Mishingo 1
1
1Tiyofilasi unodikanwa, Muwhalo yotanga ndakakwala pezhulu pezwito zwaJesu zwaakatanga kuta akale nokulayija, 2kuswika izhuba lyaakatolwa enda kudenga, wakalaya bapositoli baakashala nesimba lyoMpepo uNchena. 3Kunaibo wakazwitondejela elimpenyu mushule mokuyabiswa nozwisimiso zwechokomende kwamazhuba makumi mana ebhaunula zwoBushe bwaMwali. 4Akabungana nabo, wakabalaya kuti besibhude muJelusalema koga bemilile bejine bewane chibimbiso chaMwali Tate, beti, “Mwakawha zwandakamubuja, kuti, 5Joni wakabhabhatiza nevula, koga imwi moobhabhatizwa noMpepo uNchena, mumazhuba mashoma anotobela moobhabhatizwa noMpepo uNchena.”
Jesu unotolwa ensengwa kudenga.
6Sezwo pabakati babapamwepela beliboga, balayijwa babe bakombhuza, beti “Tezi, nonshaji yono unobwiliza na ngweno bushe kubaIzilayeli!”
7Wakati kwabali, “Azwitoba zwenu kuziba unshaji kana igole, Mwali Tate zwabakabiga musimba lyabo. 8Koga imwi mootambula isimba, uMpepo uNchena pauchezha pezhulu penu, mooba basumikiji bangu kuJelusalema nokuJudiya nokuSamaliya nokunopelela inyika yose.” 9Paakapeja kulebeleka yezwi, balayijwa babe bechakalinga, wakanyamulwa, igole likonsikatila mumesho abo.
10Bechakalinga kudenga bebona kunda kukwe, bakabona pekama pelyo nabo, banhulume babili bakambala ingubo inchena jinobaima, 11bakati kwabali, “Banhulume bokuGalili, mulomilani mwakatokoloja kudenga na? Yoyu Jesu, watolwa akasengwa kudenga, unoobuya nenzila yamombona etolwa nayo enda kudenga.”
Wakatola chigalo chaJudasi
12Bakabwilila kuJelusalema beva kudunhu linowhi Olivi, lipo pelyo neJelusalema, lwendo lunovumilwa mumulawo nezhuba lyeSabata, 13pabakangwina, bakenda mungumba yakabeli pezhulu mwabakaba begala, Pita naJoni naJemusi na Endulu, naFilipu naTomasi, na naMateo, naBhatilomeyo naJemusi mwananhulumyana waAlufiyasi naSimoni unsungwaji naJudasi mwananhulumyana waJemusi. 14Bose yaba bakabhatana nomwoyo umwempela bakazwipila mukunamata, belipamwempela namamai naMariya amai baJesu nabanuna babe.
15Mumazhuba yayo Pita wakanyamuka pakati pabanakwaina (igubungano linabanhu bangaswika kuzana namakumi mabili) akati, 16“Banakwaina,” wakati, “Iwhalo inchena jakaba jikwelela kuzhajikijwa, zwakalebwa noMpepo uNchena nondomo waDavidi, nozwaJudasi wakatungamila yabo bakasunga Jesu. 17Wakabakalabwa nasu akale eli umwe wabashingi sasu muna yobu bunshingili.”
18(Yoyu unhulume wakatenga minda nendipo yonshingo umbi, mwakawila nonsholo akakwamuka untumbu akabhuda bula. 19Yezwi zwakazibikana kubagali bose beJelusalema, nokudalo yoyu uminda wakawhi Akelidama, mululimi lwabo, zwileba kuti, “uMinda weLopa.”
20Akale zwakakwalwa mulukwalo lweJimbo kuti,
“Bugalo bubwe ngebube idongo,
akale pesibe nonhu uchagala mwakale.”
Zwilokwalwa akale kuti,
“Umwe ngetole unshingo uwe.”
21“Sokudalo, umwe wabanhulume babelinasu unshaji ose tili naShe Jesu, 22zwitangisila pambhabhatizo waJoni, kuswikila unshaji wakatolwa kuva kunasu, umwe waaba banhulume unokwelela kuba nasu unsumikiji wokumuka kukwe.”
23Kwakadombolwa mazina mabili, Josefa waluwhi Bhasabhasi akale ewhi Jusitusi, naMatiyasi. 24Bakanamata beti, “Imwi She, munoziba zwose zwimomumyoyo yabanhu bose, titondejeni umwashala pababili yaba, 25kuti ebe umwe uchashinga nasu munoyu unshingo wobupositoli wakasiyiwa naJudasi paakaleya enda nenzila yiye.” 26Bakata ifumbefumbe, ikambwelela kuna Matiyasi, akalabwa nabapositoli baligumi nomwempela.
ទើបបានជ្រើសរើសហើយ៖
Mishingo 1: LTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for The World International
