XÓ NI̱GI̱ꞋDU̱U̱N-MUU 37
37
Rí nigundaa José
1Jakób nixtáa ná mbaa Kanaán, ná máꞌ nixtáa anu̱u̱. 2Ríge̱ꞌ ñajuun rí naꞌthán xóo nijúwá i̱ji̱i̱n Jakób: Ído̱ rí José gíꞌdoo mbá gu̱wa̱ꞌ-nítsu i̱jma̱ tsiguu̱, na̱ka̱ ra̱ña̱wúu̱n mogo̱ gajmíi̱ dxíyo̱o̱. Xómáꞌ ikhaa̱ xtáa̱ gajmíi̱ i̱ji̱i̱n Bíla̱ jamí i̱ji̱i̱n Sílpa̱, tsí gu̱ꞌwi̱i̱ máꞌ anu̱u̱. Xúꞌkhue̱n máꞌ naꞌthúu̱n anu̱u̱ rí xóo kri̱ga̱ ajngáa rí ra̱máján rí none̱ dxíyo̱o̱.
3Xómáꞌ Israél ja rá, phú nando-jaꞌyoo̱ i̱tháan José xó rí mbá xúgíin i̱ji̱i̱n, numuu rí ni̱gi̱ꞌdaa̱ ído̱ rí xi̱ꞌñú máꞌ ñajuu̱n. Ikhaa jngó niꞌnii̱ mbá xtíñuu rí phú mitsaan rí mbaꞌa mixtiúu. 4Jamí ído̱ ndiyáá dxíyo̱o̱ rí i̱tháan nando-jiꞌyáa̱ ikhaa̱ eꞌne anu̱u̱ xóo rí mbá xúgíi̱n ikhii̱n, a̱ꞌkhue̱n rí najiꞌníi̱ juyáa̱, jamí nánguá itháa̱n ga̱jma̱á ajngáa máján wáa.
5A̱ꞌkhue̱n rí mbá mbiꞌi nigundaa José, jamí ni̱gu̱wí-jnga̱a̱ xnuꞌndaa inúú dxíyo̱o̱. Xómáꞌ ikhii̱n i̱tháan najiꞌníi̱ juyáa̱ xóó, 6numuu rí niꞌthúu̱n:
―Gu̱dxawíínlaꞌ xúge̱ꞌ rí ni̱gúndaa jún rá. 7Ná xanáá kacháánlóꞌ nuruꞌwáálóꞌ xtaꞌdu̱u̱ ra̱xo̱o̱ ixí iña. A̱ꞌkhue̱n rí xtaꞌdu̱u̱ drígo̱ꞌ ni̱we̱je̱ jmbu ne̱, xómáꞌ xtaꞌdu̱u̱ dríga̱ꞌlaꞌ ni̱ge̱ꞌe̱ jndi ná inuu drígo̱ꞌ jamí ndiya-makuíi̱ ne̱.
8A̱ꞌkhue̱n ni̱ri̱ꞌñaa̱ dxíyo̱o̱:
―Ikháán ma̱ra̱tha̱n-ñájuanxo̱ꞌ ráꞌ, jamí ma̱nimba̱ꞌxo̱ꞌ ju̱ya̱a̱ꞌ ráꞌ.
A̱ꞌkhue̱n rí i̱tháan najiꞌníi̱ juyáa̱ xóó ga̱jma̱á numuu xnuꞌndaa, xúꞌkhue̱n máꞌ ajngáa xóo rí naꞌthúu̱n.
9Nigundaa̱ xóó i̱mba̱ xnuꞌndaa, jamí ni̱gu̱wí-jnga̱a̱ ne̱ inúú dxíyo̱o̱:
―Xúge̱ꞌ ni̱gúndaa-lá i̱mba̱ mbu̱jú rá. Ndi̱yo̱o̱ a̱kha̱ꞌ ga̱jma̱á go̱nꞌ xúꞌkhue̱n máꞌ mbá gue̱mba̱ a̱ꞌgua̱án rí nduya̱-makui̱ꞌ-lá méꞌ.
10Jamí ni̱gu̱wí-jnga̱a̱ ne̱ inuu anu̱u̱ xúꞌkhue̱n máꞌ inúú dxíyo̱o̱. A̱ꞌkhue̱n waxpríguíi̱ neꞌne anu̱u̱ jamí waꞌtháa̱n:
―Dí-lá iꞌthán xnuꞌndaa ríge̱ꞌ rí nitanuꞌndaa ján rá. Á ma̱gu̱ma rí ikhúúnꞌ, ru̱dáaꞌ jamí dxíya̱a̱ꞌ ma̱gúwa̱ꞌxo̱ꞌ mu̱sma̱tíga̱ꞌxo̱ꞌ inaaꞌ asndo mbayíí rá dxe̱ꞌ.
11Tsí dxíyo̱o̱ naxígu̱ún juyáa̱, xómáꞌ anu̱u̱ nandxaꞌwá-mina̱ꞌ ga̱jma̱á numuu rúꞌkhue̱n.
Rí nigíꞌnuu José nene̱ a̱ngui̱i̱n
12Nda̱wa̱á nigóó dxíyo̱o̱ ná Sikém, judii̱n mogui̱i̱ anúu̱ rí mu̱ña̱wúu̱n ikhín. 13A̱ꞌkhue̱n Israél niꞌthúun José:
―A̱ngia̱a̱nꞌ gatiin nu̱ña̱wu̱ún mogo̱ ná Sikém. Nando̱ꞌ rí mi̱dxu̱ꞌ ná kachúu̱n.
Xómáꞌ ikhaa̱ niriꞌña̱a̱:
―Xtáá ma̱ꞌgálo̱ꞌ.
14A̱ꞌkhue̱n Israél niꞌthúu̱n:
―Ayu xúge̱ꞌ, athayáá xóo júwa̱ꞌ dxíya̱a̱ꞌ, xóo júwa̱ꞌ mogo̱, jamí aya̱a̱ꞌ máꞌ ꞌcháa ajngáa ma̱dxawuunlo̱ꞌ.
A̱ꞌkhue̱n rí Israél nixuꞌmaa José ni̱ka̱. Nigájnuu̱ ná xkua̱ Ebrón, a̱ꞌkhue̱n ni̱ga̱níi̱ asndo ná Sikém. 15Jamí ikhín waxkamaa̱ eꞌne mbáa xa̱bo̱ rí ni̱ngra̱ꞌaa̱ ná xanáá. A̱ꞌkhue̱n watraxíi̱ eꞌne xa̱bo̱ tsúꞌkhue̱n:
―Díne ithaꞌyáa̱ꞌ rá.
16Xómáꞌ José niriꞌña̱a̱:
―Nda̱ꞌñíi̱ꞌlo̱ꞌ dxíyo̱ꞌ. Arathúnꞌ tháan náá katii̱n nu̱ña̱wúu̱n xu̱kú ithayáá ján.
17Xómáꞌ xa̱bo̱ tsúꞌkhue̱n niꞌthán:
―Nigóo̱ máꞌ ná ge̱e̱ ikhii̱n. I̱ndo̱ó ni̱dxawuun rí nithee̱n: “U̱ꞌgua̱lóꞌ ná Dotán rá”.
A̱ꞌkhue̱n rí José ni̱ka̱ ná nigóó dxíyo̱o̱, jamí ni̱ka̱ gáxkami̱i̱ ná Dotán. 18Jamí ído̱ ndiyáa̱ rí na̱ꞌkha̱ tsíngua̱ꞌ José, rí xóó máꞌ tága̱níi̱ mijngi ná rí kachúu̱n, a̱ꞌkhue̱n nithan-mi̱jne̱e̱ xáne rí mu̱xi̱ya̱a̱. 19Xáꞌnii nithee̱n:
―A̱gu̱ya̱xíí-lálaꞌ rí a̱ꞌkhue̱n i̱ꞌkha̱ xa̱bo̱ xnuꞌndaa rá. 20Xúge̱ꞌ rí ni̱ga̱nú mbiꞌi rá. Awalaꞌ mu̱xíya̱a̱lóꞌ jamí gu̱xpa̱tuáꞌáa̱nlóꞌ ná awúun mbá iñá drígo̱o̱ iya. A̱ꞌkhue̱n mu̱ꞌthánlóꞌ: “Mbáa xu̱kú-xáná wanitsíi̱ neꞌne”. A̱ꞌkhue̱n mbu̱ꞌyáá dí gáꞌne xnuꞌnduu̱ xúꞌkhue̱n rá.
21Ído̱ niꞌdxuun Rubén rí xúꞌkhue̱n ithee̱n, niꞌnii̱ rí ma̱ꞌne-jríya̱a̱ꞌ ná ñawúún dxíyo̱o̱, jamí niꞌthúu̱n xáꞌnii:
―Ma̱xúxíya̱a̱-málóꞌ. 22―Jamí niꞌthúu̱n xóó―: Ma̱xúxi̱díílaꞌ iꞌdi. I̱wa̱á máján gu̱xpa̱tuáꞌáa̱nlaꞌ ná iñá drígo̱o̱ iya rí ꞌgí ná mbaa niníí ge̱e̱, jamí ma̱xúne̱ ngínáa̱laꞌ.
Niꞌthée̱n rúꞌkhue̱n numuu rí ma̱goo ma̱ꞌne-jríya̱a̱ꞌ José ná ñawúún dxíyo̱o̱, jngó xúꞌkhue̱n ma̱xuꞌma̱a̱ inuu anu̱u̱, i̱ju̱mu̱u̱.
23Jamí ído̱ ni̱ga̱nú José ná gatiin dxíyo̱o̱, a̱ꞌkhue̱n ikhii̱n ni̱ri̱ye̱e̱ꞌ xtíin rí júwuu̱n rí mbaꞌa mixtiúu. 24A̱ꞌkhue̱n ni̱xpa̱tua̱ꞌa̱a̱n ná iñá drígo̱o̱ iya, i̱ndo̱ó numuu rí iñúu iya ri̱ga̱ mixoo, nda̱a̱ máꞌ iya ikhín. 25Nda̱wa̱á a̱ꞌkhue̱n nikuíji̱i̱n nipiꞌtsii̱. Jamí a̱ꞌkhue̱n ni̱ya̱xi̱i̱, ndiyáa̱ rí naguwá mbaꞌiin xa̱bo̱ ismaelíta̱ tsí naguwá ná Galaád. Naguwée̱ꞌ gajmíi̱ kaméyo̱ judee̱ iya ndaa thawuun, wájia thana ndaa thawuun ga̱jma̱á wájioo ixu̱u̱ mírra̱, rí ná Ejípto̱ igóo̱ judúu̱n ne̱.
26A̱ꞌkhue̱n Judá niꞌthúún dxíyo̱o̱: «Náá-lá rí máján gámbáyálóꞌ rí mu̱xíya̱a̱lóꞌ dxíya̱ꞌlóꞌ, xúꞌkhue̱n máꞌ rí mu̱rkaꞌwíílóꞌ rí nijáñuu̱ rá. 27I̱wa̱á máján rí gu̱ngu̱jua̱a̱lóꞌ inúú mbo̱ ismaelíta̱ xóo rí mo̱ꞌne̱ ngínáa̱lóꞌ. Numuu rí dxíya̱ꞌ-málóꞌ jamí iꞌdia-málóꞌ ñajuu̱n». Xkuaꞌnii jngó nigruígúun dxíyo̱o̱ rí niꞌthée̱n. 28Jamí ído̱ nigánújngúún mbo̱ madianíta̱#37.28 Tsí «mbo̱ madianíta̱», ikhiin máꞌ ñajúún «mbo̱ ismaelíta̱», xó máꞌ naꞌthán ná kíxnuu 25 ga̱jma̱á 27. tsí nagóó ra̱ngu̱jua̱, a̱ꞌkhue̱n ni̱ri̱ya̱a̱ꞌ José ná iñá, jamí ni̱ngu̱jua̱a̱ inúú xa̱bo̱ tsúꞌkhue̱n. Mbá skíñú mbúkha̱a̱ ajua̱nꞌ miꞌxá jámaa̱ rí ni̱ngu̱jua̱a̱. Xkuaꞌnii neꞌne rí nigó juya̱a̱ José ná Ejípto̱.
29Nda̱wa̱á nitanga̱a̱ Rubén ni̱ka̱ gáꞌyoo iñá, jamí nánguá-lá kua̱ꞌa̱a̱n José ikhín ndiꞌyoo̱. A̱ꞌkhue̱n ni̱ru̱thii̱n xtíñuu̱ rí natájuíin a̱kui̱i̱n. 30A̱ꞌkhue̱n rí nitanga̱a̱ ná kachúún a̱ngui̱i̱n, jamí niꞌthúu̱n: «Nánguá-lá kua̱ꞌa̱a̱n dxáma ná iñá ndi̱yo̱o̱. Xómáꞌ ikhúúnꞌ, náá rí gáne̱ xúge̱ꞌ rá».
31A̱ꞌkhue̱n ni̱ro̱tho̱n-raꞌáa̱ agoo mbáa a̱ꞌdá-tsútúún, xúꞌkhue̱n máꞌ ni̱xta̱jmáa̱ iꞌdi rúꞌkhue̱n xtíñuu José. 32A̱ꞌkhue̱n nigúu̱n juya̱a̱ xtíin rí mbaꞌa mixtiúu inuu anúu̱, jamí nitháa̱n:
―Ni̱xkama̱a̱xo̱ꞌ ríge̱ꞌ. Á ra̱ꞌkháa-lá xtíñuu a̱ꞌdeáaꞌ ñajuun ríge̱ꞌ ithayáá ján.
33Xómáꞌ ikhaa̱ neꞌne-nuwi̱i̱nꞌ ne̱, jamí niꞌthée̱n:
―Xtíñuu a̱ꞌdéꞌ ñajuun ne̱. Mbáa xu̱kú-xáná wanitsíi̱ neꞌne, jamí wachíko-ri̱ga̱a̱ José.
34A̱ꞌkhue̱n rí Jakób ni̱ro̱thon xtíñuu, jamí nijúwuu̱nꞌ xtíin rí xíni, numuu rí natájuíin a̱kui̱i̱n. Xúꞌkhue̱n máꞌ mba̱a̱ mbiꞌi nixtáa̱-jínúu̱ ga̱jma̱á numuu a̱dée̱. 35A̱ꞌkhue̱n rí mbá xúgíin i̱ji̱i̱n tsí xa̱bekha jamí go̱ꞌo̱ niguwá rí muxna̱a̱ la tsiakhe̱ anúu̱. I̱ndo̱ó numuu rí ikhaa̱ ra̱khóo̱ gáxná-mina̱a̱ꞌ tsiakhe̱, jamí niꞌthée̱n: «Ma̱xtáá máꞌ jínúꞌ asndo náá gájnguaa̱nꞌ iñá-wa̱jíín ga̱jme̱ꞌ a̱ꞌdéꞌ». Jamí ni̱mbi̱ya̱ꞌ-jmaa̱ máꞌ xúꞌkhue̱n a̱dée̱.
36Xómáꞌ mbo̱ madianíta̱#37.36 Tsí «mbo̱ madianíta̱», ikhiin máꞌ ñajúún «mbo̱ ismaelíta̱», xó máꞌ naꞌthán ná kíxnuu 25 ga̱jma̱á 27. ni̱ngu̱jua̱a̱ José ná Ejípto̱ inuu mbáa xa̱bi̱i̱ Faraón#37.36 «Faraón» nuxnáá mbiꞌyuu thúngaa mba̱a̱ ná Ejípto̱. tsí mbiꞌyuu Potifár, xa̱bo̱ tsí naꞌthán-ñájúún mbo̱ ku̱ra̱tuun ajua̱nꞌ, tsí nu̱ña̱wa̱án máꞌ.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 37: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.