Job 31
31
1Ndiyigolela finganu ndambu wundimlola mdadala,
ngotoo kumlola mdadala kwa dobukelu, dandiyiholi ha kucha dang'onji na mdadala.
2Yoyonda yagola afi amanyi kucha Chapanga daavatovi,
Chapanga muna liwovi davatovi vandu vonda yivagola findu fya wafu.
3Wuli, njifwa yikuvawona vandu vawafu ng'odu,
na danganyishilu kwa vandu yivagola ng'odu nyanyi?
4Chapanga akufiwona fyosi yifigola,
nakaka mweni akulola ndambu ya ngalilu yangu?
5Leki ndiyikala kwa kuvajanga vandu,
awu nyenda kuvajanga vandu.
6Chapanga ahighi kucha wuyidayiliwa,
mweni ndi damanyi ndivahela mbatiwa.
7Leki deha shangu silewushwa,
leki ndima yangu yilongushiwa na mesu vangu,
awu leki mawoku vangu yipighashiwa na sambi,
8topi filivi fyangu valyi vandu vengi,
na fivelekwa fyangu fitupuliwi.
9Leki ndima yangu yivayiliwa na mweni wa mundu,
awu leki nyatila mwehi wa mjofi wangu,
10topi ngudayila mwehi wangu amtelikeli mlumi wingi,
na awonji na valumi vengi.
11leki pawugola nahawu ndi livifyu likomi,
kwa sambi ayi dahighiwi.
12Livifyu lyangu lingavelili nga motu wuugwijusha na kudanganyisha,
na kunyanya tinigu findu fyangu fyosi.
13Leki, ningavakajili haki vandumindumi vangu valulumi awu vadadala,
pavayisili kung'ong'utekela fila fivagoliwili.
14topi dagoli chindu liki panyenda pawulongolu ya Chapanga?
Danyanguli chindu liki pangema ndimuwombeli figolili fyangu?
15Chapanga ndi yanumbili nenga na vandumindumi vangu,
mweni ndi yatulumbili twavosi
16Leki ndimkaja kamu chadayila mgaju,
na leki ndivaleka vangalimlyangu vayikali ngajila shuvililu.
17awu ndilya fivili fyangu weka hela,
ngajila kulya na vangalekwa.
18Lakini kukandila usongolu wangu ndivalela kucha tati wawu,
na nenga kukandila pang'onikili ndivalongosha vangalimlyangu.
19Leki ndamuwonili mundu akusova na lupepu kwa kupota yingwa,
awu mgaju yavelihela fwali ya kufwala,
20nenga ndimgayila fwali ya wagi wa fungami yimupi luhutuhutu,
na mweni anganumbili.
21lakini ndimuwonela ha ngalekwa kuchitemela,
kunu pamanya kucha chitemela dachindangi nenga,
22Chapanga angandovili leki findu afi fya nakaka ha,
dajumili chitovi chindiyilata kupata.
23Kwanongwa ngutila kuhighiwa na Chapanga,
kwa ukomi waki ndaweshili ha kugola chindu.
24Lakini shuvililu yangu ndiyivika mchumang'adu ha,
awu ndiyiwombela chumang'andu nofu, yuwi ndi luviwu lwangu.
25Leki ningasekilelili kwanongwa ya ulundamali wangu,
awu kwidumbila fila fimbata kufuma muchichuku cha mawoku vangu.
26Leki ndalitundamilili ha lijuva paling'alika,
awu mwesi pawulangasha muuvayisi waki,
27kunu ndima yangu kwa chifisu yikudayila kufitundamila,
ngunonela mawoku vangu kwa kufitundundamilu.
28leki ningagolili nahau wungavelili uvifyi na ningadayiliwili kuhighiwa,
nongwa ningavelili mdesi kwa Chapanga yavelili kumbindi.
29Leki, ndasekililili kudanganyika kwa chimdwama wangu,
awu kusekilela njifwa payimuwonili,
30ndajumishili ha mlomu wangu agoli wafu,
kwa kumlapila ili asovi.
31Vandumindumi vangu vonda vakudeta lipala,
ghani yayikutili ng'odu nyama yivelili munyumba yangu.
32Kwahela muhenja yawonjili panji ya nyumba yangu,
vahenja ndavalekili ha vawonji panji.
33Wuli, fifa vifyu shangu nga vandu vengi?
Wuli, ndalemili kudeta sambi shangu?
34Ndila kamu ha kuwoloka palipinga lya vandu,
mbaka nyamala jii na kwitatila munyumba,
na kutila chipwembwi na kubedaliwa na vandu.
35Leki kungavelili na mundu wa kumbikanisha!
Nguwilapachila chidetili ndi nakaka
chidetili Chapanga anyanguli.
Leki fivadeta vafimdwana vangu fingayandikiwili.
36Nakaka ningavafwalili mumakombi,
ningayifwalili pamutwi ngimu likokoma.
37Ningamuwombilili Chapanga kila chindu chigolili,
ningamuyendilili kucha mwana wa mutwa.
38Leki chitava chilima mboka,
nakaka chitava cheni chihighi nenga leki gola naha,
39leki ndilya fivelekwa fyaki ngajila kuhomba,
awu kuvawulagha yivavelili na fitava,
40topi misomi yimeli badili ya nganu,
na miwuwuti yimeli badili ya upemba.
Filongu fya Ayubu fipelela apa.
ទើបបានជ្រើសរើសហើយ៖
Job 31: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.