योहान 21
21
ईसुउ हांत सेलाहा दर्शन
1यीं गोठीइ फासाड़ी ईसु सोताहा तिबिरियास दोर्याअ मेरे सेलाहां दर्शन आप्यो, आन तो एहें कोइत आप्यो: 2शिमोन पेत्र, आन थोमू जो जेड़ख्यू कोवाअहे, आन गालीलोअ कानावालू नथनेल, आन जब्दीइ पोऱ्या, आन ईसुउ सेलामेर्याआ बेन जोओं मिलीत आखा टोलू वोलीत रोयाते. 3शिमोन पेत्रे तियांहां कोयो, “आंय मासे तोऊ जाहो.”
तियां तियाहा कोयो, “आमू बी ताअरी आवताहा.” ताहराअ ते निहीत कोइत नावड़ाम बोठा, पोन तियी राती किज ने तोअयो. 4हुजता हुजता ईसु पाअयोंअ मेरे आवित उबू रोयू; तेबी सेलहां ने ओलख्यु के ओ ईसु होय. 5ताहां ईसु तियांहां कोयो, “पोर्यां, केहें तुमापोअ वाजीहीं मासे होय के?”
तियां उत्तर आप्यो, “कायने.”
6तिये तियांहां कोयो, “नावड़ाअ हाजाड़्यीइ वोल जाल टाकहा ताहां तुमुहूं कि तेबी मिले.” ताहराअ तियां जाल टाक्यी, आन ओमे मासे जाअखीलेहे तिहीं वाअहीं जालेहे खेसीत ने सेका.
7ताहां तिये सेले जियापोअ ईसु मेर कोअतुतो, पेत्राहा कोयो, “ओ ते प्रभु होय!” शिमोन पेत्रे ओं उनाइत कोइत के तो प्रभु होय, कंबरेएरी साअको बांदीत लेदो, काहाके तो उगड़ाअलुज ओतू, तालावोमेहें उडीत पोड़्यु. 8पोन बिहीरा सेला नावड़ापोअ मासावाअहीं पोआली जाल खेसता खेसता आया, काहाके ते मेरेपोअ रोत वादार सेटे ने ओता, पोन एहेलाहा एक होव मिटर सेटे ओय. 9जेहेलाम ते मेरेपोअ उतर्या, ताहां तियां आराआ आग आन तियीपोअ मासे मिकल्ये, आन रोटू देख्यू. 10ईसु तियांहां कोयो, “जे मासे तुमू ओमे तोअयेहे, तियांमेर्येए थोड़ेक लेतावा.”
11ताहां शिमोन पेत्र नावड़ापोअ सोढ़ीत कोइत 153 वोडे मासावाअहीं पोआली जाल मेरेपोअ आपक्यी, आन एवडे मासे ओते तेबी जाल नाहां फाट्यी. 12ईसु तियांहां कोयो, “आवा, रोटू खावा.” सेलामेर्याअ कोडाहा हिम्मत ने ओवयी के तियाहा फुसो, “तू कोडो होय?” काहाके ते जांअताते के ओ प्रभुज होय. 13ईसु आयु आन रोटू विसीत कोइत तियांहां आप्यू, आन तेहेंज कोइत मासे बी.
14ओं तिसरीवारी होय के ईसु मोल्याम रोत जिवीत उठीइलाअ फाटी सेलाहां देखाअयू.
ईसु आन पेत्र
15रोटू खाअलाअ फासाड़ी ईसु शिमोन पेत्राहा कोयो, “शिमोन, योहानोअ पोर्या, केहें तू यांरोत वादार मापोअ मेर कोअहे?” तिये तियाहा कोयो, “होव, प्रभु; ताहूं ते मुंदू होय के आंय तापोअ मेर कोअहो.” ईसु तियाहा कोयो, “माआं गिद्लाहां सार.”
16तिये फाशोअ बिहरीवारी तियाहा कोयो, “शिमोन, योहानोअ पोर्या, केहें तू मापोअ मेर कोअहे?” तिये तियाहा कोयो, “होव, प्रभु; ताहूं मुंदू होय के आंय तापोअ मेर कोअहो.” तिये तियाहा कोयो, “माआं मेडाअ राखवाली कोओ.”
17आन ईसु तिसरी वारी तियाहा कोयो, “शिमोन, योहानोअ पोर्या, केहें तू मापोअ मेर कोअहे?” पेत्र नाराज ओवयू के तिये तियाहा तिसरीवारी जाआं एहेंज कोइत कोयो, “केहें तू मापोअ मेर कोअहे?” आन तियाहा कोयो, “प्रभु, ताहूं ते आखो मुंदू होय; तू ओं जाअहें के आंय तापोअ मेर कोअहो.”
ईसु तियाहा कोयो, “माआं मेडाहां सार. 18आंय ताहूं खोरीज कोहो, जेहेलाम तू जुवान ओतू ताहां सोताआ कंबर बांदीत कोइत जिहीं इत्वीइतुतो तिहीं फिरतुतो; पोन जाहां तू डायु ओवीही ताहां ताआ आथ पसरावही, आन बिहीरो ताआ कंबर बांदीत कोइत जिहीं तू ने जाअहूं होदही तिहीं ताहूं लेत जाय.”
19ईसु यीं गोठीवाअहीं ईसारु आप्यु के पेत्र केहेलाहा मोतो वाअहीं देवोअ महिमा कोए. आन ताहां ईसु तियाहा कोयो, “माआं फासाड़ी आव.”
ईसुउ मेरालु सेलू
20पेत्र वोलीत कोइत तिया सेलाहा फासाड़ी आवत्लू देख्यू, जियापोअ ईसु मेर कोअतुतो, आन जिये रोटू खाअलाअ वेले तियाआ सातीइहें ओंणाइत कोइत फुशोतो, “प्रभु, ताहूं धोकू देत तोआड़नारु कोडु होय?” 21तियाहा देखीत कोइत पेत्रे ईसुहू कोयो, “प्रभु, याअ बाप्तिम की?”
22ईसु तियाहा कोयो, “जर माआं इश्शा ओय के तो आंय दुसरीवारी आविहीं ताअहूं जाआं रोय, ताहां ताहूं याअरी कि? तू माआं फासाड़ी आव.”
23तियाहा काजे पायहोंमेहें ए गोठ पसरीत गोयी के तो सेलू ने मोअनारु; तेबी ईसु तियाहा ओं नाहां कोयो के तो ने मोए, पोन ओं कोल्यो के, “जर माआं इश्शा ओय के तो माआं आविइलाअ वेले जाआं रुकाइत रोय, ताहां ताहूं याअरी कि?”
समाप्ती
24आन ओ तोज सेलू होय जो यीं गोठीइ साक्शी आपेहे आन जिये यीं गोठीही लेख्यीही, आन आमुहूं मुंदू होय के तियाआ साक्शी खोरी होय.
25फाशे बी जाअखीलेहे कामे होय, जे ईसु कोअये; जर ते एक एक कोइत लेखाअते, ताहां माहूं एहेलोह लागेहे के पुस्तके जे लेखाअते ते दुन्यामेहें बी ने होमाअते.
ទើបបានជ្រើសរើសហើយ៖
योहान 21: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
योहान 21
21
ईसुउ हांत सेलाहा दर्शन
1यीं गोठीइ फासाड़ी ईसु सोताहा तिबिरियास दोर्याअ मेरे सेलाहां दर्शन आप्यो, आन तो एहें कोइत आप्यो: 2शिमोन पेत्र, आन थोमू जो जेड़ख्यू कोवाअहे, आन गालीलोअ कानावालू नथनेल, आन जब्दीइ पोऱ्या, आन ईसुउ सेलामेर्याआ बेन जोओं मिलीत आखा टोलू वोलीत रोयाते. 3शिमोन पेत्रे तियांहां कोयो, “आंय मासे तोऊ जाहो.”
तियां तियाहा कोयो, “आमू बी ताअरी आवताहा.” ताहराअ ते निहीत कोइत नावड़ाम बोठा, पोन तियी राती किज ने तोअयो. 4हुजता हुजता ईसु पाअयोंअ मेरे आवित उबू रोयू; तेबी सेलहां ने ओलख्यु के ओ ईसु होय. 5ताहां ईसु तियांहां कोयो, “पोर्यां, केहें तुमापोअ वाजीहीं मासे होय के?”
तियां उत्तर आप्यो, “कायने.”
6तिये तियांहां कोयो, “नावड़ाअ हाजाड़्यीइ वोल जाल टाकहा ताहां तुमुहूं कि तेबी मिले.” ताहराअ तियां जाल टाक्यी, आन ओमे मासे जाअखीलेहे तिहीं वाअहीं जालेहे खेसीत ने सेका.
7ताहां तिये सेले जियापोअ ईसु मेर कोअतुतो, पेत्राहा कोयो, “ओ ते प्रभु होय!” शिमोन पेत्रे ओं उनाइत कोइत के तो प्रभु होय, कंबरेएरी साअको बांदीत लेदो, काहाके तो उगड़ाअलुज ओतू, तालावोमेहें उडीत पोड़्यु. 8पोन बिहीरा सेला नावड़ापोअ मासावाअहीं पोआली जाल खेसता खेसता आया, काहाके ते मेरेपोअ रोत वादार सेटे ने ओता, पोन एहेलाहा एक होव मिटर सेटे ओय. 9जेहेलाम ते मेरेपोअ उतर्या, ताहां तियां आराआ आग आन तियीपोअ मासे मिकल्ये, आन रोटू देख्यू. 10ईसु तियांहां कोयो, “जे मासे तुमू ओमे तोअयेहे, तियांमेर्येए थोड़ेक लेतावा.”
11ताहां शिमोन पेत्र नावड़ापोअ सोढ़ीत कोइत 153 वोडे मासावाअहीं पोआली जाल मेरेपोअ आपक्यी, आन एवडे मासे ओते तेबी जाल नाहां फाट्यी. 12ईसु तियांहां कोयो, “आवा, रोटू खावा.” सेलामेर्याअ कोडाहा हिम्मत ने ओवयी के तियाहा फुसो, “तू कोडो होय?” काहाके ते जांअताते के ओ प्रभुज होय. 13ईसु आयु आन रोटू विसीत कोइत तियांहां आप्यू, आन तेहेंज कोइत मासे बी.
14ओं तिसरीवारी होय के ईसु मोल्याम रोत जिवीत उठीइलाअ फाटी सेलाहां देखाअयू.
ईसु आन पेत्र
15रोटू खाअलाअ फासाड़ी ईसु शिमोन पेत्राहा कोयो, “शिमोन, योहानोअ पोर्या, केहें तू यांरोत वादार मापोअ मेर कोअहे?” तिये तियाहा कोयो, “होव, प्रभु; ताहूं ते मुंदू होय के आंय तापोअ मेर कोअहो.” ईसु तियाहा कोयो, “माआं गिद्लाहां सार.”
16तिये फाशोअ बिहरीवारी तियाहा कोयो, “शिमोन, योहानोअ पोर्या, केहें तू मापोअ मेर कोअहे?” तिये तियाहा कोयो, “होव, प्रभु; ताहूं मुंदू होय के आंय तापोअ मेर कोअहो.” तिये तियाहा कोयो, “माआं मेडाअ राखवाली कोओ.”
17आन ईसु तिसरी वारी तियाहा कोयो, “शिमोन, योहानोअ पोर्या, केहें तू मापोअ मेर कोअहे?” पेत्र नाराज ओवयू के तिये तियाहा तिसरीवारी जाआं एहेंज कोइत कोयो, “केहें तू मापोअ मेर कोअहे?” आन तियाहा कोयो, “प्रभु, ताहूं ते आखो मुंदू होय; तू ओं जाअहें के आंय तापोअ मेर कोअहो.”
ईसु तियाहा कोयो, “माआं मेडाहां सार. 18आंय ताहूं खोरीज कोहो, जेहेलाम तू जुवान ओतू ताहां सोताआ कंबर बांदीत कोइत जिहीं इत्वीइतुतो तिहीं फिरतुतो; पोन जाहां तू डायु ओवीही ताहां ताआ आथ पसरावही, आन बिहीरो ताआ कंबर बांदीत कोइत जिहीं तू ने जाअहूं होदही तिहीं ताहूं लेत जाय.”
19ईसु यीं गोठीवाअहीं ईसारु आप्यु के पेत्र केहेलाहा मोतो वाअहीं देवोअ महिमा कोए. आन ताहां ईसु तियाहा कोयो, “माआं फासाड़ी आव.”
ईसुउ मेरालु सेलू
20पेत्र वोलीत कोइत तिया सेलाहा फासाड़ी आवत्लू देख्यू, जियापोअ ईसु मेर कोअतुतो, आन जिये रोटू खाअलाअ वेले तियाआ सातीइहें ओंणाइत कोइत फुशोतो, “प्रभु, ताहूं धोकू देत तोआड़नारु कोडु होय?” 21तियाहा देखीत कोइत पेत्रे ईसुहू कोयो, “प्रभु, याअ बाप्तिम की?”
22ईसु तियाहा कोयो, “जर माआं इश्शा ओय के तो आंय दुसरीवारी आविहीं ताअहूं जाआं रोय, ताहां ताहूं याअरी कि? तू माआं फासाड़ी आव.”
23तियाहा काजे पायहोंमेहें ए गोठ पसरीत गोयी के तो सेलू ने मोअनारु; तेबी ईसु तियाहा ओं नाहां कोयो के तो ने मोए, पोन ओं कोल्यो के, “जर माआं इश्शा ओय के तो माआं आविइलाअ वेले जाआं रुकाइत रोय, ताहां ताहूं याअरी कि?”
समाप्ती
24आन ओ तोज सेलू होय जो यीं गोठीइ साक्शी आपेहे आन जिये यीं गोठीही लेख्यीही, आन आमुहूं मुंदू होय के तियाआ साक्शी खोरी होय.
25फाशे बी जाअखीलेहे कामे होय, जे ईसु कोअये; जर ते एक एक कोइत लेखाअते, ताहां माहूं एहेलोह लागेहे के पुस्तके जे लेखाअते ते दुन्यामेहें बी ने होमाअते.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.