मत्तय 13
13
बियारु ओअनाराआ काईं
(मार्क 4:1-9; लुक 8:4-8)
1तेदिहींज ईसु कोअमेहें रोत निहींत दोर्याअ मेरे सिकाड़ीइलोअ काजे जात कोइत बोठू. 2#लुक 5:1-3 आन तियाआ जागे एतीही वोडी गर्दी आवयी के तो नावड़ामेहें सोढ़ीत बोहीत गोयू, आन पुरी गर्दी मेरे उबी रोयी. 3आन तिये तियांहां काईं कोत आपीत जाअखीलिही गोठी कोत आप्यी,
“एक ओअनारु बियारु ओउ निहींयू. 4ओइलोअ वेले थोड़ुक बियारु वाटेए मेरेपोअ पोड़्यु, आन सिड़े आवित खात गोये. 5थोड़ुक बियारु काकराट्यामेहें पोड़्यु, जिहीं तियाहा जाअखु कादुउ ने जोड़्यू आन उपरसोल्यू कादुव जोड़्यू, तिहीं वाअहीं तो वेगुज उगित गोयू. 6पोन दिही उगू तेहेलाम ते हुका मोइत गोया, आन मुले उंडे ने गोये, तिहीं वाअहीं उगात गोया. 7थोड़ुक बियारु काटाआ वोणसाम पोड़्यु, आन वोणसू वादीत गोयू, आन हुका सिवात गोया. 8पोन थोड़ुक बियारु हाजा कादवोमेहें पोड़्यु आन, थोड़क होव पोट, थोड़हो साट पोट, आन थोड़हो तिस पोट ओन पाको.”
9ताहां ईसु कोत नेवराअयू, “जियाहा कान होय तो उनाइत ल्या!”
काईंइं उद्देश
(मार्क 4:10-12; लुक 8:9-10)
10ताहां सेला ईसुउ जागे आवित कोना वोल्या, “तू माअहूंअरी काईं वाअहीं काहा गोठी मेकत्लू?”
11ताहां ईसु तियांहां उत्तर आप्यो, “तुमुहूं होरगाआ राजोअ निकाअली गोठी जाईंत लेअलोअ समज होय, पोन तियांहां कायनाहां. 12#मत्तय 25:29; मार्क 4:25; लुक 8:18; 19:26 काहाके जियापोअ होय, तियाहा फाशोअ बी जोड़े, आन तियापोअ जाअखीलोहो ओत जाय, पोन जियापोअ किज नाहां, तियापोअ जो किबी होय तो बी मागित लेय. 13आंय काईं वाअहीं तियांअरी याआकाजे गोठी मेकोहो, काहाके तें देखतेहे, पोन तियांहां नाहां देखाअतो, आन तें उनाअतेहें, पोन तियांहां नाहां समजाअतो. 14तियांआं बाप्तिमेहें यशयाआ भविश्यवाणी पुरी ओवेहे:
“‘एं माहें कानो वाअहीं ते उनाय, पोन ने समजे,
आन डोआ वाअहीं ते देखे, पोन ने देखाय.#यश 6:10
15काहाके यां माअहुंउं मोने ते वोडे ओत गोयेहे,
आन तियां कान बुजीत लेदाहा,
आन ते तियांआं डोआ मिसीत लेदाहा;
एहेलोह ने ओवुहूं जोवे के ते डोआ वाअहीं देखे,
आन कानो वाअहीं उनाय,
आन मोनो वाअहीं समजे,
आन ते तियांआं मोन माआं वोगेहे वाले,
आन आंय तियांहां हुदारो.’#यश 6:9,10; योहान 12:40; प्रेशित 28:26,27; रोम 11:8
16“पोन केताहा हाजा होय तुमाआं डोआ, जे देखताहा; आन तुमाआं कान जे उनाअताहा.#लुक 10:23-24 17काहाके आंय तुमुहूं खोरीज कोहो, के जे गोठी तुमू देखतेहे ते वारुज भविश्यवक्ता आन धर्मी माअहूं देखीइलोअ इश्शा कोअयी, पोन तें ने देखीत सेके; आन जे गोठी तुमू उनाअतेहे ते तियां उनाइलोअ इश्शा कोअयी, पोन तें ने उनाइत सेके.
बियारु ओअनाराआ काईं ईसु फोड़ कोइत आपत्लू.
(मार्क 4:13-20; लुक 8:11-15)
18“ओमे तुमू बियारु ओअनाराआ काईंइं अर्थ उनाआ आन समजा. 19जो कोडो राज्याआ वसन उनाइत बी नाहां समजीइतो, तियाआ मोनोमेहें जो किबी ओआयोहो, तो एहलोहो होय, जो वाटेए मेरे ओअल्या बियाराअ होस होये. जियाहा तो पुत आवेहे आन बुउसीत लेत जातु रोहे. 20आन जो काकराट्यामेहें पोडल्यू होय, तो एहेलुहू बियारु होय, जो वसन उनाइत ताबुड़ खुसी वाअहीं मानित लेहे. 21पोन तियामेहें मुले कायने तिहीं वाअहीं तों थोड़ाज दिही टिकेहे, आन जाहां वसनोअ वोजेसे दुख नेत तारास ओवेहे, ताहां तों तुरतुज सोड़ी देत जातो रोहे. 22जों वोणसामेहें पोड़्यो, तों एहेला बियाराअ होस होये, जों वसन उनाअहे, पोन यी दुन्याअ सिंता आन धनोअ लालस वसनोहो दाबी देहे, आन तों नाहां फलतो. 23जों हाजा कादवूम पोड़्यो, तों एहेलोहो होय, जो वसनोहो उनाइत समजेहे आन फलवे आपेहे, कोडो होव पोट, कोडो साठ पोट, कोडो तीस पोट.”
रानठ्या बियाराआ काईं
24ईसु तियांहां फाश्यी एक काईं कोयी: “होरगाआ राज#मत्तय 13:31,33,44,45,47; 18:23; 20:1; 22:2; 25:1; मार्क 4:26,30; लुक 13:18,20 तिया माहुंउं होस होय, जिये तियाआ खेतोमेहें हाजू बियारु ओअयू. 25पोन जेहलामेहें माअहें हुवतेते, ताहां तियाआ दुस्मोन आवित गोंवोंमेहें रानठ्यू बियारु पेइ देत जातु रोयू. 26जाहां हुका निहीया आन जाहां निहींवे वोल्ये, ताहां रानठ्या बियाराआ खोड़ बी देखाअये. 27ताहां कोअ धण्योअ पावरों आवित तियाहा कोयो, ‘मालिख, तुमे ताआ खेतोमेहें हाजू बियारु नाहां ओअयू के? ताहां रानठ्या बियाराआ खोड़ तियामेहें का रोत आयो?’ 28तिये तियांहां कोयो, ‘ओं एखा दुस्मोनोअ काम होये.’ पावरों तियाहा कोयो के, ‘ताआ इश्शा होय के आमू जात कोइत तों उफड़ीत टाको?’ 29तिये कोयो, ‘नाहां, एहलोहो ने ओवुहूं जोवे के, रानठ्या बियाराआ खोड़ उफड़ाहा, तेहेलाम तुमू तियांअरी गोंवें बी उफड़ीत लेहा. 30वाडे ताअहूं जाआं बेनुहूं आरीज वोडे ओवुहूं द्या, आन वाडीइलोअ वेले आंय वाडनाराहां कोहीं के पेल रानठ्या बियाराआ खोड़ टोलू वालित पेटाड़ीलोअ काजे तियांआं पुला बांदी द्या, आन गोंवें माआं मोठीमेहें पोआ.’”
रायीइ दाणाअ काईं
(मार्क 4:30-32; लुक 13:18-19)
31ईसु तियांहां फाश्यीइ एक काईं कोयी: “होरगाआ राज रायीइ दाणाआं होस होय, तों एखा माहुंउं होस जों लेत जात कोइत तियाहा खेतोमेहें ओइ देदू. 32तो आखा दाणामेहें रोत हानू होय, पोन जाहां वोडो ओत जाहे, तो बिहीरा आखापोअ रोत वोडो साड़ बोणीत जाहे, ताहां जुगोमेर्येए सिड़े आवित तियाआ डालीपोअ पांजरु बोणावतेहे.”
खमीरोअ काईं
(लुक 13:20-21)
33ईसु तियांहां फाश्यी एक काईं कोयी: “होरगाआ राज खमीरोअ#13:33 खमीर मोन्ज्ये लोटोहो फुगाड़ीलोअ एक सोड़ाआ होसर्युउ वस्तू होस होय, जियाहा एकी बोईं लेत जात कोइत तीन तागारी लोटोमेहें सान्बी देदू, आन रोता रोता तो आखु लोट खमीर वालू ओत गोयू.”
ईसु काईंइं वापर कोअत्लू
(मार्क 4:33-34)
34ए आखी गोठी ईसु काईं वाअहीं माअहुंहूं कोत आप्यी, आन बिगर काईं वाअहीं कीज ने कोतूतो. 35के जो वसन भविश्यवक्ता वाअहीं कोयो, तो पुरो ओवे:
“आंय काईं कोअलोअ काजे माआं सोब उगाड़ीहीं;
आंय तियी गोठीही जे दुन्याआ बोणिइलोअ पेल गुप्त्यी होय, ते देखाड़ीहीं.”
ईसु रानठ्या बियाराआ काईं फोड़ कोइत आपेहे
36ताहां ईसु गर्दीही सोड़ीत कोअमेहें आवयू, आन तियाआ सेला तियाआ जागे आवित कोयो, “खेतोमेर्याआ रानठ्या बियाराआ काईं समजाड़ी दे.”
37ईसु तियांहां उत्तर आप्यो, “हाजा बियाराआ ओअनारु माहुंउं बेटुह्हू होय. 38खेत कांय ए दुन्या होय, हाजू बियारु कांय देवोअ राज्याआ माअहें होय, आन रानठ्यू बियारु कांय पुतोअ माअहें होय. 39जिये दुस्मोने तो बियारु ओअयू, तो कांय सैतान होय; वाडीइलोअ वेल का दुन्याआं आखरी होय, आन वाडनारा कांय देवदुत होय. 40ताहां जेहें कोइत रानठ्या खोड़ोअ बियारु टोलू वालित पेटाड़तेहे तेहेंज कोइत दुन्याआ सेवट ओवे. 41माहुंउं बेटुह्हू तियाआ देवदुतोंहों मोकले, आन ते तियाआ राजोमेहें जे पाप कोआड़तेहे आन खाराब कामें कोअनाराहां एकठे कोए. 42आन तियांहां आगीइ दोर्यामेहें टाके, जिहीं रोड़ीइलोअ आन दात कोकराविलोअ रोय. 43तिये वेले देवोअ माअहें तियांआं आब्हाआ राजोमेहें दिहोअ होस सोमके. जियाअ कान होय तो उनाइत लेय.
रेटल्या खोजानाआ काईं
44“होरगाआ राज एखा खेतोमेहें रेटल्या खोजानाआ होस होय. जो एखा माहुंहूं जोड़्यो आन तिये तो रेटी देदो, आन खुसीमेहें जात कोइत तियापोअ ओतो-नोतो तो आखो वेसी देदो आन तिया खेतोहो वेसातो लेत लेदो.”
मोगला मोतीइ काईं
45“फाशोअ, होरगाआ राज एका वेपारीइ माहुंउं होस होये, जो हाजा मोतीही होदतुतो. 46जाहां तियाहा खुब किमती मोती जोड़्यू, ताहां तिये जात कोइत तिया पोअ ओतो तेतो आखो वेसी देदो आन तिया मोतीही वेसातु लेत लेदू.”
जालेए काईं
47“फाश्योअ, होरगाआ राज तियी वोडी जालेए होस होये, जे दोर्यामेहें टाक्यी, आन आखी जातीइ मासे हारकीत लेतायी. 48आन जाहां जाल पोआत गोयी, ताहां मासारा ते जाल मेरे काड्यी, आन बोहीत हाजे-हाजे मासे बोअनामेहें एकठे कोअये, आन बिगर कामोअ ते टाकी देदे. 49दुन्याआं आखरीमेहें एहेंज कोइत ओवे. होरगाआ दुत आवित पाप्योहों धर्मी रोत अलग कोए. 50आन तियांहां आगीइ दोर्यामेहें टाके जिहीं रोड़ीइलो आन दात कोकराविलोअ रोय.”
जुनी आन नवी शिक्शणोअ महत्व
51ईसुहू तियां फुशो, “केहें तुमुहूं ए आखी गोठी समजाअयी के?”
तियां कोयो, “होव प्रभु.”
52तिये तियांहां कोयो, “तियाहा काजे हारेक कायदाआ मास्तर जो होरगाआ राजोअ सेलू बोण्युहूं, तो तियाआ कोठीमेहें रोत जुनी-नवी गोठी काडनारा एखा कोअ धण्योअ होस होय.”
नासरेथ गांवोंमेहें ईसुउ नाकार
(मार्क 6:1-6; लुक 4:16-30)
53ताहां ए काईं कोत नेवराअयू तेहेलाम ईसु तिहीं रोत निहींयू. 54आन तियाआ गांवोंमेहें आवित तियांआं आराधनालयोमेहें तो तियांहां एहलोहो सिकाड़ु वोल्यू के, ते बोगलात कोना वोल्या के, “एती ओकल आन एं वोडे कामे कोइलाआ ताकत याहा का रोत जोड़्यी? 55ओ ते हूतारोअ पोर्यू ना? याआ आयहीही मरिया कोतेहे ना? याकोब, योसेफ, शिमोन, आन यहुदा ए याआ पाही होय ना? 56केहें याआ आखी बोअह्हीं आपाआ विसमेहें नाहां रोती के? ताहरीइ ए आखी गोठी याहा का रोत जोड़्यी?” 57एहें कोइत तियां तियाआ नाकार कोअयू.
ईसु तियांहां कोयो, “भविश्यवक्ताहा तियाआ गांवोंमेहें आन कोअमेहें सोड़ीत आखी जागे मानपान जोड़ेहे.” 58काहाके तियांआं कमी विश्वासोअ वोजेसे तिहीं तिये वोडे कामें ने कोअये.
ទើបបានជ្រើសរើសហើយ៖
मत्तय 13: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
