John 3
3
Jisu Nicodemus de keledeu
1Cidau Phariseeme kakga mipei ge pezi Nicodemus lie kecuge bamla, Jewme muiteume ge. 2Aipau pei de tingmui Jisu da gwang nah pe dage rangdi, “Keledeubo, nang au Tinggwang dade gwang kela keledeube kecu anui ci lie, kedanemene nang tei kebam marehidung aide au migede tei gailak Tinggwang pecu ngngwa la melie cai.” 3Jisu keligai nah pe dage rangdi, “Ih nnui dage rangsiakte liazie, mige mna heci dailu meliecai, pa Tinggwang hegwangram ngau gailak.” 4Nicodemus pe dage rangdi, “Dainzwa mige pa cing kedi caine mna dailu lai? Pa pe pui henabam ga pekenabe nlüt dai eh dainzwa mna dailu lai?” 5Jisu keligai, “Ih nnui dage rangsiakte liazie, mige dui nah Rabe gade mna lu#3:5 Dui nah Rabe gade mna lu: aide “duipum” tei kecu de rangbam. kemaktane, pa Tinggwang hegwangram ga nlüt gailak. 6Pumteihbe gade mna kelube au pumteihbe da, nah Rabe gade mna kelube au rabe da. 7Ih n dage ‘Nang mna heci dailu maisia’, de eh rang kegai ziemne nswa gah di so. 8Tingkai pesui gage guigai bamla, nah nang pekwa siula, dede nang cide dai gade gwangla bi mede dai gage tetgaila bi kecu ci ma. Mileune de Rabe gade mna kelume au cinzwa da.”#Kel. 11:5 9Nicodemus pe dage keteugai, “Ma aidungde dainzwa teilu zieno?” 10Jisu keligai, “Nang Israel ga keledeume ge ni, nah nang aidungde ci mene lareu ni? 11Ih nnui dage rangsiakte liazie, anui kecibe anui rangla, nah anui kengaube ha zierang teila. Iciude nnui anui zierang luu luma. 12Ih nnuide kideube hadung ranglia nah nnui nlumlu mecai, magade Ih nnuide tinggim hadung ranglia de nnui dainzwa nlum lulai? 13Migede tinggim ga nghang ma tinggim gade kenghungbe de, Mina Nabe gwale. 14Moses hetaideu gade henei de pwacuh kecu nzwa eh, Mina Nabe dede pwacuh maisia,#Pum. 21:9, Jhn. 8:28 15iciude pecu nlum kelume leune kelungta kering ngaulu kerane.
16Tinggwang kideube de hungzu kecune, pe Na kepumlibe de pa kaibeu, iciu eh pecu nlum kelu keheibe de kap eh gah dilak dede kelungta kering ngaulu kerane. 17Kedanemene kideube de mmau kerane Tinggwang Nabe de kideu gage langgai ma, dede pe dade kideube de kelilu kerane. 18Pecu nlum kelume de mmau di lama, dede nlumlu kemakme de au mmau bam dida kedanemene pa Tinggwang Na kepumlibe zi gade nlum kemakne.#Jhn. 5:10 19Dede hetu ketiak aipau kiede ziemne da: Kebaabe kideu ga gwang da, nah minadung kebaabe de swade kemuibe de hungki di kedanemene penui batadung kesiade ziemne. 20Kedanemene kesia tei kela leune kebaabe de ngkaula, nah kebaa ga gwang lamah, iciude pe batadung let mpetdi kelak ziemne. 21Iciuliede, mige kesang tei kelabe kebaa da gwangla iciu eh cide Tinggwang gade pe batadung tei kegai mci hegi eh ngaulu kerane.”
Duipumketeibe John Jisu ha kerang
22Aipaucai, Jisu nah pe caisuimedung Judea deu ga gwang di. Cika pa penuide tingkakge ngngwa bamdi nah duipum tei. 23Pecai heni ge Salim taiga Aenon#3:23 Aenon: “Enon,” mede “Aenon,” aide pekie “duilet”. lie qukela ga John de duipum teibam kedanemene cika dui kiee kebamne. Minadung peda gwang bam nah duipum teibam, 24John de hebaangki gage kaigai mereu kecune. 25Ge John caisuimedung mikangge nah Jewme ge kakga hui kemci zaidung ha gade kesamlim cuhdi. 26Cine penui John da mie delwe pedade rangdi, “Keledeubo, ncu nzang eh Jordan Reuki lulegim ga kelabe de, nang pe zierang tei kebambe de, pielo, pa duipum tei bam dida, nah penui pelane pe dage tetgai bam dida.” 27John keligai eh rangdi, “Migede magede ngaugai lak Tinggim gade cide pecu pwapeu mecai. 28Nnuine de a dage zierang teiluibui, ‘Ih au Khrista ma,’ dede meliene, ‘Acu Pe dwa lang nswa gai,’ de eh Ih rang kegai de. 29Lakciube puide ngau kelube lakciube delie. Cu lakciube zangme, sap eh pe kwa kingnei kebambe de, pesuiyi sütlu lakciube kwa siu kelune. Ciziemne a suiyi aide tei canglu da. 30Pa au di reureu maisia, dede Ih au ceu reureu maisia.
31Mige nreule de kegwangbe au pekiene reube lie. Mige kideu gade kegwangbe au kideu gade nah kideube ha rang la. Mige tinggim gade kegwangbe au pekiene reube lie.#Jhn. 8:23 32Pa au pa ngau kelube nah siu kelube ha zierang tei la, dede migede pe zierang luulu ma. 33Mige pe zierang luulu kelube Tinggwang au kesanglie kecu cisiakte luda. 34Kedanemene Tinggwang mige de lang kegaibe de Tinggwang samdung rangla. Kedanemene Pa Rabe de mdet eh kaibeu melu. 35Peibe Nabe de hungla nah ma pelane pwa peba gage kaibeu dida. 36Mige Nabe de nlum kelube au kelungta kering ngaulu da, dede mige Nabe samzai teilu kemakbe au kering ngau gailak, dede Tinggwang lungkabe pe da bam dizie.”
ទើបបានជ្រើសរើសហើយ៖
John 3: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
