XÓ NI̱GI̱ꞋDU̱U̱N-MUU 19
19
Ana̱ꞌlóꞌ naꞌne gámba̱a̱ Sodóma̱ ga̱jma̱á Gomórra̱
1A̱ꞌkhue̱n tsí a̱jmi̱i̱ ánje̱l niguáꞌnú ná Sodóma̱ ído̱ na̱ka̱-raꞌne wakhíí. Xómáꞌ Lót ꞌgí ná na̱tu̱ꞌúún-múú xa̱bo̱ ná rawuun xuajen Sodóma̱. Ído̱ ndiꞌñúu̱ ni̱tu̱xu̱u̱ gágrui̱gúu̱n, jamí ni̱rnga̱du̱u̱n asndo mbayíí. 2A̱ꞌkhue̱n niꞌthúu̱n:
―Táta̱, na̱nda̱ꞌa̱ꞌlaꞌ rí mu̱ꞌgua̱lóꞌ guꞌwáá, mbu̱ya̱a̱ xa̱ꞌlaꞌ jamí mu̱jiáa̱n la nakhuálaꞌ. Gátsíí miꞌcha̱ gáguaxu̱u̱nꞌlaꞌ rí mbu̱ya̱a̱ jamba̱a̱ mu̱ꞌgualaꞌ.
Xómáꞌ ikhii̱n ni̱ri̱ꞌñaa̱:
―Ma̱xúꞌguá-máxo̱ꞌ, ma̱waná-máxo̱ꞌ mbroꞌon ríge̱ꞌ ná rixa̱á ge̱jioꞌ.
3Xómáꞌ ikhaa̱ niꞌthán-jáñúu̱ guéño, a̱ꞌkhue̱n rí nigóo̱ goꞌóo Lót. Ído̱ niguáꞌníi̱ ikhín neꞌne-mújúu̱n mbaꞌa rí máján rí mu̱phi̱i̱, xúꞌkhue̱n máꞌ nixúmbíi̱ guma rí tsíge̱xe̱, a̱ꞌkhue̱n rí nipiꞌtsii̱. 4Asndo xóó máꞌ túbúu̱n ído̱ ni̱ru̱ꞌwáá xa̱bo̱ xuajen guꞌwá. Xúgíin xa̱bekha mbo̱ Sodóma̱, rí asndo tsí jiáma jamí asndo tsí xi̱ꞌñú, mbá ꞌnduꞌ niguwée̱ꞌ. 5A̱ꞌkhue̱n rí ni̱ndxa̱ꞌwa̱-ri̱ya̱a̱ꞌ Lót jamí ni̱ra̱xíi̱:
―Náá júwa̱ꞌ xa̱bekha tsí niguwá guꞌwáaꞌ mbroꞌon ríge̱ꞌ rá. Arawíi̱n, numuu rí mu̱ba̱ꞌ-gajmiáxo̱ꞌ.
6A̱ꞌkhue̱n rí Lót nigájnuu ná rawuun goꞌóo, jamí nacha̱ máꞌ nirugua̱a̱ rawuun xkrugua. 7A̱ꞌkhue̱n niꞌthúu̱n:
―Na̱tha̱n-jáñalaꞌ, a̱ngui̱nꞌ, rí ma̱xúne̱laꞌ rúꞌkhue̱n, rí xkawe̱ꞌ guéño. 8Gúꞌdiin a̱jmi̱i̱ i̱ji̱nꞌ tsí go̱ꞌo̱ tsí xóó túno gajmíí xa̱bekha. Ma̱gúwíi̱nlo̱ꞌ inalaꞌ rí mo̱ne̱laꞌ náá rí eyalaꞌ ga̱jma̱á nindxúu̱n. I̱ndo̱ó máꞌ xa̱bekha tsíge̱ꞌ, ma̱xúñu̱úlaꞌ nimbá, numuu rí niguwée̱ꞌ mbuya̱a̱ xúu̱nꞌ ná goꞌóꞌ.
9Xómáꞌ ikhii̱n ni̱ri̱ꞌñaa̱:
―¡Araxo̱n janíí a̱ꞌkhue̱n! ―Mangaa nithee̱n xóó―: Ikháán tsáán nidxa̱ꞌ janíí rí ma̱ra̱xtaa ga̱jma̱á nindxa̱ꞌxo̱ꞌ, ma̱ra̱tha̱n-ñájuanxo̱ꞌ ján ráꞌ. Jngó xúge̱ꞌ rá, mu̱ña̱a̱ꞌxo̱ꞌ i̱tha̱n nikhuáa xóo rí xa̱bo̱ tsúꞌkhue̱n.
A̱ꞌkhue̱n rí ni̱dráꞌii̱n inuu Lót rí muxnáa̱, jamí na̱tu̱múu̱ rí mu̱xpi̱gui̱i̱ꞌ xkrugua. 10A̱ꞌkhue̱n ni̱ka̱ ñawúún xa̱bekha, jamí ni̱xma̱ngua̱ꞌa̱a̱n Lót ná guꞌwáá, xúꞌkhue̱n máꞌ ni̱rugua̱a̱ xkrugua. 11Jamí nini̱i̱ rí ma̱mbadúún xa̱bo̱ tsí wájun ná rawuun guꞌwáá, jiáma jamí asndo tsí xi̱ꞌñú. Xkuaꞌnii neꞌne rí niskúu̱n ndiꞌyáa̱ꞌ rawuun guꞌwá. 12A̱ꞌkhue̱n rí xa̱bekha tsúꞌkhue̱n nitháán Lót:
―Náá tsí xóó a̱ngia̱a̱nꞌ xtaꞌdiin ge̱jioꞌ rá. Tsí nigiáanꞌ, i̱jia̱a̱nꞌ xa̱bekha jamí go̱ꞌo̱ jamí xúgíin tsí xtaꞌdiin ná xuajen ríge̱ꞌ, arawíi̱n janíí, 13numuu rí mo̱ne̱ gámba̱a̱xo̱ꞌ xuajen ríge̱ꞌ. Ni̱ga̱nú ajngáa inuu Ana̱ꞌlóꞌ Mikhuíí ga̱jma̱á numúú xa̱bo̱ tsíge̱ꞌ, ikhaa jngó nixuꞌmáa̱ꞌxo̱ꞌ Ana̱ꞌlóꞌ Mikhuíí rí mo̱ne̱ gámba̱a̱xo̱ꞌ ne̱.
14A̱ꞌkhue̱n rí Lót nigájnuu gáꞌthúu̱n niguíi̱n, tsí júwa̱ꞌ mu̱ni̱gu̱nꞌ gajmíí i̱ji̱i̱n: «A̱guáxo̱nlaꞌ, a̱ga̱jnálaꞌ ge̱jioꞌ, numuu rí Ana̱ꞌlóꞌ Mikhuíí ma̱ꞌne gámba̱a̱ xuajen ríge̱ꞌ». Xómáꞌ niguíi̱n, ni̱ju̱múu̱ rí ajngáa xaꞌon iꞌnii̱.
15Ído̱ rí na̱ka̱ ra̱mbiꞌi máꞌ, xa̱bekha mbo̱ ánje̱l nuxka nachaa̱ Lót, nitháa̱n:
―¡Araxo̱n mi̱dxu̱ꞌ! Ayáa a̱ꞌgia̱a̱ꞌ jamí ná-a̱jmi̱i̱ máꞌ i̱jia̱a̱nꞌ tsíge̱ꞌ, ikhaa jngó ma̱xámbáa̱nꞌlaꞌ ído̱ gámínu̱u̱ꞌ xuajen.
16Xómáꞌ ikhaa̱ tsícho̱o̱, ikhaa jngó xa̱bekha tsúꞌkhue̱n ni̱ra̱tuun ñawúun Lót, ga̱jma̱á a̱ꞌgui̱i̱ jamí ná-a̱jmi̱i̱ i̱ji̱i̱n, numuu rí Ana̱ꞌlóꞌ Mikhuíí nañáwíin a̱kui̱i̱n jaꞌñúu̱. A̱ꞌkhue̱n rí nirawíi̱n, nigóo̱ gúni̱ñúu̱ꞌ ná rawuun xuajen. 17Ído̱ rí nigájnu-jiꞌdii̱n máꞌ, a̱ꞌkhue̱n nitháa̱n Lót:
―Athane̱ jríya̱ꞌ-mina̱ꞌ. Ma̱xátia̱xe̱ tsu̱da̱a̱ꞌ, ni ma̱xáriajún mbá xúgíí xkua̱ ríge̱ꞌ. Atagáyaaꞌ ja ná júba̱, ra̱ꞌkhá ma̱ja̱ñáaꞌ.
18Xómáꞌ Lót niꞌthúu̱n:
―Táta̱, na̱nda̱ꞌa̱ꞌlaꞌ rí ma̱xáꞌne xkuaꞌnii ja̱nꞌ. 19Xúge̱ꞌ rí ikháa̱nꞌlaꞌ nañáwíin a̱kia̱nꞌlaꞌ ju̱yo̱ꞌ, phú májáa̱nꞌlaꞌ rí no̱ne̱-jríya̱a̱ꞌlaꞌ mbiꞌyu̱ꞌ. I̱ndo̱ó ikhúúnꞌ ma̱xáꞌngo̱ꞌ ma̱ne̱ jríya̱ꞌ-mina̱ꞌ asndo ná júba̱, ra̱ꞌkhá ma̱xkama-ri̱gu̱ún rí ra̱máján, jamí ma̱ja̱ñúꞌ. 20A̱gu̱yáálaꞌ rí mijngi máꞌ ge̱jioꞌ ri̱ga̱ mbá xuajen, ná rí ma̱ga̱yú-toꞌo̱. Gu̱ni̱ꞌñúꞌ ma̱ꞌgá gáne̱ jríya̱ꞌ-mina̱ꞌ ikhín. Á ra̱ꞌkhá phú lájuíin ne̱ rá, ikhaa jngó ma̱ne̱-jríya̱a̱ꞌ mbiꞌyu̱ꞌ ikhín.
21A̱ꞌkhue̱n rí mbáa ánje̱l niriꞌña̱a̱:
―Ni̱dxawaanꞌ máꞌ rí na̱tha̱nda̱ꞌa̱ ríge̱ꞌ, ikhaa jngó ma̱xáne̱ gámba̱a̱ xuajen rí narathán. 22Nacha̱ máꞌ gátha̱ne̱, ayu máꞌ gátha̱ne̱ jríya̱ꞌ-mina̱ꞌ ñúꞌún, numuu rí asndo nimbá ma̱xáxóo ma̱ne̱ asndo náá gádxa̱ꞌnú ikhín.
Ikhaa jngó Soár neꞌne mbiꞌyuu xuajen rúꞌkhue̱n.
23Mbá nangutaꞌáan a̱kha̱ꞌ rawuun numbaa ído̱ ni̱ga̱nú Lót ná Soár. 24A̱ꞌkhue̱n rí Ana̱ꞌlóꞌ Mikhuíí neꞌne rí ma̱ri̱gú ruꞌwa agu ga̱jma̱á yoo ná inuu Sodóma̱ ga̱jma̱á Gomórra̱. 25Xkuaꞌnii neꞌne gámba̱a̱ xuajen rúꞌkhue̱n, xúꞌkhue̱n máꞌ mbá xúgíí xkua̱, mbá xúgíin máꞌ xa̱bo̱ tsí júwa̱ꞌ ná awúun xuajen, mangaa mbá xúgíí rí najma̱a̱ ná inuu ju̱ba̱ꞌ. 26Xómáꞌ a̱ꞌgui̱i̱ Lót, nitangayii̱ niyaxi̱i̱ tsu̱du̱u̱, jamí ikhín máꞌ niwanúu̱ wíji̱i̱, niꞌni̱i̱ la itsí idú xuyuu̱.
27A̱ꞌkhue̱n rí miꞌcha̱ máꞌ nitsima̱a̱ Abraám ná niꞌthán-mina̱ꞌ ga̱jmáa̱ Ana̱ꞌlóꞌ Mikhuíí. 28Niyaxi̱i̱ asndo ná Sodóma̱ ga̱jma̱á Gomórra̱, jamí asndo mbá xúgíí mbaa xkua̱. A̱ꞌkhue̱n ndiꞌyoo̱ rí natsimuu gúní ikhín, asndo xó mbá gúniúu iñá rí nakha-roꞌoo agu jaꞌnii ne̱.
29Ído̱ Ana̱ꞌlóꞌ neꞌne gámba̱a̱ xuajen ná xkua̱, a̱ꞌkhue̱n ni̱rmáꞌáa̱n a̱kui̱i̱n jaꞌyoo̱ Abraám. Ikhaa jngó niríya̱a̱ꞌ Lót ná xuajen rí neꞌne gámba̱a̱, ído̱ rí neꞌne gámbu̱u̱ ná nixtáa Lót.
Lót gajmíí i̱ji̱i̱n
30A̱ꞌkhue̱n rí nigájnuu Lót ná xuajen Soár numuu rí namíñuu̱ gáxtáa̱ xóó ikhín, ikhaa jngó ni̱ke̱e̱ gáxtáa̱ ná júba̱ gajmíi̱ ná-a̱jmi̱i̱ i̱ji̱i̱n tsí go̱ꞌo̱. Nijúwe̱e̱ꞌ mbá iñúu itsí. 31A̱ꞌkhue̱n tsí nikhi̱i̱ niꞌthúun ge̱ꞌthe̱e̱: «Nikhi̱i̱ máꞌ tátiálóꞌ, xúꞌkhue̱n máꞌ nánguíin xa̱bekha ná mbaa ríge̱ꞌ tsí mu̱ꞌdiinlóꞌ, xóo rí none̱ máꞌ xúgíin xa̱bo̱ numbaa. 32Aya̱, gu̱ꞌxnáá tátiálóꞌ iya najnga̱a̱ ma̱ga̱a̱n, xúꞌkhue̱n máꞌ mu̱ꞌbáa̱ꞌ gajmiálóꞌ, ikhaa jngó ga̱jma̱á majiu̱u̱nꞌ ikhaa̱ mu̱guaꞌdáálóꞌ ri̱jiu̱u̱ꞌ».
33Ikhaa máꞌ mbroꞌon rúꞌkhue̱n nixnáa̱ iya najnga̱a̱ anúu̱ niꞌña̱a̱. A̱ꞌkhue̱n rí ni̱to̱ꞌo̱o̱ tsí nikhi̱i̱, jamí nibóo̱ꞌ ga̱jmáa̱ anu̱u̱. Xómáꞌ ikhaa̱ táꞌyoo̱ mbá jayu ído̱ nibóo a̱dée̱, ni máꞌ ído̱ rí ni̱tu̱xi̱i̱. 34Rí i̱mba̱ mbiꞌi, tsí nikhi̱i̱ niꞌthúun ge̱ꞌthe̱e̱: «Nathayáá ráꞌ, rí nduꞌwíín nigú ga̱jme̱ꞌ tátéꞌ. Gu̱ꞌxnáa̱lóꞌ iya najnga̱a̱ ma̱ga̱a̱n mangaa máꞌ mbroꞌon ríge̱ꞌ, a̱ꞌkhue̱n rí ma̱ta̱ꞌa̱a̱ꞌ me̱no̱ꞌ ga̱jma̱a̱ꞌ, ikhaa jngó ga̱jma̱á majiu̱u̱nꞌ ikhaa̱ mu̱guaꞌdáálóꞌ ri̱jiu̱u̱ꞌ».
35Mangaa máꞌ mbroꞌon rúꞌkhue̱n nixnáa̱ iya najnga̱a̱ anúu̱ niꞌña̱a̱, a̱ꞌkhue̱n rí ni̱tu̱xu̱u̱ tsí lájuíin, jamí ni̱ke̱e̱ gábóo̱ ga̱jmáa̱ anu̱u̱. Xómáꞌ ikhaa̱ táꞌyoo̱ mbá jayu ído̱ nibóo a̱dée̱, ni máꞌ ído̱ ni̱tu̱xi̱i̱. 36A̱ꞌkhue̱n rí ná-a̱jmi̱i̱ máꞌ i̱ji̱i̱n Lót nida-éda neꞌne anúu̱. 37Xómáꞌ tsí nikhi̱i̱ neꞌne ku̱maa̱ mbáa a̱dée̱, jamí nixnúu̱ mbiꞌyuu Moáb, tsí ñajuun anu̱ú xa̱bo̱ moabíta̱ asndo xúge̱ꞌ. 38Mangaa tsí lájuíin neꞌne ku̱maa̱ mbáa a̱dée̱, jamí nixnúu̱ mbiꞌyuu Ben-ámmi̱, tsí ñajuun anu̱ú xa̱bo̱ amoníta̱ asndo xúge̱ꞌ.
ទើបបានជ្រើសរើសហើយ៖
XÓ NI̱GI̱ꞋDU̱U̱N-MUU 19: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.