Luke 16
16
Kemriak kerengeibe samgwa
1Jisu pe caisuimedung dage maranglia si eh rangdi, “Makeheime ge pe ma kekwame ge bam, nah cipaude pe ma kehei teidi zeulie eh mi peda rang gwang. 2Cine pa kerengeibe de qulwe pe dage rangdi, ‘Ih n ha kesiu aide ai daino? Nang manyia teu kela de pau mci gailo, kedanemene peu ncu hema kekwabe tei si lakta.’ 3Ge hema kekwabe pekatei pecu mpau eh ‘Ih daipai tei zieno, a mpaube peu acu pe ma kekwa tei si lakta? Ih kideu su kera ngking ma, nah maha tyei kera Ih ngngam. 4Ih teimai kesiage cet luda, iciu eh Ih hema kekwabe tei tadi de, mide peu penui kiga acu ngngwa lu kera.’ 5Ge hema kekwabe pe mpaube pau pung kelamedung hangge ge de qulwe, nah pa keraibe dage ranggai, ‘Nang a mpaube pau daikenzwa ge pung lano?’ 6Nah pa rangdi, ‘Olive cabung haige.’#16:6 Olive cabung haige: cide olive litre 3,000 kenzwa ge Iciu eh pa pe dage rang, ‘Nlaisiu keulwe bam kelwalu, delwe riangngei raulu.’ 7Iciu eh pa kedage dage rangdi, ‘Nang daikiee ge pungla no?’ Ge pa rang, ‘Wheat bung haige.’ Pa pe dage rang, ‘Nlaisiu keulwe riakheset raulu.’ 8Iciu eh pe mpaube hema kekwabe masangkemakpe de twagai kedanemene pa mriak eh peta keteine. Kedanemene kideube name au penui tingdau kebaabe namedung swa mriak ki kecune. 9Nah Ih nnui dage ranglia zie, samsang kemak maheide de ngngwa zangna tei lulo, iciude cidungde gadi sangne, mi nnuide kelungta bam kela bamdung gage ngngwagai luzie. 10Ma kecam nage gade kesamsangme kekiee gade de samsang la, nah ma kecam nage gade samsang lula kemakme kekiee gade de samsanglu lamah. 11Ciziemne, ma gade nnui kesangkemak mahei teu samsang la melie cai, cau nnuide mahei kesangbe pwa nlumbeu laino? 12Nah ma gade nnui mi kedame gu teu samsang lula melie cai, cau nnui ba gage makai eh nnuide peu teu nnui gu teizie no? 13Kila hangge mi hangna gwatei gailak, kedanemene pa hangge de ngkau nah kedabe de ku, mede pa hangge kilam bam di eh kedabe de caudi zie. Nang Tinggwang nah kideu mahei gwa teida gailak.”
14Cu Phariseemedung, rangkang kehengim medung, aidungde leune siulu, nah penui Jisu de nuineudi. 15Cine pa penui dage rang, “Nnui au mina dwade nnuide tei masang teu kelamedung da, dede Tinggwang nnuilung cibam. Kedanemene mina dwade tei mdi kelube au Tinggwang dwade ngkau kemneu ge kecune.
Ledeusi kegaidung
16John kegwang dwa hezaibe nah caihakecime ne heta tei gwang. Cipau cai au, Tinggwang hegwang samliakeyibe teu ledeu beu, nah keheibe de cika nsung lüt. 17Dede hezai keceu nage de teicang kemak swa au tingkideu ga kedibe la kizie.
18Keheibe de pe nau de tadi nah kedage de luucai mmha la dida, nah mige pe nahne ta kebeu puige de luucai mmha la dida.
Keheibe nah Lazarus
19Cu makeheime ge pe pai gieremang nah langcim pai bahlwe tingnai ramsangne lungh kehega süt bamla. 20Nah ma kegah pei ge pezi Lazarus#16:20 Lazarus: Lazarus au Hebrewme sam, nah pekie be mipei ge kengha teumai kesia ge, kegame ge. pe kirie ga zeubam, keteeizamle pui eh, 21nah pa ma keheibe taktyei bam gade tangra kemiebe de pa tyei neu eh bamla. Cirünne mene heteudung gwang pe mateei jamdung mniak bamla. 22Iciu la eh ma kegabe de tsaidi, nah pe rabe tinggimgwame ne pwa gwang Abraham taiga ge kaizeu di. Cidau ma keheibe de de tsaidi nah kungdi, 23nah Hades#16:23 Hades: kemui, ci kemak, nah heni kesia ge, tinggim gade deisüt kecu, cika kemaume de tei keherei jüja bamla. gade keherei süt eh, ngang cuh ge kemdei ga Abraham de pa ngaulu nah petaiga Lazarus kebam. 24Cine pa sahbak eh cu, ‘Apei Abraham, acu ngau nggia eh Lazarus de langgai eh peu pecu dui gage pe zurangtün taulwe a mleu tei ngkung gai beulo, kedanemene Ih miheu aika de kehereisüt bamdi delu.’ 25Dede Abraham rangdi, ‘Ana, n kering tingdau nang makeyidung ngaukelu, nah Lazarus de cinzwa kesia ngau kedi de nsung lulo. Dede pa au cu aika relui bamdi da, nah nang au keherei bamdi da. 26Nah cirünne mene, anui penai n kakga hekwa kecuk ge bam dida, cine aika de nnui lambie pet gailak ta, nah migede cika de anui lambie de pet gailak.’ 27Cidau pa rangdi, ‘Ciciu cai Ih n dade a nggia kiela, a pei, pecu a pei ki gage langgai beulo, 28kedanemene Ih a siname hang mengei bam, peu penui de keherei bam aika gwang di melu kerane, peu pecu gwang rangbeu lo.’ 29Dede Abraham rangdi, ‘Penui da Moses nah caihakecimedung de bam; penuide peu penui kwa kingnei lulo.’ 30Dede pa keligai, ‘Ma, A pei Abraham, dede ketsai gade midungge penuida gwang cai, penui lung nreulu zie.’ 31Dede pa pe dage rangdi, ‘Penui Moses nah caihakecime kwa kingnei mecai, penui ketsai gade mige nligwang de nlumlak.’”
ទើបបានជ្រើសរើសហើយ៖
Luke 16: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
