योहान 14
14
ईसु देव आब्हाअ जागे जाअलोअ वाट
1“तुमाआं मोन दुखी ने ओवुहूं जोवे; देवोपोअ विश्वास मिका आन मापोअ बी विश्वास मिका. 2माआं आब्हाअ कोअमेहें जाअखीलुहू रोअलाआ जागू होये, जर ने रोतू ताहां आंय तुमुहूं कोत देतु; काहाके आंय तुमाआं काजे जागू तियार कोउ जाहो. 3आन जर आंय जात कोइत जागू तियार कोअहीं, ताहां फाशुउ आवित कोइत तुमुहूं माआं जागे लेत जाहीं के जिहीं आंय रोहीं तिहीं तुमू बी रोहा. 4आन जिहीं आंय जाहो तिहींइं वाट तुमुहूं मुंदू होये.”
5थोमे तियाहा कोयो, “प्रभु, आमुहूं ने मुंदू के तू का जाहे; ताहां तिहींइं वाट कि कोइत जाईंत सेकताहा?”
6ईसु तियाहा कोयो, “वाट, सत्य आन जिवन आंयुंज होय; माआं जागे आया सिवाय कोडोज आब्हाआ जागे नाहां पोतीत सेकतो. 7जर तुमू माहूं ओलखीइता, ताहां माआं आब्हाहा बी ओलखीइता; आन ओमे तुमू तियाहा ओलखीइताहा, आन तियाहा देखीत बी लेदूहू.”
8फिलीप्पे तियाहा कोयो, “प्रभु, आब्हाहा आमुहूं देखाड़ी दे, ओंज आमाआं काजे खुब होये.”
9ईसु तियाहा कोयो, “फिलीप, आंय एता दिही ओत गोया तुमाअरीज होये, केहें तू माहूं ओमे जाआं नाहां ओलखीइतू? जिये माहूं देख्युहू तिये आब्हाहा देख्युहू. ताहां तू काहा कोहे के ‘आमुहूं आब्हू देखाड़?’ 10केहें तू विश्वास नाहां कोअतू के आंय आब्हामेहें होय आन आब्हू मामेहें होय? ए गोठी जे आंय तुमुहूं कोहो, ते माआं तरफ रोत नाहां कोतू, पोन आब्हू मामेहें रोत कोइत तियाआ काम कोअहे. 11माआं विश्वास कोआ के आंय आब्हामेहें होय आन आब्हू मामेहें होय; नेताहां कामोंहों पालित तेबी माआं विश्वास कोआ. 12आंय तुमुहूं खोरीज कोहो के जो मापोअ विश्वास कोअहे, एं कामे जे आंय कोअहो, तें तोबी कोए, पोन यांरोत बी वोडे कामे कोए, काहाके आंय आब्हाअ जागे जाहो. 13जों किबी तुमू माआं नावसे मागहा, तों आंय कोअहीं के बेटाह्हा वाअहीं आब्हाअ महिमा ओवुहूं जोवे. 14जर तुमू मापोअ माआं नावसे काविंहीं मागहा, ताहां आंय तियाहा कोअहीं.
पवित्र आत्माआं बाप्तिम वायदो
15“जर तुमू मापोअ मेर कोअतेय, ताहां माआं आदेशोंहों मानहा. 16आंय आब्हाहा रावणी कोअहीं, आन तो तुमुहूं फाशुउ एक हाती आपे के जो सादा तुमाअरी रोये. 17तो ओ आत्मा होय, जो देवोअ बाप्तिम सत्य देखाड़ेहे. दुन्या तियाआ स्विकार नाहां कोइत सेकती, काहाके ते तियाहा देखीत नाहां सेकती आन नाहां तियाहा ओलखीइती; पोन तुमू तियाहा ओलखीइताहा, काहाके तो तुमाअरी रोहे, आन तो तुमामेहें होये.
18“जेहेलाम आंय जाहीं, ताहां तुमुहूं एखला ने सोडो; आंय तुमाआं जागे वापिस आविहीं. 19आन थोड़ीज वाआ बाकी रोत गोयीही के फाशीइ दुन्या माहूं ने देखे, पोन तुमू, माहूं देखहा; याअकाजे के आंय जिवतु होय, तुमू बी जिवते रोहा. 20तेदिहीं तुमू जाअहां के आंय माआं आब्हामेहें होय, आन तुमू मामेहें, आन आंय तुमामेहें.
21“जों माआं आदेशोअ स्विकार कोअहे, आन तियांआं पालन कोअहे, तोंज मापोअ मेर कोअहे; आन जों मापोअ मेर कोअहे, तियापोअ माआं आब्हू मेर कोए, आन आंय बी तियापोअ मेर कोअहीं आन सोताहा तियापोअ प्रगट ओविहीं.”
22तिये यहुदा जो इस्कार्योत ने ओतू, तियाहा कोयो, “प्रभु, की ओयो के तू आमापोअ सोताहा प्रगट कोइलाआ कोअहे आन दुन्यापोअ नाहां?”
23ईसु तियाहा उत्तर आप्यो, “जों कोडो मापोअ मेर कोए, ताहां तों माआं शिक्शण माने, आन माआं आब्हू तियां पोअ मेर कोए, आन आमू तियाआ जागे आवहूं आन तियाअरी रोहूं. 24जो मापोअ मेर नाहां कोअतो, तो माआं शिक्शण नाहां मानतो; आन जो शिक्शण तुमू उनाअताहा तों माआं नाहां पोन आब्हाअ होये, जिये माहूं मोकल्यू.
25“ए गोठी आंय तुमुहूं तेहेलाम कोयी जेहेलाम आंय तुमाअरी ओतू. 26पोन हाती मोन्ज्ये पवित्र आत्मा जियाहा आब्हू माआं नावसे मोकले, तो तुमुहूं आखी गोठी सिकाड़े आन जो किबी आंय तुमुहूं कोयोहो, तो आखो तुमुहूं ओर कोइत आपे.
27“आंय तुमुहूं शांती आपीत जाहो, माआं शांती तुमुहूं आपोहो, जेहलीही दुन्या आपेहे, तेहेलीही आंय तुमुहूं नाहां आपतू; तुमाआं मोन दुखी ने ओवुहूं जोवे आन ने बिअहूं जोवे. 28तुमू उनाअये के आंय तुमुहूं कोयो, ‘आंय जाहो, आन तुमाआं जागे फाशुउ आविहीं.’ जर तुमू मापोअ मेर कोअता, ताहां यी गोठी वाअहीं खुस ओवता के आंय आब्हाअ जागे जाहो, काहाके आब्हू माआं रोत वोडू होये. 29आन आंय ओमे ए घटना ओवीइलाआ पेलुज तुमुहूं कोत देहो, जेहेलाम ते ओत जाय, ताहां तुमू विश्वास कोआ. 30आंय ओमे तुमाअरी फाशीइ वादार गोठी नाहां कोइत सेकतु, काहाके यी दुन्याअ राज कोअनारु आवेहे. मा पोअ तियाआ किज आधिकार कायनाहां; 31पोन ओं दुन्या जाईंत लेअहूं जोवे के आंय आब्हापोअ मेर कोअहो, आन जेहें कोइत आब्हे माहूं आदेश आप्युहू, तेहेंज कोइत आंय कोअहो.”
“उठा, इंहीं रोत साला.”
ទើបបានជ្រើសរើសហើយ៖
योहान 14: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
