मार्क 12
12
दाराक्शाआ मोलाआ जागल्याआ काईं
(मत्तय 21:33-46; लुक 20:9-19)
1ताहरुउ ईसु काईं वाअहीं तियांअरी गोठी कोउ वोल्यू: “एके माअहें दाराक्शाआ मोलु लागाड़्यु, आन तिया मोलाआ मेरेमेरे वाड़ बांद्यी, आन दाराक्शाआ रोहोअ खाण खुंअयी, आन मालू बोणावयू; आन जागल्याहा ठेकू आपित कोइत पोरदेस जातु रोयू. 2आन जाहां दाराक्शे तोड़ीइलोअ वेल आयी, ताहां तिये एका पावरोहो तियां जागल्याआ जागे फलवाअ इसु लेत आवे तेहें मोकल्यू. 3पोन तियां तिया पावरोहो तोइत कोइत बोहाट्यू आन ठाल्ले आथेज मोकली देदू. 4फाशुउ तिये एका पावरोहो तियांआं जागे मोकल्यू; पोन तियां तियाआ बी मुन्को फोड़ीत टाक्यो आन तियाआ अपमान कोअयू. 5मालख्ये फाशुउ एका पावरोहो मोकल्यू; पोन तियां तियाहा माईंत टाकी देदू. ताहां तिये फाशाआ जाअखा जोअहों मोकल्या; तियांमेर्याअ तियां थोड़ाक जोअहों बोहाट्या, आन थोड़ाक जोअहों माईंत टाक्या. 6ओमे एकुज जोओं उगर्युतो, जो तियाआ मेरालू पोर्यू ओतू; आखरी पोअ तिये तियाहा बी तियांआं जागे ओं समजीत कोइत मोकल्यू के ते माआं पोर्याआ मानपान मिके. 7पोन ते जागल्या तियां तियांआंज गोठी कोअयी, ओते वारीस होय; साला, आपू याहा माईंत टाकी देहूं, ताहां जागू आपाअ ओत जाय. 8आन तियां तियाहा तोइत कोइत माईंत टाक्यु, आन तिया तोड़ोहो दाराक्शाआ मोलाआ बारथे उडाड़ी देदो.
9“तियाहा काजे दाराक्शाआ मोलाआ मालिख कि कोए? तो आवित कोइत तियां जागल्याहा माइत टाके, आन दाराक्शाआ मोलु बिहीराहा आपी देय. 10केहें तुमू वसनोमेहें ओं नाहां वाशो के?
“‘जिया डोणोहों राजमिस्त्र्यां बिगर कामोअ ठरव्युतो,
तोज कोपराआ खास कामोअ डोण बोण्यु.
11ओं प्रभुउ तरफ से ओवो,
आन आमाआं नजरेम जुदो बाहरी होये!’”#भजन 118:23
12ताहराअ यहुदी पुढार्यों तियाहा तोइलाअ कोअयू; काहाके तियांहां मुंदू पोड़ीत गोयू के ए काईं तिये तियांआं विरुद्धामेहें कोयीही. पोन ते माअहुंहूं बित गोया आन जाता रोया.
फालू आपीइलोअ बाप्तिम प्रश्न
(मत्तय 22:15-22; लुक 20:20-26)
13ताहराअ ते ईसुहू गोठी मेहें फोसाड़ीइलोअ काजे थोड़ाक कायदाअ मास्तरहों जे फरिसी आन हेरोदोअ पार्ठीइ माट्योहों तियाआ जागे मोकल्या. 14ते तियाआ जागे आवया आन कोयो, “गुरु, आमुहूं मुंदू होय के तू खोरो कोत देखाड़ेहे; आन कोडाअ भेदभाव नाहां कोअतू, काहाके तू माअहोंअ सोब पालीत गोठी नाहां कोअतू पोन देवोअ वाट माअहोंहों बोराबर कोत आपेहे. ताहां आमुहूं को, केहें कैसरोहो फालू आपीइलो कायदाअ पुरमाणे बोराबर के सुकीइ? आमू तो आपीइलो के ने?”
15पोन ईसु तियांआं ढोंगड़ा ओलखीत कोइत तियांहां कोयो, “माहूं काहा फारकिइताहा? एक सांदीइ आनो माआं जागे लेत आवा, के आंय तियाहा पालो.”
16ते लेत आवया, आन तिये तियांहां कोयो, “ओ सापू आन नांव कोडाआ होय?”
तियां कोयो, “कैसरोअ.”
17ईसु तियांहां कोयो, “जो कैसरोअ होय तो कैसरोहो आपा, आन जो देवोअ होय तो देवोहो आपा.”
ताहां ते बोगलाइत गोया.
मोतोमेहें रोत जिवित उठिइलाअ बाप्ति मेहें प्रश्न
(मत्तय 22:23-33; लुक 20:27-40)
18फाश्याआ थोड़ाक सादूकी, जे कोताहा के “मोतोम रोत जिवित उठिइलोअ होयज नाहां,” ईसुउ जागे आवित कोइत तियाहा फुशो, 19“गुरु, मोशे आमांआं काजे लेख्योहो के ‘जर कोडाअ बी पाही बिगर पोर्यो ओवयेज मोइत जाय आन तियाआ लाडी जिवती रोय, ताहां मोअनाराआ पाही तियाआ लाडीइ आरी वेहवाल कोइत लेय आन तियाआ पायहोअ काजे पोर्ये उब्जाड़े.’ 20हांत पाही ओता. पेल्लूउ पाही वेहवाल कोइत बिगर पोर्याआ मोइत गोयू. 21ताहां बिहरे पायहे तियी बोंईं आरी वेहवाल कोइत लेदो आन बिगर पोर्याआ मोइत गोयू; आन तेहेंज कोइत तिसरे बी कोअयो. 22आन बिहीरा आखा हांतू जोओंअ बी पोर्ये ने ओवये आन ते मोइत गोया. आखाआ फासाड़ी ते बोईं बी मोइत गोयी.” 23पोन जाहां आखे मोतोम रोत जिवीत उठे, ताहां ते कोडाआ लाडी बोणे? काहाके तियी हांतू जोओंअ आरी वेहवाल कोअयोतो.
24ईसु तियांहां कोयो, “तुमू केताहा सुकीइ होय! काहाके तुमुहूं वसन आन देवोअ सेक्ती नाहां मुंदू. 25काहाके जाहां ते मोतो मेहें रोत जिवित उठे, ताहां तें ने वेहवाल कोअनारे आन ने वेहवाल कोइत आपनारे, पोन होरगामेर्याआ देवदुतोअ होस रोये. 26मोअनाराअ जिवीत उठिइलाअ बाप्तिमेहें केहें तुमू मोशेए पुस्तकोम पेटाअत्ला साटवाआ काईं नाहां वाशी के, देव तियाहा कोयो, ‘आंय अब्राहामोअ देव, आन इसहाकोअ देव, आन याकोबोअ देव होय?’#निर्ग 3:6 27देव मोल्याआ नाहां पोन जिवताआ देव होय; तुमू खुब सुकताहा.”
आखाम रोत वोडु आदेश
(मत्तय 22:34-40; लुक 10:25-28)
28एक कायदाअ मास्तर आवित कोइत तियांहां गोठी कोअत्ला उनाअयू, आन ओं फारकीत कोइत के ईसु तियांहां मोस्तेए उत्तर आप्यो, तियाहा फुशो, “आखाम रोत खास आदेश कोड्लू होय?”
29ईसु तियाहा उत्तर आप्यो, “आखा आदेशोम रोत ओ खास होय: ‘ए इस्राएल उनाआ! प्रभु आपाअ देव एक्कुज प्रभु होय,’ 30आन ‘तू प्रभु ताआ देवोपोअ पुरा मोनो वाअहीं, आन ताआ पुरा जिवो वाअहीं, आन ताआ पुरी बुद्दी वाअहीं, आन ताआ पुरी सेक्ती वाअहीं मेर कोअजी.’#कायदा 6:4,5 31आन बिहीरु आदेश ओ होय के, ‘तू ताआ आहने रोनारा पोअ ताआ हारकीज मेर कोअ.’#लेवी 19:18 यापोअ रोत वोडू बिहीरु कोड्लूज आदेश कायनाहां.”
32कायदाअ मास्तर तियाहा कोयो, गुरु, खुब हाजो! तुमे खोरो कोयो, तो एक्कुज होय, आन तियाहा सोड़ीत कोइत बिहीरु कोड्लूज कायनाहां.#कायदा 4:35
33आन तियापोअ पुरो मोन, पुरी बुद्दी, पुरु जिव आन पुरी ताकते वाअहीं मेर कोअजी; आन आहने रोनाराहा ताआज होस मेर कोअजी, ओं आखी भेटेए, आन गाराहा रोत वादार कामोअ होय.#होशे 6:6
34जाहां ईसु देख्यो के तिये समझदारी वाअहीं उत्तर आप्यो, ताहां तियाहा कोयो, “तू देवोअ राजोअ रोत सेटू कायनाहां.” आन ताअहां रोत कोडाहा फाश्यो तियाहा किज फुसीइलोअ हिम्मत ने ओवी.
मसीहा बाप्तिमेहें प्रश्न
(मत्तय 22:41-46; लुक 20:41-44)
35फाश्यू ईसु मंदिरो मेहें सिकाड़त्लू तेहेलाम ओं कोयो, “कायदाअ मास्तर केहें कोइत कोताहा के ख्रिस्त दाविदोअ पोर्यू होय? 36दाविद तिया तियाआज पवित्र आत्मामेहें ओत कोइत कोयो:
“‘प्रभु माआं प्रभुहू कोयो:
जाअहूं जाआं आंय ताआ दुस्मोनोहों ताआ गुडाआ थुड़ी ने टाकी देंव
ताअहूं जाआं तु माआं हाजाड़ीइ वोग बोहो.’#भजन 110:1
37“दाविद ते सोताहा तियाहा प्रभु कोहे, ताहरुउ तो दाविदोअ पोर्यू कि कोइत बोण्यु?”
कायदाअ मास्तरहों रोत सांबालित रोजा
(मत्तय 23:1-36; लुक 20:45-47)
आन गर्दी मेर्येए माअहें ईसुउ गोठी खुसी वाअहीं उनाअतेते. 38ताहां तिये तियाआ हिके मेहें तियांहां कोयो, “कायदाअ मास्तरहों रोत सांबालित रोजा, जे नांबा नांबा झगा पोवित फिरीइलो आन बाजारो मेहें सलाम, 39आन आराधनालयो मेहें मुख्य मुख्य कुर्सी आन पांगाती मेहें मुख्य मुख्य जागा बी होदताहा. 40ते रोंडाअली बोईंइ फायदू उठाडताहा आन तियींइं कोअ लुटीत लेताहा, आन देखाड़ीइलोअ काजे नांबी प्रार्थना कोअता रोताहा. याहां वादार डोंड मिले.”
रोंडाअली बायीइ दान
(लुक 21:1-4)
41ईसु मंदिरोअ भेटेए पेटीइ सामने बोहीत कोइत पालतूतो के माअहें मंदिरोअ पेटी मेहें कि कोइत पोशा टाकतेहे; आन थोड़ाक कुन्ब्यों बी वारुज पोशा टाक्या. 42तेताजमेहें एक गरीब रोंडोअ बाय आवित कोइत बेन हाने तांबाआ आने #12:42 बेन हाने तांबाआ आने ग्रीक बाशामेहें हाना रुप्याहा “लेप्टोस” आन वोडा रुप्याहा “कोड्रांटेस” कोतेहे.टाक्ये, मोन्ज्ये एका दिहोअ मोजरी रोत बी थोड़ो कोवाय. 43ताहां ईसु तियाआ सेलाहां आहने हादीत कोइत कोयो, “आंय तुमुहूं खोरीज कोहो, के यी रोंडोअ बायी आखाम रोत जाअखी भेट पेटीमेहें टाक्यीही. 44काहाके आखे तियांआं कामायीम रोत टाक्यो, पोन ए गरीब रोंडोअ बाय यीपोअ ओतो तेतो आखो टाकी देदो. जियापोअ यीइ जिवणो सालतोतो तों आखो यी आपी देदो.”
ទើបបានជ្រើសរើសហើយ៖
मार्क 12: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.