Luke 15
15
Gahkedi meurün samgwa
1Cu heraha kehamedung pelane nah kemaumedung Jisu sam kingnei zielie pe da gwanglu. 2Dede Phariseemedung nah laisiukecime ncam bam eh, ranggai, “Aipaude kemaume de ngngwa nah penuide ngngwa matyei la.”
3Cine pa penui dage samgwa aide rang eh, 4“Nnui kakga cau ge, meurün haige bam nah pa cidung gade ket teinggah dicai, pa riakhekui eh hekui de renaam gage kainzeu eh mie gahkedi nade de ngaulu kemakta peeila lak ni?#Eze. 34:11,12,16 5Nah pa cide ngau kelu dau, pa pesuiyi eh cide pwa pe hekeutu gage kailu la. 6Nah pa kilung gwanglu ge, pa pe zangme nah pe kidamedung de qu hekwa lwe, penui dade rang eh, ‘Acu ngngwa nnui suiyi lulo, kedanemene Ih a meurünna ga kedina de ngaulu delu.’ 7Cinzwa Ih nnui dage ranglia zie, makesangme hangriakhekui-hekui helungnreu maisia kemakme swade kemaume hangge helung nreu kelu ziemne tinggim ga suiyi kieeki zie.
Gahkedi rangkanggeu samgwa
8“Mede cau pui ge, rangkang geu kerei bam eh, magade pa ket teinggah dicai, pa mi mtau lwe kilung biak eh lungpang tei cide ngaulu kemakta peei lakni? 9Nah pa cide ngau luge, pa pe zangme nah kidamedung de qu hekwalwe, rang eh, ‘Acu ngngwa nnui suiyi lulo, kedanemene Ih rangkanggeu teinggah kedide ngaulu delu.’ 10Cide nzwa eh, Ih nnui dage ranglia zie, kemaume ge helung nreu kelu ziemne Tinggwang gwamedung de penui sui yila.”
Gahkedi nabe samgwa
11Ge pa rangdi, “Mige pena hangna bam, 12nah henabe pe pei dade rangdi, ‘A pei, mabam a nzibe pwa acu peulo.’ Cine pa pema penaide nzibeudi. 13Ma tingtie mene pe na henabe pegu keu hekwa kaplu eh renam kemdei gega mie di, nah pa cika de lungh pesuira tei eh pema teizang kapdi.#Mac. 29:3 14Nah pa ma peciakne teizang kap dige, renam cika herakum kum cudi, ge pa maga bamdi. 15Cine pa renam cika kelungme ge kiga mahi kera gwanglu, nah cipaude pecu hebak kwa kera peluh gage langgai. 16Nah pa hebaktak de tyei nggei gaineu bamdi, dede migede pecu ma gede peu ma. 17Dede pa pelung mraklu ge, pa rangdi, ‘A pei mi zie luilwe pe kila tei kebammedung daikieege de ketyeipok kepui teibam no, dede Ih aika de nzeu eh tsai lau da! 18Ih culwe a pei da gwang zie da, nah Ih pe dade rangzie, “A pei, Ih tinggim dwade de nah ndwa gade de mau dida.#Lei. 51:4 19Acu le pwa n na lie qulu dui da; acu mahi kebam n kilame ge nzwa eh ngngwa lulo.”’ 20Cine pa culu delwe pe pei da gwang. Dede pa kemdei ga kela dau de, pepei pecu ngaulu nah pelungsia eh pak gwang pecu tui pwalwe kemam. 21Ge pe napei pe dade rangdi, ‘A pei, Ih tinggim dage nah n dage kemau teigai dida. Ih n na lie kulu kera bui meda.’ 22Dede pe pei pe kilamedung dade rangdi, ‘Pai yitube keu kelwa gwang, nah cide peu pecu balu, nah bakap de pe ba gage kailu, nah pe picum de pe pi gage kailu. 23Pecai hetumna pelui keyina de teu gwang, gilu, delwe anui tyei eh anui suiyi bamgo! 24Kedanemene ana aide tsaidi, nah pa cu ringdai luda; pa gahdi dege,#15:24 Gahdi dege: kilung gade tetdi, nah anui pa au daiga ladi bi ci luma. pecu ngaudai luda.’ Ciciu eh penui penuisuiyi eh bamdi. 25Cidau pena kecingbe luhga la, nah pa kilung mna gwang kecu dau, pa lei ketei nah helim kelim kwa siulu. 26Cine pa kilame hangge de qu lwe aide daipai teizeu bi keteu. 27Ge pa pe dade rangdi, ‘N caihereibe gwang bamda, nah n pei hetum pelui keyina de gilu da, kedanemene pa yimcang la eh pecu ngaudai kelu ziemne.’ 28Dede pa perata di nah kilung nlüt neu ta di, cine pepei hegwale pet eh pena dade penggia kie. 29Dede pa pepei sam keli eh rangdi, ‘Ainie, Ih mmi aikie ge n gwatei gwang, nah Ih nsam mzai tadi ma, dede nang madau de Ih azangme de ngngwa renga kera hemeuna gede acu peu ma, 30dede n na aipaude n ma helipuidung de ngngwalwe tei ngkapdi eh lungh gwang, dede nang pe ziemne hetum pelui keyina de gibeu.’ 31Ge pa pe dage rangdi, ‘Ana, nang acu ngngwabam muila, nah agu peciakne ngu ciakda. 32Dede anui ngngwa taktyei nah suiyi bam kera petaulu, kedanemene n caihereibe tsaidi, nah cu ringdai luda, nah pa gahdi dege, pecu ngaudai luda.’”
ទើបបានជ្រើសរើសហើយ៖
Luke 15: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
