प्रेशित 5
5
हनन्या आन सफीरा
1हनन्या नावोअ एक माटी जो तियाआ लाडी सफीराअरी तियांआं थोड़ुक जागू वेशु. 2आन तियी किंमतेमेहें रोत तिये थोड़ाक पोशा मिकीत लेदा, आन ए गोठ तियाआ लाडीही बी मुंदू ओतू, आन तियाआ एक भाग लेतावीत कोइते सेलाअ गुडाअहीं मिकी देदू. 3पेत्रे कोयो, “ए हनन्या! सैताने ताआ मोनोमेहें ए गोठ काहा टाक्यी के तू पवित्र आत्माहां ठोगे, आन जागाअ किंमतेमेहें रोत थोड़ाक पोशा मिकीत लेय? 4जाअहूं जाआं जागू तापोअ ओतू, ताअहूं जाआं तो ताआ ने ओतो के? आन जेहेलाम जागू वेसाअयू, तेहेलाम पोशा ताआ ताबाम ने ओता के? ताहां तुमे एहेलोह काम कोइलाअ ताआ मोनोम विसार काहा कोअयू? तू माअहुंहूं नाहां, पोन देवोअ आगाड़ी खोटो गोग्युहू.” 5ए गोठ उनाअताज वाआ हनन्या उठ्लीत पोड़्यू आन जिव सोड़ी देदू, आन आखा उनाअनाराम बिक फोहीत गोयी. 6ताहराअ जुवान उठीत कोइत तियाआ सिड़ी बोणावीत बारथे लेत जात कोइत ओजी देदो.
7एहेलाहा तिनेक तासोअ फासाड़ी तियाआ लाडी मायते आयी, पोन जे गोठ ओवी ते तियीही ने मुंदू ओतू.
8ताहरोअ पेत्रे तियीही कोयो, “माहूं को, केहें तुमू तो जागू तेताआज वेसल्यू के?” तियी कोयो, “होव, तेताआजे.”
9पेत्रे तियीही कोयो के, “ओं केहें ओवो, के तुमू बेनू जोएं प्रभुउ आत्माआं परिक्शाआ काजे एक मोन कोइत लेदो? पाल, ताआ माट्योहो ओजनारा बाअणापोअ उबलाज होये, आन ताहूं बी बारथे लेत जायमे.” 10ताहरीइ ते ताब्बुड़ तियाआ गुडाअ जागे उठ्लीत पोड़्यी, आन जिव सोड़ी देदू; आन जुवान्या मायते आवित कोइते तियीही मोल्यीज देख्यी, आन बारथे लेत जात कोइत तियीइ माट्योअ जागे लेत जात ओजी देदी. 11पुरी मंडड़ीइ माअहें आन यी गोठीइ उनाअनारे आखे माअहें जाअखीलेहे बित गोये.
समत्कार आन वोडे वोडे कामे
12प्रेशितोंअ आथोवाअहीं जाअखीलाहा समत्कार आन वोडे वोडे कामे माअहुंउं विसमेहें ओवतेते, आन तें आखे विश्वासी एक मोन ओत कोइत शलमोनोअ ओटापोअ टोलू वोलीत ओते. 13पोन बिहीरा कोडाअ ए हिम्मत ने ओवतीते के तियांअरी जुड़ात सेके; तेबी माअहें तियांआं वोडाय कोअतेते. 14पोन विश्वास कोअनारे जाअखीलेहे बोईंन माटी प्रभुउ मंडड़ीम आवित जुड़ाअतेते. 15एतेहे जाआं के माअहें मांदवाड़्याहां सडके पोअ लेतावी लेतावीइ खाट्ला आन सटायी पोअ लोटाड़ी देतेते, के जेहेलाम पेत्र आवे ताहां तियाआ सावलू तेबी तियां एखा पोअ पोड़े. 16येरुसालेमोअ आहने-पाहने सेहरोम रोत खुब माअहें मांदवाड़्ये आन पुते दोमल्ये एहेलाहा लेतावी लेतावीइ टोलू कोअतेते, आन बादे हुदरीत जातेते.
प्रेशितोंहों सताव
17ताहां डायु पुंजारु आन तियाआ आखा हाती जे सादूकी जातीइ ओता, प्रेशितों पोअ आद्राय कोआ वोल्या. 18आन तियां सेलाहां तोइत कोइत जेलेमेहें केंडी देदा. 19पोन राती प्रभुउ एके देवदुते जेलेए बाअणो उगाड़ीत कोइते तियांहां बारथे लेतावीत कोइत कोयो, 20“जावा, मंदिरोम उबा रोत कोइत या जिवनोअ आखी गोठी माअहुंहूं कोतापा.”
21ते ओं उनाइत कोइत हुसता हुसता मंदिरोम जात कोइत हिकवोण आपा वोल्या. ताहराअ डाया पुंजारा आन तियाआ हाती आवित कोइत महासभाहा आन इस्राएल वाला बादा डायहांहां टोलू कोअया, आन तियांहां लेतावे तेहें जेलेमेहें कोत मोकल्यो. 22पोन आधिकारी तिहीं आया, तेहेलाम तियांहां ते जेलेमेहें ने सापड़्या, आन वोलीत आवित खबर आप्यी, 23“आमू जेलेहे वारुहूं सांबालित बोंद कोअल्यी आन जागल्याहां बारथे बाओ पोअ उबा रोल्या देख्या; पोन जेहेलाम बाआ उगाड्यो, तेहेलाम मांयते कोडोज ने सापड्यो.” 24जेहेलाम डाया पुंजारा आन मंदिरोअ मुख्य आधिकार्यों ए गोठ उनाअया, ताहां तियांआं बाप्तिमेहें जुदा बोगलाअया के प्रेशितोंअ की ओवो! 25तेताजमेहें एके जोएं आवित कोइते तियांहां कोयो, “जियांहां तुमू जेलेमेहें केंड्याते, ते माटी मंदिरोम उबा रोत कोइत माअहुंहूं सिकाड़ताहा.” 26ताहरुउ सिपायडाअ आधिकारी तियाआ माट्योहों लेत जात कोइते प्रेशितोहों लेतायू, पोन तियांपोअ जबरजस्ती ने कोअयी, काहाके तियांहां माअहें डोणो वाअहीं ने देअहूं जोवे कोत ते माअहुंहूं बिताते.
27सिपायडां प्रेशितोहों लेतावीत कोइत वोडा पोन्साअ हुंबर उबा कोइ देदा; ताहरोअ मुख्य पुंजारां तियांहां कोयो. 28“आमू तुमुहूं कड़क आदेश आप्युतो के तुमू या नावोवाअहीं मा सिकाड़हा, पोन पाला, तुमू ते फाशाअ बी आखा येरुसालेम होयरोहो तुमाआं हिकवोणो वाअहीं पोई देदोहो! आन तिया माहुंउं खुनोअ आरोप आमाआं बोसी आलवुहूं होदताहा.”
29ताहराअ पेत्र आन आरीइ प्रेशितों उत्तर आप्यो, “आपू माअहोंअ आदेशो रोत वादार देवोअ आदेशोहों मानिइलोअ जाअखी गरज होये. 30आपाअ डायहांआं देवे ईसुहू जिवाड़्यू, जियाहा तुमू क्रुस खांबो पोअ टांगीत कोइत माईंत टाक्युतो. 31देवे बी तियाहाज सोताआ हाजाड़्या आथोअ वोगेहे पुडारी आन तारनारु कोत बोणावी देदू, मोन्ज्ये तो इस्राएल वालाहां मोन फिरावीलाअ सेक्ती आपे आन पापोअ माफी आपित सेके. 32आमू यी गोठीइ साक्शीदार होये, आन जे तियाआ आदेश मानतेहें तियांहां देवे जो पवित्र आत्मा भेट कोत आप्युहू, तो बी साक्शीदार होये.”
33ओं उनाइत कोइत ते खिजवात गोया, आन प्रेशितोहों माईंत टाकीइलोअ ईतव्यो. 34पोन तियांमेहें रोत गमालिएल नावोअ एक जोऊं ओतू जो एक कायदाअ मास्तर बी ओतू, आन तो फरिसी आन आखा माअहूंमेहें हाजू गणाअतुतो, तिये पोन्सामेहें उबू रोत कोइत प्रेशितोहों एक घेड़ी बारथे काडीइलोअ आदेश आप्यू. 35ताहरुउ पोन्सात्या माहुंहूं कोयो, “ए इस्राएलवाला, तुमू जों किबी यां माट्योंअरी कोइलाअ ईतवीइताहा, तों समजीत कोइत कोअजा. 36काहाके तुमुहूं ओर ते ओयजे के थोड़ाक दिहोअ पेल थियुदास ओ आगाड़ी आवित आंयहांआं कि तेबी होय कोतूज उठ्यू; आन शार होव केतेहे माअहें तियाआ वोलेहे वालित लेदे, पोन जेहेलाम तो माआंयू, ताहां जेते बी माअहें तियाआ वोलेहे ओते, तें बादे वेरासेर ओत गोये आन आरवात गोये. 37तियाआ फासाड़ी नावे टिपीइलाअ दिहोमेहें यहुदा गालीलवालू उठ्यू, आन थोड़ेक माहें हाती कोइत लेदे; तो बी आरवात गोयू आन तियाहा मानतेते तें बी आखे वेरासेर ओत गोये. 38तियाहाज काजे ओमे आंय तुमुहूं कोहो, यां माट्यों रोत सेटेज रोवा आन यांहां यांअ यांआं रोअहूं द्या; काहाके जर ओं काम माअहूंअहें रोत ओय, ताहां तो आरवात जाय; 39पोन जर देवोअहीं रोत ओय, ताहां तुमू तियांहां केदिहींज नाहां आरवीत सेकता. एहेलोह ने ओवुहूं जोवे के तुमू देवोअरी बी सुलाअनारा ठरे.” 40ताहराअ ते तियाआ गोठ मानित लेदी; आन प्रेशितोहों हादीत कोइत मार खावाड़्यू; आन ओ आदेश आपी देदू के फाशाअ फिरीत ईसुउ नाव लेत कोडाअरी गोठी मा कोअहा. 41ते यी गोठी वाअहीं खुस ओत कोइत वोडा पोन्साम रोत जाता रोया, के आमू तियाआ नावोवाअहीं अपमानोअ लायक तेंव ठर्या. 42ते रोत दिही मंदिरोमेहें आन कोओं कोओं सिकाड़ता, आन यी गोठीइ हाजी बातमी कोत आपीइलोअ ने सोड़्यो के ईसुज ख्रिस्त होय.
ទើបបានជ្រើសរើសហើយ៖
प्रेशित 5: NST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Noiri-Bhil Bible ©The Word For The World International and Noiri-Bhil Translation Samiti, Dhadgaon, Maharashtra, India, 2025.
