Rí nene̱ 20
20
Páblo̱ na̱ka̱ ná numbaa Masedónia̱ jamí ná Grésia̱
1Nda̱wa̱á ído̱ neꞌne-wíyuu xkujndu rí niríga̱, a̱ꞌkhue̱n Páblo̱ nindxaꞌwúún tsí nanimbu̱únꞌ juyáá Jesús. Niꞌthán-múꞌúu̱n jamí nigo̱raꞌii̱n, a̱ꞌkhue̱n niꞌthán-ngawúu̱n jamí nigájnuu̱ rí ma̱ꞌgee̱ ná numbaa Masedónia̱. 2A̱ꞌkhue̱n ni̱ka̱-rangroꞌoo̱ ná numbaa rúꞌkhue̱n, jamí naxnáa̱ la guéño tsiakhe̱ a̱ngia̱nꞌlóꞌ ga̱jma̱á ajngáa rí naꞌthúu̱n. Nda̱wa̱á ni̱ga̱níi̱ ná numbaa Grésia̱. 3Ikhín nixtáa̱ mbá atsúun go̱nꞌ. Jamí inu máꞌ xtáa̱ ma̱jngúu̱n ná awúun guꞌwá-rguwa rí ma̱ꞌgee̱ ná Síria̱, ído̱ nidxawuu̱n rí xa̱bo̱ judío̱ ríga̱ rí muñíi̱ ná ma̱ꞌgee̱, a̱ꞌkhue̱n niꞌgí-mine̱e̱ꞌ rí ma̱thangaa̱ ná Masedónia̱. 4Jamí nigóó mbá tikhuun xa̱bo̱ ga̱jma̱á nindxu̱u̱ asndo ná Ásia̱: Sópa̱te̱r tsí na̱ꞌkha̱ ná Beréa̱, Aristárko̱ ga̱jma̱á Segúndo̱ tsí naguwá ná Tesalóni̱ka̱, Gáyo̱ tsí na̱ꞌkha̱ ná Dérbe̱, jamí Timotéo̱, xúꞌkhue̱n máꞌ Tíki̱ko̱ jamí Trófi̱mo̱, tsí naguwá ná numbaa Ásia̱. 5Ikhiin xa̱bo̱ tsíge̱ꞌ nigóó ginuu jamí niguáꞌtha̱nꞌxo̱ꞌ ná xuajen Tróa̱s. 6Xómáꞌ ikháanꞌxo̱ꞌ nijnguánxo̱ꞌ ná awúun guꞌwá-rguwa ná Filípo̱s ído̱ ninújngoo ndxa̱a̱ rí naꞌpho̱ xa̱bo̱ guma bopho rí na̱nguá gíꞌdoo ñu̱u̱ miga̱ꞌ, jamí awúun rí witsu mbiꞌi nimbáxi̱iꞌ gajmiáxo̱ꞌ ná xuajen Tróa̱s. Ikhín máꞌ ninguanáxo̱ꞌ mbá juwan mbiꞌi.
Naꞌthángoo Páblo̱ ná Tróa̱s
7Mbiꞌi ginii rí ndayáa semána̱ niwi̱in mbá ꞌnduꞌ#20.7 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «niwa̱ánꞌxo̱ꞌ mbá ꞌnduꞌ». tsí nanimbu̱únꞌ juyáá Jesús kajngó mune̱-ri̱yaa̱ꞌ rí nikueꞌtso-añuu Jesús, jamí Páblo̱ naꞌsngúu̱n. I̱ndo̱ó máꞌ numuu rí i̱mba̱ mbiꞌi ma̱ga̱jnúu̱ ma̱ꞌgee̱, ikhaa jngó niꞌthúu̱n asndo mbá tikhuu mbroꞌon. 8Jamí phú mbaꞌa agu tráma nakha rí nambiꞌi ná awúun guꞌwá ri̱jma̱á ná gachúu̱n. 9Jamí mbáa dxáma mbiꞌyuu Eutíko̱ ꞌgí ná rawuun iduu guꞌwá. Xómá Páblo̱ naꞌthán-ráꞌa mba̱yo̱ꞌ, ikhaa jngó niꞌgu me̱do̱ dxáma, jamí nixpátríguíi̱ atsú ja̱rngo̱xe̱ rí tsída̱ꞌ guꞌwá. Ído̱ nigóo̱ gúxu̱xíi̱, a̱ꞌkhue̱n ndiyáa̱ rí nijáñuu̱. 10A̱ꞌkhue̱n ni̱ga̱taa Páblo̱, ni̱mba̱tsra̱ꞌmá-mine̱e̱ꞌ ná inuu dxáma, jamí ndiyáraꞌaa̱. A̱ꞌkhue̱n niꞌthée̱n: «¡Ma̱xámíñalaꞌ, ndaꞌyee̱!». 11Ído̱ nitsimaa̱ neꞌne-ri̱yaa̱ꞌ rí nikueꞌtso-añuu Jesús gajmíi̱ jamí nipiꞌtsii̱, nda̱wa̱á a̱ꞌkhue̱n niꞌthúu̱n xóó asndo watse. A̱ꞌkhue̱n nigájnuu̱ ni̱ke̱e̱. 12Xómáꞌ dxáma, ndaꞌya nigúu̱n juya̱a̱ ná guꞌwóo, jamí phú mba̱a̱ niꞌni̱i a̱kuíi̱n neꞌne.
Páblo̱ na̱ka̱ ná xuajen Miléto̱
13A̱ꞌkhue̱n ikháanꞌxo̱ꞌ, wapha máꞌ nijnguánxo̱ꞌ ná awúun guꞌwá-rguwa rí na̱ka̱ ná xuajen Asón, numuu rí ikhín nimbánuu rí mbu̱ya̱axo̱ꞌ Páblo̱. Xkuaꞌnii nimbánaxo̱ꞌ numuu rí ikhaa̱ ndiyoo̱ ma̱ꞌgee̱ nakhúu̱ asndo ikhín. 14Ído̱ ni̱xkama̱axo̱ꞌ Páblo̱ ná xuajen Asón, a̱ꞌkhue̱n nijngúu̱n ná awúun guꞌwá-rguwa ga̱jma̱á nindxa̱ꞌxo̱ꞌ jamí nikuáxo̱ꞌ ná xuajen Mitiléne̱. 15Nigájnaxo̱ꞌ ikhín, i̱mba̱ mbiꞌi niguáꞌnúxo̱ꞌ ná kri̱doo Kío̱. Jamí i̱mba̱ mbiꞌi niguáꞌnúxo̱ꞌ ná Sámo̱s. Niwajúnxo̱ꞌ kajngó mbu̱ya̱a xa̱ꞌxo̱ꞌ ná Trojílio̱,#20.15 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Niwajúnxo̱ꞌ kajngó mbu̱ya̱axa̱ꞌxo̱ꞌ ná Trojílio̱». jamí i̱mba̱ mbiꞌi niguáꞌnúxo̱ꞌ ná xuajen Miléto̱. 16Páblo̱ niꞌgí-mina̱ꞌ rí ma̱xánújngoo̱ ná xuajen Éfe̱so̱, kajngó ma̱xágajyúu̱ ná numbaa Ásia̱, numuu rí nacho̱o̱ ma̱ga̱níi̱ ná Jerusalén kajngó ma̱xtáa̱ ikhín ído̱ ma̱ꞌne ndxa̱a̱ Pentekostés, xí numuu rí na̱ꞌngo̱o̱ na̱ga̱níi̱ wapha.
Páblo̱ naꞌthán-ngáwúún xa̱bo̱ buanuu tsí júwa̱ꞌ ná Éfe̱so̱
17Awúun máꞌ rí xtáa Páblo̱ ná xuajen Miléto̱, nixuꞌmee̱ ajngáa ná inúú xa̱bo̱ buanuu tsí juya̱ idxu̱ún tsí nanimbu̱únꞌ juyáá Jesús ná Éfe̱so̱, nandxaꞌwúu̱n rí ma̱guwée̱ꞌ. 18Ído̱ niguáꞌníi̱ ná inuu̱, a̱ꞌkhue̱n ikhaa̱ niꞌthúu̱n: «Ikháanꞌlaꞌ ndu̱ya̱álaꞌ xáne nixtáálo̱ꞌ ná majña̱ꞌlaꞌ mbá xúgíí mbiꞌi, asndo nákhí mbiꞌi ginii rí ni̱to̱ꞌo̱ꞌ ná numbaa Ásia̱. 19Ni̱xrígú-mina̱ꞌ mbá jayu rí ne̱ne̱lo̱ꞌ ñajuun Táta̱, phú ni̱mbi̱ya̱ꞌlo̱ꞌ, jamí nika-ranújngoꞌ mbaꞌa inii gaꞌkho̱ rí ni̱ꞌgí-mijná xa̱bo̱ judío̱ rí muñi̱ꞌ. 20Xúꞌkhue̱n máꞌ ndu̱ya̱álaꞌ rí táni̱ꞌñúu rí ma̱tha̱nꞌlaꞌ mbá xúgíí rí mambáyálaꞌ. Ni̱sngálaꞌ ná inúú xa̱bo̱, jamí ná guꞌwálaꞌ. 21Na̱sngúúnlo̱ꞌ xa̱bo̱ judío̱ jamí xa̱bo̱ tsí ra̱ꞌkháa judío̱ ñajúún rí ma̱thangii̱n ná inuu Ana̱ꞌlóꞌ, jamí na̱sngúu̱nlo̱ꞌ rí mu̱tsijii̱ a̱kuíi̱n ná inuu Táta̱ Jesukrísto̱.
22»Rí xúge̱ꞌ rá, Xu̱u̱ꞌ Ana̱ꞌlóꞌ na̱tsu̱dúún rí ma̱ꞌgá ná Jerusalén, jamí ni máꞌ tsíyo̱o̱ dí ñajuun rí ma̱gíꞌnuꞌ ikhín. 23I̱ndo̱ó máꞌ nda̱yo̱o̱ rí mbá xúgíí xuajen ná nakalo̱ꞌ, Xu̱u̱ꞌ Ana̱ꞌlóꞌ naꞌthínꞌ rí ma̱ꞌgálo̱ꞌ géjwa̱nꞌ jamí ma̱mínu̱u̱ꞌ. 24I̱ndo̱ó máꞌ numuu rí asndo nimbá máꞌ tsíꞌgíi idxu̱ꞌlo̱ꞌ, ni máꞌ tsíndxa̱ꞌwa̱-mina̱ꞌ rí gíꞌdoo numuu mbiꞌyuꞌ. Rí phú i̱tha̱án gíꞌdoo numuu ñajuun rí ma̱mbóꞌ ma̱ne̱ ñajun rí nixníꞌ Táta̱ Jesús ma̱ne̱, rí ma̱tha̱n-ráꞌa ajngáa máján rí nasngájma rí Ana̱ꞌlóꞌ nandoo jaꞌyalóꞌ.
25»Jamí xúge̱ꞌ rá, nda̱yo̱o̱lo̱ꞌ rí nimbáa tsí ikháanꞌlaꞌ náxáyoꞌ, ikháanꞌlaꞌ tsáanꞌ nijuwalaꞌ ga̱jma̱á nindxu̱ꞌ awúun máꞌ rí naka-ra̱sngálaꞌ ga̱jma̱á numuu rí Ana̱ꞌlóꞌ ñajuun tsí naꞌthán-ñájúún xa̱bo̱. 26Ikhaa jngó, ikhúúnꞌ na̱tha̱nꞌlaꞌ mbiꞌi xúge̱ꞌ rí na̱nguá gíꞌmúú aꞌkhán xí mbáa tsí ikháanꞌlaꞌ ma̱xájríya̱a̱ꞌ. 27Numuu rí ikhúúnꞌ tárkaꞌwu nitháan rí naꞌgí-mina̱ꞌ Ana̱ꞌlóꞌ rí ma̱ꞌne, rí ni̱tha̱nꞌlaꞌ ne̱ mbá xúgíí. 28Ikhaa jngó, gu̱ña̱wa̱n-mijná máꞌ ikháanꞌlaꞌ, jamí gu̱ña̱wu̱únlaꞌ mbá xúgíin xa̱bo̱ tsí xómá xu̱kú mogo̱ jaꞌñúú. Numuu rí Xu̱u̱ꞌ Ana̱ꞌlóꞌ niskuíjñáaꞌlaꞌ rí ma̱nindxa̱ꞌlaꞌ xómá waxtú, rí mu̱ña̱wu̱únlaꞌ xa̱bo̱ tsí nanimbu̱únꞌ juyáá Táta̱,#20.28 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «Ana̱ꞌlóꞌ». tsí ikhaa̱ máꞌ niꞌtsii̱n ga̱jma̱á iꞌdiuu̱. 29Numuu rí ikhúúnꞌ nda̱yo̱o̱ rí ído̱ ma̱ꞌgálo̱ꞌ, a̱ꞌkhue̱n ma̱tu̱ꞌu̱ún ná majña̱ꞌlaꞌ xa̱bo̱ tsí xómá i̱ña̱ꞌ tsí namangu̱únꞌ jaꞌñúú. Ikhiin tsúꞌkhue̱n mune̱ rí mune̱-gámbi̱in tsí xómá mogo̱ jaꞌñúú. 30Jamí ná majña̱ꞌlaꞌ máꞌ ikháanꞌlaꞌ ma̱tu̱xu̱ún xa̱bo̱ tsí musngáá rí mi̱nduwa, kajngó magóó tsu̱dúu̱n tsí nanimbu̱únꞌ juyáá Jesús. 31¡Ikhaa jngó ga̱juwalaꞌ xawi! Ga̱rmáꞌáan a̱kia̱nꞌlaꞌ rí mbá atsú tsigu ga̱jma̱á jamínu̱ꞌ, mbiꞌíí mbruꞌwíín táni̱ꞌñúu ra̱tha̱n-múꞌúun mbámbáa tsí ikháanꞌlaꞌ.
32»Jamí xúge̱ꞌ rá, a̱ngui̱nꞌ, na̱ni̱ꞌñálaꞌ ná ñawúun Ana̱ꞌlóꞌ, jamí na̱ni̱ꞌñálaꞌ ga̱jma̱á ajngáa rí nasngájma rí Ana̱ꞌlóꞌ nandoo jaꞌyalóꞌ. Ajngáa rúꞌkhue̱n gíꞌdoo tsiakhe̱ rí ma̱ꞌne rí ma̱gajáanꞌlaꞌ, jamí maxnálaꞌ ne̱ rí nixuda-mina̱ꞌ Ana̱ꞌlóꞌ maxnúú mbá xúgíin tsí na̱gu̱ma-jaꞌwu̱un. 33Táni̱gu̱ꞌ rí ma̱gúꞌdo̱ꞌ drígo̱o̱ nimbáa, ni máꞌ mbúkha̱a̱ ajwa̱nꞌ miꞌxá drígo̱o̱, ni máꞌ mbúkha̱a̱ ajwa̱nꞌ mo̱jmo̱ꞌ drígo̱o̱, ni máꞌ xtíñuu̱. 34Ikháanꞌ ndu̱ya̱á májánlaꞌ rí ni̱ñajun ga̱jma̱á ñawúnꞌ kajngó mba̱ꞌyá mbá xúgíí rí ndaꞌyóꞌ ma̱xtáá ga̱jma̱á, xúꞌkhue̱n máꞌ rí ndaꞌñúú tsí gajmíꞌ. 35Jámba̱ miꞌtsú ni̱sngálaꞌ rí xkuaꞌnii jaꞌyoo mu̱ñajunlóꞌ kajngó ma̱goo mu̱mbáñúúlóꞌ tsí ndaꞌñúú, jamí ma̱rmáꞌáan a̱kia̱nꞌlóꞌ ajngáa rí niꞌthán Táta̱ Jesús: “I̱tha̱án máꞌ gagi xtáa tsí naxná xó rí tsí na̱grui̱gú”».
36Ído̱ wámbo̱o̱ Páblo̱ niꞌthán ajngáa rúꞌkhue̱n, a̱ꞌkhue̱n nismáti̱go̱o̱ jamí niꞌthán-jáñuu̱ Ana̱ꞌlóꞌ gajmíi̱ mbá xúgíin xa̱bo̱ buanuu tsúꞌkhue̱n. 37A̱ꞌkhue̱n mbá xúgíi̱n phú nu̱mbi̱ye̱e̱ꞌ, xúꞌkhue̱n máꞌ nduya̱raꞌaa̱ Páblo̱, jamí nu̱raꞌníi̱ inuu. 38Jamí phú nadaa a̱kuíi̱n ga̱jma̱á numuu ajngáa rí niꞌthán Páblo̱, rí ni miꞌtsú náxúyáa̱. A̱ꞌkhue̱n nigóo̱ ga̱jma̱á nindxu̱u̱ asndo ná nijngúu̱n awúun guꞌwá-rguwa.
ទើបបានជ្រើសរើសហើយ៖
Rí nene̱ 20: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
