मार्क 6
6
नासरेथोमेहें ईसुउ नाकार
(मत्तय 13:53-58; लुक 4:16-30)
1तिहीं रोत निहीत ईसु तियाआ नासरेथ होयरोम आवयू, आन तियाआ सेला तियाआ फाटी गोया. 2आरामोअ दिहोअ दिही तो आराधनालयो मेहें संदेश आपू वोल्यू; आन वारुज माअहें उनाइत कोइत बोगलाइत गोये आन कोने वोल्ये, “याहा ए गोठी का रोत मुंदू पोड़्यु?” एहेलिही हिकवोण याहा कोडे आप्यी? याआ आथे एते वोडे कामे केहें कोइत ओवतेहे? 3केहें ओ तोज हुतार नाहां के जो मरियाआ पोर्यू, आन याकोब, योसेफ, यहुदा आन शिमोनोअ पाही होय? आन याआ बोअह्हीं इंहीं आपाआ विसमेहें नाहां रोती के? तियाहा काजे तियां तियाआ नाकार कोअयू.
4ईसु तियांहां कोयो, “भविश्यवक्ताहा फक्त तियाआ कुटूंबामेहें आन कोअमेहें आन कोर्याआ माहूंमेहें सोड़ीत आखी जागे मानपान जोड़त्लू.”
5आन तो तिहीं कोड्ले वोडे कामे नाहां कोइत सेक्यू, फक्त थोड़ाज मांदवाड़्यापोअ आथ मिकीत तियांहां हाजे कोअये. 6आन तो बोगलाइत गोयू, काहाके तियां माअहुंउं अविश्वास ओतू.
फाश्यू तो गांवोंमेहें माअहुंहूं सिकाड़तु फिरु वोल्यू.
ईसु बारा सेलाहा सेवाहा मोकलीइत्लू
(मत्तय 10:5-15; लुक 9:1-6)
7आन ईसु बारा सेलाहा तियाआ जागे हादीत कोइत तियांहां बेन बेन जोओंहों मोकलु वोल्यू; आन तियांहां खाराब आत्मा पोअ आधिकार आप्यू. 8आन तियांहां हुकुम आप्यू, “के वाटेए काजे डेंगार सोड़ीत बिहीरो किज मा लेहा; ने रोटू, ने खोत्लू, ने खुहेंमेहें पोशा. 9पोन खाहड़े पोवजा आन पोवित रोल्या आंगड़ा वासी बिहीरो आंगड़ो मा लेहा.” 10आन तिये तियांहां कोयो, “जिहीं तुमाआं स्वागत ओवे, तिहीं रोत जाअहूं जाआं तो कोअ टाकीत ने जाहा, ताअहूं जाआं तिहींज रोजा. 11जिया गावोंअ माअहें तुमुहूं स्विकार ने कोए, आन तुमाआं ने उनाये, तिहीं रोत निहींत तुमाआं गुडाआ थुड़ीइ तुलो बी फोकड़ीत टाका, काहाके तों तियांआं काजे साक्शी बोणुहूं जोवे.”
12ताहां तियां जात कोइत परसार कोअयू के पाप कोइलोअ सोड़ा, आन देवोअ वोल मोन फेरवा. 13आन वारुज पुते काड्ये, आन वारुज मांदवाड़्यापोअ जेयतुनोअ तेल हारीत कोइत हाजे कोअये.
बाप्तिस्मा आपनारा योहानोअ खुन
(मत्तय 14:1-12; लुक 9:7-9)
14आन हेरोद राजा ईसुउ सर्सा उनाअयू, काहाके तियाआ नाव पसरीत गोयोतो, आन तिये कोयो, के “योहान बाप्तिस्मा आपनारु मोतो मेहें रोत जिवीत उठ्यूहू, तियाहा कोत तिया वाअहीं एं वोडे कामे ओवतेहे.”
15आन बिहीरा कोयो, “ओ एलिया होय,”
पोन थोड़हा कोयो, “भविश्यवक्ता नेत भविश्यवक्ता मेर्युउ कोडू तेबी एकाआ होस होय.”
16हेरोद ओं उनाइत कोयो, “जिया योहानोअ मुंड तोडल्यो, तोज जिवीत उठ्यूहू.” 17काहाके हेरोद तियाआ पाही फिलीप्पअ लाडी हेरोदियास, जियीइरी तिये वेहवाल कोअल्यो, माअहुंहूं मोकलीत योहानोहो तोइत जेलेमेहें टाकी देदूतो. 18काहाके योहान हेरोदोहो कोयोतो, “ताआ पायहोअ लाडीही मिकीइलोअ ताहूं कायदाअ पुरमाणे नाहां होबा देतो.”
19तियाहा काजे तियाअरी हेरोदियाआ ने जोमतीते आन एहेलुहू विसार कोअतीते, के योहानोहो माईं देअहूं जोवे, पोन एहलोहो ने ओवयो. 20काहाके हेरोद योहानोहो धर्मी आन पवित्र माअहुंउं कोत बितूतो, आन तियाहा वारुहूं वेंडारतूतो, आन तियाआ गोठ उनाइत जाअखिलुहू बितूतो, पोन खुसीमेहें उनाअतूतो.
21आन बोराबर वेल आयी पोन जाहां हेरोद तियाआ जल्माआं दिहोपोअ तियाआ मुख्याहां आन सेयनिकोअ मुख्याहां, आन गालील मुलखोमेर्याआ डायहांआं काजे पांगात मिक्यी. 22आन ते हेरोदियाआ बेटिह्ही मांयते आवयी, आन नासीत कोइत हेरोद आन तियाअरी बोहनाराहां खुस कोअया; ताहां राजा पोर्यीही कोयो, “ताहूं जों जोवे तों मापोअ माग, आंय ताहूं आपिहीं.” 23आन तिये शप्पत खादी के, “आंय माआं आरदो राज्यो जाआं जो किबी तू मापोअ मागही तों आंय ताहूं आपिहीं.”
24ताहां ते पोर्यी बाअथे जात कोइत तियीइ आयहीही फुशो, “आंय कि मागो?”
तियी कोयो, “बाप्तिस्मा कोअनारा योहानोअ मुनको.”
25ते ताबुड़ राजाअ जागेहे मांयते गोयी, आन तियाहा विनंती कोअयी, के “माहूं ओंमेज बाप्तिस्मा आपनारा योहानोअ मुनको एकी ठालीमेहें लेतावीत आपुहूं जोवे.”
26ताहां राजा खुब उदास ओवयू, पोन तियाआ शप्पतेए वाखरी आन आरी बोहनाराआं वाखरी तो तियीही नाकारीत ने सेक्यू. 27ताहां राजा ताबुड़ एका सिपायोहो तियाआ मुनको वाडीत लेतावेतेहें काजे हुकूम आप्यू, तिये जेलेमेहें जात कोइत तियाआ मुनको वाड्यो. 28आन एकी ठाली मेहें मिकीत लेतायू, आन तियी पोर्यीही आप्यो, आन पोर्यी तियीइ आयहीही आप्यो. 29ओं उनाइत कोइत योहानोअ सेला आवया, आन तियाआ तोड़ विसीत माहणोमेहें ओज्यो.
ईसुउ हाजार माअहोंहों खावाड़ीइलो
(मत्तय 14:15-21; लुक 9:11-17; योहान 6:1-14)
30साकर्या ईसुउ जागे आवित कोइत एकठा ओवा, आन जों किबी तियां कोअयो, आन सिकाड़्यो तों, आखो तियाहा कोत देखाड्यो. 31फाश्यू तिये तियांहां कोयो, “तुमू रानोमेहें हुंदली जागे साला आन थोड़ुक आराम कोआ.” काहाके तिहीं जाअखीलेहे माअहें जातेते आन आवतेते नेहें तिहीं वाअहीं तियांहां रोटू खाअलोअ बी वेल ने जोड़तीते. 32ताहां ते आखा नावड़ाम बोहीत नेवरी जागेहे गोया.
33पोन वारुज माअहें तियांहां जात्ला देखीत लेदा आन ते कोडा होय ते ओलखीत लेदा ताहां तिहींइं आसे-पासेए आखे माअहें पागेज गुगदीइतेज निहींये आन तियां रोत आगाड़ी तें तिहीं पोते. 34ईसु जाहाजीम रोत उतर्यू, ताहां तिये वोडी गर्दी देख्यी; तें सारवाली ने ओय एहेलाहा मेडाआं होसर्येए ओते, तियाहा काजे तियाहा तियां पोअ दया आयी; तियाहा काजे तो तियांहां वारुज गोठीइ बाप्तिम सिकाडू वोल्यू. 35जेहेलाम दिही वारुज डोलीत गोयू तेहेलाम सेला तियाआ जागे आवित कोइत तियाहा कोयो, “ओ हुंदलू जागू होये आन दिही बी जाअखुज डोलीत गोयुहू. 36माअहुंहूं वाटे लागाड़ मोन्ज्ये तें आसे-पासेए खेतोम आन गांवोंमेहें जात कोइत सोताआ काजे कि तेबी लेत खाय.”
37ईसु तियांहां कोयो, “तुमूज तियांहां खायतेहें काजे आपा.” तियां तियाहा कोयो, “आमू तियांहां खायतेहें काजे बेन होव दीनारोअ#6:37 दीनार दीनार ताहां सांदीइ आनो आन एक दीनार ताहां एका दिहोअ मोजरी एतीही तियाआ किंमत बोणत्ली. वेसातू रोटू लेतावो के?”
38ईसु तियांहां फुशो, “तुमापोअ केतुहू रोटू होय?” जावा आन पाला,
आन तियां होदीत कोइत कोयो, “पास रोटा आन बेन मासा होय.”
39ताहां ईसु तियाआ सेलाहां कोयो, के आखाहा रांगी-रांगीमेहें निला सारा पोअ बोहाड़ी द्या. 40तियाहा काजे तें होव-होव आन पोन्नास-पोन्नास जोओं एहेलिही रांग्यी कोइत बोठे. 41ताहरुउ ईसु पास रोटा आन बेन मासा लेत कोइत होरगाआ वोलेहे पाल्योन ताहरुउ देवोअ आभार मान्यू. आन माअहुंहूं वाटेतेहें काजे सेलाहां मुड़ीत-मुड़ीत आपतू गोयू आन बेन मासा बी वाटीत कोइत तियां आखाहा आप्या. 42आन बादे खात कोइत ताराईत गोये. 43ताहराअ सेला उगरीइल्या रोटाअ कुटका वाअहीं बारा टोपले पोइत लेदे आन मासाआ बी पुकरा टोलू कोअया. 44जियां रोटू खादू तियांमेहें निस्ता पास हाजार माटी ओता.
ईसु पाअयोंपोअ सालत्लु.
(मत्तय 14:22-33; योहान 6:15-21)
45ताहरुउ ईसु ताब्बुड़ तियाआ सेलाहां नावड़ा मेहें बोहाड़्या आन ते तिया रोत पेल तियी तोड़े बेथसैदा मेहें जाता रोयतेहें कोयो, जाअहूं जाआं के तो माअहोंहों मोकले. 46तियांहां मोकलीत कोइत तो डोगो पोअ प्रार्थना कोउ गोयू. 47जेहेलाम वेल पोड़्यी, ताहां नावड़ो तालावोअ विसमेहें ओतो, आन ईसु मेरेपोअ एखलुज ओतू. 48जेहेलाम तिये देख्यो के ते नावड़ो सालाड़ी-सालाड़ीइ काबरात गोयाहा, काहाके हावा तियांआं विरुद्दाम सालतीते, ताहां रातीइ शार वाजताआ वेलेए विसमेहें हुजीइला रोत पेल तो तालावो पोअ सालित तियांआं जागे आयू; काहाके तियाआ तियांआं रोत आगाड़ी जाअलोअ विसार ओतू. 49पोन ते तियाहा पाअयों पोअ सालत्लु पालित कोइत समज्या के पुत होय, आन आअड़ा वोल्या; 50काहाके आखा तियाहा पालीत कोइत काबराईत गोयाते.
पोन ताबुड़ ईसु तियांहां कोयो, “हिम्मत मिका: आंय होय; मा बिहा!” 51ताहरुउ तो तियांआं जागे नावड़ाम आयू, आन वारो बोंद ओत गोयो: ताहराअ ते जुदा बोगलाइत गोया. 52ते तियां पास हाजार माअहोंहों रोटू खावाड़ीइलाअ गोठीइ अर्थ नाहां समजीत सेके, काहाके तियांआं मोन टाठो ओत गोयेते.
ईसु गनेसरेतोमेहें मांदवाड़्याहां हुदारत्लू
(मत्तय 14:34-36)
53जेहेलाम ते दोर्या उनकावित कोइत गनेसरेत पोत्या, आन नावड़ो मेरे बांदी देदो. 54जेहेलाम ते नावड़ामेहें रोत उतर्या, ताहां माअहें ताब्बुड़ ईसुहू ओलखीत लेदू, 55आहने पाहनेए आखा भागोमेहें गुगद्ये, आन मांदवाड़्याहा खाट्ला पोअ टाकीत कोइत, जिहीं जिहीं तियाआ खबर मिल्यी, तिहीं तिहीं रोत वोहीत फिर्ये. 56आन जिहीं काबी ईसु गांवोंम, सेहरोम नेते खेतोमेहें जातुतो, माअहें मांदवाड़्याहा बोर बाजारोमेहें लेतावीत मिकतेते आन ताआ साअकाआ कोरेहे तेबी आथ लागाड़ुहूं दे, एहें कोइत तियाहा रावण्या कोअतेते, आन जेत्ते जोएं तियाहा आथ लागाड़्यु, तेत्ते आखे हाजे ओत गोये.
ទើបបានជ្រើសរើសហើយ៖
मार्क 6: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.