Rí nene̱ 19
19
Rí neꞌne Páblo̱ ná Éfe̱so̱
1Awúun máꞌ rí Apólo̱s xtáa ná Korínto̱, Páblo̱ ni̱ka̱-rangroꞌoo ná xuajen rí triga̱ ná júba̱. Nda̱wa̱á a̱ꞌkhue̱n ni̱ga̱níi̱ ná Éfe̱so̱, jamí ikhín nixkamii̱ mbá tikhuun tsí nanimbu̱únꞌ juyáá Jesús. 2Jamí niraxúu̱n:
―Á ni̱dríguíilaꞌ Xu̱u̱ꞌ Ana̱ꞌlóꞌ nákhí ninimba̱ꞌlaꞌ ju̱ya̱á Jesús rá.
Xómáꞌ ikhii̱n ni̱riꞌñee̱:
―Na̱nguá. Asndo ni máꞌ túdxawíínxo̱ꞌ xí xtáa Xu̱u̱ꞌ Ana̱ꞌlóꞌ.
3A̱ꞌkhue̱n niraxúu̱n:
―Náá rí gisngáá ni̱drígúlaꞌ kajngó waxúꞌdu-maꞌáa̱nꞌlaꞌ ná awúun iya xúꞌkhue̱n rá.
Xómáꞌ ikhii̱n ni̱riꞌñee̱:
―Gisngáá rí niꞌthán-raꞌa Juáán tsí nixúꞌdu-maꞌíin xa̱bo̱ ná awúun iya.
4A̱ꞌkhue̱n Páblo̱ niꞌthúu̱n:
―Juáán nixúꞌdu-maꞌíin xa̱bo̱ ná awúun iya tsí nathanga̱a a̱kui̱ín ná inuu Ana̱ꞌlóꞌ. I̱ndo̱ó máꞌ numuu rí niꞌthúu̱n xa̱bo̱ xuajen rí ga̱nimbúu̱n juyáa̱ tsí ma̱ꞌkha̱ tsu̱du̱u̱. Ikhaa tsúꞌkhue̱n ñajuun Jesús tsí ñajuun Krísto̱.#19.4 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «tsí ñajuun Krísto̱».
5Ído̱ ni̱dxawíi̱n rúꞌkhue̱n, a̱ꞌkhue̱n waxúꞌdu-maꞌíi̱n ná awúun iya ga̱jma̱á numuu Táta̱ Jesús. 6Ído̱ rí Páblo̱ nixkrámii̱, a̱ꞌkhue̱n ni̱dri̱guíi̱ Xu̱u̱ꞌ Ana̱ꞌlóꞌ. A̱ꞌkhue̱n ni̱gíꞌdíi̱n nithee̱n ajngáa rí tsígu̱ma-nuwiin jamí nu̱rawíjngaa̱ ajngóo Ana̱ꞌlóꞌ. 7Naꞌne xó mbá gu̱wa̱ꞌ i̱jmi̱i (12) wáa xa̱bekha tsúꞌkhue̱n rí mbá xúgíin.
8Awúun rí mbá atsúun go̱nꞌ ni̱ka̱ Páblo̱ ná guꞌwá rí na̱gi̱mbíin xa̱bo̱ judío̱. Tsímíñuu̱ rí naꞌthán-rúꞌúu̱n xa̱bo̱, naꞌthúu̱n ga̱jma̱á numuu rí Ana̱ꞌlóꞌ ñajuun tsí naꞌthán-ñájúún xa̱bo̱, jamí naꞌnii̱ rí ma̱nimbúu̱n. 9I̱ndo̱ó máꞌ numuu rí mbá tikhuun nene̱ gúkú a̱kui̱ín, ra̱khúu̱n gánimbúu̱n, jamí nithan-xkawi̱i̱ꞌ ga̱jma̱á numuu gisngáá drígo̱o̱ Jesús ná inúú mbaꞌiin xa̱bo̱. A̱ꞌkhue̱n Páblo̱ niríya̱ꞌ-mina̱ꞌ ná majñúu̱, jamí ni̱gu̱wíi̱n tsí nanimbu̱únꞌ juyáá Jesús, ni̱ka̱ jaguu̱n ná guꞌwá gisngáá drígo̱o̱ mbáa xa̱bo̱ tsí mbiꞌyuu Tiráno̱. Ikhín tsitsíí naꞌthúu̱n xa̱bo̱. 10Xkuaꞌnii niꞌnii̱ awúun rí a̱jma̱ tsigu, ikhaa jngó mbá xúgíin xa̱bo̱ tsí júwa̱ꞌ ná numbaa Ásia̱, xa̱bo̱ judío̱ jamí xa̱bo̱ griégo̱, ni̱dxawíín ajngóo Táta̱ Jesús.
11Jamí Ana̱ꞌlóꞌ naꞌne rí phú wáá mi̱ndaꞌkho ga̱jma̱á majñu̱u̱ Páblo̱, 12rí asndo pañíto̱ o xtíin rí ningájma ná xuyuu̱ na̱ka̱ jiꞌda ná inúú tsí najáñúú, jamí naꞌnii̱ a̱kuíi̱n, xúꞌkhue̱n máꞌ nagájna̱á gíñá ꞌguéen ná xuñúu̱. 13I̱ndo̱ó máꞌ numuu rí mbá tikhuun xa̱bo̱ judío̱, tsí ngrigu̱ún nune̱ ñajun rí nu̱xkawíin gíñá ꞌguéen, nini̱i̱ mu̱xri̱gáa̱ mbiꞌyuu Táta̱ Jesús ná inúú tsí guáꞌdiin gíñá ꞌguéen. Xáꞌnii nithee̱n: «Na̱xna̱-ñájwanlaꞌ rí ma̱ga̱jnáaꞌlaꞌ ga̱jma̱á numuu Jesús, tsí naꞌthán-ráꞌa Páblo̱ ga̱jma̱á numuu».
14Ikhaa rúꞌkhue̱n nune̱ mbá juwiin i̱ji̱in mbáa xa̱bo̱ judío̱ mbiꞌyuu Eséba̱, mbáa dxakuun tsí gíꞌdoo numuu. 15Xómáꞌ gíñá ꞌguéen niriꞌñúu̱: «Na̱ne̱-núwíinlo̱ꞌ Jesús, jamí nda̱yo̱o̱ tsáa ñajuun Páblo̱. Xómáꞌ ikháanꞌlaꞌ, tsíin ñajwanlaꞌ rá».
16A̱ꞌkhue̱n xa̱bo̱ tsí gíꞌdaa gíñá ꞌguéen ni̱ki̱xi̱i̱ ni̱ga̱ta̱ꞌmáa tsu̱dúu̱n, nirngáxii̱n ga̱jma̱á tsiakhe̱ jamí neꞌne-ñawúu̱n mi̱ndaꞌkho mbá xúgíi̱n. A̱ꞌkhue̱n tsaꞌtsii̱n jamí nijámbi̱ñúu̱ ningujwíi̱n-ragáñúu̱ ná guꞌwá rúꞌkhue̱n. 17Jamí ni̱dxawíín rúꞌkhue̱n mbá xúgíin xa̱bo̱ judío̱ jamí xa̱bo̱ griégo̱ tsí júwa̱ꞌ ná Éfe̱so̱. A̱ꞌkhue̱n mbá xúgíi̱n phú nimíñúu̱, jamí ndiya-makuíi̱ mbiꞌyuu Táta̱ Jesús.
18Jamí phú mbaꞌiin tsí ninimbu̱únꞌ juyáá Jesús naguwée̱ꞌ nune̱maphíi̱ a̱pha̱ mbá xúgíí rí ra̱máján nini̱i̱. 19Xúꞌkhue̱n máꞌ phú mbaꞌiin xa̱bo̱ tsí nene̱ xawan niguwá judúu̱n i̱ñúu̱ꞌ, jamí ni̱tsi̱khe̱e̱ ne̱ ná inúú mbá xúgíin xa̱bo̱. Ído̱ ni̱ru̱waa̱ rí numuu ne̱ kajngó mbuyáa̱ wátha̱ mbúkha̱a̱ jámaa mbá xúgíí i̱yi̱i̱ꞌ rúꞌkhue̱n, a̱ꞌkhue̱n ndiyáa̱ rí a̱jma̱ skíñú gu̱wa̱ꞌ míl (50 000) mbúkha̱a̱ ajwa̱nꞌ miꞌxá jámaa ne̱. 20Xkuaꞌnii i̱tha̱án na̱ka̱-raꞌne mbaꞌiin xa̱bo̱ tsí nanimbu̱únꞌ juyáá ajngóo Táta̱ jamí na̱ka̱-rakujma rí phú mba̱a̱ tsiakhe̱ gíꞌdoo ne̱.
21Ído̱ ninújngoo mbá xúgíí rúꞌkhue̱n, a̱ꞌkhue̱n niꞌgí-mina̱ꞌ Páblo̱ rí ma̱ꞌga ná Jerusalén, i̱ndo̱ó máꞌ numuu rí ginii ma̱nújngoo̱ ná numbaa Masedónia̱ jamí Akáya̱. Xúꞌkhue̱n máꞌ naꞌthée̱n: «Nda̱wa̱á rí nixtáá ná Jerusalén, mba̱ꞌyóo rí ma̱ꞌgá ná Róma̱ mangaa». 22A̱ꞌkhue̱n nixuꞌmii̱ magóó ná Masedónia̱ a̱jmi̱i tsí nu̱mbáyíi̱, Timotéo̱ ga̱jma̱á Erásto̱, awúun máꞌ rí ikhaa̱ nanguanúu̱ xóó i̱mbá wátha̱ wáa mbiꞌi ná numbaa Ásia̱.
Xa̱bo̱ xuajen nu̱xu̱xí a̱ꞌwá ná Éfe̱so̱
23Nákhí mbiꞌi rí ñúꞌún niríga̱ mbá xkujndu mba̱a̱ ná Éfe̱so̱ ga̱jma̱á numuu gisngáá drígo̱o̱ Jesús. 24Xkujndu rúꞌkhue̱n nigíꞌdu̱u̱n mbáa xa̱bo̱ tsí mbiꞌyuu Demétrio̱. Xa̱bo̱ tsúꞌkhue̱n nañajun ga̱jma̱á ajwa̱nꞌ miꞌxá rí naꞌne guꞌwá lakiin, xtiꞌkhuu guꞌwá dxákuun drígo̱o̱ Diána̱,#19.24 Ikhaa máꞌ Diána̱ mbiꞌyuu «Artemísa̱» ná ajngáa griégo̱. jamí phú mba̱a̱ mbúkha̱a̱ nudaa xa̱bo̱ tsí nune̱ ñajun rúꞌkhue̱n. 25A̱ꞌkhue̱n Demétrio̱ ni̱ru̱wi̱in xa̱bo̱ tsí ikhaa máꞌ ñajun guáꞌdáá xómá ikhaa̱, jamí niꞌthúu̱n:
«Xa̱bo̱ buanuu, ikháanꞌlaꞌ ndu̱ya̱álaꞌ rí ñajun rí nu̱ꞌne̱lóꞌ phú máján nuꞌdaalóꞌ mbúkha̱a̱ ga̱jma̱á numuu ne̱. 26I̱ndo̱ó máꞌ numuu rí ikháanꞌlaꞌ ndu̱ya̱álaꞌ jamí nu̱dxawíínlaꞌ rí xa̱bo̱ tsí mbiꞌyuu Páblo̱, na̱ꞌngo̱o̱ naꞌne-rájíi̱n xa̱bo̱, ra̱ꞌkhá máꞌ i̱ndo̱ó ná Éfe̱so̱, rí asndo xó mbá xúgíí máꞌ ná numbaa Ásia̱. Naꞌthúu̱n xa̱bo̱ rí ra̱ꞌkháa Ana̱ꞌlóꞌ ñajúún tsí nune̱-ku̱mii xa̱bo̱ ga̱jma̱á ñawúún. 27Ra̱ꞌkhá máꞌ i̱ndo̱ó ngamí rí náxúya̱-makuíí xa̱bo̱ ñajun rí nu̱ꞌne̱lóꞌ, rí mangaa máꞌ ngamí rí náxúya̱-makuíí xa̱bo̱ guꞌwá dxákuiin ru̱dálóꞌ Diána̱, tsí maphú mba̱a̱, xúꞌkhue̱n máꞌ ngamí rí náxágu̱ma-mba̱a̱ gúne̱ xa̱bo̱ xómá rí na̱gu̱ma-mba̱a̱ xúge̱ꞌ ene̱ mbá xúgíin xa̱bo̱ tsí júwa̱ꞌ ná numbaa Ásia̱, jamí mbá xúgíí numbaa».
28Ído̱ ni̱dxawíi̱n ajngáa rúꞌkhue̱n, a̱ꞌkhue̱n phú nijiꞌníi̱, jamí ni̱ndxa̱ꞌwe̱e̱ xáꞌnii: «¡Maphú mba̱a̱ Diána̱, ru̱dúún xa̱bo̱ Éfe̱so̱!». 29Jamí mbá ni̱ngra̱ꞌaa idxu̱ún mbá xúgíin xa̱bo̱ xuajen. A̱ꞌkhue̱n nigóo̱-ragáñúu̱ ná guꞌwá rí na̱gi̱mbíin a̱pha̱ xa̱bo̱ xuajen, jamí nigóo̱-ru̱xma̱taa̱ Gáyo̱ ga̱jma̱á Aristárko̱, tsí naguwá ná numbaa Masedónia̱, tsí ngrigu̱ún gajmíí Páblo̱. 30A̱ꞌkhue̱n Páblo̱ ndiyoo ma̱ga̱jnúu maꞌthúún xa̱bo̱ xuajen, xómáꞌ tsí nanimbu̱únꞌ juyáá Jesús túni̱ꞌñáa̱ rí ma̱ga̱jnúu̱. 31Jamí mangaa máꞌ mbá tikhuun xa̱bo̱ ñajun tsí júwa̱ꞌ ná numbaa Ásia̱, tsí ñajúún iyanga̱jwe̱e Páblo̱, ni̱xu̱ꞌmee̱ ajngáa inuu̱, nuthán-jáñíi̱ rí ma̱xáꞌgee̱ ná guꞌwá rí na̱gi̱mbíin a̱pha̱ xa̱bo̱ xuajen. 32Mbá tikhuun xa̱bo̱ mbá xó i̱ndxa̱ꞌwa̱, jamí i̱ꞌwíin i̱mba̱ xó i̱ndxa̱ꞌwa̱. Numuu rí mbá ni̱ngra̱ꞌaa idxúu̱n, jamí tsí i̱tha̱án mbaꞌiin ni tsíyáá náá numuu kajngó niwii̱n ikhín. 33Jamí ná majñu̱ú xa̱bo̱ tsí mbaꞌiin, xa̱bo̱ judío̱ ni̱ríya̱a̱ꞌ Alejándro̱ jamí ni̱rmajngua̱a̱ꞌ kajngó ma̱wi̱ji̱i̱ ná inúú mbá xúgíin xa̱bo̱ maꞌthée̱n. A̱ꞌkhue̱n Alejándro̱ niꞌnii̱ ñawúu̱n kajngó ma̱ꞌne-wíyuu rawúún xa̱bo̱, numuu rí nandoo̱ maꞌthán-mbáa̱ ga̱jma̱á numúú xa̱bo̱ judío̱ ná inúú xa̱bo̱ xuajen. 34I̱ndo̱ó máꞌ numuu rí ído̱ ndiyáa̱ rí xa̱bo̱ judío̱ ñajuu̱n, a̱ꞌkhue̱n mbá xúgíin xa̱bo̱ ni̱ru̱wa̱a a̱ꞌwúún jamí ni̱ndxa̱ꞌwe̱e̱ mbóó ikhaa máꞌ ajngáa awúun rí xó a̱jma̱ wáa kíxnuu iduu ajwa̱nꞌ: «¡Maphú mba̱a̱ Diána̱, ru̱dúún xa̱bo̱ Éfe̱so̱!».
35A̱ꞌkhue̱n xa̱bo̱ tsí naꞌne i̱yi̱i̱ꞌ ná guꞌwá-ñajun, ído̱ ni̱ꞌngo̱o̱ niꞌnii̱ rí ma̱ꞌne-wíyuu gúne̱ xa̱bo̱ tsí mbaꞌiin, a̱ꞌkhue̱n niꞌthée̱n: «Xa̱bo̱ buanuu Éfe̱so̱, mbá xúgíin nduyáá rí xa̱bo̱ xuajen Éfe̱so̱ nu̱ña̱wa̱án guꞌwá dxákuiin Diána̱ tsí maphú mba̱a̱, xúꞌkhue̱n máꞌ nu̱ña̱wáa̱n xtiꞌkhuu̱ rí ni̱ga̱taa ná Júpi̱te̱r.#19.35 Ríga̱ i̱yi̱i̱ꞌ griégo̱ rí wayuu rí naꞌthán «ni̱ga̱taa ná mikhuíí». 36Numuu rí ndawa̱a̱ tsí maꞌthán rí na̱nguá gakon rúꞌkhue̱n, ikhaa jngó ndaꞌyóo rí mu̱ne̱laꞌ wíí, jamí gu̱ndxa̱ꞌwa̱-mijná májánlaꞌ rí mu̱ne̱laꞌ. 37Numuu rí niguwa ju̱diinlaꞌ xa̱bo̱ tsíge̱ꞌ ge̱jyoꞌ, tsí ni máꞌ túne̱-ku̱ꞌwá ná guꞌwá dxákuiin ru̱dálaꞌ#19.37 Ríga̱ mbá tikhu i̱yi̱i̱ꞌ griégo̱ rí wayuu rí naꞌthán «ru̱dálóꞌ». ni máꞌ túthee̱n xkawe̱ꞌ ga̱jma̱á numuu̱. 38Xí Demétrio̱ jamí tsí nu̱ñajun ga̱jma̱á nindxu̱u̱ guáꞌdáá xkujndu ga̱jma̱á nindxu̱u̱ mbáa xa̱bo̱, ikhaa numuu rúꞌkhue̱n júwa̱ꞌ xa̱bo̱ ñajun tsí nu̱ra̱jwa̱ꞌ. Gagóo̱ gúríguii̱ ajngáa rí guáꞌdáa̱ ná inúu̱ ikhii̱n jamí ikhín máꞌ gúne̱-mbánu-mijnée̱. 39Jamí xí ríga̱ i̱mba̱ rí nu̱tha̱nlaꞌ numuu rá, gu̱rígulaꞌ ne̱ ná na̱gi̱mbíin xa̱bo̱ ñajun kajngó ma̱mba̱núu numuu ne̱. 40Numuu rí ga̱jma̱á numuu rí niríga̱ xúge̱ꞌ ngamí ma̱rigu tsu̱da̱ꞌlóꞌ rí nu̱xkaxi̱i̱lóꞌ xkujndu ná xuajen, numuu rí nda̱a̱ nimbá rí ma̱goo mu̱ꞌthánlóꞌ numuu ga̱jma̱á numuu rí niríga̱ xúge̱ꞌ». 41Jamí ído̱ wámbo̱o̱ niꞌthée̱n ajngáa rúꞌkhue̱n, a̱ꞌkhue̱n niꞌthán-ngawúu̱n xa̱bo̱ tsí ni̱gi̱mbíin.
ទើបបានជ្រើសរើសហើយ៖
Rí nene̱ 19: tcf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 SIL Global. Creative commons license CC BY-SA.
