Kendeu 30
30
1Rachel pa hena mna pwa Jacob de peulu kemak ngau luge, Rachel pe swacingbe puide ngau pe riakdi. Pa Jacob dage kiedi, “Acu hena peulo, maige Ih tsai dizie.” 2Jacob Rachel de pe ratadi. Pa rangdi, “Ih Tinggwang sap ga sap bamni, pane ncu n na lunglu kebui kaam pwabam.” 3Pa rangdi, “Ainie, cika a kilapui Bilhah bam. Pecu ngngwa zeulu, iciude pa a ziemne hename ge lungh beuzie, nah Ih peda de hename lungh luzie.” 4Cine pa Bilhah pe kilapui de pe nahpei de nau nzwa pwa peu, nah Jacob pecu ngngwa henau tei kera hepei zai teidi. 5Bilhah tetlak lu nah mipeina ge Jacob de mnabeu. 6Pecai Rachel rangdi, “Tinggwang a lam pwa beuda, nah pa a kwa siu luda nah acu mipeina ge peuda.” Aide ziemne pa pezi Dan msiaklu. 7Bilhah, Rachel kilapui, tetlak dailu nah Jacob de mipeina pe kena be mnabeu. 8Rachel rangdi, “Ih a swakecingbe pui de ngngwa hereu kehung ge teida nah Ih ne ngkieng luda.” Pa pezi Naphtali msiaklu.
9Leah pa pena lung si takedi ngaulu ge, pa pe kilapui Zilpah de pwa pecu Jacob nau tei kera peu. 10Zilpah, Leah kilapui, Jacob de mipeina ge mna beu. 11Leah rangdi, “Ih raci da!” Cine pa pe zi Gad msiaklu. 12Pecai Zilpah, Leah kilapui, Jacob de mipeina pe kenabe mna beu. 13Leah rangdi, “Ih a suiyi bam! Kedanemene mipuidung acu suiyi lie qu zieda.” Cine pa pezi Asher msiaklu.
14Wheat luhlüt tingdau Reuben luh ga mie nah hekuhei ngaulu. Pa teugwang pe pui Leah de peu. Pecai Rachel Leah dage rang eh, “Acu n na gu hekuheidung kesa peulo.” 15Leah pedage rangdi, “N ziemne cide ma keceu nage ni, nang a nahpei de teu tetdi kecu de? Nang cu au a napei gu hekuhei de keuteu di neu la reu ni?” Rachel keli eh, “Nang heziu pecu ngngwa zeu lubui, n na gu hekuheidung peu cai.” 16Jacob tinghegi luh gade gwang. Leah pet pecu redau lwe ranggai, “Nang ada gwang maisia, Ih ncu a na gu hekuheidung le luilu delu.” Cine cipau ziu Jacob Leah de ngngwa zeudi. 17Tinggwang Leah kekie kingneilu, nah pa tetlak lu nah Jacob de mipeina pe mengei be mnabeu. 18Leah rangdi, “Tinggwang acu a ziehi peu da, kedanemene Ih a kilapui de a nahpei de kepeune.” Pa pezi Issachar msiaklu. 19Leah tetlak dailu nah Jacob de mipeina pe herok be mnabeu. 20Leah rangdi, “Tinggwang acu mapeu keyi peu da. Cu au a nahpei acu rütlu zieda, kedanemene Ih pecu mipeina hang herok mnabeu di delu.” Pa pe zi Zebulun msiaklu. 21Pecai pa mipuina ge mnalu nah pezi Dinah msiaklu. 22Tinggwang Rachel de nsunglu eh qu nah pe kekie teibeu. Pa pecu pe na lunglu kebui teibeu. 23Pa tetlak lu nah mipeina ge mnabeu. Pa rang eh, “Tinggwang a ngam keugidi beuda.” 24Pa pe zi Joseph de qulu, rang eh, “RAMPAUBE acu mipeina keda ge peudai kelu tei luda.”
Jacob pe mabam mmipet kedi
25Rachel Joseph de mna kelu cai, Jacob Laban dade rangdi, “Acu peu tetlu culo, iciu eh Ih akatei a ki ga nah a deudi ga gwang dailu kerane. 26Ih nta tei eh hikelu a nau kena nah a name de acu peu culo, nah acu peu tetdi culo, kedanemene Ih daikenzwa ge n ta teigwang bi nang cibam.” 27Laban pedage rangdi, “Cu Ih ndwa gade n suiyi teilu lie cai, kwalu, kedanemene Ih rabe kilam de n ziemne RAMPAUBE acu samlam kebeu ci luda.” 28Pecai pa rangdi, “N ziehidung ranggai lo, nah Ih cidung de peu zie.” 29Jacob pedage rangdi, “Ih daikenzwa ge n ta tei bi nah n gu makaunedung daikenzwa ge yilu di bi kecu nang cibam. 30Kedanemene Ih kegwang dwa nang kecam nage kebam de, lung ngkie süt luda. RAMPAUBE Ih ketei leu ga ncu samlam beu da. Cu daidau ne Ih a kilungme ma de pie lai?” 31Cine Laban rangdi, “Ih ncu dai peu lai?” Jacob rangdi, “Nang acu magede peu lak. Nang a ziemne aide teibeu cai, Ih n kaunedung de rengei nah pie dailu zie. 32Acu peu henai n kauhaudung da mie, delwe meurün na kak ga ketiak be leune nah hemeudung kak de pegiak kepungbe leune keulu. Cidung de a ziehidung da. 33A masang de ne pecai a zierang tei beu zie, nang gwang a ziehidung pie kecu dau. Hemeudung kak de pelane pegiak pung kemak be gede ga cai, nah meuründung kak de tiak kemakbe gede bam eh ada ngaulu cai, rega teu kedi gage kaidi zie.” 34Laban rangdi, “Petauda. Nang kerang de nzwa tei luzie.” 35Cipau nai Laban hemeuseudung pegiak kebam be, nah hemeupuidung pegiak tau kecube nah kedau kecu bedung, keha tau pwa kebam pelane, nah meuründung kak de ketiakbe pelane keuntsam mpetdi, delwe cidungde pe namedung ba gage pwa peu di. 36Laban langcum ne mbeu dei ge#30:36 Langcum ne mbeu dei ge: 60 mile/90 kilometer pe dade nah Jacob da de kailu. Ciu eh Jacob Laban kaune hau kebangbedung de rengei eh bamdi.
37Jacob dang mnwa kelu poplar nah almond kiak kemdiakdung nah tsingbang keda kiakdung keu lwe pegeu kesa siep gidi, delwe tsingkiak cidung de ga keha giakdung teilu. 38Pecai pa tsingkiak pa siep keludung de makaune hau dwa gade kailu, penui sak kera kegwang dui kesak kwakdung dwa gage. Penui dui sak kera kegwang dau penui kerehala kecune. 39Makau haudung tsingkiakdung dwa gade halu; nah makau haudung pe na kedau nah pegiak ketei bedung lunghlu. 40Jacob meurünna aidungde kedet tsamlu, dede penuide peu Laban kaunedung pegiak kepung nah meurün hau ketiak bedung lam nreu eh kainzeu. Iciu eh pa pe kauhau pekatei ziemne keutsam eh pielu nah Laban kaune dade keu ncüt mene keutsamlu. 41Meurün keyibedung ha kebam dau, Jacob tsingkiakdung pwa penui dwa ga dui sak kwakdung gage kaibeu, iciu eh penuide peu tsingkiakdung kakga de mciulu kerane. 42Dede makaune kemneibedung kegwang dau, pa makaune kemneibedung dwaga tsingkiakdung pwa gai ma. Cine Laban gu kaunedung mneidi, nah Jacob gu kaunedung be yi ngkieng di. 43Minabe de mahei süt petdi. Pa hekaune haudung, kilame pui nah kilame pei, nah utdung nah gadadung kekieege bamdi.
ទើបបានជ្រើសរើសហើយ៖
Kendeu 30: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.