Luke 24
24
Ringcuhdaikecu
1Cu mtakkak tingbazie raitu benai, penui tingcang nuge marim kehengui penui mtei keludung teu eh herau ga gwang. 2Ge penui tangtsube herau gade nlet mpet kedi ngaulu, 3dede penui pelungga lüt ge, Rampaube Jisu paaube ngaulu tadi. 4Nah penui aide cet kailak eh kebam dau ainie, cidau zette eh mina hangna pai rebaaha kecu balwe penui taiga sap di. 5Dede mipuidung de keheudi nah penui keumie taksu penui zu hangdeu lebie bamdi. Penai penui dage keteudi, “Daitei eh nnui ringkelabe de ketsaime kakga peei lano? 6Pa aika bam meda, dede pa ringcuh dida! Pa Galilee ga kebam dau dainzwa nnui dage rangbeu bi nsung lulo, 7‘Mina Nabe de kemaume ba gage tuigai beu maisia nah gwak di eh langcumne benai ringcuh dailu zie,’” de eh kerang de. 8Ge penui Jisu samdung nsung lu, 9nah penui heraube gade cailigwang aidung pelane pe caisuime kereieket nah kedame pelane dage paubeu. 10Cu langkegaimedung dage sam aidung de rangkebeu puidung cai, Mary Magdalene, Joanna, nah James pui Mary nah mipui kedamedung de si. 11Dede cipau samdung de langkegaimedung ziemne kemta samge nzwadi, nah penui mipuidung de nlum tadi. 12Iciu liede, Peter culwe, heraube ga pak gwang nah keumie piege, pa langcim kehezui pai gwale ma kedage de ngau ma. Cine pa ma cidungde ngau eh pe swaga eh kilung ga cailigwangdi.
Emmaus lampui ga
13Ainie, cipau benai penui kakde Jisu caisuime hangna Emmaus lie kecu renam ge Jerusalem gade kilometer kereieket dei ge ga kebam ga mie la. 14Nah penai ma aidungde tei kedi hadung hangge ge de keresiu la. 15Nah cinzwa eh, penai marang nah mpau pwa keladau, Jisu penaide gwang nna lwe nzang miedi. 16Dede peu pecu cilu kera gade penai miak kezeudi. 17Cidau Jisu penaide rangdi, “Nnai tet kegwang dau hangge ge dade rang keladung de daipai ha reki la no?” Cine penai cika sap bamdi, penai suisia rakke. 18Ge penai hangge pau pe zi Cleopas keligai, nah pe dage rangdi, “Jerusalem ga kegwangme nang rünne cuting ma aidungde tei kedi ci kemakme da ha?” 19Cidau Jisu penai dage keteudi, “Daipai dung no?” Cine penai pe dage rang eh, “Nazarethme Jisu ha lie, mina aipaude caihakecime#24:19 Caihakecime: Tinggwang dade langkegai keledeube., pa Tinggwang nah mina peciakne dwade pe sam de nah bata de disüt, 20nah cinzwa anui cingku kedimedung nah muiteume pecu nim lwe mmau eh teitset dilo miba gage kaibeu, iciu eh pecu gwaktset di. 21Dede anui au Israel de kelilu kera pa delie regui gwanglie. Cipau caide ma aidung pelane tei kedi, henai lang cumne dida. 22Dede ci rünne mene, anui maagade mipuidung ge tingcang nuge herau ga gwang, 23nah pe paaube ngaulu tadi, penui tinggimgwamedung rengei, pa au ringdaidi delie rangbeu lie eh, kengau de rang eh cailigwang. 24Cidau anui ngngwa kela mina kangge de herau mie pie ge penui mipuidung rangkebeu de nzwa ngausiak lu. Dede penui Jisu de ngaulu tadi.” 25Ge pa penaide keteudi, “Nnai dai miemie no, nah caihakecime ma pelane rangkebeudung de daikenzwage de nlum pa dino! 26Khrista ma aidung de ziemne keherei maisia meni, delwe pe kendu ga lütlu kera?” 27Pecai pa Moses gade gwang caihakecime peciakne, pe ha raupwa keladungde penai dage ranglia Kesanglaisiu pelane gade. 28Cidau penai gwang kela nam ga penui gwang mna di, nah pa tet mdei pet si kecu nzwa. 29Dede penai pecu kaam eh cu, rang eh, “Anaide ngngwa bamdi lulo, kedanemene cu tinghegi dida, nah tingbazie be kekieele cang dida.” Cine pa kilung ga penaide nzang eh lütlu. 30Pa penaide ngngwa matyei zielie taktyeibam ga ngngei keludau, pa tangku keupwa samlam gai, delwe cide panglu eh penai de peu. 31Cidau Tinggwang penai miak ngkei beu, nah penai pecu cilu, nah pa penai miakngau gade tetdi. 32Nah penai ketket dage rang eh, “Pa lampuiki ga anaide mpau kela dau, pa Kesanglaisiu gade anaide ma ranglia kela dau, anai mlung mi ne keru nzwadi meni?” 33Cine penai cipau bamdakkak gade cuh lwe, tet daipwa Jerusalem ga cailigwang. Ge penai langkegaime kereieketbau nah kedamedung de ngkwa bam eh penuide ngaulu, 34rang eh, “Rampaube ringcuh daidi kecu kesangda, nah Simon depeu ngau gaida.” 35Cidau Emmaus gade kegwang kenade lampuiki gade daipai teidi bi, nah tangku teipop keludau dainzwa penai pecu cilu dibi kecu ranglia.
Jisu ledeukelume de peu ngaukegai
36Cu penai ma aidungde rang kebam dau, Jisu penui kakga saplwe penui dage rangdi, “Lungciep be nnui da bam lulo.” 37Dede penui de keheudi eh ngngi sütdi, nah penui ma rabe ge de ngaulie cetdi. 38Cine pa penui dage rangdi, “Daitie nnuilung keherei, nah nnuilung lunghau zeuno? 39A pi nah a ba pielo, cide au Ih delie. Acu deu eh pielo kedanemene rabe au pe teih pe ra gah, dede Ih au kebam nnui pie lulo.” 40Nah pa aide ranggai eh, pa penuide pe pi pe ba pwalia gai. 41Penui iciude nlum luma, kedanemene penuisui yizu nah penui swaga zu kedine, cine pa penui dage rangdi, “Nnui aika makeheibe de tyei kera bam mi?” 42Cine penui heka lang kelube ge pecu peugai, 43nah pa cide keulwe penui dwa gade tyeilu.
44Pecai pa penui dage rangdi, “Aidungde a sam, Ih cu nnuide ngngwa kebam dauge ranglia zeu, cide a ha Moses zai gage nah caihakecime nah lei laisiukwak gadung ge rauteu kela peciakne teicang megai lak.” 45Iciu eh peu penuide Kesanglaisiu cilu kebui penuilung ngkeibeu, nah pa penui dage rangdi, 46“Ainzwa eh kesanglaisiu ga raupwa la: Khrista kehereisüt zie, pecai langcumne benai ketsaime kakgade ringcuh luzie; 47iciu eh Jerusalem gade pe bangdwa teilwe heleuh leunedung dage pezi gade kemaudung gilu kerane helungkenreu paurwa zie. 48Nnui ma aidungde zierangme da. 49Ih a Pei kaibeu zielie sampet kebeude nnui dage langgai beuzie. Dede tinggim gade kengkieng ngaulu kemaktane namdi be ga bam lulo.”
Cuhkedi
50Iciu eh pa penuide nzangpwa Bethany lebie gwangdi, nah pa pe ba hwacuh penuide samlambeu. 51Pa penuide samlambeu kebamdau, pa penui dade tetdi, iciu eh pecu ngngwa tinggim nghang di. 52Iciu eh penui, pecu reca, nah penui suiyisüt eh Jerusalem namdi ga cailigwangdi, 53nah penui peciakne kerecaki ga Tinggwang de twa eh bamdi.
ទើបបានជ្រើសរើសហើយ៖
Luke 24: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
