Juáán 9
9
Jesús naꞌne-thanuu mbáa xa̱bo̱ tsí tsífrigo̱o̱ꞌ asndo nákhí ni̱gu̱maa
1Ído̱ nigájna̱a Jesús, a̱ꞌkhue̱n ndiꞌyoo̱ ná na̱ka̱-ranújngoo̱ mbáa xa̱bo̱ tsí tsífrigo̱o̱ꞌ asndo nákhí ni̱gu̱maa. 2A̱ꞌkhue̱n tsí naꞌsngúu̱n ni̱ra̱xíi̱:
―Táta̱ naꞌsngáá, tsáa neꞌne aꞌkhán kajngó tsífrigo̱o̱ꞌ xa̱bo̱ tsíge̱ꞌ ni̱gu̱maa róꞌ. Á ikhaa̱ o tátée̱ ga̱jma̱á nánée̱ dxe̱ꞌ.
3A̱ꞌkhue̱n niriꞌña Jesús:
―Ra̱ꞌkháa tsíge̱ꞌ neꞌne aꞌkhán, ni máꞌ ra̱ꞌkháa tátée̱ ga̱jma̱á nánée̱, rí xkuaꞌnii ni̱gu̱maa̱ kajngó mbu̱ya̱álaꞌ rí ma̱ꞌne ski̱yu̱u̱ꞌ Ana̱ꞌlóꞌ ga̱jma̱á numuu̱. 4Awúun rí xóó mbiꞌi, ndaꞌyóo rí ma̱ne̱#9.4 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «ndaꞌyóo rí mu̱ꞌne̱lóꞌ». ñajuun tsí nixúngu̱únꞌlo̱ꞌ, numuu rí nangiyuu máꞌ rí ma̱ꞌne mijína ído̱ rí mbá xúgíin xa̱bo̱ nda̱a̱ rí ma̱goo muni̱i̱. 5Awúun mbiꞌi rí xtáá ná numbaa, ikhúúnꞌ ñajunꞌ agu rí nambiꞌñúú xa̱bo̱ numbaa.
6Ído̱ wámbo̱o̱ Jesús niꞌthán ríge̱ꞌ, a̱ꞌkhue̱n nindútée̱ mbayíí, ni̱rma̱jee̱n tháan ju̱ba̱ꞌ ga̱jma̱á iyandawoo̱, jamí nixtájmuu̱ ne̱ ná xtóo iduu xa̱bo̱ tsí tsífrigo̱o̱ꞌ. 7A̱ꞌkhue̱n niꞌthúu̱n: «Ayu gára̱jña̱a idaaꞌ ná Siloé (rí nandoo gáꞌthán “Tsí waxúngua̱a̱ꞌ”), ná gajno̱ꞌ iya».
A̱ꞌkhue̱n ni̱ka̱ gáꞌjñáa iduu xa̱bo̱ tsí tsífrigo̱o̱ꞌ. Jamí ído̱ ni̱ꞌkhaa̱, nafrigo̱o̱ꞌ máꞌ. 8A̱ꞌkhue̱n rí xa̱bo̱ tsí júwa̱ꞌ mijngi jamí tsí ndiyáá rí ni̱ka̱-ra̱nda̱ꞌa̱-mínu̱u̱ꞌ xa̱bo̱ tsí tsífrigo̱o̱ꞌ, ni̱ra̱xe̱-mijnée̱: «Á ra̱ꞌkhá xa̱bo̱ tsí na̱ꞌge̱ꞌe̱ rí ma̱nda̱ꞌa̱-mínu̱u̱ꞌ ñajuun tsíge̱ꞌ dxe̱ꞌ».
9Mbá tikhuun nuthan: «Ikhaa̱». Jamí tsí i̱ꞌwíin nuthan: «Ra̱ꞌkháa̱, maske máꞌ xó ikhaa̱ jayu jaꞌnii».
Xómáꞌ ikhaa̱ naꞌthée̱n: «Ikhúúnꞌ ñajunꞌ, ta̱ꞌún».
10A̱ꞌkhue̱n ni̱ra̱xíi̱:
―Xáne kajngó nafriga̱a̱ꞌ rí xúge̱ꞌ róꞌ.
11Xómáꞌ ikhaa̱ niriꞌñúu̱:
―Xa̱bo̱ tsí mbiꞌyuu Jesús ni̱rma̱jan ju̱ba̱ꞌ, nixtájmuu̱ ne̱ ná xtóo iduꞌ, jamí niꞌthínꞌ: “Ayu gára̱jña̱a idaaꞌ ná Siloé”. A̱ꞌkhue̱n nika gájña̱a iduꞌ, jamí núkho̱ máꞌ ni̱ma̱ꞌtha̱a iduꞌ.
12A̱ꞌkhue̱n watraxíi̱ nene̱ xa̱bo̱:
―Náá ni̱ka̱ xa̱bo̱ tsúꞌkhue̱n rá.
Xómáꞌ ikhaa̱ niꞌthúu̱n xa̱bo̱:
―Tsíyo̱o̱ ikhúúnꞌ.
Xa̱bo̱ ñajun judío̱ nu̱ra̱xi̱í tsí niꞌni̱i iduu
13A̱ꞌkhue̱n nigóo̱ juya̱a̱ xa̱bo̱ tsí niꞌni̱i iduu ná inúú xa̱bo̱ fariséo̱. 14(Numuu mbiꞌi rí nduya̱a xu̱únꞌ xa̱bo̱ judío̱ ñajuun mbiꞌi rí ni̱rma̱jan ju̱ba̱ꞌ Jesús rí ma̱ꞌne-thanuu iduu xa̱bo̱ tsí tsífrigo̱o̱ꞌ.) 15Ikhaa jngó xa̱bo̱ fariséo̱ ni̱ra̱xíi̱ mangii̱n:
―Xáne kajngó nafriga̱a̱ꞌ rí xúge̱ꞌ róꞌ.
Jamí ikhaa̱ niꞌthúu̱n:
―Nixtájmuu̱ ju̱ba̱ꞌ xtiꞌthi ná xtóo iduꞌ, a̱ꞌkhue̱n ni̱jña̱a ne̱. Xkuaꞌnii kajngó nafrigo̱ꞌ rí xúge̱ꞌ rá.
16Mbá tikhuun xa̱bo̱ fariséo̱ nuthan: «Ra̱ꞌkhá Ana̱ꞌlóꞌ nixuꞌmaa xa̱bo̱ tsí neꞌne ríge̱ꞌ, numuu rí tsíya-makuu̱ mbiꞌi rí nduꞌyáa xa̱ꞌlóꞌ». Xómáꞌ i̱ꞌwíin xa̱bo̱ nuthan: «Xáne lá gágoo rí mbáa xa̱bo̱ aꞌkhán ma̱ꞌne rí phú wáá xómá rí neꞌne xa̱bo̱ tsíge̱ꞌ rá». Xkuaꞌnii na̱nguá niꞌkho̱-mina̱aꞌ rí nuthee̱n.
17Ikhaa jngó ni̱ra̱xíi̱ mbu̱júu̱n xa̱bo̱ tsí niꞌni̱i iduu:
―Tsáánꞌ nirmáꞌthoo idaaꞌ xa̱bo̱ tsúꞌkhue̱n, tsáa ñajuu̱n irathán ikháánꞌ rá.
Xómáꞌ ikhaa̱ niriꞌñee̱:
―Ikhúúnꞌ na̱tha̱n rí mbáa xa̱bo̱ tsí na̱gu̱wíjnga̱a ajngóo Ana̱ꞌlóꞌ ñajuu̱n.
18Xómáꞌ xa̱bo̱ ñajun judío̱ tánimbúu̱n rí ikhaa xa̱bo̱ tsíge̱ꞌ ñajuun tsí tsífrigo̱o̱ꞌ nákhí rí ginii, ni máꞌ rí ni̱gu̱ma-thanáa̱. Ikhaa jngó ni̱ndxa̱ꞌwáa̱ tátée̱ ga̱jma̱á nánée̱, 19jamí ni̱ra̱xúu̱n:
―Á ikhaa tsíge̱ꞌ ñajuun a̱ꞌdiálaꞌ rá. Á gakon rí tsífrigo̱o̱ꞌ nákhí rí ni̱gu̱maa̱ rá. Xáne kajngó nafrigo̱o̱ꞌ rí xúge̱ꞌ róꞌ.
20A̱ꞌkhue̱n niriꞌña tátée̱ ga̱jma̱á nánée̱:
―Aan, a̱ꞌdiáxo̱ꞌ ñajuu̱n. Gakon máꞌ rí tsífrigo̱o̱ꞌ nákhí rí ni̱gu̱maa̱. 21I̱ndo̱ó máꞌ numuu rí tsíya̱áxo̱ꞌ xáne jaꞌnii kajngó nafrigo̱o̱ꞌ rí xúge̱ꞌ, ni máꞌ tsíya̱áxo̱ꞌ tsáa neꞌne-thanuu̱. Gu̱ra̱xíi̱laꞌ ikhaa̱, numuu rí nikhi̱i̱ máꞌ. Ma̱goo máꞌ maꞌthánlaꞌ jmína̱a̱ꞌ.
22Xkuaꞌnii nithee̱n numuu rí namíñúu̱ ene̱ xa̱bo̱ ñajun judío̱. Numuu rí tsúꞌkhue̱n niguáꞌdáá máꞌ awan rí mu̱xkri̱ya̱a̱ꞌ jámba̱a̱ tsí naꞌthán rí Jesús ñajuun Mesía̱s, kajngó náxáꞌkhe̱e̱ ná guꞌwá rí na̱gi̱mbíin xa̱bo̱ judío̱. 23Ikhaa jngó niꞌthán tátée̱ ga̱jma̱á nánée̱: «Gu̱ra̱xíi̱laꞌ ikhaa̱, numuu rí nikhi̱i̱ máꞌ».
24A̱ꞌkhue̱n xa̱bo̱ ñajun judío̱ ni̱ndxa̱ꞌwáa̱ mbu̱júu̱n tsí niꞌni̱i iduu, jamí nitháa̱n:
―Arathán-jmbaaꞌ ná inuu Ana̱ꞌlóꞌ rí ma̱ra̱tha̱nꞌxo̱ꞌ rí gakon. Ikháanꞌxo̱ꞌ ndu̱ya̱áxo̱ꞌ rí xa̱bo̱ aꞌkhán ñajuun xa̱bo̱ tsúꞌkhue̱n.
25Xómáꞌ xa̱bo̱ tsí niꞌni̱i iduu niriꞌñúu̱:
―Xí xa̱bo̱ aꞌkhán ñajuu̱n, na̱nguá i̱yo̱o̱ ikhúúnꞌ. I̱ndo̱ó máꞌ nda̱yo̱o̱ rí nákhí ginii na̱nguá ifrigo̱ꞌlo̱ꞌ, jamí rí xúge̱ꞌ nafrigo̱ꞌlo̱ꞌ.
26A̱ꞌkhue̱n ni̱ra̱xíi̱ mbu̱júu̱n:
―Dí niꞌñaa̱ꞌ róꞌ. Xáne niꞌnii̱ rí neꞌne-thanuu̱ idaaꞌ róꞌ.
27Xómáꞌ ikhaa̱ niriꞌñúu̱:
―Ni̱tha̱nꞌlaꞌ máꞌ rí niꞌnii̱, jamí ikháanꞌlaꞌ tsíyalaꞌ gúdxawíín rí na̱tha̱nꞌlaꞌ. Náá numuu kajngó nandalaꞌ rí ma̱tha̱nꞌlaꞌ mbu̱júꞌ róꞌ. Á nandalaꞌ rí mangáanꞌlaꞌ ma̱nindxa̱ꞌlaꞌ xa̱bo̱ tsí naꞌsngúu̱n dxe̱ꞌ.
28A̱ꞌkhue̱n rí xa̱bo̱ ñajun judío̱ nithán-xkawíi̱ꞌ, jamí nitháa̱n:
―Ikháánꞌ ñajwaanꞌ tsí nisngáá eꞌne xa̱bo̱ tsúꞌkhue̱n, xómáꞌ ikháanꞌxo̱ꞌ nisngáxo̱ꞌ eꞌne Moisés. 29Jamí ndu̱ya̱áxo̱ꞌ rí Moisés waꞌtháán neꞌne Ana̱ꞌlóꞌ. Xómáꞌ xa̱bo̱ tsúꞌkhue̱n, tsiánguá náá ni̱ꞌkhe̱e̱.
30Xómáꞌ xa̱bo̱ tsí niꞌni̱i iduu niꞌthúún xa̱bo̱ ñajun judío̱:
―¡Tsiánguá xáne jaꞌnii rúꞌkhue̱n rá! Ikháanꞌlaꞌ tsíya̱alaꞌ náá ni̱ꞌkhe̱e̱, xómáꞌ ikhúúnꞌ neꞌne-thanuꞌ. 31Jamí nduꞌyáá májánlóꞌ rí Ana̱ꞌlóꞌ tsídxawuu̱n rí nuthan xa̱bo̱ tsí nune̱ aꞌkhán, rí xa̱bo̱ tsí nune̱-mba̱a̱ jamí nune̱ rí nandoo̱, tsúꞌkhue̱n nadxawuu̱n rí nuthan. 32Ni miꞌtsú táwán rí mbáa xa̱bo̱ numbaa ma̱ꞌne-thanuu mbáa xa̱bo̱ tsí tsífrigo̱o̱ꞌ asndo nákhí ni̱gu̱maa. 33Xí ra̱ꞌkhá Ana̱ꞌlóꞌ nixuꞌmaa xa̱bo̱ tsíge̱ꞌ, nimbá rí ma̱xáxóo ma̱ꞌnii̱.
34A̱ꞌkhue̱n ikhii̱n ni̱riꞌñáa̱:
―Ikháánꞌ tsáánꞌ ñajwaanꞌ xa̱bo̱ aꞌkhán asndo nákhí ni̱gu̱mááꞌ, nandaaꞌ gára̱sngáxo̱ꞌ ráanꞌ.
A̱ꞌkhue̱n ni̱xkriya̱a̱ꞌ mbá jayu ná guꞌwá rí na̱gi̱mbíin xa̱bo̱ judío̱.
Tsí nafrigu̱únꞌ júgoo idúún ná inuu Ana̱ꞌlóꞌ
35Nidxawuun Jesús rí waxkriya̱a̱ꞌ xa̱bo̱ tsíge̱ꞌ, ikhaa jngó ído̱ rí nixkamaa̱ niraxu̱u̱:
―Á nanimba̱a̱ꞌ ikháánꞌ xtayáá A̱dée Ana̱ꞌlóꞌ#9.35 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán: «A̱dée Xa̱bo̱ Numbaa». rá.
36A̱ꞌkhue̱n ikhaa̱ niriꞌñee̱:
―Táta̱, arathúnꞌ tsáa ñajuu̱n kajngó ma̱nimbo̱ꞌ ja̱yo̱o̱.
37Xómáꞌ Jesús niriꞌñuu̱:
―Nithayáa̱ máꞌ. Ikhaa tsúꞌkhue̱n ñajunꞌ ikhúúnꞌ, tsúún na̱tha̱n ga̱jma̱á nindxa̱a̱ꞌ.
38A̱ꞌkhue̱n xa̱bo̱ tsúꞌkhue̱n nismáti̱go̱o̱ inuu Jesús, jamí niꞌthúu̱n:
―Nanimbo̱ꞌ ja̱ya̱a̱ꞌ, Táta̱.
39A̱ꞌkhue̱n niꞌthán Jesús:
―Ikhúúnꞌ niꞌkha ná numbaa ríge̱ꞌ rí ma̱xu̱ꞌdáa awan ga̱jma̱á numúú xa̱bo̱, kajngó ma̱xna̱ idúún tsí tsífrigu̱únꞌ, jamí tsí nafrigu̱únꞌ, ma̱ju̱góo idúu̱n.
40Mbá tikhuun xa̱bo̱ fariséo̱ tsí wájun ikhín ni̱dxawíín rí niꞌthée̱n. A̱ꞌkhue̱n ni̱ra̱xíi̱ Jesús:
―Á mangáanꞌxo̱ꞌ tsífriga̱ꞌxo̱ꞌ rá dxe̱ꞌ.
41A̱ꞌkhue̱n Jesús niriꞌñúu̱:
―Xí numuu rí tsífriga̱ꞌlaꞌ, ma̱xági̱ꞌmáaꞌlaꞌ máꞌ nimbá aꞌkhán ná inuu Ana̱ꞌlóꞌ. I̱ndo̱ó máꞌ numuu rí nu̱tha̱nlaꞌ rí nafriga̱ꞌlaꞌ, ikhaa jngó xóó máꞌ gíꞌmáaꞌlaꞌ aꞌkhán ná inuu Ana̱ꞌlóꞌ.
ទើបបានជ្រើសរើសហើយ៖
Juáán 9: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
