Aba Loma 5
5
Twayughiwa ukuti twe bagholoke pamaso pa Chala
1Ipano pakuti twayughiwa ukuti twe bagholoke pamaso pa Chala ukwendela mu lwitiko, tuli nu mutende nu Chala ukwendela mwa Yesu Kilisitu u Malafyale witu. 2Ukwendela mumwake atwighulila isila ukwendela mu lwitiko ukuti tuchimanye ichisa cha Chala, cho tuli nacho losulu. Po tukusekela, bo tukulindilila ukubeghana nabo ubughindikiwa bwa Chala. 3Te popa papo pene awe, loli tukusekela sona mundamyo situ chifukwa tusimenye ukuti mundamyo tukumanyilamo ukukiba, 4ukukiba kukumupelela umundu pakuba na akayilo akisa, sona akayilo akisa ka kumupela umundu pakuba nu lusubilo. 5Ulusubilo ulu lutakutukosya isoni, chifukwa ulughano lwa Chala lwapunguliwa mu myoyo yitu ukwendela mwa Mbepo Mwikemo, yo akatupa utwe.
6Bo tukali tutenamaka, u Kilisitu akatufwila utwe twe bambibi pakabalilo akisa ko u Chala akasala. 7Chindu chipala ngani ukuti umundu amufwile yumo, napo angabapo yumo umugholoke. Pamo angabapo yumo yo angakiba pakumufwila umundu umugholoke. 8Loli u Chala akalangisya mo atughanile utwe pakuti u Yesu akatufwila bo tukali twe bambibi. 9Pakuti mwibanda lyake lyatupela pakuba bagholoke pamaso pa Chala. Po akwisa pakutupoka kubukali bwa Chala. 10#1 Kol1.20-21.Pakuti tukaba balughu ba Chala, tukasayana nawe ukwendela mu bufwe bwa Mwana wake. Pakuti ipano twasayana nu Chala, tukwisa pakupokiwa ukwendela mu bumi bwake! 11Te popapa pene, loli utwe tukusekela mwa Chala ukwendela mwa Malafyale witu u Yesu Kilisitu, yo ipano atusayannya utwe nu Chala.
Adamu nu Kilisitu
12 #
Ubw3.6. Pololi ukuyana namo imbibi yikisila mu chisu ichapasi ukwendela mu mundu weka, sona nu bufwe ukwendela mumbibi, musila yiyi ubufwe bukisa ku mundu wesi, chifukwa wesi akananga. 13Imbibi yikabamo muchisu chapasi bo indaghilo sitabikiwe. Loli po pate indaghilo, abandu batangayughiwa ukuti bambibi. 14Loli ukwandila pakabalilo ka Adamu mupaka pakabalilo ka Mozesi, ubufwe bukaba nu bulaghili napa bo batanangite, ukusita ukukonga indaghilo ngati mo u Adamu akabombelagha.
U Adamu akaba chifwanikisyo cha yo akwisa. 15Loli ichabupi cha pabu tutangayanisya nu kunanga kwa bandu, pakuti abingi bakafwa chifukwa cha kunanga kwa mundu weka yula, ngani ngani ichisa cha Chala sona ni chabupi cha pabu cha mundu weka u Yesu Kilisitu, chikababalila abandu abingi. 16Po ichabupi cha pabu icha Chala chitakuyana nu kunanga kwa mundu weka. Pakuti ukulongiwa kwa umundu weka yula kukisa nu bubibi. Loli ichabupi ichapabu chikufuma ku bubibi ubwingi nu kutubika ku bugholoke. 17Chifukwa cha kunanga kwa mundu weka ubufwe bukanda pakuba nu bulaghili chifukwa cha mundu weka yula. Loli bo bakupokela ichisa, fyo fikubalila ni chabupi cha bugholoke, umwakuti bakwisa pakuba nu bumi mu bunyafyale bwa mundu weka, yo we Yesu Kilisitu.
18Po ukuyana ni mbibi ya mundu weka yikabapelela abandu bosi ukuti bafundiwe, umwakuyana bubu ni mbombo ya mundu weka umugholoke yikubapela abandu bosi pakuba bagholoke nu kubapa ubumi. 19Pakuti ukuyanamo abandu abingi bakabela bambibi chifukwa chakusita ukwifwila kwa mundu weka, umwakuyana bubu, abandu abingi bakwisa pakubapela ukuba bagholoke chifukwa cha kwifwila kwa mundu weka.
20Indaghilo sikapeghiwa ukuti imbibi syongelele, loli bo imbibi sikongelela, ichisa cha Chala chope chongelelagha ngani. 21Po ukuyanamo imbibi sikabela nu bulaghili chifukwa cha bufwe, po sona ichisa cha Chala mo chibelile nu bulaghili ukwendela mu bugholoke ukutulongosya utwe ku bumi bwa bwile na bwile ukwendela mwa Yesu Kilisitu, u Malafyale witu.
ទើបបានជ្រើសរើសហើយ៖
Aba Loma 5: SSTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
