John 21
21
Jisu nah heka miswakega tuikelu
1Ma aidungde cai Jisu Tiberias jaaidi gade pekatei pecu pwa ledeukelumedung de peu ngau daigai. Pa pekatei pecu ainzwa liagai: 2Simon Peter nah Thomas Didymus lie qu kelabe de, nah Galilee deu ga Cana nam gade kegwangbe Nathaniel, nah Zebedee napei kena, nah Jisu caisuime keda hangna de penui ngngwa la. 3Simon Peter penui dade rangdi, “Ih au heka tui kera mie zie.” Penui pe dade rangdi, “Anuide ncu ngngwa mie zie.” Penui mie delwe liem ge ga lütlu, dede cipau ziu penui magede tuilu ma. 4Cu, tingcang kedi dau, Jisu jaaidi kungga sap, dede ledeukelumedung cide Jisu lie kecu cilu tadi. 5Cine Jisu penui dage rangdi, “Rehangmedung, nnuida magede tyei kera bam meni?” Penui pecu keligai, “Gahlie.” 6Pecai pa penui dade rangdi, “Nnui liem zetlebie gage helang sam gailo, iciu cai nnui kiee kemakge ngau luzie.” Cine penui penui lang kelien gaige heka kiee ham kedine cide teunlüt gailak di. 7Pecai ledeukelube Jisu pecu hung kelabe Peter dage rangdi, “Cide au Rampaube da.” Cine Simon Peter cide Rampaube delie kecu siu luge, (pa pe paini lwakdi eh bamkecu ziemne), pa pe paini kailu delwe pa jaaidi kung ga petlu kera jaaidi gage nsau gaidi. 8Ledeukelume kedame de liem ga lütlu (penui hangdeu gade mdei ham kemak ga kebamne, dede cubit haina kenzwa kemdei gega bam), nah penui langbe hekale puipung kebam de teu bamdi. 9Cine penui kecangdeu ga mpet luge, penui regeu mi heu kebam nah cipau reuga heka kebam nah tangku kebam ngaulu. 10Jisu penui dage rangdi, “Nnui cune heka tui kelu bedung kiee kemakge keu gwanglo.” 11Simon Peter cidau nghanglu delwe helang de jaaidi kung gage teu mpetlu, heka kedibe le puiting eh; 153 ge. Cika kieesüt bam, dede helangbe hak dima. 12Jisu penui dage rangdi, “Gwang eh matyei lulo.” Dede ledeukelumedung hangge de, “Nang cauno?” de kecu pecu keteu gai hingdi, cide au Rampaube lie kecu penui cilu. 13Jisu gwang delwe tangku keulu delwe cide penuide peu, nah cinzwa eh heka liede. 14Jisu ketsai gade pa ringcuh kelu cai ledeukelumedung da pecu peu ngau kegai cu aide au pe kecumbe.
Jisu Peter de teucuhdaikelu
15Iciu eh penui matyei kelu cai, Jisu Simon Peter dage rangdi, “John napei Simon, nang aidungde swa acu hungki lami?” Peter pe dage rangdi, “Yeo Rampaubo, Ih ncu hung kela nang cibam.” Jisu pe dage rangdi, “A meurünnadung puk tei lulo.” 16Pa pia pekenabe pedade rang dai, “John napei Simon, nang acu hung lami?” Peter pe dage rang eh, “Yeo Rampaubo, Ih ncu hung kela nang cila.” Jisu pe dage rang eh, “A meuründung#21:16 A meuründung: aide ngqwa mtei de rangbam (John 10) mapie lulo.”
17Jisu pia pe kecumbe de pe dade rangdi, “John napei Simon nang acu hung lami?” Jisu pedade pia pe kecumbe “Nang acu hung lami?” de eh kerang ne Peter pelung sia di, pa pe dage rangdi, “Rampaubo, nang ma pelane cibam, Ih ncu hung kelade nang cibam.” Jisu pe dade rangdi, “A meuründung pok tei lulo. 18Ih n dage rangsiakte liazie, nang rehang dau, nang nkatei ne n nia mteilwe nang mie keneu leune ga miela, dede nang cing kedi dau, nang n ba hwa beu zie, nah mi kedame ne n nia mtei beu zie nah nang mie neu kemak gage ncu ngngwa gwang zie.” 19Cu Jisu sam aide kerang au Peter daikenzwa tsit gade Tinggwang zi teindu lubui bi kecu keulia gai. Pa aide rang kedicai, pa Peter dage rangdi, “A cai suilu.” 20Peter nreu gwanggai nah Jisu hung kela ledeukelube de penui caisuigwang kela ngaulu, taktyei gade Jisu mbie ga ngngei kecube de nah, “Rampaubo, caube ne ncu tuipwa miba gage kai zieno?” De eh kerangbe de. 21Ciziemne Peter pecu ngau eh Jisu dage rangdi, “Dede Rampaubo, Mina aipaude dainzwa no?” 22Jisu pe dage rangdi, “Ih cailigwangdai kemaktane Ih pecu peu bamneu liecai, cide n ziemne daipai no? Nang a caisui lulo.” 23Cine ledeukelu aipaude tsaidi laklie kecu sinamedung kakga aide sam rangpopbak di. Dede Jisu Peter dade ledeukelube kedabe de tsai lak lie kecu rang ma, dede, “Ih gwang kemaktane pecu peu bamneu liecai, cide n ziemne daino?” 24Ledeukelu aipaude ne ma aidung zierang tei#21:24 Ledeukelu aipaude ne ma aidung zierang tei: ledeukelu kekube au John lie kecu cilu aide gade. kegaibe da, nah ma aidungde rau kegaibe da, nah pe zierang kesang lie kecu anui ci bam. 25Dede Jisu tei kegai ma keda kekiee gede bam, ma cidungde ket ket eh rau siakte gwangzie liecai, Ih cet kecu au laisiukwakdung raugai kera de ziemne kideube liede pebam bam canglak lie.
ទើបបានជ្រើសរើសហើយ៖
John 21: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.
