XÓ NI̱GI̱ꞋDU̱U̱N-MUU 38
38
Judá ga̱jma̱á Tamár
1Mbiꞌi máꞌ rúꞌkhue̱n, nigájnuu Judá níjiúún a̱ngui̱i̱n, jamí ni̱ke̱e̱ gáxtáa̱ inuu mbáa xa̱bo̱ mbo̱ adulamíta̱, tsí mbiꞌyuu Íra̱. 2Jamí ikhín ndiꞌyoo̱ mbáa a̱ꞌgo̱, a̱dée mbáa xa̱bo̱ mbo̱ kananéo̱ mbiꞌyuu Súwa̱. A̱ꞌkhue̱n ndiyáa̱, jamí niꞌgu ga̱jmáa̱. 3Xómáꞌ ikhaa̱ nigo̱-édee̱, jamí ni̱gu̱maa mbáa a̱dée̱ dxáma, tsí nixnúu̱ mbiꞌyuu Ér. 4Nigo̱-édee̱ mbu̱jú, jamí ni̱gu̱maa i̱mba̱a̱ a̱dée̱ dxáma, tsí nixnúu̱ mbiꞌyuu Onán. 5Nigo̱-édee̱ xóó jamí ni̱gu̱maa i̱mba̱a̱ a̱dée̱ dxáma, tsí nixnúu̱ mbiꞌyuu Séla̱. Jamí ná Kesíb xtáa̱ ído̱ rí ni̱gu̱maa tsúꞌkhue̱n.
6Nda̱wa̱á a̱ꞌkhue̱n, Judá ndiꞌyáa mbáa a̱ꞌgo̱ tsí ma̱ꞌne a̱ꞌgui̱i̱ Ér, a̱dée̱ tsí ginii, jamí a̱ꞌgo̱ mbiꞌyuu Tamár. 7Xómáꞌ Ér ja rá, ra̱máján a̱kui̱i̱n inuu Ana̱ꞌlóꞌ Mikhuíí. A̱ꞌkhue̱n rí Ana̱ꞌlóꞌ Mikhuíí nirígúu̱ la mbiꞌyuu̱. 8A̱ꞌkhue̱n rí Judá niꞌthúun Onán: «Ayáa̱ a̱ꞌgui̱i̱ dxíya̱a̱ꞌ, xó rí jaꞌyoo máꞌ, ikhaa jngó ma̱gu̱maa mbáa tsí ma̱nindxu̱u̱ ri̱jiu̱u̱ꞌ dxíya̱a̱ꞌ». 9Xómáꞌ Onán ndaꞌyoo máꞌ rí ma̱xánindxu̱u̱ a̱dée̱ tsí ma̱gu̱maa. Ikhaa jngó mbámbá rí naꞌguii̱ ga̱jmáa̱ a̱ꞌgui̱i̱ dxíyo̱o̱, naxídíi̱ iya tsígoo̱ mbayíí, numuu rí xúꞌkhue̱n ma̱xágu̱maa a̱dée dxíyo̱o̱. 10Ana̱ꞌlóꞌ Mikhuíí táni̱gu̱u̱ꞌ jaꞌyoo rí naꞌnii̱, ikhaa jngó nirígúu̱ la mbiꞌyuu mangaa. 11A̱ꞌkhue̱n Judá niꞌthúun gu̱ꞌgíin: «A̱wanáaꞌ máꞌ rí a̱ꞌgó-xuáꞌa ñajuaanꞌ ná goꞌóo ana̱a̱ꞌ, asndo gáꞌkhi̱i̱ a̱ꞌdéꞌ Séla̱ mbi̱ya̱a̱». Numuu rí ni̱ju̱mu̱u̱: «Ra̱ꞌkhá ma̱ja̱ñúu̱ mangaa̱ xóo rí nijáñúú dxíyo̱o̱». A̱ꞌkhue̱n rí ni̱ka̱a̱ Tamár gáxtáa goꞌóo anu̱u̱.
12Nigánújngoo guéño máꞌ mbiꞌi, a̱ꞌkhue̱n rí nijáñuu a̱ꞌgui̱i̱ Judá tsí a̱dée máꞌ Súwa̱. Nda̱wa̱á ído̱ nigánújngoo máꞌ rí natájuíin a̱kui̱i̱n, a̱ꞌkhue̱n ni̱ke̱e̱ ná Timnát ná júwa̱ꞌ xa̱bo̱ tsí nudi̱i̱n mogui̱i̱. Ni̱ka̱ ga̱jmáa̱ xa̱bo̱ iyanga̱jue̱e̱ tsí mbiꞌyuu Íra̱, mbo̱ adulamíta̱. 13A̱ꞌkhue̱n waꞌtháán Tamár ajngáa ríge̱ꞌ: «Á nathayáá rí jmégia̱a̱ꞌ na̱ka̱ ná Timnát gáꞌdi̱i̱n mogui̱i̱ rá». 14A̱ꞌkhue̱n rí ikhaa̱ niríya̱a̱ꞌ xtíñuu̱ rí júwuu̱n rí a̱ꞌgó-xuáꞌa ñajuu̱n, jamí nirogoo̱ inuu̱ ga̱jma̱á mbá xtíin mbawi. Xúꞌkhue̱n máꞌ nimbraꞌa-mine̱e̱ꞌ ni̱gi̱ꞌi̱i̱ ná rawuun xuajen Enaím, ná nagánújngoo máꞌ jambo̱o̱ Timnát. Numuu rí ndiꞌyoo̱ máꞌ rí wáxi̱i̱ Séla̱, jamí na̱nguá xóó ijanaxi̱i̱ rí manújuíi̱nꞌ ga̱jmáa̱.
15Ído̱ Judá ndiꞌyoo̱, ni̱ju̱mu̱u̱ rí mbáa a̱ꞌgo̱ tsí na̱ngu̱jua̱-mina̱ꞌ ñajuu̱n, numuu rí ikhaa̱ nirogoo̱ inuu̱. 16A̱ꞌkhue̱n niniñuu̱ jambo̱o̱ ná na̱ke̱e̱, jamí ni̱ke̱e̱ gáꞌthúu̱n:
―Araxnúꞌ tháan rí ma̱bo̱ꞌ ga̱jma̱á nindxa̱a̱ꞌ.
Numuu rí tséꞌyoo̱ xí gu̱ꞌgíi̱n ñajuun. Xómáꞌ ikhaa̱ niꞌthée̱n:
―Díne-lá gára̱xnu̱ꞌ rí ma̱tha̱ba̱a̱ꞌ ga̱jma̱á nindxu̱ꞌ rá.
17A̱ꞌkhue̱n Judá niriꞌña̱a̱:
―Ikhúúnꞌ ma̱xu̱ꞌdú-jma̱a̱ mbáa a̱ꞌdáꞌ-tsútínꞌ, mbi̱ya̱a̱.
Xómáꞌ a̱ꞌgo̱ niꞌthán:
―Máján máꞌ. I̱ndo̱ó atatsíñáá rí ñajuun ꞌcháa, asndo gáta̱xu̱ꞌdú-jma̱a̱ xúꞌkhue̱n rámá.
18A̱ꞌkhue̱n niꞌthán Judá:
―Dí-lá gáxna̱a̱ꞌ naꞌcho̱o̱ rá.
Xómáꞌ ikhaa̱ niriꞌña̱a̱:
―Tsinuu dríga̱a̱ꞌ ga̱jma̱á máꞌ ñawiin ne̱, xúꞌkhue̱n máꞌ ixe̱ rí gída̱ꞌ ñawáanꞌ a̱ꞌkhue̱n.
Jamí ikhaa̱ nixnáxu̱u̱ ne̱, a̱ꞌkhue̱n rí nibóo̱ꞌ ga̱jmáa̱. Xómáꞌ a̱ꞌgo̱ nigo̱-éda niꞌnii̱. 19A̱ꞌkhue̱n rí ni̱tu̱xi̱i a̱ꞌgo̱ ni̱ka̱a̱. Jamí nirígúu̱ xtíin rí nirogoo̱ inuu̱, xúꞌkhue̱n máꞌ nijúwa̱a̱nꞌ xtíin rí a̱ꞌgó-xuáꞌa ñajuu̱n.
20Nda̱wa̱á wáa nixuꞌdu-jma̱a̱ Judá a̱ꞌdá-tsútúún ná ñawúun xa̱bo̱ iyanga̱jue̱e̱ mbo̱ adulamíta̱, ikhaa jngó magu̱u̱ drígo̱o̱ rí niniñuu̱ naꞌcho̱o̱ ná ñawúun a̱ꞌgo̱. I̱ndo̱ó numuu rí na̱nguá nixkama̱a̱. 21A̱ꞌkhue̱n rí niraxúu̱n xa̱bo̱ xuajen rúꞌkhue̱n:
―Náá xtáa a̱ꞌgo̱ mbo̱ Enaím tsí na̱ngu̱jua̱-mina̱ꞌ, tsí na̱ge̱ꞌe̱ ná rawuun jamba̱á, i̱yáálaꞌ jánlaꞌ.
Xómáꞌ xa̱bo̱ tsúꞌkhue̱n niriꞌña̱a̱:
―Táxtáa ge̱e̱ nimbáa a̱ꞌgo̱ tsí na̱ngu̱jua̱-mina̱ꞌ.
22A̱ꞌkhue̱n rí xa̱bo̱ i̱ya̱nga̱jue̱e̱ Judá nitanga̱a̱ inuu̱, jamí waꞌtháa̱n:
―Táxkama̱a̱ a̱ꞌgo̱. Jamí xúꞌkhue̱n máꞌ xa̱bo̱ tsí júwa̱ꞌ ikhín nithan: “Nimbá miꞌtsún táxtáa ge̱e̱ mbáa a̱ꞌgo̱ tsí na̱ngu̱jua̱-mina̱ꞌ”.
23A̱ꞌkhue̱n niꞌthán Judá:
―A̱wanúu máꞌ ga̱jmáa̱ ne̱, ra̱ꞌkhá muthan tsi̱ndiánlóꞌ xa̱bo̱. Inaaꞌ neꞌne rí gakon ikhúúnꞌ ni̱xu̱ꞌdú-jmaa̱ a̱ꞌdá-tsútúún tsíge̱ꞌ, jamí ikháán táta̱xkama̱a̱.
24Ído̱ neꞌne mbá atsúun go̱nꞌ wáa, waꞌtháán Judá:
―Gu̱ꞌgiáanꞌ Tamár niꞌgu ga̱jma̱á mbáa xa̱bo̱, jamí nigo̱-édee̱ numuu rí niꞌnii̱.
A̱ꞌkhue̱n niꞌthán Judá:
―Gu̱ríya̱a̱ꞌlaꞌ, jamí gu̱tsi̱khaa̱laꞌ.
25Ído̱ nu̱ri̱ya̱a̱ máꞌ rixa̱á, a̱ꞌkhue̱n ikhaa̱ nixuꞌmee̱ ajngáa ríge̱ꞌ inuu jmégue̱e̱: «Xa̱biya̱ tsí drígo̱o̱ ja̱ꞌne ríge̱ꞌ, tsúꞌkhue̱n neꞌne rí ja̱go̱-éda xúge̱ꞌ. ―Mangaa niꞌthúu̱n―: Athayáá tháan tsáa drígo̱o̱ ja̱ꞌne ríge̱ꞌ: tsina ga̱jma̱á máꞌ ñawiin ne̱, xúꞌkhue̱n máꞌ ixe̱ ñawún». 26A̱ꞌkhue̱n rí Judá neꞌne-nuwi̱i̱nꞌ ne̱, jamí niꞌthée̱n: «I̱wa̱á jmbii̱ ikhaa̱ xóo rí ikhúúnꞌ, numuu rí ikhúúnꞌ táxni̱i̱ a̱ꞌdéꞌ Séla̱ rí ma̱ꞌne a̱jmbaa̱». Jamí ni̱mi̱ꞌtsu̱n ná-tábóo̱ ga̱jmáa̱.
27Ído̱ ni̱ga̱nú mbiꞌi rí ma̱ꞌne xuajii̱n, nikujmaa rí e̱je̱n-xpa gatiin awúu̱n. 28Jamí awúun máꞌ rí naꞌne xuajii̱n, niríya̱ꞌ ñawúun mbáa. Xómáꞌ a̱ꞌgo̱ tsí na̱grui̱gúun e̱je̱n niguatuu̱n ñawúun jamí niroꞌóo̱ mbá gúmá maña̱ꞌ. A̱ꞌkhue̱n niꞌthée̱n: «Tsíge̱ꞌ nigájnuu ginii». 29Xómáꞌ ada̱ nixmá-ngua̱ꞌa̱a̱n ñawúun, a̱ꞌkhue̱n ni̱gu̱maa i̱mba̱a̱ dxíyo̱o̱. A̱ꞌkhue̱n niꞌthán a̱ꞌgo̱: «Xáne rí nitarmáꞌtháá jamba̱a̱ ján róꞌ». Ikhaa jngó ada̱ tsúꞌkhue̱n nixnúu̱ mbiꞌyuu Fáre̱s.#38.29 Ná ajngáa ebréo̱, mbiꞌyuu Fáre̱s naꞌthán-wíi̱ «ná ja̱ma̱ꞌtha». 30Nda̱wa̱á ni̱gu̱maa dxíyo̱o̱ tsí xtoꞌwóo gúmá maña̱ꞌ ñawúun, jamí nixnúu̱ mbiꞌyuu Sára̱.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 38: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.