu̱ú xa̱bo̱. 3Ikhaa jngó xúge̱ꞌ rá, Táta̱ Mikhuíí, na̱tha̱n-jáñaaꞌ rí ma̱trígúu̱ mbiꞌyuꞌ. Numuu rí i̱tha̱án máꞌ máján rí ma̱ja̱ñúꞌ xó rí ma̱xtáálo̱ꞌ.
4A̱ꞌkhue̱n rí Ana̱ꞌlóꞌ Mikhuíí niꞌthúun Jonás:
―Á máján ithane̱ rí najiꞌnáá guéño rá.
5A̱ꞌkhue̱n nigájna̱a Jonás ná xuajen, ni̱ke̱e̱ gági̱ꞌi̱i̱ ná rawuun ne̱, ná na̱ꞌkha̱ a̱kha̱ꞌ. Ikhín niꞌnii̱ mbá guꞌwá iná, ni̱gi̱ꞌi̱i̱ ná xka̱mixoo ne̱ kajngó mba̱ꞌyoo̱ rí ma̱gíꞌnuu xuajen.
6Xómáꞌ Ana̱ꞌlóꞌ Mikhuíí neꞌne rí mba̱ꞌya mbá iná ajma̱a̱ rí ma̱ꞌne xka̱mixoo ná ꞌgí Jonás, kajngó ma̱ꞌni̱i wáa a̱kuii̱n rí najmúu̱. Jamí Jonás maphú nidxuu̱ rí ndiꞌya iná ajma̱a̱. 7I̱ndo̱ó máꞌ numuu rí ído̱ na̱ꞌkha̱-ratse rí i̱mba̱ mbiꞌi, a̱ꞌkhue̱n Ana̱ꞌlóꞌ neꞌne rí mbáa ñu̱u̱ mi̱kho̱ ajmu̱u̱ iná ajma̱a̱, a̱ꞌkhue̱n nijndoo ne̱. 8Jamí ído̱ nixpátri̱ya̱a̱ꞌ máꞌ a̱kha̱ꞌ rá, a̱ꞌkhue̱n Ana̱ꞌlóꞌ neꞌne rí maxnúu gakhe̱ mbá gíñá rí phú mika. Xómáꞌ a̱kha̱ꞌ natsikhá ná idxu̱u̱ Jonás, rí asndo najámíndúu̱ jamí naꞌne a̱kuii̱n rí ma̱ja̱ñúu̱. A̱ꞌkhue̱n niꞌthée̱n: «I̱tha̱án máꞌ máján rí ma̱ja̱ñúꞌ xó rí ma̱xtáálo̱ꞌ».
9A̱ꞌkhue̱n Ana̱ꞌlóꞌ niꞌthúun Jonás:
―Á máján ithane̱ rí najiꞌnáá mi̱ndaꞌkho numuu rí nijndoo iná ajma̱a̱ rá.
Jamí ikhaa̱ niriꞌñee̱:
―¡Aan, máján e̱ne̱lo̱ꞌ. Najiꞌnúú mi̱ndaꞌkho, rí asndo naꞌne a̱kui̱nꞌ rí ma̱ja̱ñúꞌlo̱ꞌ!
10A̱ꞌkhue̱n Ana̱ꞌlóꞌ Mikhuíí niꞌthúun Jonás:
―Phú niñáwíin a̱kia̱anꞌ eꞌne iná ajma̱a̱ maske máꞌ tátha̱du ne̱, ni máꞌ tátha̱ne̱ rí mba̱ꞌya ne̱. Mbá mbroꞌon nijráꞌán ne̱, jamí i̱mba̱ mbroꞌon nijndoo ne̱. 11Á ra̱ꞌkhá i̱tha̱án ma̱ñáwíin a̱kui̱nꞌ ikhúúnꞌ ja̱yo̱o̱ xuajen Níni̱be̱ rá. Numuu rí ná xuajen mba̱a̱ rúꞌkhue̱n nanújngoo rí mbá majun skíñíi míl (120 000) xa̱bo̱ júwa̱ꞌ, tsí tsíma̱ñúú gúra̱ꞌwíí rí máján jamí rí ra̱máján, xúꞌkhue̱n máꞌ phú mbaꞌiin xu̱kú júwa̱ꞌ ikhín.
ទើបបានជ្រើសរើសហើយ៖
Jonás 4: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.