Kendeu 29
29
Jacob Paddan-Aram ga gwangkelu
1Pecai Jacob mbeuh tet sigai eh mina naimiak kepetle deudi lambie miedi. 2Pa pie kegai dau, pa luh ga tekwa ge ngaulu, nah, ainie, cika cipau de ga meurünhau kecum ne twagwa bam. Kedanemene cipau tekwa gade penui meurün haudung de peu dui sakla, nah tekwa peu reu ga tangtsu kebam de au kedi ge. 3Meurün hau pelane cika gwang ngkwalu ge, meurün kekwame tangtsu de letlu la delwe peu meuründung de dui sakla, nah pecai tangtsu de tekwa peu reu ga pe bam gage kai dai dila. 4Jacob penui dage rangdi, “A zangmedung, nnui dai gade gwang no?” Penui keli eh, “Anui au Haran namdi gade.” 5Pa penui dage keteudi, “Nnui Nahor tsapei Laban de ci mi?” Penui keligai, “Anui pecu cibam.” 6Pa penuide rang dai eh, “Pa yibam mi?” Penui rangdi, “Pa yibam, nah, cika pielo, pe napui Rachel pe meurünhau de nzang eh gwangla da.” 7Jacob rangdi, “Ainie, cu ting baha di reu. Cu meurün haudung de gwang kera peting mereu. Nnui meurün de peu dui saklu maisia nah ngngwa mie delwe peu penuide cehei tyei cu.” 8Penui rangdi, “Anui meurün haudung de dui sak kera pwa peu gailak penui peciakne gwang kemaktane. Penui tangtsu tekwa peu reu ga kebam de kela mpet luzie, nah iciulu de anui meurün hau de peu dui sak zie.” 9Jacob penuide ngngwa marang bam kecune, Rachel pe pei meurün haudung de nzang eh gwang, kedanemene pa cidung dede pie rengei kebamne. 10Jacob pe pui heipei Laban napui Rachel, nah Laban gu meurün de ngau luge, Jacob gwang eh, tangtsu de tekwa peu gade kela mpet di, nah Laban, pe pui heipei meurün hau depeu dui sak. 11Jacob Rachel de kemam nah mrung eh hapdi. 12Jacob au Rachel dade Ih n pei kibaume, nah pa Rebekah napei lie ranglia beu. Iciu eh pa pe pei dage paubeu kera pakgwang di.
13Laban pe tipui napei Jacob ha siulu ge, pa pak pet pecu redau, pecu tuipwa lwe pecu kemam gai, nah pecu pe kilung ga ngngwa gwang. Jacob Laban dage ma aidungde pelane ranglia beu. 14Laban pedage rangdi, “Nang au a teih nah ajai kesang.” Cidau Jacob kei ge kenzwa ge peda ngngwa bamdi. 15Pecai Laban Jacob dage rangdi, “Nang a kibaume kecune n ziehi teimene a gwa tei bam eh ni? Ada ranggailo, n ziehi dai kenzwa ge luneu no?” 16Cu Laban pe napui hangna bam. Kecingbe pui zi cai Leah, nah henabe pui zi cai Rachel. 17Leah pe miak au mnie, dede Rachel au pe rehi de nah hezu de yi. 18Jacob Rachel de pe suidi, cine pa rangdi, “Ih mmi hena Rachel ziemne n gwa teizie, n napui henabe ziemne.” 19Laban rangdi, “Ih pecu ncu pwa peu kelu be yiki, Ih mi kedame de pecu pwa peu kera swade. A da bam lulo.” 20Cine Jacob mmi hena Rachel de luulu kerane bata tei; nah pe ziemne cipau tingde tingba zie kecam nage nzwa, pa pecu mrai kedine.
21Pecai Jacob Laban dage rangdi, “Anau de acu peulo, kedanemene a tingbaziedung cang dida, iciude Ih pecu a naulu kerane!” 22Cine Laban nautak ngyi ge mtei lwe heni ga mina pelane de qu hekwalu. 23Cipau ziu, Laban pe napui Leah de pwa Jacob de peu, nah Jacob pecu ngngwa henau hepei zai teidi. 24Laban pe kilapui Zilpah de pwa pe napui Leah kilapui tei kera peu. 25Tingcang cuge, ainie, pa ngngwa kebam pui au, Leah! Jacob au Laban dage rangdi, “Nang daitei aide a dage teigai lano? Ih Rachel ziemne n bata tei me ni? Nang daitei a dade heciem tei di no?” 26Laban rangdi, “Neraibe pui dwa henabe pui depeu mmeu di kera anui zai melie. 27Aipau napui nautak ngyi de teicanglu nah anui ncu kedabe pui dede peuzie, nang a ziemne mmi keda hena ge bata tei daicai.” 28Jacob cide kesamdaulu, nah Leah nautak ngyi teicanglu. Pecai Laban pe napui Rachel de pwa pe nau kera pecu pwapeu. 29Laban pe kilapui Bilhah de pwa pe napui Rachel dede pe kila tei kera pwapeu. 30Cine Jacob Rachel de de ngngwa henau hepei zai teidi, dede pa Leah swa Rachel de ku ki. Cine Jacob mmi hena Laban ta teidai.
Jacob namedung
31RAMPAUBE Leah de ku kemak ngaulu, cine pa pecu hena lunghlu kera teibeu, dede Rachel pena tei mene bamdi. 32Leah tetlak lu nah mipeina ge mnalu, nah pa pezi Reuben msiaklu. Kedanemene pa rangdi, “Kedanemene RAMPAUBE a lungrei ngau kelune; kesang cu au a nahpei acu ku zieda.” 33Pecai pa tetlak dailu nah mipeina ge mnalu. Pa rangdi, “Kedanemene RAMPAUBE acu qu kemak siulu, ciziemne pa acu mipeina aide dede peu da,” nah pa pe zi Simeon msiaklu. 34Pecai pa tetlak dailu nah mipeina ge mnalu. Pa rangdi, “Henaipia au a nahpei acu pesuiki di lubui da, kedanemene Ih pecu mipei hangcum mna beu di delu.” Cine pezi Levi lie msiaklu. 35Pa tetlak dailu nah mipeina ge mnalu. Pa rangdi, “Henaipia Ih RAMPAUBE de twa zie.” Ciziemne pa pezi Judah msiaklu; pecai pa pena lungh si tadi.#Mat. 1:2
ទើបបានជ្រើសរើសហើយ៖
Kendeu 29: NorthernZeme
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Northern Zeme Bible_Draft Version
Creative Commons License
Northern Zeme Bible (Draft Version), 2023 by Benreu Baptist Church and Bridge Connectivity Solutions Pvt. Ltd. is licensed under a Creative Commons Attribution-ShareAlike 4.0 International License. This resource is published originally on VachanOnline, a premier Scripture Engagement digital platform for Indian and South Asian Languages and made available to users via vachanonline.com website and the companion VachanGo mobile app.