Joni 8
8
Unhukaji Wakabhatwa Epombola
1Jesu wakenda kudunhu lyeOlivi. 2Zhingwanangwana wakenda kutempeli, banhu bose bakezha kwaali, akagala pasi akabalayija. 3Bakwali bomulawo nabaFalisi bakabuza unhukaji, wakaba abhatwa epombola, akale bakombiga pakati pabo. 4Bakati kwaali, “Ndayiji, yoyu unhukaji wabhatwa epombola. 5Ngweno mumulawo waMozesi waakatilayija isu kuti tipubule unhukaji wakadai, iwi unotini naye?” 6Yezwi bakazwileba bounkweja, kuti bewane zwokuuntamijila nazwo, asi Jesu wakashuzhumala akakwala pasi nakanyala kake. 7Bakendila mbeli beumbhuza, wakanyamuka akati kwabali, “Yoyo usina zwibi pakati penhu ngetange kuumpubula nebwe.” 8Wakashuzhumala kabili akakwala nakanyala kake pasi. 9Koga pabakazwiwa bakamilika benda umwe nomwe, kutanga bakulwana, asi Jesu wakasala ega, nonhukaji akama mbeli kukwe. 10Jesu wakakotomoka akombhuza eti, “Nhukaji bayikokupi? Akuna wakupa undandu na?”
11Wakashandula eti, “Akuna, Tezi.”
Akale, Jesu wakati, “Nami anditokupa undandu, inda koga usichinye kabili.”
Jesu Mwenje Wenyika
12Jesu wakalebeleka kabili kwabali eti, “Ndili mwenje wenyika, iye unonditobela, aatokwenda munhilima koga unoba nomweje wobupenyu.”
13BaFalisi bakati kwaali, “Ukumuzwipa busumikiji, busumikiji bubo abutoba ilebeswa.”
14Jesu wakashandula eti, “Kojoba ndili nobusumikiji, busumikiji bwangu ndibwechokomende nokuti ndinoziba kwandakava kana kwandikumunda koga imwi amutoziba kwandikumunda kana kwandikumuva. 15Munotonga nenzila yabanhu, imi anditonga unhu. 16Kojoba ndikatonga, kutonga kwangu ndikwe chokomende, nokuti andili ndoga, Tate bakandituma bananami. 17Mumulawo wenu kulokwalwa kuwhi, busumikiji bwabanhu babili ngobwechokomende. 18Ndinozwisumikijila akale naTate bakandituma naibo banondisumikijila.”
19Bakati kwaali, nezwo, “Baiko kupi Tate babo.”
Jesu wakashandula akati, “Amutondiziba kana naTate bangu. Ngana mundiziba mwalubaziba naTate bangu.”
20Yaya mawhi wakaaleba, eli panolondotwa mipilo, paakabelayija mutempeli koga akuna wakoonsunga nokuti unshaji uwe aujakabanu waswika.
Amungende Kwandikumunda
21Jesu wakati kwabali akale, “Ndikumunda, munondishaka, akale munofila muluchinyo zwenu. Kwandinonda imi amungakuswike.” 22Batungamili babaJuda bakati, “Chisoko kuda kuzwibulaya na? Sezwo eti, Kwandinonda amungakuswike?” 23Wakati kwabali, “Imwi muli bopenyika yeino, asi imi anditoba wopenyika yeino. Imi ndinova kudenga. 24Ndizwo ndamubuja kuti munofila muzwibi zwenu. Kuzhe kokuti mudimbwe kuti ndili iye, chokomende muchafila muluchinyo lwenu.”
25Bakombhuza beti, “Ndiwi aani?”
Jesu wakabashandula eti, “Ndili iye wandabemubuja kuti ndili iye kuva pakutanga. 26Ndina zwinji zwokuleba zwokumutonga nazwo, koga iye wakandituma, ndiye chokomende, akale ndinobuja banhu bopenyika zwandakawha kwaali.”
27Abajakawhisisa kuti wakalebeleka nabo, nezwa Tate. 28Nokudalo Jesu wakati, “Mungonyamulila pezhulu Mwananhulumyana woNhu, ndipo pamuchooziba kuti ndili iye akale akuna zwandinota nesimba lyangu chete asi ndinolebeleka somundakalayijwa naTate. 29Akale iye wakandituma una nami ajandisiya ndoga, nokuda kokuti ndinota zwinounshantisa Iye.”
30Elebeleka banji, ndipo pabadimbwa kwaali.
Ilebeswa Linomusupula
31Jesu kova eti kuba Juda bakaba badimbwa kwaali, “Mungondila mbeli mulinundayijo yangu, mulibalayijwa bangu bechokomende. 32akale munooziba ilebeswa, akale ilebeswa linomusungunula.”
33Bakonshandula beti, “Tili bwoluji lwaAbhulahamu, akale atijanu tababalanda kana kunani, ini biya uti unosungunulwa?”
34Jesu wakabashandula eti, “Ndinolebesa nditi kwamuli, wose unochinya, undanda woluchinyo. 35Undanda, aatogala mumhuli kusinopela, asi mwananhulumyana ndiye, unogala kusinopela. 36Nezwo kana Mwananhulumyana emusungunula, munosungunulwa kasa. 37Ndinoziba kuti muli bechizekululu chaAbhulahamu koga mumuda kundibulaya, nokuti mawhi angu aana bugalo mwamuli. 38Ndinolebeleka zwandakatondejwa naTate bangu akale mota zwamwakawha zwiva kuna tate benu.”
39Bakonshandula beti, “Abhulahamu nditate bedu.”
Jesu wakati kwabali, “Ngana muli bana baAbhulahamu mwalota zwakatiwa naAbhulahamu, 40koga ngweno munoshaka kundibulaya, imi unhu wamubuja ichokomende lyandakawha kunaMwali, asi yezwi azwitoba izwo zwakatiwa naAbhulahamu. 41Munota zwakatiwa natate benu.”
Bakashandula beti kwaali, “Isu atijakazwalilwa mubupombwe, tina Tate bamwempela Mwali.”
42Jesu wakati kwabali, “Ngana Mwali wakabeli Tate benu, mwalondida, nokuti ndakava kunaMwali, Ngweno ndipo yopano penyika. Andijakazwizhila nokuda kwangu koga wakandituma. 43Ini musinowhisisa zwandinoleba? Nokuti amutotubula kutambula indayijo yangu. 44Muli batate benu guluzhanje, chido chenu kuta kuda kwatate benu. Wakabeli umbulayi kuvila pakutanga akale aanani nezwokuta nechokomende, nokuti amuna ichokomende mwaali. Kana enyepa, unolebeleka lulimi lulwe nokudalo unonyepa akale nditate bamaniepwa. 45Koga, nokuda kokuti ndinomubuja ichokomende, imi amutondidimbwa. 46Ndiani wenu unowana luchinyo munami? Kana ndimubuja ilebeswa ini musinondidimbwa? 47Iye uli waMwali unowha iwhi lyaMwali, zwinotisa kuti musunwhe, ndizwokuti amutoba baMwali.”
Jesu NaAbhulahamu
48Batungamili babaJuda bakonshandula beti, “Amutoba imo na kana titi unSamaliya akale unedimoni?”
49Jesu wakabashandula eti, “Andina idimoni,” koga ndinokuja Tate bangu asi, amutondilemekeja. 50Nezwo anditoshaka lukujo lwangu, koga, umwempela unolushaka unoba ndiye untongi. 51Ndinolebesa nditi kwamuli, “Wose unolondota mawhi angu, aatofa.”
52Batungamili babaJuda bakati kwaali, “Ngweno taziba kuti unedimoni, Abhulahamu wakafa, pamwempela nabapolofeti akale unoleba, kuti, ‘Yoyo unolondota mawhi angu aatofa.’ 53Unkulwana na kupinda tate bedu Abhulahamu? Wakafa, akale nabapolofeti bakafa, iwi unozwiti uli ani?”
54Jesu wakabashandula eti, “Kana ndizwikuja imi, lukujo lwangu alutoba chinu, ndiTate bangu banondikuja ibo bamunoti ndiMwali wenu. 55Asi amujanu moonziba, imi ndonziba, ndingoti anditonziba ndinoba ndiniepa samwi, ndinokwelela kuba uniepi samwi, asi ndinounziba nokudalo ndinowhilila indayijo yiye. 56Tate benu Abhulahamu bakashanta kuti walubona izhuba lyangu, wakalibona akale wakashanta.”
57Batungamili babaJuda bakati kwaali, “Aujanu waswika makole okuzwalwa makumi mashanu, unoti wombona Abhulahamu?” 58Jesu wakati kwabali, “Ndolebesa nditi, ndakabayipo Abhulahamu esanu abayipo ndakabelipo.” 59Nokudalo bakanunga mabwe kuti bompubule, koga Jesu wakazwisisa akava abhuda mutempeli.
ទើបបានជ្រើសរើសហើយ៖
Joni 8: LTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for The World International
